E Mafai Ona Fai mo Oe Faamanuiaga o le Malo

SA MAFAI ona tautala le aposetolo o Paulo i nisi o gagana aloaʻia i ona aso. Sa ia ausia le maualuga tau aʻoaʻoga e tutusa atu i aʻoaʻoga i se iunivesite i aso nei. Sa ia fiafia i itu lelei atoa ma aiā i le avea ai ma tagatanuu o Roma. (Galuega 21:37-40; 22:3, 28) Sa ono mafai e nei agavaa ona avea ai o ia o sē e mauʻoa toe taʻutaʻua. Ae ui i lea, na ia faapea mai: “O mea uma sa aoga ia te au, ua ou manatu ua le aoga ia mea ona o Keriso . . . ma ou manatu o otaota lava ia mea, ina ia ou maua Keriso.” (Filipi 3:7, 8) Aiseā na fai ai e Paulo lena faaupuga?

Ona sa lauiloa muamua o ia o Saulo o Taso ma o sē sa sauāina i latou ‘sa iai i le Ala,’ ae na avea Paulo o sē e talitonu ina ua uma ona ia mauaina se faaaliga o Iesu ua toe faatūina mai ma ua faamamaluina. (Galuega 9:1-19, LF) Ia Paulo lava ia, o lenei mea na tupu i le ala i Tamaseko sa matuā faatalitonuina ai lava o ia e aunoa ma se masalosalo e faapea o Iesu le Mesia folafolaina, po o le Keriso, o lē o le a avea i le lumanaʻi ma pule o le Malo ua folafolaina mai. Sa aumaia ai foʻi se suiga mataʻina i le soifuaga o Paulo, e pei ona faailoa mai i lana faamatalaga malosi e pei ona taʻua i luga. I nisi o faaupuga, i le moni ma le lotofaamaoni, na salamō ai Paulo.—Kalatia 1:13-16.

I le Tusi Paia, o le veape lea o le “salamō” e masani ona  faaliliu mai i le upu Eleni lea o lona uiga moni lava o le “iloa mulimuli ane,” e ese mai i le “muaʻi iloa.” O lea la, o le salamō e aofia ai se suiga i le mafaufau, o uiga, po o fuafuaga a se tasi, o le teea o ona uluaʻi ala ona ua lē talafeagai ai. (Galuega 3:19; Faaaliga 2:5) Ia Paulo lava ia, e leʻi manatu i le mea matuā tāua lava lea na tupu i le ala i Tamaseko e faapea ua na o se mea e faagaeetia ai faalogona, ia pe faapea foʻi o se faiga faalelotu e mafai lava ona tupu. Ia te ia, o se fafagu mai i le mea moni e faapea, o ona ala sa ola muamua ai, i le lē iloa o Keriso, e lē aogā. Sa ia iloatino foʻi e faapea, ina ia maua aogā mai i lona poto lea ua faatoʻā maua e uiga ia Keriso, e tatau ona ia faia se mea ina ia faasaʻo ai lona olaga.—Roma 2:4; Efeso 4:24.

O se Suiga na Aumaia ai Faamanuiaga

I le taimi muamua, o le iloa o Paulo e faatatau i le Atua na maua mai i le lotu mavae a le ʻau Faresaio, lea sa muaʻi avea ai o ia ma vaega. O a latou talitonuga sa aofia ai le tele o filosofia ma uputuu faaletagata. Ona o faiga faaituʻau a lotu, sa faatulaga sesē ai gaoioiga ma le maelega o Paulo. E ui lava sa ia manatu o loo auauna i le Atua, ae o le mea moni sa ia faasagatau ia te ia.—Filipi 3:5, 6.

Ina ua ia mauaina le poto saʻo e uiga i le Keriso ma lana vaega i fuafuaga a le Atua, sa iloa ai e Paulo o loo fesagaʻi o ia ma se filifiliga: Pe o le a tumau pea ona avea o ia ma se Faresaio ma faaauau ona fiafia ai i tofiga ma le faamamaluina, po o le a suia lona olaga ma amata ona faia po o le ā lava e manaʻomia ina ia maua ai le faamaoniga a le Atua? O le mea e fiafia ai, sa faia e Paulo le filifiliga saʻo, auā na ia faapea mai: “Ou te le mā i le tala lelei ia Keriso; auā o le mana lava lea o le Atua e ola ai i latou uma o e faatuatua, e muamua le Iutaia, atoa ma le Eleni.” (Roma 1:16) Na avea Paulo o sē e talaʻia ma le maelega le tala lelei e faatatau i le Keriso ma le Malo.

I ni tausaga se tele mulimuli ane, na taʻu atu ai e Paulo i ana aumea Kerisiano e faapea: “Ou te le manatu ua ou maua, a o le mea e tasi ou te faia, ou te faagalogalo i mea ua tuanaʻi, ou te momoʻe punou aʻi foi i mea o lumanai, ou te tausisi atu i le faailoga, ia maua ai le taui na valaauina ai aʻu mai lugā e le Atua ia Keriso Iesu.” (Filipi 3:13, 14) Sa maua e Paulo faamanuiaga mai i le tala lelei ona sa ia lotomalie e lafoaʻi mea sa tataʻieseina ai o ia mai i le Atua, ma sa ia tuliloaina ma le lotoatoa ia sini sa talafeagai ma fuafuaga a le Atua.

O le ā o le a E Faia?

Atonu faatoʻā e faalogo talu ai nei i le tala lelei o le Malo. Pe e faaoso naunau ia te oe le faamoemoe o le ola e faavavau i se parataiso lelei atoatoa? E talafeagai pe afai o lou lagona lena, auā o i tatou uma lava na tatou fananau mai ma le faanaunauga e fia ola ma ia olioli i se olaga filemu ma le saogalemu. Ua faailoa mai e le Tusi Paia e faapea ua tuuina e le “faavavau,” (NW) i o tatou loto. (Failauga 3:11) O lea la, e faalenatura mo i tatou lo tatou faamoemoe mo le taimi o le a mafai ai e tagata ona ola e faavavau i le filemu ma le fiafia. Ma o le mea lena o loo ofoina mai e le tala lelei o le Malo.

Peitaʻi, ina ia avea lena faamoemoe o se mea moni, e manaʻomia ona e suʻesuʻe ma ia iloa po o le ā o loo faatatau i ai le tala lelei. Na faatonu mai le aposetolo o Paulo: “Ia [e] suesue pe se a le finagalo o le Atua, o mea ua lelei, ma le malie, ma le atoatoa.” (Roma 12:2) O lea la, i le pei o Paulo, afai e te maua le poto ma le malamalamaga, e iai se filifiliga e ao ona e faia.

I le isi itu, atonu o iai ni ou lava talitonuga e faatatau i lou lumanaʻi. Manatua sa iai lagona o Saulo lava ia e faatatau i le finagalo o le Atua a o leʻi avea o ia ma Paulo le aposetolo. Ae na i lo o le faatalitalia o se faaaliga faavavega mai i le Atua, aiseā e lē tagaʻi totoʻa ai ma iloilo e aunoa ma le faaituʻau o le mataupu? Fesili ifo ia te oe lava: ‘Po ua ou iloa moni ea le finagalo o le Atua e faatatau i le fanau a tagata ma le lalolagi? O ā ni faamaoniga ou te ofoina atu e faamautūina ai oʻu talitonuga? Pe e tumau pea le talafeagai o oʻu manatu pe a faatusatusa i le malamalamaga o le Afioga a le Atua, le Tusi Paia?’ O se faiga talafeagai le iloiloina o ou talitonuga faalelotu i le auala lenei. O le mea moni, e ao ona e manaʻo e faia faapea, auā ua  uunaʻia i tatou e le Tusi Paia ina ia: “Tofotofo [“faamautinoa,” NW] i mea uma lava, ia taofi mau i le mea lelei.” (1 Tesalonia 5:21) Pe e lē moni ea, o le faamaoniga a le Atua e sili ona tāua?—Ioane 17:3; 1 Timoteo 2:3, 4.

E ono folafola mai ia i tatou e taʻitaʻi lotu se lumanaʻi e faavavau. Peitaʻi afai e lē faavaea lena lumanaʻi i aʻoaʻoga a le Tusi Paia, o le a lē fesoasoani la ia i tatou ina ia mauaina faamanuiaga o le Malo o le Atua. I lana Lauga taʻutaʻua i le Mauga, sa lapataʻia malosi mai ai e Iesu e faapea: “E le sao atu i le malo o le lagi i latou uma o e fai mai ia te au, Le Alii e, le Alii e, na o le na te faia le finagalo o loʻu Tamā o i le lagi.”—Mataio 7:21.

Mātau mai sa faamamafa e Iesu le faia o le finagalo o lona Tamā e avea o se mea e manaʻomia mo le mauaina o faamanuiaga o le Malo o le Atua. I nisi faaupuga, e lē faapea o mea e ono foliga mai e faaleatua o le a mautinoa le faamaonia e le Atua. Auā, na fetalai atili Iesu: “E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou taʻutino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.” (Mataio 7:22, 23) E manino mai la, o le mea tāua o lo tatou faamautinoaina lea ua tatou malamalama lelei po o le ā moni lava le tala lelei o le Malo ma ia gaoioi e talafeagai ai—Mataio 7:24, 25.

E Maua le Fesoasoani

Ua sili atu nei i le 100 tausaga, o talaʻia e Molimau a Ieova le tala lelei o le Malo o le Atua. E ala i lomiga atoa ma ā latou faamatalaga, o loo latou fesoasoani atu ai i tagata i le lalolagi atoa ina ia maua le poto saʻo e uiga i le Malo, o faamanuiaga o le a ia aumaia, ma le mea e ao ona fai e se tasi ina ia maua ai na faamanuiaga.

Matou te faalaeiauina oe ina ia tali atu i le feʻau o loo talaʻia e Molimau a Ieova. O le taliaina ma gaoioi e tusa ai ma le tala lelei, o le a mafai ai ona e mauaina faamanuiaga sili, e lē gata i le taimi nei ae faapena foʻi i le lumanaʻi pe a pulea e le Malo o le Atua le lalolagi atoa.—1 Timoteo 4:8.

Gaoioi nei loa, auā ua i faitotoʻa faamanuiaga o le Malo o le Atua!

[Ata i le itulau 7]

E ala i lomiga atoa ma a latou faamatalaga, o loo talaʻia e Molimau a Ieova le tala lelei o le Malo o le Atua