Le Toetū o Iesu—Ua Iloiloina Nei

“Ou te taʻutino atu le mea moni faapea, e ui tatou te matuā mautinoa sa soifua Iesu . . . , ae tatou te lē mafai ona faapea atu ma lena lava mautinoa, tatou te iloa sa toe faatūina mai o Ia e le Atua mai le oti.” O le faamatalaga lena a le tagata sili ona maualuga i le Lotu Egelani, le Akiepikopō o Canterbury.

SA LEʻI iai se masalosaloga faapena o le aposetolo Kerisiano o Paulo. I le mataupu e 15 o lana uluaʻi tusi faagaeeina i uso Kerisiano i Korinito anamua, na tusi ai Paulo e faapea: “Auā na ou tuuina atu ia te outou mea muamua, o mea foi ia na ou maua foi e aʻu; na maliu Keriso mo a tatou agasala, pei ona tusia; na tanu foi o ia, ma toe tu mai i le aso tolu, pei o upu ua i Tusi.”—1 Korinito 15:3, 4 LF.

O le faatuatua i le toetū o Iesu Keriso na uunaʻia ai ona soo e talaʻi le tala lelei i Eleni atoa ai ma Roma—“i tagata uma lava i le lalolagi.” (Kolose 1:23) O le mea moni lava, o le toetū o Iesu o le faavae mautū lea o le faatuatuaga faa-Kerisiano.

Ae peitaʻi, e mai lava i le amataga, sa feagai ai le toetū o Iesu ma masalosaloga ma le lē talitonuina. I le manatu o tagata Iutaia lautele, o se upuvale mo soo o Iesu le faapea mai, o lenei tagata na faasatauroina o ia o le Mesia. E lē gata i lea, i le toʻatele o tagata Eleni atamamai, sa avea le talitonuga i le toetū o se mea e inosia, ona o lo latou talitonuga i le ola pea o le solu. —Galuega 17:32-34

Le ʻAumasalosalo i Aso Nei

I tausaga talu ai nei, o nisi o tagata atamamai na faapea mai o latou o Kerisiano, na lomiaina ni tusi ma mataupu e faalēaogāina ai le toetū o Iesu faapea, o se mea na fafau aʻe e mafaufauga ma ua amataina ai se finauga aasa e uiga i lea mataupu. I la latou suʻesuʻega mo “le tagata taʻutaʻua i talafaasolopito o Iesu,” ua finau mai ai ē atamamai eseese e faapea, o faamaumauga a Evagelia i le tuugamau na avanoa ma le vaaia o Iesu ina ua mavae lona toetū, e mautinoa lava o se talafatu, na fatuina ae ua leva lena ona mavae lona maliu, ina ia lagolagoina ai le manatu e faatatau i lona mana faalelagi.

Mo se faataʻitaʻiga, seʻi tagaʻi i le manatu o le tagata Siamani atamai o Gerd Lüdemann, o se polofesa o le Feagaiga Fou ma o ia foʻi o le tusitala o le tusi What Really Happened to Jesus—A Historical Approach to the Resurrection. Na ia finau mai e faapea, o le toetū o Iesu o “se manatu e lē faavaea” lea e tatau ona lafoaʻia e so o se tasi o loo talitonu i se “vaaiga faasaienisi o le lalolagi.”

Na faamautūina e polofesa Lüdemann le manatu faapea, o le Keriso na toe faatūina aʻe lea na  faaali i le aposetolo o Peteru, o se faaaliga na māfua mai i le soona mafatia ma faalogona agasala o Peteru ona o lona faafitia o Iesu. E tusa ai foʻi ma le faamatalaga a Lüdemann, o le faaali atu o Iesu i tagata talitonu e silia ma le 500 i se tasi o taimi, o se tulaga o le “lofitūina i lagona ootia.” (1 Korinito 15:5, 6) I sona aotelega, o le toʻatele o tagata atamamai ua latou suivaia faamatalaga a le Tusi Paia e uiga ia Iesu na toe faatūina mai e avea ma faasologa o ni mea na tutupu sa faamatalaina sesē, lea na avatu ai i le ʻausoo, se lagona faafouina o le mautinoa faaleagaga i le tagata lava ia ma le maelega faamisionare.

O le mea moni, o le toʻatele lava e itiiti so latou naunau i finauga a le ʻauatamamai. Peitaʻi, o le talanoaina o le toetū o Iesu e tatau ona tatou manatu mamafa uma lava i ai. Aiseā? Talu ai, afai e leʻi toetū mai o ia, ua faavaeina la le Faa-Kerisiano i se faavae sesē. I le isi itu, afai o le toetū o Iesu o se mea moni o le talafaasolopito, ua faavaeina la le Faa-Kerisiano i mea moni. I na tulaga uma, o le a lē gata ina faamamaluina ai fetalaiga a Keriso e uiga ia te ia lava, ae o le a faapena foʻi ma ana folafolaga. E lē gata i lea, afai e iai se toetū, o le a lē avea ai la le oti o se manumalo ae o se fili e mafai ona faatoʻilaloina. —1 Korinito 15:55.

[Faamatalaga i Ata i le itulau 3]

Mai le Self-Pronouncing Edition of the Holy Bible, o loo iai le King James ma Revised version