Lipoti a Ē Faalauiloa le Malo

Faamamāina le Suafa o le Atua Mai Tuuaʻiga Sesē

UA FAAPEA mai le Afioga a le Atua, le Tusi Paia: “Ia lelei a outou amio i luma o nuu ese, o le mea latou te fai upu leaga ai ia te outou, peiseai o tagata amio leaga outou, latou te vaavaai ai i a outou amio lelei, ona latou vivii atu ai lea i le Atua i le aso e asiasi mai ai.” (1 Peteru 2:12) O le mea lea, e taumafai ai lava Kerisiano moni e tausisia amioga lelei ina ia ʻalofia ai le faalumaina o le suafa o Ieova.

I se vaipanoa maotua i Zambia lea ua taʻua o Senanga, na gaoia ai se leitiō a se faiaʻoga mai lona fale. Ona sa talaʻi ai Molimau a Ieova i lea vaipanoa, na tuuaʻia ai i latou e le tamāloa i le gāoi. Sa ia lipotia atu le mataupu i leoleo, ma faapea atu ua gaoia e Molimau lana leitiō. O le faamaoniga na iloa ai sa iai Molimau i lona fale, sa ia tuuina atu se sāvali na ia mauaina i lona fale. Ae peitaʻi, sa matuā lē talitonu leoleo ia te ia. Sa latou fautuaina o ia ina ia alu e suʻesuʻe māeʻaeʻa le mataupu.

O Molimau ia sa talaʻi i le vaipanoa e iai le fale o le faiaʻoga i lena aso, sa faalaeiauina e le ʻautoeaina ina ia ō atu e talanoa i le faiaʻoga e uiga i le mataupu. Sa ō atu nisi o uso ma talanoa atu ia te ia, ma faamatala atu i ai e latou te mananaʻo ina ia faamamāina le suafa o Ieova mai le faalumaina. I la latou talanoaga, na latou taʻu atu ai i le faiaʻoga e faapea, na latou feiloaʻi ma se tama talavou i lona fale ma na latou tuuina ia te ia le sāvali. E mai i lo latou faamatalaina atu o foliga o le tagata, na iloa ai e le faiaʻoga le tama. O le mea moni e lolotu faatasi i laʻua. Sa talanoa atu le faiaʻoga i le tama talavou, ae sa ia faafitia ia tuuaʻiga. Sa talanoaina le mataupu e le faiaʻoga ma mātua o le tama talavou ma toe foʻi atu i lona aiga. E leʻi atoa se itula, ae toe faafoʻi atu e le tinā o le tama le leitiō na gaoia.

Ona ua salamō le faiaʻoga, na ia alu atu ai i le ʻautoeaina ma faatoese i ai ina ia faamagalo o ia ona o le faia o ni tuuaʻiga sesē. Sa talia e toeaina lana faatoesega ae sa fai atu i ai e tatau ona faasilasila faalauaʻitele atu iʻuga o le suʻesuʻega ina ia iloa ai e tagata uma lava e mamā Molimau. Na faia se faasilasilaga i le aʻoga, ma faapea ona taʻumamāina ai le suafa o Ieova mai le faalumaina. Ua mafai ai ona faaauau pea ona talaʻi Molimau a Ieova ma le saʻoloto i lea vaipanoa.

[Faafanua/Ata i le itulau 19]

(Tagaʻi i le lomiga mo le ata atoa)

AFERIKA

Zambia

[Faamatalaga i Ata]

Mountain High Maps® Copyright © 1997 Digital Wisdom, Inc.