O se Sauniga e Lē Tatau Ona E Misia

“O mea lelei uma e foaifuaina mai, atoa ma mea alofa uma e atoatoa ona lelei” mai lugā lava ia, e alu ifo mai le Tamā.—Iakopo 1:17.

O LE meaalofa silisili na foaʻi atu e le Atua i tagata agasala, o le sauniaina lea o lo latou faaolataga e ala mai i lona Alo pele e toʻatasi, o Iesu Keriso. O le maliu o Iesu, lo tatou Togiola, ua mafai ai ona maua le ola e faavavau i le lalolagi parataiso. Ua faatonuina i tatou i le Luka 22:19, e faamanatuina lona maliu.

Ua valaaulia oe ma le māfana e Molimau a Ieova ina ia e auai faatasi ma i latou i le usitaia o le faatonuga a Iesu. O lenei faatasiga faaletausaga, o le a faia pe a mavae le goto o le lā i le aso e fetaui atu ia Nisani 14 i le kalena faalemasina a le Tusi Paia—Aso Sa, Aperila 8, 2001. Ia faailogaina lenei aso ina ia lē galo ai ia te oe. E mafai ona taʻu atu e Molimau a Ieova i lou vaipanoa le nofoaga tonu ma le taimi e faia ai.