Usiusitai—Po o se Lesona Tāua ea i le Taimi a o Laiti?

“E MANANAʻO Mātua i Tamaiti Popoto, ae Lē o Tamaiti Usiusitai.” O le faatomuaga lea a se nusipepa. O lenei lipoti puʻupuʻu na faavae i se iʻuga o se suʻesuʻega na faia i Niu Sila, lea na faaalia ai faapea e na o le “22 pasene o i latou na tali mai na manatu e tatau ona aʻoaʻoina e tamaiti le usiusitai i le aiga.” Na mauaina foʻi i le suʻesuʻega faapea o mātua i aso nei e talitonu faapea e sili mamao atu le tāua o le aʻoaʻoina o tamaiti i mataupu e pei o uiga lelei, le tutoʻatasi, ma le auala e faatinoina ai tiute tauave.

I lenei vaitaimi o le faatāuaina e le tagata o ia lava ma le manatu o le tagata mo lona lava lelei, e lē o se mea e faateʻia ai faapea o le toʻatele o tagata e tau lē talitonu i le usiusitai ma le aʻoaʻoina o le usiusitai i tamaiti. Ae po ua na ona manatu ea i le usiusitai o se mea ua tuai ma e lē o toe faaaogāina? Po o iai le usiusitai i lesona tāua ia e mafai ona aʻoaʻoina e tamaiti ma maua mai ai aogā? E sili atu i lena, o faapefea ona silasila Ieova le Atua, o Lē na Amataina le fuafuaga o aiga, i le usiusitai i mātua, ma o ā nisi o faamanuiaga e maua mai i lena usiusitai?—Galuega 17:28; Efeso 3:14, 15.

“O le Mea Tonu Lava Lea”

Na tusi le aposetolo o Paulo i le faapotopotoga Kerisiano i Efeso i le uluaʻi senituri e faapea: “O outou le fanau, ia outou faalogo i o outou mātua i le Alii, auā o le mea tonu lava lea.” (Efeso 6:1) O lea, o le māfuaaga autū mo lea usiusitai ona e ōgatusa ma faatulagaga tauatua o mea e saʻo. E pei ona faaupu ai e Paulo, “o le mea tonu lava lea.”

I le ōgatusa ma lenei mea, tatou te mātauina ai faapea o loo faamatalaina e le Afioga a le Atua le aʻoaʻiga faamātua i le alofa o se mea e matagofie, o se “pale matagofie i lou ulu, ma mea e asoa i lou ua,” ma o se mea e “mālie lea i le Alii.” (Faataoto 1:8, 9; Kolose 3:20) I sona faaeseesega, o le lē usiusitai i mātua e aumaia ai le faamasinoga tauatua.—Roma 1:30, 32.

“Ina ia Manuia ai Oe”

Na faasino atu e Paulo le isi taui o le usiusitai ina ua ia tusi e faapea: “Ia e ava i lou tamā ma lou tinā; (o le uluai tulafono lea ua i ai le mea ua folafolaina), ina ia manuia ai oe, ma ia e nofo tuluʻi ai i luga o le laueleele.” (Efeso 6:2, 3; Esoto 20:12) O ā auala e ono faamanuiaina ai se tasi ona o le usiusitai i mātua?

Muamua, pe lē moni ea faapea o mātua ua loa ona soifua, ma ua tele le poto masani ua iai? E ui e foliga mai e lē tele so la iloa e faatatau i komepiuta po o isi mataupu o loo aʻoaʻoina i le aʻoga, ae e tele mea la te iloa e faatatau i le soifuaga ma le faafetaiaʻia o faafitauli o le olaga. Ae i le isi itu, o talavou, e leai se paleni lelei faalemafaufau lea e mauaina i le tulaga o le tagata matua. O lea, e latou te mafuli atu ai i le faatopelau o le faia o faaiʻuga, e masani foʻi ona latou lolo atu ai i lamatiaga o omiga e aumai e ā latou tupulaga, lea e oo atu ai i lo latou faaleagaina. Ua moni ai la le faapea mai o le Tusi Paia: “Ua fusifusia le valea i le loto o le tama.” O le ā le vaifofō? “A e faateaeseina ai ia te ia i le sasa e aoai aʻi.”—Faataoto 22:15.

E sili atu aogā e maua mai i le usiusitai na i lo o le  faiā a mātua ma le tamaitiiti lava ia. Ina ia sologa lelei ma maua aogā e le sosaiete faaletagata, e tatau ona galulue felagolagomaʻi tagata, lea e manaʻomia ai le usiusitai. O se faataʻitaʻiga, i se faaipoipoga, o le nofosauni e gauaʻi atu, na i lo o le tagisā ma lē amanaʻiaina o aiā ma faalogona o isi, e iʻu ai i le filemu, le autasi, ma le fiafia. I le fale faigaluega, o le gauaʻi atu o tagata faigaluega o se mea e manaʻomia mo so o se pisinisi po o se taumafaiga fitā ina ia taulau manuia ai. I le fesootaʻi atu i tulafono ma aiāiga faalemalo, e lē gata ina saʻoloto ai se tasi mai i le faasalaina ona o le usiusitai, ae aumaia ai foʻi sina lagona o le saogalemu ma le malupuipuia.—Roma 13:1-7; Efeso 5:21-25; 6:5-8.

O talavou e lē usiusitai i le pule e masani lava ona avea ma ē e lē aogā i le sosaiete o tagata. I lona faaeseesega, o le aʻoaʻoina o le usiusitai a o laiti e mafai ona aogā ai i le olaga atoa o se tasi. Maʻeu le lelei o le aʻoaʻoina o le usiusitai a o laiti!

Le Taui Sili mo le Usiusitai

O le usiusitai e lē gata e aumaia ai faiā fiafia i le aiga ma isi faamanuiaga mo le olaga atoa, ae ua saunia ai foʻi le faavae lea e mafai ona ati aʻe ai le faiā e sili ona tāua i faiā uma—le vā o le tagata ma Lē na Foafoaina o ia. Ua tonu lo tatou usiusitai atoatoa atu ia Ieova le Atua ona o ia o ‘Lē na faia oe’ o “le puna o le ola.”—Failauga 12:1; Salamo 36:9.

O loo tele ina taʻua le upu “usiusitai” ma isi upu e tutusa uiga i le Tusi Paia. E faaopoopo atu i ai, o loo iai le faitau selau o faasinoga i tulafono a le Atua, faatonuga, poloaʻiga, faamasinoga, ma feʻau, o na mea uma e manaʻomia ai le gauaʻi atu. Ua tatou malamalama lelei faapea o loo silasila le Atua i le usiusitai o se mea e manaʻomia ina ia maua ai lona finagalo malie. Ioe, o le usiusitai e tāua tele mo le atiina aʻe o se faiā ma Ieova. (1 Samuelu 15:22) O le mea e faanoanoa ai, o le faanaunauga masani faaletagata e lē o le usiusitai ae o le lē usiusitai. Ua taʻua e le Tusi Paia e faapea: ‘Ua leaga o manatu o loto o tagata e afua mai ina o tama iti.’ (Kenese 8:21) O lea la, o le lesona o le usiusitai e tatau ona aʻoaʻoina e lē na o le taimi o laiti ai, ae i le olaga atoa. O le faia faapea e aumaia ai le taui sili.

Seʻi toe manatu, e pei ona faaupu ai e le aposetolo o Paulo, o le poloaʻiga ia usiusitai i mātua e ō mai faatasi ma se folafolaga e vala lua, e faapea “ia manuia ai oe, ma ia e nofo tuluʻi ai i luga o le laueleele.” O le faamautinoaga o lenei folafolaga o loo maua i le Faataoto 3:1, 2: “Loʻu atalii e, aua neʻi galo ia te oe laʻu tulafono; a ia tausia aʻu poloaiga i lou loto. Auā e faaopoopoina ai ia te oe o aso e tele, ma tausaga e te ola ai, atoa ma le manuia.” O le taui sili mo i latou e usiusitai o se faiā totino ma Ieova i le taimi nei ma le ola e faavavau i le lalolagi fou filemu.—Faaaliga 21:3, 4.

[Ata i le itulau 30, 31]

O le usiusitai e aumaia ai faiā fiafia i le aiga, i nofoaga o galuega, faapea ma Ieova