“Ua Tupu le Afioga a Ieova”

“O loo auina mai e ia lana poloaiga i le nuu, e momoʻe tele vave lana afioga.”​—SALAMO 147:15.

1, 2. O le ā le tofiga na tuuina atu e Iesu i ona soo, ma o le ā sa aofia ai?

O SE tasi o valoaga sili ona ofoofogia i le Tusi Paia, o loo maua lea i le Galuega 1:8 (LF). A o toeitiiti lava oo i le taimi na afio aʻe ai Iesu i le lagi, sa ia fetalai atu i ona soo faamaoni: “O le a maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au, . . . e oo lava i le tuluʻiga o le lalolagi.” Maʻeu le telē o le a iai lenei galuega!

² O le folafolaina atu o le afioga a le Atua i le lalolagi aoao, atonu sa foliga o se tofiga faigatā i nai soo e lē toʻatele naʻuā, o ē na tuuina atu i ai. Seʻi manatu i le mea sa aofia ai. Sa tatau ona latou fesoasoani atu i tagata ina ia malamalama i le tala lelei o le Malo o le Atua. (Mataio 24:14) O le molimau atu e uiga ia Iesu, e manaʻomia ai foʻi ona faaali atu i isi ana aʻoaʻoga malolosi ma faamalamalama atu lana matafaioi i fuafuaga a Ieova. E lē gata i lea, sa aofia ai i le galuega le faia o tagata ma soo ona papatisoina lea o i latou. Ma sa tatau ona faataunuuina lenei mea i le lalolagi aoao!—Mataio 28:19, 20.

3. O le ā na faamautinoa atu e Iesu i ona soo, ma na faapefea ona latou tali mai i le galuega na tuuina atu ia i latou?

³ E ui lava i lea, sa faamautinoa e Iesu i ona soo e faapea, o le a lagolagoina i latou e le agaga paia i le faataunuuina o le galuega na ia tuuina mai ia i latou. O lea, e ui i le telē o le tofiga ma le faifai tetele o taumafaiga sauā a tagata tetee ina ia taofia i latou, ae sa taulau manuia lava uluaʻi soo o Iesu i le faia o le galuega na ia faatonuina. O se mea moni ua faamaumauina ma e lē mafai ona faafitia.

4. Na faapefea ona faaalia le alofa o le Atua i le tofiga e talaʻi ma aʻoaʻo atu i isi?

⁴ O le tauiviga i le lalolagi aoao ina ia talaʻi ma aʻoaʻo atu, sa avea o se faailoaga mai o le alofa o le Atua mo i latou o ē na leʻi iloa o ia. Na latou maua ai se avanoa e faalatalata atu ai i a Ieova ma mauaina ai le faamagaloga o agasala. (Galuega 26:18) O le tofiga e talaʻi ma aʻoaʻo atu sa faaalia mai ai foʻi le alofa o le Atua mo i latou o loo tauaveina le feʻau, auā ua mafai ai ona latou faailoa atu lo latou tuutoina i a Ieova ma faaalia lo latou alofa mo o latou uso a tagata. (Mataio 22:37-39) Sa matuā tāua i le aposetolo o Paulo le faiva faa-Kerisiano, o le māfuaaga lea na ia taʻua ai o se “oa.”—2 Korinito 4:7.

5. (a) O fea tatou te maua ai le talafaasolopito e sili ona maufaatuatuaina o uluaʻi Kerisiano, ma o le ā le tupu aʻe ua faamatalaina ai? (e) Aiseā ua aogā ai le tusi o Galuega i auauna a le Atua i aso nei?

⁵ O le talafaasolopito e sili ona maufaatuatuaina e faatatau i le galuega talaʻi a uluaʻi Kerisiano, e maua lea i le tusi faagaeeina o Galuega, na tusia e le soo o Luka. Ua faamatalaina ai se tupu aʻe e sili ona maofa ai ma vave. O lenei tupu aʻe o le poto i le Afioga a le Atua, e faamanatu mai ai ia i tatou le Salamo 147:15, lea e faapea mai: “O loo auina mai e [Ieova] lana poloaiga i le nuu, e momoʻe tele vave lana afioga.” O le tala i uluaʻi Kerisiano, o ē na maua le malosi mai le agaga paia, e lē gata ina mālie ae matuā aogā lava ia i tatou i aso nei. E faapena foʻi le galuega o loo faia e Molimau a Ieova, o le talaʻi ma le faia o soo, seʻi vaganā ai, o lea ua tatou faia i se tulaga ua telē atu. O loo tatou fesagaʻia foʻi faafitauli e talitutusa lava ma faafitauli sa fetaiaʻi ma Kerisiano i le uluaʻi  senituri. A o tatou iloiloina le auala sa faamanuia ma foaʻi atu ai e Ieova le malosi i uluaʻi Kerisiano, e faapena foʻi ona faamalosia ai lo tatou faatuatua i lana lagolagosua mai.

Le Tupu Aʻe o le Aofaʻiga o Soo

6. O le ā le fuaitau e faatatau i le tupu aʻe o loo faatolu ona maua i le tusi o Galuega, ma o le ā e faasino atu i ai?

⁶ O se tasi o auala e iloiloina ai le faataunuuga o le Galuega 1:8, o le talanoaina lea o le faaupuga “ua tupu le afioga a [Ieova],” o se fuaitau e na o le faatolu lava ona aliali mai i le Tusi Paia faatasi ai ma ni nai suiga laiti i lona faaupuina, ma o na faaupuga eseese e maua uma i le tusi o Galuega. (Galuega 6:7; 12:24; 19:20) O “le afioga a Ieova,” po o “le afioga a le Atua,” i nei fuaitau e faasino atu i le tala lelei—le feʻau faagaeeloto o le upu moni tauatua, o se feʻau olaola ma le malosi na suia ai olaga o i latou na taliaina.—Eperu 4:12.

7. O le ā le mea lea e faafesootaʻi atu i ai e le Galuega 6:7 le tupu aʻe o le afioga a le Atua, ma o le ā na tupu i le aso o le Penetekoso 33 T.A.?

⁷ O le uluaʻi faasinoga lava i le tupu aʻe o le afioga a le Atua, o loo taʻua i le Galuega 6:7. O iinā tatou te faitau ai: “Ua tupu foi le afioga a le Atua [Ieova]; ua matuā faatoateleina le au soo i Ierusalema; ua anaana foi ositaulaga e toatele lava i le faatuatua.” Iinei, ua faafesootaʻi atu ai le tupu aʻe i se faatelega o le aofaʻi o soo. Muamua atu, i le aso o le Penetekoso 33 T.A., na liligi ifo ai le agaga paia o le Atua i soo e tusa ma le toʻa 120, o ē na faapotopoto i se afeafe aupito aluga. Ona tauaaoina atu ai lea e le aposetolo o Peteru se lauga matuā faagaeeloto, ma o i latou na faalogologo, pe tusa ma le 3,000, ma na avea ai lava ma soo i lena aso. Maʻeu se vavaō atonu na iai iinā a o tau faaofiofi atu le faitau afe o tagata i le vaitāʻele po o ni vaitāʻele sa iai i Ierusalema ma vaipanoa lalata ane, ina ia papatisoina i latou i le suafa o Iesu, le tagata o lē na faasatauroina e pei o se tagata agasala i le tusa o le 50 aso na muamua atu!—Galuega 2:41.

8. Na faapefea ona faateleina le aofaʻi o soo i tausaga mulimuli ane ina ua mavae le Penetekoso 33 T.A.?

 ⁸ O le mea moni, sa na o se amataga lena mea. Sa lē taulau taumafaiga faifai pea a taʻitaʻi lotu Iutaia ina ia taofia le galuega talaʻi. Na matuā fiu lava na taʻitaʻi, auā sa “faaopoopoina i le [ʻausoo] e [Ieova] i aso fai soo o e ua faaolaina.” (Galuega 2:47) E leʻi umi, ae oo ‘le aofai o tagata pe tusa ua limagaafe.’ Ina ua mavae lena, sa ‘faaopoopoina pea o e ua faatuatua i le Alii, e toatele o tane atoa ma fafine.’ (Galuega 4:4; 5:14, LF ) I se vaitaimi mulimuli ane, tatou te faitau ai: “Ona fifilemu lea o ekalesia i Iutaia uma lava, ma Kalilaia, ma Samaria, ua faamafanafanaina i latou; ua savavali foi ma le mataʻu [ia Ieova], ma ua faatoateleina i le fesoasoani o le Agaga Paia.” (Galuega 9:31) I ni tausaga mulimuli ane, pe tusa o le 58 T.A., sa faasino atu ai se faamatalaga i le “mano e tele . . . ua faatuatua.” (Galuega 21:20) E oo ane i lena taimi, ua toʻatele foʻi tagata o Nuu Ese ua faatuatua.

9. O le a faapefea ona e faamatalaina uluaʻi Kerisiano?

⁹ O se tasi o māfuaaga tele o lenei tupu aʻe o le aofaʻi ona o tagata na liliu mai. O se lotu fou—peitaʻi sa matuā olaola lava le tuputupu aʻe. I le matuā lē avea lava o ni tagata e na ona ō i lotu, na tuutoina atu ai atoatoa soo i a Ieova ma lana Afioga, ma o nisi taimi sa latou aʻoaʻoina le upu moni mai ia i latou o ē ogaoga sauāga na faia i ai. (Galuega 16:23, 26-33) O i latou na taliaina le Faa-Kerisiano sa latou faia ona o se filifiliga talafeagai ma le faamaoni a o latou lava lotofuatiaifo. (Roma 12:1) Sa aʻoaʻoina i latou i ala o le Atua; sa iai le upu moni i o latou mafaufau ma loto. (Eperu 8:10, 11) Sa latou lotomalilie e oti mo le mea na latou talitonu i ai.—Galuega 7:51-60.

10. O le ā le tiute tauave na taliaina e uluaʻi Kerisiano, ma o le ā le tulaga tutusa o loo tatou iloa i aso nei?

¹⁰ O i latou na taliaina le aʻoaʻoga faa-Kerisiano sa latou amanaʻia lo latou tiute tauave e tufa atu le upu moni i isi. Na fesoasoani tele lenei mea i le faatupulaʻia atili o le aofaʻi. Na faapea mai se tasi alii atamai faapitoa i mataupu fale-Tusi Paia: “O le talanoaina o le faatuatua sa lē manatu i ai o se mea e patino atu i le faievagelia sili ona maelega po o le faievagelia ua tofia aloaʻia. O le faiva faaevagelia, o se faaeaga ma o se tiutefai a tagata uma o le Lotu. . . . O taumafaiga maumauaʻi faaevagelia a vaega uma o Kerisiano na avea o se uunaʻiga malosi i le Faa-Kerisiano mai lava i le amataga.” Na ia tusi atili mai: “O le faiva faaevagelia o le ola lea o uluaʻi Kerisiano.” O le tulaga tonu foʻi lena o loo iai Kerisiano moni i aso nei.

Le Tupu Aʻe i le Aofaʻiga o Oganuu ma Atunuu

11. O le ā le ituaiga o tupu aʻe o loo faamatalaina i le Galuega 12:24, ma na faapefea ona tupu lenei mea?

¹¹ O le faasinoga lona lua o le tupu aʻe o le afioga a le Atua, e maua lea i le Galuega 12:24: “Ua tupu le afioga a le Atua ma ua faateleina.” Iinei o loo fesootaʻi atu ai le fuaitau i le tupu aʻe i le aofaʻiga o oganuu ma atunuu. E ui lava i teteega mai i faiga malo, ae sa faaauau pea ona lauolaola le galuega. Na muamua lava liligi ifo le agaga paia i Ierusalema, ma na amata mai ai iinā ona vave le faalauteleina atu o le upu. Na avea sauāga i Ierusalema ma māfuaaga o le salalau solo atu o soo i vaipanoa uma o Iutaia ma Samaria. O le ā le iʻuga? “Ua o solo foi e na faasalalauina, ma latou folafola atu le tala lelei o le upu.” (Galuega 8:1, 4) Sa taʻitaʻiina atu Filipo ina ia molimau i se tamāloa o lē, ina ua uma ona papatisoina, ona ia avatu lea o le feʻau i Aitiope. (Galuega 8:26-28, 38, 39) Na vave ona mauaa le upu moni i Lita, le fanua laugatasi o Sarona, ma Iopa. (Galuega 9:35, 42) Mulimuli ane, e faitau afe maila na faimalaga ai le aposetolo o Paulo i le sami ma le laueleele, i le faavaeina o faapotopotoga i le tele o atunuu o le Metitirani. Na alu atu le aposetolo o Peteru i Papelonia. (1 Peteru 5:13) I le 30 o tausaga talu ona liligiina ifo le agaga paia i le Penetekoso, na tusi ai Paulo e faapea, ‘sa talaʻiina atu le tala lelei i le lalolagi,’ ma e foliga sa ia faasino atu i vaega o le lalolagi sa lauiloa i lena vaitaimi.—Kolose 1:23.

12. Na faapefea ona taʻutino atu e tagata sa tetee i le Faa-Kerisiano le tupu aʻe o le afioga a le Atua i le aofaʻiga o oganuu ma atunuu?

¹² E oo lava i tagata sa tetee i le Faa-Kerisiano sa latou taʻutino atu faapea ua mauaa le afioga a le Atua i vaipanoa uma o le Emepaea o Roma. Mo se faaaʻoaʻoga, o loo faamatala mai e le Galuega 17:6 e faapea, i Tesalonia, i le itu i mātū o Eleni, na  alalaga ai tagata tetee e faapea: “O tagata nei o e ua faatupu le fouvale i le lalolagi uma, ua latou oo mai foi iinei.” E lē gata i lea, i le amataga o le senituri lona lua, na tusi atu ai Pliny le Itiiti a o iai i Pitunia, i le emeperoa o Roma o Trajan e faatatau i le Faa-Kerisiano. Na ia faitio atu e faapea: “Ua lē na o aai ua oo atu i ai, ae ua sosolo atu ana taaʻiga i isi nuu ma itumalo tuaoi.”

13. I le ā le auala na atagia ai le alofa o le Atua mo le fanau a tagata, i le tupu aʻe o le aofaʻiga o oganuu ma atunuu?

¹³ O lenei tupu aʻe i le aofaʻiga o oganuu ma atunuu sa avea o se faailoaga o le alofa loloto o Ieova mo le fanau a tagata ua mafai ona togiolaina. Ina ua iloa atu e Peteru le faaali mai o le agaga paia lava ia i a Konelio, le tagata o Nuu Ese, ona ia faapea mai lea: “E moni, ua ou iloa e le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.” (Galuega 10:34, 35) Ioe, sa avea ma o loo avea pea le tala lelei ma feʻau mo tagata uma, ma o le tupu aʻe o le afioga a le Atua i le aofaʻiga o oganuu ma atunuu, na maua ai e tagata i so o se vaipanoa se avanoa e tali atu ai i le alofa o le Atua. I lenei senituri lona 21, ua salalau moni atu ai lava le afioga a le Atua i vaega uma o le lalolagi.

Le Tupu Aʻe o Loo Manumalo

14. O le ā le ituaiga o tupu aʻe lea e faamatalaina i le Galuega 19:20, ma o le ā ua manumalo mai ai le afioga a le Atua?

¹⁴ O le faasinoga lona tolu i le tupu aʻe o le afioga a le Atua o loo taʻua lea i le Galuega 19:20: “Ua matuā tupu tele . . . ma ua manumalo le afioga a [Ieova].” O le uluaʻi upu Eleni lea e faaliliuina i le “manumalo” o loo faaoo mai ai le manatu o le “malosi e uunaʻi atili ai.” O fuaiupu na muamua atu o loo faamatala mai ai e faapea, e toʻatele tagata i Efeso na oo ina faatuatua, ma e toʻatele tagata na faia faiga faataulāitu, sa latou susunuina a latou tusi a o matamata atu i ai tagata uma. O lona uiga, sa manumalo le afioga a le Atua mai i talitonuga sesē faalotu. Sa manumalo foʻi le tala lelei mai i isi toʻatugā, e pei o sauāga. E leai se mea e mafai ona taofia. O iinei tatou te iloa ai foʻi le isi tulaga mataʻina ua tutusa mai ai i le Faa-Kerisiano moni i o tatou taimi.

15. (a) O le ā le mea na tusia e se tasi tusitala i talafaasolopito o le Tusi Paia e faatatau i uluaʻi Kerisiano? (e) Ia te ai na avatu i ai e soo le viiga ona o lo latou taulau manuia?

¹⁵ Sa folafola atu ma le maelega e le ʻauaposetolo ma isi uluaʻi Kerisiano le afioga a le Atua. Na taʻua e se alii tusitala i talafaasolopito o le Tusi Paia e faatatau ia i latou nei, e faapea: “Pe a iai i tagata le faanaunauga e talanoa atu e uiga i lo latou Alii, e mautinoa lava le tele o auala latou te faia ai faapea. O le mea moni, o le uunaʻiga o gaoioiga a nei tane ma fafine ua matuā sili ona matou maofa ai na i lo o a latou auala.” E ui lava i lea, sa iloatino e na uluaʻi Kerisiano, sa leʻi faalagolago tasi atu le taulau manuia o la latou faiva i na o a latou lava taumafaiga. Sa ia i latou se tofiga tauatua ina ia faaauau ai pea la latou galuega, ma sa ia i latou le lagolagosua tauatua e faataunuu ai lena tofiga. O le Atua ua māfua ai le tupu aʻe faaleagaga. Na taʻutino e le aposetolo o Paulo lenei mea i lana tusi atu i le faapotopotoga i Korinito. Na ia tusi: “Na ou totōina, na faasūsūina e Apolo; a e peitai o le Atua ua faatupuina. Auā o le au faigaluega i matou faatasi ma le Atua.”—1 Korinito 3:6, 9.

 O Loo Galue le Agaga Paia

16. O le ā e faaalia ai na foaʻia e le agaga paia le malosi i le ʻausoo ina ia tautatala atu ma le lototetele?

¹⁶ Seʻi manatua, na faamautinoa atu e Iesu i ona ʻausoo e faapea, o le a faatino e le agaga paia se matafaioi i le tupu aʻe o le afioga a le Atua ma o le a foaʻi atu e le agaga paia le malosi i soo i la latou galuega talaʻi. (Galuega 1:8) Na faapefea ona tupu lenei mea? E leʻi umi lava talu ona liligiina ifo le agaga i luga o soo i le Penetekoso, ae faatonuina loa Peteru ma Ioane ina ia la tali atu i le ʻau Saniterini a Iutaia, o le faamasinoga sili i le nuu, o ē sa tuuaʻia o latou faamasino i le sala na faaooina i a Iesu Keriso. Pe na gatete ea le ʻauaposetolo i le matataʻu a o tulaʻi atu i luma o lena fono o tagata malualii ma le maʻemaʻeā? E matuā leai lava! Na foaʻi atu e le agaga paia le malosi i a Peteru ma Ioane e tautatala atu ai ma le lototetele, ma sa matuā maofa ai o la fili, ma “ua latou iloa foi o i laua sa latou faatasi ma Iesu.” (Galuega 4:8, 13) O le agaga paia foʻi na faapogaia ai ona molimau atu ma le lototele Setefano i le ʻau Saniterini. (Galuega 6:12; 7:55, 56) Muamua atu, na uunaʻia ai e le agaga paia le ʻausoo ina ia talaʻi ma le lototele. Ua taʻu mai e Luka e faapea: “Ua mavae atu la latou tatalo, ona luluina lea o le mea ua faapotopoto ai i latou; ua tutumu foi i latou uma i le Agaga Paia, ma ua tautala atu i le afioga a le Atua ma le loto tele.”—Galuega 4:31, LF.

17. O ā isi auala na fesoasoani atu ai le agaga paia i le ʻausoo i la latou faiva?

¹⁷ E ala mai i lona agaga paia matuā malosi, ua taʻitaʻia ai e Ieova faatasi ma Iesu o lē na toetū mai, le galuega talaʻi. (Ioane 14:28; 15:26) Ina ua liligiina ifo le agaga i a Konelio, o ona tauaiga, ma ana uō mamae, na iloa ai e le aposetolo o Peteru faapea, sa mafai e tagata o Nuu Ese o ē e leʻi peritomeina ona agavaa e papatiso i le suafa o Iesu Keriso. (Galuega 10:24, 44-48) Mulimuli ane, sa faatino ai e le agaga se matafaioi autū i le tofiaina o Panapa ma Saulo (le aposetolo o Paulo) mo le galuega faamisionare ma i le taʻitaʻia i mea e tatau ma mea e lē tatau ona la ō atu i ai. (Galuega 13:2, 4; 16:6, 7) Sa taʻitaʻiina le faia o filifiliga a le ʻauaposetolo ma toeaina i Ierusalema. (Galuega 15:23, 28, 29) O le agaga paia foʻi na taʻitaʻia le tofiaina o ovasia i le faapotopotoga Kerisiano.—Galuega 20:28.

18. Na faapefea ona faailoa le alofa o uluaʻi Kerisiano?

¹⁸ E lē gata i lea, na faaalia le agaga paia i Kerisiano lava latou, ma fuaina mai ai uiga faaleatua, e pei o le alofa. (Kalatia 5:22, 23) O le alofa na uunaʻia ai le ʻausoo e fetufaaʻi le tasi i le isi. Mo se faaaʻoaʻoga, ina ua mavae le Penetekoso 33 T.A., sa faatulaga ai se vaegatupe mo le tausiaina o manaʻoga faaletino o le ʻausoo i Ierusalema. Ua faapea mai le tala a le Tusi Paia: “Ua leai foi so latou e mativa; auā o i latou ua i ai fanua po o fale, ua latou faatauina, ua au mai foi le tau o mea na faatauina, ma tuu mai i le au aposetolo e pule; ua tufatufa ia te i latou taitoatasi e faatatau i le mativa o le tagata.” (Galuega 4:34, 35) Na faasalafa atu lenei alofa e lē i na o uso talitonu ae faapea foʻi i isi, i le tufaina atu o le tala lelei faapea foʻi isi gaoioiga agalelei. (Galuega 28:8, 9) Na fetalai Iesu e faapea o le a mātaulia ona soo i lo latou alofa faataulagaina totino. (Ioane 13:34, 35) E mautinoa lava o le uiga tāua o le alofa na tosina mai ai tagata i le Atua ma fesoasoani i le tupu aʻe lea sa iai i le uluaʻi senituri e pei lava foʻi ona iai i aso nei.—Mataio 5:14, 16.

19. (a) O ā auala e tolu na tupu aʻe ai le afioga a Ieova i le uluaʻi senituri? (e) O le ā le manatu o le a tatou talanoaina i le mataupu o sosoo mai?

 ¹⁹ I le aotelega la, e 41 taimi o loo aliaʻi mai ai i le tusi o Galuega mai le uluaʻi gagana, le faaupuga faa-Eleni mo le ‘agaga paia.’ E manino lava, o le tupu moni aʻe faa-Kerisiano i le uluaʻi senituri, sa fesootaʻi vavalalata atu i le malosi ma le taʻitaʻiga a le agaga paia. Sa faateleina le aofaʻiga o soo, ma na soo atoa vaipanoa o salalau atu i ai le afioga a le Atua, ma na manumalo mai i lotu ma filosofia o lena vaitaimi. O lenei tupu aʻe i le uluaʻi senituri e iai lona tulaga tutusa mai i le galuega a Molimau a Ieova i aso nei. I le mataupu o sosoo mai, o le a tatou iloiloina ai tupu aʻe o le afioga a le Atua i ona pō nei, lea e tutusa lona mataʻina.

Pe E te Manatua?

• Na faapefea ona tupu aʻe le aofaʻi o uluaʻi soo?

• I le ā le auala na salalau atu ai le afioga a le Atua i oganuu ma atunuu?

• Na faapefea ona manumalo le afioga a le Atua i le uluaʻi senituri?

• O le ā le matafaioi na faia e le agaga paia i le tupu aʻe o le afioga a le Atua?

[Fesili mo le Suʻesuʻega]

[Ata i le itulau 12]

Na talaʻi atu Filipo i le Aitiope, ma salalau atu ai le tala lelei i oganuu ma atunuu

[Ata i le itulau 13]

Na taʻitaʻia e le agaga paia le ʻauaposetolo ma toeaina i Ierusalema

[Faamatalaga i Ata i le itulau 10]

Tulimanu taumatau pito i luga: Se toe faaataina mai o le Aai o Ierusalema i le taimi o le Malumalu Lona Lua–o loo i ogaeleele o le Holyland Hotel, i Ierusalema