Le Auala e Feagai ai ma Faalogona Lē Lelei

● Sa faitio mai Asafo e faapea: “E moni lava, ua ou faamamāfuaina loʻu loto, ma aʻu fafano oʻu lima ina ua ou le sala, a e fai fua lava. Ua taia lava aʻu i aso fai soo, ua aoaiina foi aʻu i taeao uma lava.”—Salamo 73:13, 14.

● Sa auē Paruka ma faapea mai: “Oi talofa ia te au! auā ua faaopoopoina e Ieova le faanoanoa i loʻu tiga; ua ou lailoa i loʻu mapuitiga, ou te le maua foi sina mapu.”—Ieremia 45:3.

● Sa faapenei ona tagi auē Naomi: “Ua matuā oona mea ua faia ia te au e Lē ona le malosi uma lava. Na ou alu atu ua tamaoaiga, ua faafoiina mai aʻu e Ieova ua mativa; se a le mea tou te taʻua aʻu, o Naomi? auā ua faatigaina aʻu e Ieova, ua malaia aʻu i Lē ona le malosi uma lava.”—Ruta 1:20, 21.

O LOO iai i le Tusi Paia le anoanoaʻi o faaaʻoaʻoga o tagata tapuaʻi faamaoni o Ieova o ē sa iai taimi na lofia ai i faalogona o le lotovaivai. O le mea moni lava ia i le avea ai ma tagata lē lelei atoatoa, e oo uma lava ia i tatou na faalogona mai i lea taimi i lea taimi. E ono faigofie ona aafia nisi o i tatou i le lotovaivai—atonu e oo atu ai lava i ni faalogona tigā—na i lo isi ona o mea tutupu faigatā na oo i ai.

Peitaʻi, pe afai e lē pulea nei faalogona, e iʻu ina faaleagaina ai la outou faiā ma isi faapena ma la oulua faiā ma Ieova le Atua. Na taʻutino mai e se tasi tuafafine Kerisiano o lē e aafia gofie i le lotovaivai e faapea: “Sa ou lē taliaina le tele o valaaulia ina ia auai i faatasitasiga faasamasamanoa ona sa ou manatu e lē talafeagai ia te aʻu ona faatasitasi ma isi i le faapotopotoga.” Pagā se faaleagaina e mafai e na faalogona ona aumaia i le olaga o se tasi! O le ā se mea e ao ona fai e taofia ai nei faalogona?

Faalatalata Atu i a Ieova

I le Salamo 73, o loo tusia manino ai e Asafo e uiga i lona lē mautonu. Ina ua faatusatusa atu lona lava tulaga i le olaga manuia o ē amioleaga, na oo ia te ia le matauʻa. Sa ia mātauina tagata amioleaga e faasiasia ma sauā, ae foliga mai sa aunoa i latou ma le faasalaina. Ona amata ai lea ona faaalia e Asafo le masalosalo e faatatau i le aogā o lona uia o se ala saʻo i le olaga.—Salamo 73:3-9, 13, 14.

Pe e pei ea oe o Asafo, i lou mātauina o le foliga taulau mai o tagata amioleaga o ē e faalialia i a latou mea leaga? Sa faapefea ona faaleleia e Asafo ona faalogona lē lelei? Na faaauau mai lana faamatalaga e faapea: “Na ou mafaufau lava ia aʻu iloa lenei mea; o le mea faatiga lava lea i loʻu manatu; ua oo i le aso na ou alu atu ai i le malumalu o le Atua; ona ou iloa ai lea o lo latou iuga.” (Salamo 73:16, 17) Sa uia e Asafo ia laasaga mautinoa e ala i le liliu atu i a Ieova i le tatalo. I lona faaaogāina o faaupuga na mulimuli ane faaaogā foʻi e le aposetolo o Paulo, sa faatoʻilalo ai e Asafo le “tagata faaletino” i le faagaoioia o le “tagata faaleagaga” sa ia te ia lava. E ala i se vaaiga faaleagaga toe faafouina, na ia malamalama ai e ʻinoʻino Ieova i le leaga ma i le taimi atofaina o le a faasalaina ai ē amioleaga.—1 Korinito 2:14, 15.

Maʻeu le tāua o lou faaaogāina o le Tusi Paia e fesoasoani ia te oe e taulaʻi atu i le tulaga moni  o le olaga! Ua faamanatu mai ia i tatou e Ieova e lē faapea na te lē o silafiaina mea o loo faia e tagata amioleaga. E aʻoaʻoina faapenei e le Tusi Paia: “Aua neʻi faaseseina outou, e le ulagia le Atua, auā o le mea e luluina e le tagata, o le mea lava lea e seleseleina mai ai e ia. . . . Aua neʻi tatou faapalapala i le amio lelei; auā o ona po e tatau ai tatou te selesele mai ai, pe afai tatou te le faavaivai.” (Kalatia 6:7-9) O le a tuuina e Ieova ē amioleaga i “mea maseesee”; o le a ia “faapaūina atu i latou i mea faatafunaina.” (Salamo 73:18) E mautinoa lava o le a iʻu ina taulau faamasinoga tauatua.

O le polokalame faifai pea o le fafagaina faaleagaga i le laoʻai a Ieova atoa ma le aufaatasiga mamā ma tagata o le Atua, o le a fesoasoani ia te oe e faamalosia ai lou faatuatua ma aveesea le lotovaivai po o isi faalogona lē lelei. (Eperu 10:25) I le pei o Asafo, o le faalatalata atu i le Atua, o le a e mauaina ai lana lagolagosua alofa. Na faapea mai atili Asafo: “E le aunoa ona ta faatasi ma oe; na e taofiina loʻu lima taumatau. E te taʻitaʻi ia te au i lau pule, a e mulimuli ane e te talia mai aʻu i le manuia.” (Salamo 73:23, 24) O se tasi o Kerisiano o lē sa faileagaina a o avea ma teineitiiti sa ia aʻoaʻoina le atamai o na upu. Ua faapea mai o ia: “O le aufaatasi vavalalata pea ma le faapotopotoga, sa faailoa mai ai ia te aʻu se isi vaega ese o le olaga. Sa manino lelei ai i laʻu vaai le alolofa tele o toeaina Kerisiano, sa leʻi pei i latou o ni leoleo o le malo ae o ni leoleo mamoe.” Ioe, e tāua le vaega e fai a toeaina Kerisiano faapalepale i le faaleleia o faalogona ua faaleagaina.—Isaia 32:1, 2; 1 Tesalonia 2:7, 8.

Talia Fautuaga a Ieova

Sa ōi Paruka le failautusi a le perofeta o Ieremia, ona o omiga tau i faalogona o lona tofiga. Ae ui i lea, sa faasino atu ma le agalelei e Ieova i a Paruka le mea moni. “O oe foi, ua e saili ea mo oe mea tetele? Aua e te sailia; auā faauta, ou te faaoo le malaia i luga o tagata uma, ua fetalai mai ai Ieova; a ou te avatu ia te oe lou ola e fai ma vete i mea uma e te alu i ai.”—Ieremia 45:2-5.

I se gagana tuusaʻo, na faamatala atu ai e Ieova e faapea o saʻiliga manatu faapito a Paruka lava ia na māfua ai lona lē mautonu. E leʻi maua e Paruka le fiafia i lona tofiga mai le Atua ae i le taimi lava e tasi sa ia saʻilia ai mea tetele mo ia. Atonu o le a e mātau mai foʻi e faapea o le laasaga mautinoa lava i le aveesea o le lotovaivai, o le ʻalofia lea o mea e faatosina ese ai ae sapaitalia le mafaufau toʻafilemu lea e maua mai le lotomalie tauatua.—Filipi 4:6, 7.

Sa lē mafatia naʻuā Naomi ua maliu lana tane ona o ona faalogona faanoanoa ina ua maliliu lana tane ma ana tama tama e toʻalua i Moapi. Peitaʻi, e aliali mai sa iai se taimi na iai ni ona lagona tigā e faatatau ia te ia lava ma avā e toʻalua a ana tama. Ina ua fai atu ia i laʻua e toe foʻi, na faapea atu Naomi: “Ua sili loʻu tiga i  lo oulua, ina ua oo mai ia te au le aao o Ieova.” Ina ua taunuu foʻi i Peteleema, sa ia maumauaʻi lava: “Aua tou te taʻua aʻu o Naomi [“O Loʻu Matagofie”], a ia taʻua aʻu o Mara [“Oona”], aua ua matua oona mea ua faia ia te au e Lē ona le malosi uma lava.”—Ruta 1:13, 20.

Ae ui i lea, e leʻi faaesea ai e Naomi ia lava i le tumau ai pea i le faanoanoa—ma faamamao ese mai i a Ieova ma ona tagata. A o iai i Moapi sa ia faalogo ai “ua asiasi Ieova i lona nuu, ma na foai atu mea e ʻai ia te i latou.” (Ruta 1:6) Sa ia malamalama e faapea o le nofoaga sili ona lelei mo ia o le faatasi lea ma tagata o Ieova. E faatasi ai ma Ruta le avā a lana tama, na mulimuli ane toe foʻi atu Naomi i Iuta ma faatonutonu ma le atamai i a Ruta i le auala e ao ona ia gaoioi ai agaʻi i lo latou tauaiga o Poasa, o lē e tausitama ia te ia.

E faapena foʻi i aso nei, o ē faamaoni ua maliliu a latou paaga o loo taulau manuia i le faafetaiaʻia o faalogona ootia e ala i le pisi i le faapotopotoga Kerisiano. I le pei o Naomi, o loo latou uaʻi atu e lē aunoa i mea faaleagaga, le faitauina o le Afioga a le Atua i aso taʻitasi.

Mauaina Aogā Mai le Faatatauina o le Atamai Tauatua

O nei tala i le Tusi Paia ua saunia ai le malamalamaga i le auala e faafetaiaʻia ai āuga o faalogona lē lelei. Sa saʻili atu e Asafo se fesoasoani i le malumalu o Ieova ma sa faatalitali ma le onosai i a Ieova. Na tali atu Paruka i fautuaga ma sa ʻalofia le faatosina ese e le tuʻinanau i mea faitino. Sa faaauau ona tiotio Naomi faatasi ma tagata o Ieova, ma le sauniunia o le fafine talavou o Ruta mo ona faaeaga i le tapuaʻiga i le Atua moni.—1 Korinito 4:7; Kalatia 5:26; 6:4.

E mafai ona e manumalo i le lotovaivai atoa ma isi faalogona lē lelei, e ala i le mafaufau i le manumalo tauatua lea na tuuina mai e Ieova i ona tagata, i tagata taʻitoʻatasi ma i se faapotopotoga o tagata. O lea la, ia manatunatu loloto i le faatinoga silisili o le alofa o Ieova i le saunia o le togiola mo oe. Ia talisapaia le alofa moni o le ʻauuso Kerisiano. Ia taulaʻi atu lou olaga i le lalolagi fou a le Atua lea ua toe o se aga oo mai. Tau ia ina ia mafai ona e tali atu e pei o Asafo: “A o aʻu nei, ou te faalatalata atu i le Atua ou te lelei ai; ua ou faia le Alii o Ieova ma ou malu, ina ia ou taʻuina atu o au galuega uma.”—Salamo 73:28.