Ia Tausisia Lou Olioli i le Auaunaga a Ieova

“Ia outou olioli i le Alii e le aunoa; ou te toe fai atu, ia outou olioli.”—FILIPI 4:4.

1, 2. Na faapefea i se tasi uso ma lona aiga ona tausisia lo latou olioli e ui lava ina mou atu mea uma sa ia i latou?

O IAKOPO, o se Kerisiano ua 70 tausaga o lona soifua, o loo nofo i Sierra Leone, sa faigaluega mamafa i lona olaga atoa. Seʻi manatu i lona olioli ina ua mafai ona ia faaputuina se seleni na lava lelei e faatau ai sona fale talafeagai e fā potu! Peitaʻi, e leʻi umi se taimi talu ona see atu Iakopo ma si ona aiga i lo latou fale fou, ae amata loa fetauaiga i le vā o tagata lava o lena atunuu, ma susunu atoa ai ma lo latou fale. Na mou atu lo latou fale, ae sa leʻi mou atu ai lo latou olioli. Aiseā?

² Sa taulaʻi atu pea mafaufau o Iakopo ma lona aiga, e lē i mea na mou ese atu, ae i mea sa totoe pea. Ua faamatala mai e Iakopo e faapea: “E oo lava i taimi sa sili ona mataʻutia, sa faia pea a matou sauniga, faitau le Tusi Paia, tatalo faatasi, ma fefaasoaaʻi ma isi nai mea itiiti sa ia i matou. Sa mafai ona matou tausisia lo matou olioli auā sa matou taulaʻi atu i la matou faiā matagofie ma Ieova.” E ala i lo latou mafaufau pea i mea lelei sa latou maua, lea e faasilisilia ai le iai o se faiā totino vavalalata ma Ieova, na mafai ai e nei Kerisiano faamaoni ona ‘faaauau pea ona  olioli.’ (2 Korinito 13:11, NW) O le mea moni, sa leʻi faigofie ona onosaia o latou tulaga puapuagatia sa iai. Peitaʻi sa leʻi mou atu lo latou olioli ia Ieova.

3. Na faapefea ona tausisia e nisi uluaʻi Kerisiano lo latou olioli?

³ Sa fetaiaʻi uluaʻi Kerisiano ma puapuaga e talitutusa atu i puapuaga na fesagaʻi ma Iakopo ma lona aiga. Peitaʻi, na tusi atu e le aposetolo o Paulo upu nei i Kerisiano Eperu: “[Na] outou onosai i le vetega o a outou oloa ma le olioli.” Ona faamatala mai lea e Paulo le puna o lo latou olioli: “Ina ua iloa e outou ua ia te outou le oloa e sili ona lelei ma le tumau.” (Eperu 10:34, LF) Ioe, sa iai i na Kerisiano o le uluaʻi senituri se faamoemoe malosi tele. Na latou nofo tatali atu ma le mautinoa i le mauaina o se mea e lē mafai ona vetea—le “pale o le ola” e lē pala i le Malo faalelagi o le Atua. (Faaaliga 2:10) I aso nei, e mafai e lo tatou faamoemoe faa-Kerisiano—pe i le lagi po o le lalolagi—ona fesoasoani ia i tatou e tausisia ai lo tatou olioli e tusa lava pe tatou te fesagaʻi ma tulaga faigatā.

“Ia Olioli i le Faamoemoe”

4, 5. (a) Aiseā na matuā talafeagai lelei ai mo Kerisiano i Roma le fautuaga a Paulo ina ia “olioli i le faamoemoe”? (e) O le ā e ono faapogaia ai le lē manatu mamafa o se Kerisiano i lona faamoemoe?

⁴ Na faalaeiau e le aposetolo o Paulo ona uso talitonu i Roma ina ia “olioli i le faamoemoe” o le ola e faavavau. (Roma 12:12) Sa matuā talafeagai lelei lena fautuaga mo Kerisiano i Roma. A o leʻi atoa se sefulu tausaga talu ona tusi atu Paulo ia i latou, ae latou fesagaʻi loa ma sauāga matuitui, ma o nisi na faataugāina seʻia oo lava ina feoti e ala i le poloaʻiga a le emeperoa o Nero. E mautinoa lava, na avea lo latou faatuatua faapea, o le a foaʻi atu e le Atua le pale o le ola na folafolaina mai, ma itu na faatumauina ai i latou a o fesagaʻi ma mafatiaga. Ae faapefea i tatou i aso nei?

⁵ Ona o i tatou o ni Kerisiano, tatou te faatalitalia ai foʻi le sauāina o i tatou. (2 Timoteo 3:12) E lē gata i lea, ua tatou iloa lelei e oo ia i tatou uma lava “le tausaga ma le mea e tupu ai.” (Failauga 9:11) E mafai e se faalavelave faafuaseʻi ona maliu ai se tasi e pele ia i tatou. E mafai e se maʻi tugā ona maliu ai so tatou matua po o se uō mamae. Seʻi vaganā la ua tatou matuā taulaʻi atu i lo tatou faamoemoe o le Malo, ona lē oo lea o i tatou i se lamatiaga faaleagaga pe a tutupu mai na puapuaga. Ua talafeagai ai la ona tatou fesiligia i tatou lava, ‘Po o oʻu “olioli [ea] i le faamoemoe”? O le ā le tele o se taimi o oʻu mafaufau loloto ai i le faamoemoe? Pe ou te talitonu moni ea i le Parataiso o loo fotuaʻi mai? Pe mafai ona ou faaataina faalemafaufau loʻu iai iinā? Po o tutusa ea loʻu naunau atu i le oo mai o le iʻuga o lenei faiga o mea, e pei o loʻu naunau sa iai ina ua ou faatoʻā aʻoaʻoina le upu moni?’ E tatau lava ona mafaufau mamafa i le fesili mulimuli. Aiseā? Auā pe afai o loo lelei lo tatou soifua mālōlōina, o loo lava ma totoe a tatou tupe e ola ai, ma tatou nonofo i se vaipanoa o le lalolagi atonu e lē o aafia i taua, oge, po o mala faalenatura, e mafai la—atonu i le taimi lenei—ona tatou lē manatu mamafa ai i le manaʻomia tele o le oo mai o le lalolagi fou a le Atua.

6. (a) A o mafatia Paulo ma Sila i puapuaga, o ā mea sa taulaʻi atu i ai o la mafaufauga? (e) E faapefea ona faalaeiauina i tatou i aso nei i le faaaʻoaʻoga a Paulo ma Sila?

⁶ Na fautua atili atu Paulo i Kerisiano i Roma ina “ia onosai i le puapuaga.” (Roma 12:12) Sa lē o se mea fou i a Paulo puapuaga. Sa iai se taimi na ia vaaia ai i se faaaliga se tagata na valaauliaina o ia ina ia ‘sau i Maketonia’ e fesoasoani i tagata iinā ia latou iloa Ieova. (Galuega 16:9) Ona faimalaga atu ai lea o Paulo, faatasi ma Luka, Sila ma Timoteo, i Europa. O le ā na faatalitalia maia na misionare maelega? O puapuaga! Ina ua uma ona latou talaʻi atu i le aai Maketonia o Filipi, ona sasaina ai lea o Paulo ma Sila ma lafoina i le falepuipui. E manino mai, o nisi tagatanuu o Filipi sa lē na ona lē ano ane i le feʻau o le Malo—sa matuā tetee mai ma le lotoa. Pe na avea ea lenei suiga o mea ua tutupu ma itu na mou atu ai le olioli o misionare maelega? E leai. Ina ua uma ona sasaina i laʻua ma lafoina i le falepuipui, e tusa “o le tulua o po ma ao, ua tatalo ai ma pepese [“vivii,” NW] o Paulo ma Sila i le Atua.” (Galuega 16:25, 26) O le mea moni, e leai se olioli na maua e Paulo ma Sila mai tigā o le sasaina o i laʻua, peitaʻi e lē o le mea lena sa taulaʻi atu i ai nei misionare e toʻalua. Sa faaautū atu o la mafaufauga i a Ieova ma auala sa ia faamanuiaina ai i laʻua. E ala i le olioli e “onosai i le puapuaga,” na avea ai Paulo ma Sila ma faaaʻoaʻoga lelei mo o la uso i Filipi ma isi vaipanoa.

7. Aiseā e tatau ai ona faaaofia le faafetai i a tatou tatalo?

 ⁷ Na tusi mai Paulo: “Ia finafinau i le tatalo.” (Roma 12:12) Pe e te tatalo ea pe a iai ni taimi e te popole ai? O ā mea e te tatalo ai? Atonu e te taʻua se faafitauli patino ma ole atu i a Ieova mo se fesoasoani. Ae mafai foʻi ona e faaaofia ai ni upu faafetai mo faamanuiaga ua e mauaina. Pe a tutupu aʻe faafitauli, e avea lo tatou toe mafaufau i le lelei o Ieova i ana feutagaʻiga ma i tatou ma fesoasoani ina ia tatou “olioli [ai] i le faamoemoe.” Na tusi mai Tavita, o lē sa matuā tumu lona olaga i faafitauli, e faapea: “Ieova e, loʻu Atua, e tele lava mea ua e faia, o ou vavega ma ou manatu ia te i matou, e le mafai ona laulauina atu ai ia te oe; ou te fia faailoa ma tautala i ai, a e le mafaitaulia lava.” (Salamo 40:5) Pe afai e pei i tatou o Tavita, i lo tatou lē aunoa ona mafaufau loloto i faamanuiaga tatou te maua mai i a Ieova, o le a mafai moni lava ona tatou olioli.

Ia Tausia Pea se Uiga Mautinoa

8. O le ā e fesoasoani i se Kerisiano ina ia fiafia ai pea a o fesagaʻi ma sauāga?

⁸ Ua faalaeiau mai Iesu i ona soo ina ia tausia pea se uiga mautinoa pe a latou fetaiaʻi ma tofotofoga eseese. Ua ia fetalai mai: “Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o aʻu.” (Mataio 5:11) O le ā sa tatou māfuaaga e fiafia ai a o fesagaʻi ma ni tulaga faapena? O lo tatou mafaia lea ona lavatia o teteega o se faamaoniga lena ua ia i tatou le agaga o Ieova. Na taʻu atu e le aposetolo o Peteru i ona uso Kerisiano i ona aso: “Afai e upuleagaina outou ona o le suafa o Keriso, amuia outou; auā o loo tumau ia te outou le Agaga o le mamalu, o le Agaga o le Atua.” (1 Peteru 4:13, 14, LF) O le a fesoasoani foʻi Ieova ia i tatou, e ala mai i lona agaga, ina ia tatou onosai ai ma o le iʻuga, e tausisia ai pea lo tatou olioli.

9. O le ā sa fesoasoani i nisi uso ina ia maua ai ni māfuaaga latou te olioli ai, a o faafalepuipuiina ona o lo latou faatuatua?

⁹ E tusa lava pe tatou te fetaiaʻi ma tulaga sili ona faigatā, e mafai lava ona tatou maua māfuaaga e olioli ai. Na iloa e se Kerisiano e suafa ia Atofu le moni o lena manatu. E nofo o ia i se atunuu sa faasā ai le galuega a Molimau a Ieova mo le tele o tausaga. Na puʻeina faapagota Atofu ma nisi o ana aumea ma faasalaina i le falepuipui mo ni taimi uumi, talu ai sa lē mafai ona latou faafitia o latou talitonuga faale-Tusi Paia. Sa faigatā le olaga i le falepuipui, peitaʻi, i le pei o Paulo ma Sila, sa iai i a Atofu ma ana aumea ni māfuaaga e faafetai atu ai i le Atua. Na latou taʻua faapea, o mea na tutupu ia i latou i le falepuipui, na aogā lea e faamalosia ai lo latou faatuatua ma faatupu aʻe ai uiga tāua faa-Kerisiano, e pei o le limafoaʻi, le tigā alofa, ma le alofa faaleuso. Mo se faaaʻoaʻoga, ina  ua maua e se pagota sana afīfī mai lona aiga, sa ia faasoasoa ana mea na maua ma isi ona uso talitonu, o ē na manatu i nei sauniuniga faaopoopo o ni mea e mai i a Ieova, le Foaʻi sili o “mea lelei uma e foaifuaina mai, atoa ma mea alofa uma e atoatoa ona lelei.” O na gaoioiga agalelei sa lē gata ina olioli ai lē na foaʻi atu, ae faapea foʻi i ē na foaʻi atu i ai. O le mea tonu lava la lea na tupu ia i latou mo se fuafuaga ina ia gausia ai lo latou faatuatua, na avea ma itu na atili ai ona latou malolosi faaleagaga!—Iakopo 1:17; Galuega 20:35.

10, 11. Na faapefea ona faafoe e se tuafafine le tuʻifesiliina o ia, lea na sosoo ane ai ma le faasalaina mo se taimi umi i le falepuipui?

¹⁰ O Ela e nofo foʻi i se atunuu ua leva ona faasā ai le galuega o le Malo, na puʻeina faapagota o ia ona o lona tufa atu i isi o lona faamoemoe faa-Kerisiano. E valu masina o tuʻifesili pea o ia. Ma i le iʻuga ina ua oo ina faia lona faamasinoga, sa faasalaina ai o ia mo le sefulu tausaga i se falepuipui lea sa leai ma nisi lava tagata tapuaʻi a Ieova na iai. O le taimi lena e na o le 24 tausaga o Ela.

¹¹ O le mea moni, sa leʻi manaʻo Ela e faaalu uma le tele o lona olaga talavou i se falepuipui. Peitaʻi, talu ai sa lē mafai ona ia suia lona tulaga na iai, o lea na ia filifili ai e suia lona mafaufau. O lea, sa amata ai ona ia manatu i le falepuipui o lana lava lea oganuu totino e molimau atu ai. Fai mai a ia: “Sa telē lava se talaʻiga na manaʻomia ona fai, o lea na pei ai lava o le emo o le mata le mavae atu o tausaga.” Ina ua mavae le silia ma le lima tausaga, sa toe fesagaʻi ai foʻi Ela ma tuʻigafesili. Talu ai sa iloa lelei e tamāloloa na tuʻifesiliina Ela, le lē mafai e le falepuipui ona tineia lona faatuatua, na latou faapea atu ai ia te ia: “E lē mafai ona matou tatalaina oe; o lena lava e leʻi suia ou uiga.” Na tali ma le maumauaʻi atu Ela: “Ae o lea ua ou sui! O lea ua sili atu ona lelei oʻu uiga i le taimi lenei na i lo o le taimi na ou faatoʻā sau ai i le falepuipui, ma ua sili atu ona malosi loʻu faatuatua i le taimi lenei na i lo o le taimi muamua!” Ona ia toe faapea atu lea: “Pe afai tou te lē mananaʻo e tatala aʻu, o le a ou nofo ai pea iinei seʻia silasila mai Ieova ua talafeagai ona laveaʻiina aʻu.” Sa leʻi mafai ona aveesea le olioli o Ela e le lima ma le ʻafa tausaga lea na faafalepuipui ai o ia! Sa mafai ona ia lagona le lotomalie i so o se tulaga lava sa iai o ia. Pe mafai ea ona e aʻoaʻoina se lesona mai lana faaaʻoaʻoga?—Eperu 13:5.

12. O le ā e mafai ona aumaia i se Kerisiano le filemu o le mafaufau i tulaga faigatā?

¹² Aua neʻi manatu faapea o loo ia Ela se meaalofa uigaese, lea ua mafai ai ona ia fesagaʻia na luʻi. I le faasino atu e Ela i le tele o masina na tuʻifesili ai o ia a o leʻi lauina mai lona faasalaga, ua ia taʻutino mai ai: “Ou te manatua le tete o loʻu auvae, ma sa pei oʻu faalogona o se tamaʻi manulele o loo gatete i le fefe.” Peitaʻi ane, ua malosi le faatuatua o Ela ia Ieova. Ua ia iloa lelei le tatau ona faalagolago atoatoa atu ia te ia. (Faataoto 3:5-7) O le iʻuga, ua sili atu ai ona moni le Atua ia te ia na i lo le taimi muamua. Ua ia faamatala mai: “O taimi uma lava sa ou ulu atu ai i le potu sa tuʻifesili ai aʻu, sa ou lagona le filemu o loʻu mafaufau. . . . O le atili mataʻutia lava o le tulaga o mea, o le atili tele foʻi lena o le filemu na oo mai.” Sa avea Ieova ma puna o lena filemu. Ua faamatala mai e le aposetolo o Paulo e faapea: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia [“filemu,” NW] foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”—Filipi 4:6, 7.

13. O le ā e faamautinoa mai ai e faapea, pe a tatou fesagaʻi ma ni puapuaga, o le a tatou maua le malosi e onosaia ai?

¹³ Mulimuli ane na toe tatala mai i tua Ela, ae sa ia tausisia pea lona olioli e ui i faigatā. Sa ia faia lenei mea, e lē i sona lava malosi, ae i le malosi na foaʻi atu e Ieova ia te ia. O le tulaga tonu foʻi lena i le aposetolo o Paulo, o lē na tusi mai: “O lea ua tele ai lava loʻu fiafia i le mitamita i mea ua ou vaivai ai, ina ia tumau i oʻu luga le mana o Keriso. . . . auā pe a ou vaivai, ona ou malosi ai lea.”—2 Korinito 12:9, 10.

14. Faataʻitaʻi mai pe faapefea i se Kerisiano ona maua le manatu saʻo e faatatau i se tulaga faigatā, ma o le ā foʻi se iʻuga e ono oo i ai.

¹⁴ O omiga o loo e tofo totino i ai i aso nei atonu e tau ese mai omiga ia ua tatou talanoaina iinei. E ui i lea, po o ā lava na omiga, ae e faigatā ona onosaia. Mo se faaaʻoaʻoga, atonu e faitio soo lou pule i au galuega—e sili atu na i lo o lona faitio i galuega a isi tagata e ese a latou lotu. Atonu e lē faigofie  mo oe ona toe suʻe se isi au galuega. Pe faapefea la ona e tausisia lou olioli? Seʻi manatua Atofu ma ana aumea, lea na avea lo latou faafalepuipuiina ma itu na latou taumafai ai ina ia faatupu aʻe uiga matuā tāua. Pe afai e te faia se taumafaiga faamaoni e faafiafia lou pule—e tusa lava po o se pule e “faigatā ona faamalie”—o le a e faatupu aʻe ai na uiga faa-Kerisiano e pei o le tumau ma le onosai. (1 Peteru 2:18, faatusatusa i le NW) E lē gata i lea, atonu e oo ai ina avea oe o se tagata faigaluega e sili ona aogā, lea e mafai ai ona tele ni avanoa e te maua ai i se aso se galuega e te fiafia i ai. Seʻi o tatou talanoaina nei nisi auala e mafai ona tatou tausisia ai lo tatou olioli i le auaunaga i a Ieova.

O le Faafaigofieina e Iʻu ai i le Olioli

15-17. O le ā le mea na iloa e se tasi ulugalii e mafai ona aumaia ai se mapusaga, e ui lava e lē o mafai ona aveesea atoatoa le puna o omiga?

¹⁵ Atonu e lē tele ni au filifiliga i se ituaiga o galuega totogi e te maua, po o le mea foʻi e te faigaluega ai, peitaʻi atonu e iai isi vala o lou olaga e mafai ona e faia ai ni filifiliga. Seʻi manatu i le mea lenei na tupu.

¹⁶ Na valaaulia e se ulugalii Kerisiano se toeaina ina ia latou fai taumafataga faatasi i lo la fale. A o faagasolo le latou afiafi, na sasaa atu ai faalogona o le uso ma lana avā i le toeaina e faapea, e leʻi leva tele atu na matuā mafatia ai i laʻua ona o omiga o le olaga. E ui sa taufai faigaluega uma i laʻua i ni galuega na matuā alu uma ai o la taimi, ae sa lē faigofie mo i laʻua ona toe saʻili atu mo se isi galuega. Sa la tau manatu po o le ā le umi o le a mafai ai ona la talitalia lenei tulaga.

¹⁷ Ina ua la talosagaina se fautuaga, na tali atu i ai le toeaina, “Ia faafaigofie.” E faapefea? O aso taʻitasi sa oo atu lava i le tolu itula e faaaluina e le tane ma lana avā e faimalaga atu ai i le galuega ma toe foʻi i le fale. Talu ai sa masani lelei le  toeaina i le ulugalii, o lea na ia fautuaina ai i laʻua pe lē lelei ona mafaufau e see atu e nonofo i se vaipanoa e latalata i a la galuega, ina ia faaitiitia ai le tele o le taimi o loo faaalu i le ō atu ma le toe foʻi mai i galuega i aso taʻitasi. Atonu e mafai ona faaaogā le taimi lea ua sefe mai e fai ai nisi mea o loo sili atu ona tāua—pe tau lava foʻi ina fai ai sina mālōlōga. Pe afai ua tau mou atu lou olioli ona o omiga o le olaga, aiseā e te lē tilofaʻia ai pe faamata e mafai ona e maua se mapusaga e ala i le faia o ni fetuutuunaʻiga?

18. Aiseā e matuā tāua ai le mafaufau muamua ma le faaeteete a o leʻi faia ni filifiliga?

¹⁸ O le isi auala e faaitiitia ai omiga, o le mafaufau ma le faaeteete lea a o leʻi faia ni filifiliga. Mo se faaaʻoaʻoga, na filifili se tasi Kerisiano e fau sona fale. Na ia filifilia se ata e sili ona faigatā e fau i ai lona fale, e ui e na te leʻi fausia muamua lava se fale. Ua ia iloa nei, na semanū na te ʻalofia uma ni faafitauli lē manaʻomia pe ana fai sa ia ‘faautauta i ona ala’ a o leʻi filifilia le ata e fau i ai lona fale. (Faataoto 14:15) Sa malie se isi Kerisiano na te faamaonia se nonōgatupe mo sona uso talitonu. E tusa ai ma le maliega, pe afai e lē mafai e lē o loo nonōtupe ona ia toe totogi le tupe, e tatau la ona totogi e lē na faamaoniaina. I le taimi muamua, sa lelei lava le gasologa o mea uma, peitaʻi na oo mai le taimi ua lē savali ai lē na nonōina le tupe i ana upu. Sa oo ina lē manofo lē na nonōina atu le tupe ma tāpā mai ai lē na faamaonia ina ia ona totogi atoa atu le nonōgatupe. Sa matuā omia ai lava iinā lē na faamaonia le nonōgatupe. Faamata e mafai ona ʻalofia lena mea pe ana fai na te iloiloina ma le faaeteete vala uma a o leʻi malie na te tauaveina le tiute tauave mo le aitalafu?—Faataoto 17:18.

19. O ā nisi o auala e mafai ona tatou faaitiitia ai mafatiaga mai omiga i o tatou olaga?

¹⁹ Pe a tatou vaivai, seʻi aua lava neʻi o tatou manatu faapea e mafai ona maua se mapusaga mai omiga ma toe maua lo tatou olioli, e ala i le faaitiitia o taimi mo suʻesuʻega totino o le Tusi Paia, le auaunaga i le fanua, ma le auai i sauniga. Ia aua lava, auā o auala nei e matuā tāua e mafai ona tatou mauaina ai le agaga paia o Ieova, lea e fua mai ai le olioli. (Kalatia 5:22) O gaoioiga faa-Kerisiano o ni mea e faafouina ai pea, ma e masani lava ona lē soona vaivai ai. (Mataio 11:28-30) E matuā foliga mai lava o gaoioiga o le olaga nei po o faafiafiaga ma faiga mālōlōga, ae lē o ni gaoioiga faaleagaga, lea o loo māfua ai lo tatou vaivai. O le faamasani e vave moe i se taimi talafeagai e mafai ona fesoasoani ia i tatou e toe malosi ai. E matuā telē lava se aogā o le faia o sina mālōlōga faaopoopo. O le masani lava a N. H. Knorr, o lē na auauna o se tasi o le Vaega Pule a Molimau a Ieova seʻia oo i lona maliu, ona ia taʻu atu i misionare e faapea: “Pe a oo ane ia te outou lagona o le faavaivai, o le mea muamua lava e tatau ona fai, o se mālōlōga. O le a tou maofa i le faigofie ona toe faaleleia o so o se faafitauli, pe a e toe alafaʻi mai i se faiga mālōlōga lelei i le pō!”

20. (a) Otooto mai nisi o auala e mafai ona tatou tausisia ai lo tatou olioli. (e) O ā ni māfuaaga e mafai ona e mafaufauina ina ia e olioli ai? (Tagaʻi i le pusa i le itulau e 17.)

²⁰ Ua iai i Kerisiano se faaeaga e auauna atu i “le Atua fiafia.” (1 Timoteo 1:11, faatusatusa i le NW) E pei ona tatou mātauina, e mafai ona tausisia lo tatou olioli e tusa lava pe fesagaʻi ma faafitauli matuiā. Seʻi o tatou taulaʻi atu pea i le faamoemoe o le Malo o loo taatia mai i o tatou luma, ia fetuutuunaʻi o tatou mafaufauga pe a talafeagai, ma ia faafaigofie o tatou olaga. Ona tusa lava lea po o le ā le tulaga tatou te iai, ae o le a tatou talisapaia upu a le aposetolo o Paulo e faapea: “Ia outou olioli i le Alii e le aunoa; ou te toe fai atu, ia outou olioli.”—Filipi 4:4.

Seʻi Manatunatu i Fesili Nei:

• Aiseā e tatau ai i Kerisiano ona naunautaʻi e taulaʻi atu i le faamoemoe o le Malo?

• O le ā e mafai ona fesoasoani ia i tatou ina ia tausisia ai lo tatou olioli a o fesagaʻi ma tulaga faigatā?

• Aiseā e tatau ai ona tatou taumafai e faafaigofie o tatou olaga?

• O ā itu ua faafaigofie ai e nisi o latou olaga?

[Fesili mo le Suʻesuʻega]

[Pusa/Ata i le itulau 17]

Isi Māfuaaga e Olioli Ai

Ona o i tatou o ni Kerisiano, e tele māfuaaga tatou te olioli ai. Seʻi iloiloina manatu nei:

1. Ua tatou iloa Ieova.

2. Ua tatou aʻoaʻoina le upu moni o le Afioga a le Atua.

3. E mafai ona faamagaloina a tatou agasala e ala i lo tatou faatuatua i le taulaga a Iesu.

4. O loo pule le Malo o le Atua—ua lē pine ona oo mai lea o le lalolagi fou!

5. Ua aumaia e Ieova i tatou i se parataiso faaleagaga.

6. E tatou te olioli i aufaatasiga mamā faa-Kerisiano.

7. Ua tatou maua le faaeaga o le faia o se sao i le galuega talaʻi.

8. O loo tatou ola, ma o loo maua foʻi so tatou malosi.

E fia nisi māfuaaga mo le olioli e mafai ona e taʻu maia?

[Ata i le itulau 13]

Sa olioli Paulo ma Sila e ui ina sa iai i le falepuipui

[Ata i le itulau 15]

Po o taulaʻi atu ea lau silasila i le faamoemoe olioli o le lalolagi fou a le Atua?