Ia Tumau ma le Mautinoa Atoatoa

Manumalo Mai Sauāga a le ʻAu Nasi Ē na Tausisi i le Faamaoni

“LOʻU atalii e, ia poto oe, ma e faafiafia loʻu loto; ona ou mau tali ai lea i lē faifai mai.” (Faataoto 27:11) O lenei olega māfana ua faaalia ai e faapea, ua mafai e foafoaga faiola atamamai a le Atua ona faafiafiaina le finagalo o Ieova ona o lo latou tumau ma le faamaoni ia te ia. (Sefanaia 3:17) Ae peitaʻi, ua maumauaʻi Satani o lē o loo faifai mai ina ia lepetia le faamaoni o i latou o loo auauna ia Ieova.—Iopu 1:10, 11.

Aemaise lava talu mai le amataga o le senituri lona 20 ina ua lafoina ifo o ia mai le lagi i le lalolagi, na faaalia ai e Satani le matuā ita tele i tagata o Ieova. (Faaaliga 12:10, 12) Ae ui i lea, o Kerisiano moni sa ‘tumau ma le mautinoa atoatoa’ ma tausisia pea lo latou faamaoni i le Atua. (Kolose 4:12) Seʻi o tatou talanoaina puupuu se tasi o faaaʻoaʻoga mataʻina o lena tausisi i le faamaoni—o Molimau a Ieova i Siamani a o lumanaʻi ma a o faagasolo le Taua Lona Lua a le Lalolagi.

Galuega Maelega na Iʻu ai Ina Tofotofoina le Faamaoni

I tausaga mai le 1920 i le 1929 ma tausaga amata mai le 1930, na tufatufaina atu ai e Bibelforscher (Tagata Aʻoga o le Tusi Paia), e pei ona lauiloa ai Molimau a Ieova i lena taimi i Siamani, ni aofaʻiga tele o lomiga faale-Tusi Paia. I le vā o le 1919 ma le 1933, i se fua faatatau na latou tuuina atu ai e tusa ma le valu ia tusi, tamaʻitusi, po o mekasini i aiga taʻitasi i Siamani.

I lena taimi, sa avea ai Siamani ma se tasi o atunuu sa sili ona toʻatele ai soo faauuina o Keriso. O le mea moni, e mai le 83,941 tagata i le lalolagi atoa na taumamafa i le areto ma le uaina o le Talisuaga Afiafi a le Alii i le 1933, e toetoe lava o le 30 pasene o i latou e nonofo i Siamani. E leʻi umi lava se taimi, ae tofo loa nei Molimau i Siamani i ni tofotofoga sauā o lo latou faamaoni. (Faaaliga 12:17; 14:12) O le faateʻaina mai i galuega, osofaʻia o o latou fale, ma le tutulieseina o tamaiti mai i aʻoga, sa vave lava ona faatetele ma oo atu ai ina tasasaina, tapuʻe faapagota ma faafalepuipuiina. (Ata 1) Mulimuli ane, i tausaga ia na taʻitaʻiina atu ai i le Taua Lona Lua a le Lalolagi, o le 5 i le 10 pasene o i latou uma na taofia i nofoaga o faasalaga, o Molimau a Ieova.

Le Pogai na Sauāina ai e le ʻAu Nasi Molimau

Aiseā na tupu ai le ita o le pulega faa-Nasi i Molimau a Ieova? I lana tusi Hitler—1889-1936: Hubris, na mātauina ai e le polofesa o le talafaasolopito o Ian Kershaw e faapea, na avea Molimau ma taulaʻiga o sauāga talu ai sa lē mafai ona latou “lolo atu i faatonuga uma a le pulega faa-Nasi.”

Ua faamatala mai e le tusi Betrayal—German Churches and the Holocaust, na toe teuteuina e le polofesa o le talafaasolopito o Robert P. Ericksen ma le polofesa o suʻesuʻega e faatatau i tagata Siū, o Susannah Heschel e faapea o Molimau, “sa  lē mafai ona faia se sao i faiga sauā po o gaoioiga malolosi faavaegaʻau. . . . Sa talitonu Molimau i le solitū mai i aafiaga faapolotiki, o lona uiga sa latou lē palota mo Hitila pe fāʻalo faa-Nasi ia te ia.” Ua faaopoopo mai lena lava tusi, o le mea lenei na faapogai ai le ita o le ʻau Nasi ma oo ai i se tulaga na āfaina ai Molimau ona sa lē taliaina e le “Pulega Tautalatasi le lē gauaʻi atu.”

O se Tetee i le Lalolagi Aoao ma se Osofaʻiga Mataʻutia

Ia Fepuari 9, 1934, e ala i se avefeʻau faapitoa na aauina atu ai e Joseph F. Rutherford, o lē sa avea ma taʻimua o le galuega i lena taimi ia Hitila se tusi e faaalia ai le lē malie ona o faiga sauā a le ʻau Nasi. (Ata 2) Ia Oketopa 7, 1934, e sosoo ma le tusi a Rutherford, na aauina atu ai e Molimau a Ieova mai i atunuu e 50 e aofia ai ma Siamani ni tusi ma ni feʻau faauaealesi se 20,000 ia Hitila e faaalia ai lo latou lē malilie.

Na tali mai le ʻau Nasi i le faateteleina o a latou sauāga. Ia Aperila 1, 1935, na faasāina ai Molimau i le atunuu atoa. Ia Aokuso 28, 1936, na faia ai e le Gestapo po o leoleo nanā se osofaʻiga mataʻutia ia i latou. Ae peitaʻi, ua taʻua e le tusi Betrayal—German Churches and the Holocaust e faapea, “sa faaauau pea e Molimau ona tufatufa atu tamaʻi pepa ma tausisia pea lo latou faamaoni.”

Mo se faaaʻoaʻoga, i luma lava o mata o le Gestapo, ia Tesema 12, 1936, na tufatufaina atu ai e ni Molimau e 3,500 le faitau sefulu afe o kopi na lomia o iʻugafono e faatatau i faiga leaga na mafatia ai i latou. E tusa ai ma lenei tauiviga, ua lipotia mai e Le Olomatamata e faapea: “Sa avea o se manumalo tele ma o se tui ogaoga i le fili, ma o se olioli e lē mafaamatalaina i ē galulue faamaoni.”—Roma 9:17.

Ua Lē Taulau Sauāga!

Sa faaauau le saʻiliga a le ʻau Nasi mo Molimau a Ieova. E oo ane i le 1939, ua oo atu i le ono afe i latou na faafalepuipuiina, ma le faitau afe na aauina atu i nofoaga o faasalaga. (Ata 3) O le ā le tulaga na iai i le iʻuga o le Taua Lona Lua a le Lalolagi? O le 2,000 o Molimau na faafalepuipuiina na maliliu, ae sili atu i le toʻa 250 na maliliu e ala i le faasalaina i le oti. Ae peitaʻi, na tusia e Polofesa Ericksen ma Heschel e faapea, “Sa tele lava ina pipiimau Molimau a Ieova i lo latou faatuatua i le feagai ai ma faalavelave.” O le iʻuga, ina ua paʻū le faiga malo a Hitila, e sili atu i le toʻaafe Molimau na ō ese ma le manumalo mai i na nofoaga. —Ata 4; Galuega 5:38, 39; Roma 8:35-37.

O le ā na maua ai e tagata o Ieova le malosi e tumau ai i sauāga? Ua faamatala mai e Adolphe Arnold o lē na sao mai i nofoaga o faasalaga e faapea: “E ui lava ina e matuā vaivai, e silafia oe e Ieova, e na te silafia mea o loo e mafatia ai ma e foaʻiina atu ia te oe le malosi manaʻomia e foʻia ai lea tulaga ma tumau ai i le faamaoni. E lē puupuu le aao o Ieova.”

Maʻeu le fetaui lelei o le faatatauina o upu a le perofeta o Sefanaia i na Kerisiano faamaoni! Sa ia faalauiloa mai e faapea: “O Ieova lou Atua i totonu ia te oe o lē malosi ia; na te faaolaina; e olioli o ia ia te oe ma le fiafia.” (Sefanaia 3:17) Tau ina ia faataʻitaʻi uma tagata tapuaʻi faamaoni o le Atua moni i aso nei, i le faatuatua o na Molimau faamaoni o ē na tausisia le faamaoni i le feagai ai ma sauāga a le ʻau Nasi ma faapea ona faafiafiaina ai le finagalo o Ieova.—Filipi 1:12-14.

[Faamatalaga i Ata i le itulau 8]

Państwowe Muzeum Oświȩcim-Brzezinka, courtesy of the USHMM Photo Archives