‘Se Lamatiaga Iloagatā i le Soifua Mālōlōina o Tagata i le Lautele’

O SE suʻesuʻega na faia talu ai nei e faatatau i faiga faaleituaiga i le Initineti, na faaalia ai e faapea, o se mea e ofo ai, ona e lē itiiti mai i le tasi vaetolu o tagata matutua e faaaogāina le Initineti i le Iunaite Setete, ua latou tilofaʻia ma auai i se vaega o le Initineti o loo iai faiga faaleituaiga. E anoanoaʻi tagata ua faamalieina o latou tuʻinanauga faaleituaiga e ala i le Initineti. Ua faapea mai Al Cooper, o se fomaʻi o le mafaufau, lea sa faia le suʻesuʻega: “O se lamatiaga lenei e iloagatā i le soifua mālōlōina o tagata i le lautele ua vave lana sosolo atu, ona e toʻaitiiti ia tagata e latou te amanaʻiaina po o le manatu mamafa foʻi i lamatiaga o faiga faaleituaiga i le Initineti.”

O ai faapitoa lava o loo mafai ona lamatia i faiga faaleituaiga i le Initineti (cybersex)? Ua faapea mai Dr. Cooper: “O i latou ia atonu na saisaitia ma taofiofia o latou tuʻinanauga faaleituaiga i lo latou olaga atoa” ae ua “faafuaseʻi lava ona latou mauaina le tele o avanoa e faamalieina ai ia tuʻinanauga” i le Initineti.

Peitaʻi, o le toʻatele o i latou o loo fai ma masani le tilofaʻia ma auai i faiga faaleituaiga i le Initineti, e latou te manatu o lea gaoioiga e lē āfaina. Ae pe e lē āfaina ea? E pei lava ona faatupuina aʻe e se tagata ua ola faalagolago i fualaau faasāina se tulaga ua lē o toe ila ai lona tino i fualaau faasāina, e toʻatele foʻi tagata ua ola faalagolago atu i faiga faaleituaiga i le Initineti, ona saʻili e faateleina “faiga” faaleituaiga e ala i le Initineti e faamalieina ai lo latou manaʻo tele. Ua oo lava foʻi ina aafia ai a latou galuega o loo faigaluega ai i se tulaga pagatia, faapea ai ma la latou faiā ma a latou paaga!

Peitaʻi ane, o i latou e mananaʻo e faamalieina le Atua, e iai se māfuaaga faaopoopo e ʻalofia ai le tilofaʻia ma auai atu i vaega o le Initineti o loo iai faiga faaleituaiga. Ua faatonu mai le Afioga a le Atua e faapea: “O lenei, ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tuʻinanau leaga, ma le matapeapea, o le ifo i tupua lava lea; o mea ia e oo mai ai le toasa o le Atua.” (Kolose 3:5, 6) Ina ia fasiotia ‘ona itu tino’ e tusa ai ma tuʻinanauga lē mamā faaleituaiga, e manaʻomia ona ati aʻe e se tagata ia le alofa malosi mo Ieova le Atua. (Salamo 97:10) Pe afai ua ia iloa ua maileia o ia i lamatiaga i faiga faaleituaiga i le Initineti, e ao la ona faamalosia lona alofa mo Ieova e ala i le suʻesuʻeina o le Afioga a le Atua, le Tusi Paia. O aufaatasiga lelei ma Molimau a Ieova i le Maota o le Malo i lou vaipanoa e matuā aogā tele, lea e fesoasoani i se tagata e faamalosia ai lana filifiliga maumaututū e faamalieina le Atua.