Sa Leʻi Tuulafoaʻia i Maʻua Ina ua Tofotofoina lo Ma Faatuatua

O Viki o se pepe teine aulelei tele—e malosi, e aulelei, e ese le tiotio. Ioe, ina ua fanau mai Viki i le tau e totogo ai mea i le 1993, sa leai se mea e gata mai ai lo ma fiafia. Sa matou nonofo i se tamaʻi taulaga i le itu i saute o Suetena, ma sa fiafia lo matou olaga.

E UI i lea, ina ua tasi ma le ʻafa tausaga le matua o Viki, na foliga mai ai ua malepe lo ma lalolagi. Sa fai si umi e lē malosi lelei Viki, ona ma ave ai lea o ia i le falemaʻi. O le a lē taitai galo ia i maʻua le taimi na fai mai ai le fomaʻi ua aafia la ma tama teine i le lukimi (leukemia), o se ituaiga o kanesa e maua ai tamaiti, e aafia ai sela papaʻe o le toto.

Sa lē faigofie ona malamalama ma talia le manatu faapea ua aafia la ma tama teine laʻitiiti i lenei maʻi faigatā. O lea faatoʻā amata ona masani o ia i le lalolagi o loo siʻomia ai, ae o lea ua foliga mai e ono oti. I le taumafai e faamāfanafanaina i maʻua, na faapea mai ai le fomaʻi e iai se togafitiga e feololo lava se taulau manuia e mafai ona fai, lea e aofia ai le chemotherapy atoa ai ma ni nai tuiga toto. O le isi lena mea faigatā na oo mai ia i maʻua.

Ua Tofotofoina lo Ma Faatuatua

E ma te matuā alolofa lava i si a ma tama teine ma e ma te mananaʻo foʻi i se togafitiga faafomaʻi e sili ona lelei mo ia. Peitaʻi, sa matuā lē taliaina lava se tuiga toto. E ma te talitonu maumauaʻi i le Afioga a le Atua, le Tusi Paia, lea e taʻu manino mai ai e ao i Kerisiano ona ‘faamamao mai le toto.’ (Galuega 15:28, 29) Ua uma foʻi ona ma iloa lamatiaga o tuiga toto lava latou. E faitau afe ua maua i faamaʻi ma ua feoti ona o tuiga toto. Na pau lava la le mea e ao ona fai, o se togafitiga lelei tele lea e lē aafia ai se tuiga toto. Talu ai mea e pei ona taʻua, ua amata ai nei loa la ma tauiviga mo le faatuatua.

 O le ā nei se mea o le a ma faia? Na ma faafesootaʻia le Auaunaga o Faamatalaga Faafomaʻi i le lālā o Molimau a Ieova i Suetena ma talosaga atu i ai mo se fesoasoani. * O le taimi lava lea na lafo atu ai ni fax i falemaʻi eseese i Europa atoa, i la ma saʻiliga mo se falemaʻi ma se fomaʻi e mafai ona ia faia le togafitiga o le chemotherapy, e aunoa ma le faaaogāina o se tuiga toto. Sa matuā faalaeiauina i maʻua i le maelega ma le alofa sa faaalia e o ma uso Kerisiano i a latou taumafaiga e fesoasoani mai ia i maʻua. E leʻi tuulafoaʻiina na o i maʻua i la ma tauiviga mo le faatuatua.

E leʻi tele lava ni itula ae maua loa le falemaʻi ma le fomaʻi i Homburg/Saar, i Siamani. Sa faia ni fuafuaga ina ia matou felelei atu iinā i le aso e sosoo ai ina ia ave Viki e vaai i ai le fomaʻi. Ina ua matou taunuu atu, sa faatalia i matou e o matou uso Kerisiano mai le faapotopotoga a Molimau a Ieova iinā i Homburg, atoa ai ma nisi o o matou tauaiga. Sa faafeiloaʻi mai ma le māfana i matou e se sui o le Komiti o Fesootaʻiga Faafomaʻi. Sa matou ō faatasi ma le uso lea i le falemaʻi ma aumai ia i maʻua le lagolagosua atoa sa mafai ona faatinoina. Sa ma lagona le faamāfanafanaina i le iloa faapea e oo lava i se atunuu ese, sa iai foʻi o ma uso faaleagaga e lagolago mai ia i maʻua.

Ina ua ma feiloaʻi atu i le fomaʻi o Kalafi i le falemaʻi, sa toe faamāfanafanaina ai foʻi i maʻua. E malamalama lelei le fomaʻi i o ma tulaga ma sa ia faamautinoa mai o le a ia faia mea uma e mafai, ina ia togafitia ai Viki e aunoa ma se toto e tuiina. E tusa lava foʻi pe paʻū le fua o le vaega o le toto o le hemoglobin i le 5 g/dl, ae o le a ia lotomalie pea e faaauau le togafitiga e aunoa ma se tuiga toto. Sa ia faapea mai foʻi, talu ai ua vave ona iloa le maʻi, atoa ai ma le vave o gaoioiga e avatu ai Viki ia te ia, ua telē ai la se avanoa o le ono manuia o togafitiga. Sa ia taʻutino mai foʻi o le uluaʻi taimi lenei ua ia faia ai se togafitiga o le chemotherapy e aunoa ma le faaaogāina o se tuiga toto i le ituaiga maʻi lea e pei o Viki. Sa matuā ma lotofaafetai ma talisapaia le lototele o le fomaʻi o Kalafi atoa ai ma lona naunautaʻi e fesoasoani mai.

Faafitauli Tau Tupe

O le fesili na tulaʻi mai, o le a faapefea nei ona ma totogia togafitiga o Viki? Sa ma meia ina ua ma iloa o le tau mo togafitiga mo le lua tausaga e 150,000 deutsche marks (maka Siamani). E oo lava i sina vaega itiiti o lena tupe e leʻi ia i maʻua, ae o lea ua tulaʻi mai ua tatau ona amata togafitiga o Viki i le taimi lava lena. Ona o lea ua tuua Suetena ae ma ō atu mo togafitiga i Siamani, sa lē mafai la ona ma maua se inisiua mo togafitiga faafomaʻi mo le lautele. O le mea na tupu, ua ma iai nei ma la ma tama teine ua matuā maʻi lava faatasi ai ma fomaʻi tomai ua sauni e fesoasoani mai, ae sa lē lava sa ma tupe.

Sa fesoasoani mai le falemaʻi ia i maʻua i le faapea mai, e mafai ona amata i le taimi lava lea togafitiga pe a ma totogia muamua le 20,000 maka Siamani ma saini se faamaoniga o le totogiina atu o le isi vaega o le tupe lea e totoe. Sa iai si a ma tupe sa teu, faatasi ai ma le fesoasoani mai o uō ma tauaiga, sa mafai ai ona ma totogiina le 20,000 maka Siamani—peitaʻi o le a faapefea nei le tupe atoa?

O le taimi lava foʻi lea na ma toe manatua ai, sa leʻi tuulafoaʻia na o i maʻua i la ma tauiviga mo le faatuatua. Sa lotomalie se uso faaleagaga, o le taimi lena matou te leʻi masani, e na te totogia faauma le tupe lea sa totoe. Peitaʻi, sa leʻi manaʻomia ona ma faaaogāina lana ofo agalelei mai, ona sa mafai ona ma faia nisi fuafuaga.

Ua Galulue Fomaʻi Atamamai

Na iʻu lava ina faataunuuina le togafitiga o le chemotherapy. Ua mavae atu aso ma vaiaso. I nisi o taimi, e ese le faigatā ma le fitā, e lē gata i la ma tama teine ae mo i maʻua foʻi. I le isi itu, sa ma matuā fiafia lava ma lotofaafetai i taimi uma e na te faaalia mai ai faailoga o le sologa manuia o togafitiga. E tusa ma le valu masina na faia ai le togafitiga o le chemotherapy. O le maulalo na oo i ai le hemoglobin o Viki e 6 g/dl, ma sa tausisi pea le fomaʻi o Kalafi i lana taʻutinoga.

Ua mavae atu nei le ono tausaga, ma o le siakiina mulimuli lava o le suāvai o lona ivitū na iloa ai ua leai se faailoga o le lukimi o iai. Ua avea nei  o ia ma se teine fiafia e aunoa ma se faailoga o lea maʻi faigatā. Ioe, e foliga mai o se mea ofoofogia le toe vave ona malosi atoatoa o Viki. E ma te iloa le toʻatele o isi tamaiti na iai le faamaʻi lava lenei sa feoti, e ui lava sa fai i ai le togafitiga o le chemotherapy ma tuiga toto.

Ua manumalo la ma tauiviga mo le faatuatua, ae na mafai ona o le fesoasoani mai a o ma tauaiga, uso ma tuafāfine Kerisiano, atoa ai ma fomaʻi atamamai. Na aumaia ia i maʻua e le Auaunaga o Faamatalaga Faafomaʻi le lagolago atoatoa i le 24 itula i le aso. Sa faaaogā e le fomaʻi o Kalafi ma lana vaega o latou tomai e fesoasoani ai i a Viki ina ia toe malosi. Ma te lagona le matuā lotofaafetai mo nei mea uma.

Ua Faamalosia lo Ma Faatuatua

Ae o le mea aupito sili lava, e ma te faafetaia lo tatou Atua, o Ieova, mo lana tausiga alofa atoa ma le malosi sa ma mauaina mai i lana Afioga, le Tusi Paia. Pe a toe tepa i tua, e ma te mautinoa le tele o mea ua ma aʻoaʻoina ma faamalosia ai lo ma faatuatua i lenei puapuaga faigatā o le olaga na oo ia i maʻua.

O lo ma faanaunauga mai le loto i le taimi nei, o le faatumauina lea o la ma faiā vavalalata atu i a Ieova le Atua ma ia aʻoaʻoina la ma tama teine i le aogā o le ola, e ōgatusa ma mea e faafinagaloina e Ieova. Ioe, e ma te mananaʻo e avatu ia te ia se tofi lelei faaleagaga o le ola e faavavau i le Parataiso iinei i le lalolagi ua lata mai.—Ua Tusia Mai e se Tasi.

[Faamatalaga pito i lalo]