E Manumalo le Faa-Kerisiano Moni!
E Manumalo le Faa-Kerisiano Moni!
“Ua matuā tupu tele . . . ma ua manumalo le afioga a [Ieova].”—GALUEGA 19:20.
1. Faamatala mai le tupu aʻe o le Faa-Kerisiano i le faagasologa o le uluaʻi senituri.
I LE uunaʻia malosi e le mana o le agaga paia, na folafola atu ai e uluaʻi Kerisiano le afioga a le Atua i se maelega sa lē mafai ona tineia. Na tusi se alii tusitala o talafaasolopito e faapea: “Sa matuā mataʻina le televave o le sosolo atu o le Faa-Kerisiano i le emepaea o Roma. E oo ane i le tausaga e 100, ua toetoe lava tofu itumalo uma sa tuaoi i le Metitirani, ma se vaega o Kerisiano ua iai.”
2. Sa faapefea ona taumafai Satani e tetee mai i le tala lelei, ma na faapefea ona muaʻi faailoa mai lenei mea?
2 Sa lē mafai e Satani le Tiapolo ona ia toe taofiofia uluaʻi Kerisiano. Na i lo o lea, sa ia taumafai e tetee mai le aafiaga o le tala lelei e ala i se isi auala—le faaaposetasi. Na valoia mai e Iesu lenei tuputupu aʻe i lana faataoto i saito ma titania. (Mataio 13:24-30, 36-43) Na lapataʻi mai foʻi le aposetolo o Peteru e faapea, o le a aliaʻe aʻoaʻo pepelo mai totonu o le faapotopotoga, ma faatupuina vaevaega e fano ai. (2 Peteru 2:1-3) Sa faapena foʻi, ona lapataʻi faapitoa mai le aposetolo o Paulo e faapea, o le a muamua mai le faaaposetasi po o le teteʻa ese, a o leʻi oo mai le aso o Ieova.—2 Tesalonia 2:1-3.
3. O le ā na tupu ina ua maliliu atu le ʻauaposetolo?
3 Ina ua maliliu atu le ʻauaposetolo, na oo ina lilofia ai le tāua o le tala lelei, e aʻoaʻoga ma filosofia faapaupau. E pei ona muaʻi taʻu mai, sa mimilosesē ma faaoonaina e aʻoaʻo pepelo le feʻau mamā o le upu moni. Na faasolosolo mālie lava ona lilofia le Faa-Kerisiano moni e se taufaasesē ua taʻua o Kerisinetoma. Na tulaʻi mai se vasega o taʻitaʻi lotu ia na taumafai e taofiofi le Tusi Paia mai le mauaina e tagata lautele. E ui sa faatoʻateleina le aofaʻi o ē na latou taʻua i latou lava o ni Kerisiano, peitaʻi sa leʻi mamā la latou tapuaʻiga. Sa tuputupu aʻe Kerisinetoma i atunuu ma oganuu ma avea o se faatulagaga malosi ma o se taaʻiga maumauaʻi i aganuu a tagata o atunuu i Sisifo, peitaʻi sa leʻi ia i latou le faamanuiaga a le Atua, po o lona agaga.
4. Aiseā na lē manuia ai le faufauga a Satani ina ia talepeina le fuafuaga a le Atua?
4 Peitaʻi ane, sa matuā lē taulau lava le faufauga a Satani ina ia talepeina le fuafuaga a le Atua. E oo lava i le vaitaimi sili ona mataʻutia o le faaaposetasi, sa faaauau pea ona olaola ai le Faa-Kerisiano moni i nisi. Sa matuā faaeteete lava tane na latou toe siiina le Tusi Paia, a o latou taumafai e faia i se tulaga saʻo aʻiaʻi. O lea, sa tumau ai pea ona atoatoa le Tusi Paia, e ui lava sa faauigasesēina le feʻau o iai e le toʻatele o tagata na faapea mai o loo ia i latou le pule e aʻoaʻo atu ai. I le faagasologa o senituri, na lototetele ai na tagata atamamai faapitoa e pei o Ierome ma Tiniteli e faaliliu ma tufatufa atu le Afioga a le Atua. E faitau miliona tagata na latou faamasani i le Tusi Paia ma latou faia se ituaiga o Faa-Kerisiano, e ui lava e lē moni lena Faa-Kerisiano.
5. O le ā na muaʻi taʻu mai e le perofeta o Tanielu e tusa ai o le “poto saʻo”?
5 Mulimuli ane, e pei ona valoia mai i le tusi o Tanielu, ‘na oo ina tupu tele le poto saʻo.’ Ua tupu lenei mea i “le taimi o le iʻuga”—le taimi lea o loo tatou ola ai nei. (Tanielu 12:4, NW) Ua taʻitaʻia e le agaga paia ē e alolofa i le upu moni i le lalolagi aoao ina ia latou maua le poto saʻo e uiga i le Atua moni ma lana fuafuaga. E oo lava ina ua mavae le tele o senituri o aʻoaʻoga faaaposetate, o loo manumalo pea le afioga a le Atua! I aso nei, ua folafola atu ai le tala lelei i so o se vaipanoa, ma faasino atu ai i tagata le faamoemoe o se lalolagi fou matagofie. (Salamo 37:11) Seʻi o tatou iloiloina nei lenei tupu aʻe faaonapōnei o le afioga a le Atua.
Le Tupu Aʻe o le Afioga i Aso Nei
6. E oo ane i le tausaga e 1914, o ā upu moni ua malamalama ai Tagata Aʻoga o le Tusi Paia?
6 I le faaiʻuiʻuga o le senituri lona 19, sa faamalosia ai e le upu moni o le Tusi Paia sina vaega toʻaitiiti o Tagata Aʻoga o le Tusi Paia, lea ua lauiloa i aso nei o Molimau a Ieova. E oo ane i le 1914, ua matuā olaola lava le Tusi Paia ia i latou. Sa latou malamalama i upu moni ofoofogia e faatatau i fuafuaga a le Atua. Sa uunaʻia loloto i latou i le alofa o Ieova lea na auina mai ai lona Alo i le lalolagi, ma tatala ai le ala i le ola e faavavau. Na oo ai foʻi ina latou iloa ma talisapaia le suafa o le Atua ma ona uiga totino. E lē gata i lea, sa latou iloa lelei ua faaiʻuina “taimi o Nuu Ese,” e faailoa mai ai ua latalata le taimi e aumaia ai e le pulega a le Malo o le Atua faamanuiaga mo le fanau a tagata. (Luka 21:24, King James Version) Maʻeu se tala lelei faamamaluina! O nei upu moni malolosi sa tatau ona tufa atu i tagata uma, i nofoaga uma. Sa lamatia ola!
7. Ua faapefea ona manumalo le upu moni o le Tusi Paia i ona pō nei?
7 Sa faamanuia mai Ieova i lena vaega toʻaitiiti o Kerisiano faauuagagaina. I aso nei, ua silia i le ono miliona le aofaʻiga o i latou ua taliaina le Faa-Kerisiano moni. Ua salalau atu foʻi le afioga a le Atua i oganuu ma atunuu, auā o lea ua iai Molimau a Ieova i atunuu e 235. E lē gata i lea, ua matuā malosi le upu moni o le Tusi Paia, o loo manumalo mai i toʻatugā uma faalotu ma isi lava vala. O lenei galuega talaʻi i le lalolagi atoa ua atili ai ona faamausalīina le faamaoniga e faapea, ua umia nei e Iesu le pule o le Malo.—Mataio 24:3, 14.
8. O le ā ua fai mai ai nisi e faatatau i le tupu aʻe o Molimau a Ieova?
8 E pei lava ona faia e tusitala o talafaasolopito ni a latou faamatalaga i le tupu aʻe mataʻina o le Faa-Kerisiano i le uluaʻi senituri, ua faapena foʻi ona toʻatele tagata atamamai faapitoa ua fai mai o latou manatu i le tupu aʻe o tagata o Ieova i ona pō nei. I le Iunaite Setete, na tusi faatasi mai ai e ni tagata atamamai faapitoa sa la faamatalaga e faapea: “I le 75 tausaga ua mavae atu, sa matuā uigaese le tuputupu aʻe o Molimau a Ieova . . . ma o le tulaga lena o loo iai i le lalolagi atoa.” E taʻua e se tasi mekasini mai Aferika i Sasaʻe Molimau e faapea, “o se tasi o lotu ua sili ona saoasaoa lona tuputupu aʻe i le lalolagi, ma sili ona faaaloalogia i le tulaga faava-o-malo ona o lona pipii atoatoa atu i aʻoaʻoga faale-Tusi Paia.” O loo taʻua foʻi e se mekasini mo talitonuga a le Katoliko sa lomia i Europa, “le tuputupu aʻe ofoofogia o Molimau a Ieova.” O le ā ua māfua ai lenei tupu aʻe?
O Loo Galue le Agaga Paia i Aso Nei
9. (a) O le ā se māfuaaga autū o loo manumalo ai pea le afioga a le Atua i aso nei? (e) E faapefea ona tosina mai e Ieova tagata ia te ia?
9 O se māfuaaga autū o loo manumalo ai pea le afioga a le Atua i aso nei, ona o loo galue malosi le agaga o Ieova, e pei lava ona sa galue i le uluaʻi senituri. Na fetalai Iesu: “E le mafai se tasi ona sau ia te au, pe a le tosina mai e le Tamā ua auina mai aʻu.” (Ioane 6:44) O nei upu e faaalia ai le gaoioi ma le alofa o le Atua ina ia faatosina mai i latou o ē ua saunia lelei o latou loto, ma pāʻia ai o latou loto. E ala i le galuega talaʻi a ana Molimau, ua tosina mai ai e Ieova “o mea ua manaomia e nuu uma”—o tagata agamalu, e pei ni mamoe o loo i le lalolagi, ina ia latou tapuaʻi atu ia te ia.—Hakai 2:6, 7.
10. O ā ituaiga o tagata ua tali mai i le afioga a le Atua?
10 Ua foaʻi mai e le agaga paia le malosi i tagata o le Atua e faaoo atu ai le afioga a le Atua i tuluʻiga uma o le lalolagi; ua uunaʻia ai foʻi tagata o ituaiga uma ina ia tali atu i le tala lelei. O le mea moni, o i latou ua taliaina le afioga a le Atua e mai “ituaiga uma, ma gagana eseese, ma nuu, atoa ma atunuu.” (Faaaliga 5:9; 7:9, 10) O isi e mauʻoa, o isi e matitiva, o isi sa maualuluga a latou aʻoaʻoga a o isi foʻi e leʻi aʻoʻoga. O nisi na latou talia le afioga a le Atua a o fesagaʻi ma taua ma sauāga ogaoga, a o isi na latou talia i taimi o le filemu ma le sologa manuia. Mai i ituaiga eseese o faiga malo, o agaifanua uma, mai nofoaga o faasalaga mamafa e oo atu i maota o tupu, ua talileleia ai e tane ma fafine le tala lelei.
11. E faapefea ona galue le agaga paia i olaga o tagata o le Atua, ma o le ā le eseesega tele ua manino mai?
11 E ui lava i eseesega tetele i tagata o le Atua, ae o loo latou nonofo faatasi pea ma le autasi. (Salamo 133:1-3) Ua atili faamaonia ai lava, o loo galue le agaga paia i olaga o i latou o loo auauna i le Atua. O lona agaga ua avea o se uunaʻiga malosi mo le lelei, lea ua mafai ai e ana auauna ona faaalia le alofa, le olioli, le filemu, le agalelei, ma isi uiga matagofie. (Kalatia 5:22, 23) I aso nei, ua tatou malamalama lelei i le mea ua leva ona muaʻi taʻua e le perofeta o Malaki e faapea: “Ona outou . . . iloa lea e eseese lē amiotonu ma lē amio leaga; e ese le ua auauna i le Atua, ma le ua le auauna ia te ia.”—Malaki 3:18.
O Loo Manumalo le Afioga a le Atua i le ʻAufaigaluega Maelega
12. O ā faalogona o Molimau a Ieova e faatatau i le galuega faaevagelia, ma o le ā le uiga faaalia i la latou galuega talaʻi e latou te faatalitalia?
12 O Molimau a Ieova i aso nei e lē o ni tagata e tau ina ō i se lotu. E faia sa latou vaega olaola i le galuega faaevagelia. I le pei o uluaʻi Kerisiano, ua latou lotomalilie ai e ofoina atu i latou lava e faia le finagalo o le Atua, i le taumafai e fesoasoani atu i isi ina ia latou iloa folafolaga o le Malo o Ieova. O i latou o le ʻaufaigaluega faatasi ma le Atua, o ē, i le ōgatusa ma lona agaga paia, ua latou aoaoina mai ai isi ina ia auauna atu i a Ieova. I le faia o lea mea, ua latou faaatagia mai ai le alofa mutimutivale o Ieova ma lona alofa atu i le fanau a tagata e leʻi talitonu. Ma ua latou faia faapea e ui lava ina fesagaʻi ma uiga e faalēano mai, o tauemuga ma sauāga. Sa sauniunia e Iesu ona soo mo uiga eseese o le a faaali mai e tagata i le tala lelei. Na ia fetalai: “E le sili le auauna i lona alii. Afai ua latou faasaua mai ia te au, e faasaua foi ia te outou; afai ua latou tausia laʻu upu, latou te tausia foi la outou.”—Ioane 15:20.
13. O ā vala e lē o maua i Kerisinetoma, ae o lea e anoanoaʻi i Molimau a Ieova?
13 E tatou te maofa pea lava i le tulaga talitutusa o Molimau a Ieova i aso nei ma i latou na taliaina le Faa-Kerisiano moni i le uluaʻi senituri. Ua tutusapau lava foʻi ma le mataʻina o le eseesega i aso nei i le vā o Molimau a Ieova ma Kerisinetoma. Ina ua uma ona tusi e faatatau i le maelega faaevagelia o uluaʻi Kerisiano, ona tagi talatala mai ai lea o se alii atamai faapitoa e faapea: “E seʻiloga lava e iai se suiga o aiāiga ua iai nei a lotu, ina ia toe manatu i le faaevagelia o se tiutefai o Kerisiano uma ua papatisoina, ma faamaonia mai lena suiga i se ituaiga o olaga e matuā matilatila ese mai na i lo o olaga o tagata lē faatuatua, e manino mai lo tatou lē agaʻigaʻi i luma.” O vala tonu lava e lē o maua i Kerisinetoma ia e anoanoaʻi i Molimau a Ieova! O loo ia i latou se faatuatua ola, se faatuatua e moni, ma o se faatuatua e faavae aʻe i le upu moni a le Tusi Paia lea ua matuā uunaʻia ai i latou e tufa atu i tagata uma o le a faalogo mai.—1 Timoteo 2:3, 4.
14. Na faapefea ona manatu Iesu i lana faiva, ma o le ā le uiga o loo faaalia e ona soo i aso nei?
14 Sa matuā uigā i a Iesu lana faiva, i le avea o se mea e sili ona manatu mamafa i ai. Na ia fetalai atu i a Pilato: “O le mea lenei na fanau mai ai aʻu, o le mea foi lenei na ou sau ai i le lalolagi, ina ia ou molimau i le upu moni.” (Ioane 18:37) O loo iai i tagata o le Atua faalogona e pei foʻi ona sa iai i a Iesu. Talu ai ua goto le upu moni o le Tusi Paia i o latou loto, ua latou tauivi ai ina ia maua auala e tufa atu ai lea upu moni i le toʻatele o ni tagata e mafai ai. O nisi o nei auala ua atagia mai ai se tomai mataʻina tele.
15. Ua faapefea ona faaalia e nisi tagata le tomai i le talaʻiina o le tala lelei?
15 I se tasi o atunuu i Amerika i Saute, sa faimalaga atu ai Molimau i se magāvai o le Vaitafe o le Amasone ina ia faaoo atu i tagata le upu moni. Peitaʻi, ina ua tutupu fetauaʻiga i le vā o tagata lava o le atunuu i le 1995, sa faasā ai loa ona toe feoaʻi tagata lautele e ui atu i le vaitafe. Ae ona o le maumauaʻi o Molimau ia sapalai atu pea lomiga faale-Tusi Paia i tagata lotofiafia, sa latou filifili ai loa e faatafea atu le feʻau i le tafega o le vai. Na latou tusia ni tusi ma fafao faatasi ma mekasini o Le Olomatamata ma le Ala Mai! i totonu o ni fagupaʻu ua leai ni mea o iai. Ona latou tauʻai lea o fagu i le vaitafe. E fā ma le ʻafa tausaga o faaauau pea ona faia lenei mea seʻia oo ina toe tatala mai le vaitafe i tagata lautele. O tagata uma lava sa nonofo e latalata i le vaitafe, sa latou faafetai ane i Molimau mo lomiga. E iai se tasi tamaʻitaʻi o lē sa suʻesuʻeina le Tusi Paia, sa ia alu ane ma ona loimata ma fusi i latou ma faapea ane: “Sa ou mafaufau ailoga a ou toe vaai ia te outou. Ae peitaʻi, ina ua amata ona ou mauaina lomiga i totonu o fagu, ona ou iloa lea e tou te leʻi faagaloina mai aʻu!” Na faapea mai isi o ē na nonofo ai foʻi e latalata i le vaitafe, sa latou faitauina faafia mekasini. E tele vaipanoa sa iai se “falemeli”—o se vivili e tuta uma i ai mea o loo tafefea atu ona faaputuputu ai lea mo sina taimi. O iinā sa tuu asiasi i ai tagata lotofiafia e siaki pe o iai se “meli” na tafea mai i le alavai.
16. E faapefea i lo tatou faaavanoa atu o i tatou lava ona tatala ai le avanoa i nisi taimi mo le faia o soo?
16 O le talaʻia o le tala lelei ua faatonutonuina ma lagolagoina e Ieova le Atua ma ana agelu malolosi. (Faaaliga 14:6) O lo tatou faaavanoa atu o i tatou lava, e puna aʻe ai i nisi taimi ni avanoa sa leʻi faatalitalia mo le faia o soo. I Nairobi, i Kenya, sa galulue ai ni tuafāfine Kerisiano se toʻalua i le auaunaga i le fanua, ma na faatoʻā uma lava ona fai uma fale sa tofia atu la te faia. Ae faafuaseʻi loa ona alu ane ia i laʻua se tamaʻitaʻi talavou ma faapea ane ma le fiafia tele: “Sa ou tatalo ina ia ou feiloaʻi atu i se tasi e pei o oulua.” Sa ia augani ane i Molimau ina ia latou ō atu i lona fale i lea lava taimi mo sa latou talanoaga, ma na amata ai i lena lava aso se suʻesuʻega faale-Tusi Paia ma ia. Aiseā na matuā faanatinati ai le oo ane a le tamaʻitaʻi i Kerisiano e toʻalua? Pe tusa ma le lua vaiaso muamua atu, na uma ai le ola o si ana pepe teine. Ina ua ia vaaia se tama talavou o uʻuuʻu solo le sāvali “O le ā le Faamoemoe mo Ē Pele ua Maliliu?” sa matuā manaʻo lava i ai ma ʻaisi loa i le tama e avane ma ia. Na musu le tama, ae na ia faasino i ai Molimau o i latou na avane ai lana savali. E leʻi pine, ae faia e le fafine se agaʻigaʻi lelei i luma faaleagaga ma sa mafai foʻi ona iai i se tulaga lelei e manumalo ai mai le tigā o le oti o si ana tama.
E Ao Ona Manumalo le Alofa o le Atua
17-19. O le ā le alofa ua faailoa mai e Ieova mo le fanau a tagata e ala mai i le togiola?
17 O le tupu aʻe o le afioga a le Atua i le lalolagi atoa ua fesootaʻi vavalalata atu i le taulaga togiola a Keriso Iesu. I le pei o le togiola, ua faapena ona avea le galuega talaʻi o se faailoaga o le alofa o Ieova mo tagata i so o se vaipanoa. Na faagaeeina le aposetolo o Ioane e tusi: “Ua faapea lava ona alofa mai o le Atua i le lalolagi [o tagata], ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.”—Ioane 3:16.
18 Seʻi manatu i le alofa na faaalia e Ieova i le saunia maia o le togiola. E lē mafaitaulia le tele o tausaga sa olioli ai le Atua i se faiā vavalalata ma lona Alo pele e toʻatasi, “le amataga o mea na faia e le Atua.” (Faaaliga 3:14) E loloto tele le alofa o Iesu i lona Tamā, ma na alofa lava Ieova i lona Alo “a o lei faavaeina le lalolagi.” (Ioane 14:31; 17:24) Na faataga e Ieova lenei Alo pele e oo i ai le maliu ina ia mafai e tagata ona maua le ola e faavavau. Maʻeu se faailoaga sili ona mataʻina o le alofa mo le fanau a tagata!
19 Ua faapea mai le Ioane 3:17 (LF): “E lei auina mai e le Atua lona Atalii i le lalolagi ina ia faamasino i le lalolagi, a ia faaolaina le lalolagi ia te ia.” O lona uiga, sa aauina mai e Ieova lona Alo mo se tofiga alofa o le faaolataga, ae lē o se faamasinoga po o se taʻusalaina. Ua ōgatusa lenei ma upu a Peteru: “Ua le finagalo [Ieova] ia fano se tasi, a ia oo uma lava i le salamo.”—2 Peteru 3:9.
20. O le ā le auala e fesootaʻi atu ai le faaolataga i le talaʻiina o le tala lelei?
20 I le saunia o le faavae faaletulafono mo le faaolataga e ui i se tau tele na ia totogia, ua finagalo ai Ieova ina ia mafai e le toʻatele o tagata e mafai ai ona latou maua aogā. Na tusi mai le aposetolo o Paulo: “E faaolaina i latou uma o e valaau i le suafa o le Alii. O lenei, pe faapefea ona latou valaau atu i le ua latou le faatuatua i ai? pe faapefea foi ona latou faatuatua i le ua latou le faalogo atu i ai? pe faapefea foi ona latou faalogo atu, pe a leai se talaʻi atu?”—Roma 10:13, 14.
21. O ā o tatou faalogona e tatau ona iai e faatatau i le avanoa e faia ai se sao i le galuega talaʻi?
21 Maʻeu se faaeaga ofoofogia o le faia o se sao i lenei galuega talaʻi ma aʻoaʻo atu i le lalolagi aoao! E lē o se galuega faigofie, peitaʻi e maʻeu se olioli o Ieova a o silasila mai i ona tagata o loo faamaoni e ola i le upu moni ma tufa atu le tala lelei i isi! O lea la, po o ā lava ou tulaga, ae ia e faataga le agaga o le Atua ma lou alofa mai lou loto, e uunaʻia ai oe ina ia faia sou sao i lenei galuega. Ma ia manatua, o mea o loo tatou vaaia ua faataunuuina i le lalolagi aoao, o se faamaoniga mautinoa lena e iloa ai, ua lē o toe umi ona faataunuuina lea e Ieova le Atua lana folafolaga ina ia faaoo mai le “lagi fou ma le lalolagi fou” lea o le a “mau ai le amiotonu.”—2 Peteru 3:13.
Pe E te Manatua?
• Aiseā ua lē mafai ai e le faaaposetasi ona taofia tagata talaʻi o le tala lelei?
• Ua faapefea ona manumalo le afioga a le Atua i o tatou aso?
• I ā auala o loo galue ai le agaga o le Atua i aso nei?
• Ua faapefea ona fesootaʻi mai le togiola i le talaʻiina o le tala lelei?
[Fesili mo le Suʻesuʻega]
[Siata/Ata i le itulau 16]
(Tagaʻi i le lomiga mo le ata atoa)
Le tupu aʻe o le aofaʻiga o ē folafola le Malo i le senituri lona 20
Faatatauga o Tagata Talaʻi (i miliona)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Ata i le itulau 15]
IEROME
TINITELI
GUTENBERG
HUS
[Faamatalaga i Ata]
Gutenberg ma Hus: From the book The Story of Liberty, 1878
[Ata i le itulau 15]
O loo folafola atu e Tagata Aʻoga o le Tusi Paia le tala lelei i vaitausaga e amata mai le 1920
[Ata i le itulau 16, 17]
I le lalolagi atoa o loo tali atu ai tagata i le tala lelei
[Ata i le itulau 18]
Ua viiviia e le galuega talaʻi le alofa o le Atua, e pei foʻi ona faia i le taulaga togiola a Iesu Keriso