Le Tusi Paia i se Tusi ua Tuufaatasia e Tasi

INA ia faia ni kopi o le Tusi Paia, sa taulamua lava uluaʻi Kerisiano i le faaaogāina o le codex (manusikulipi tusilima anamua)—o se tusi, ae e lē o se tusi tāʻai. Peitaʻi, e leʻi vave ona gaosia e Kerisiano se tusi e tasi o loo iai uma tusi o le Tusi Paia. Sa amata i le senituri lona ono e Flavius Cassiodorus se laasaga tāua i le gaosiaina faalauaʻitele o Tusi Paia ua tuufaatasia i se tusi e tasi.

Na fanau mai Flavius Magnus Aurelius Cassiodorus pe ā o le 485-490 T.A. mai i se aiga mauʻoa i Calabria, i le faatausiʻusiʻuga i le pito i saute o Italia i aso nei. Na soifua o ia i se vaitaimi vevesi o le talafaasolopito o Italia a o nofoia e tagata Goth, ma mulimuli ane o tagata Byzantine, le penisula. Ina ua pe ā o le 60 po o le 70 o ona tausaga, na amata ai e Cassiodorus le monaseri ma le faletusi e taʻua o le Vivarium e lata ane i lona aiga i Squillace, i Calabria.

O se Tagata Filigā i le Saunia o le Tusi Paia

O se tasi o popolega sa ia Cassiodorus, o le auala e faaoo atu ai i tagata le Tusi Paia. Na tusi le tusitala o talafaasolopito o Peter Brown, e faapea: “I le manatu o Cassiodorus, e tatau ona faaaogā lomiga uma faa-Latina e faaoo atu ai i tagata le Tusi Paia. O mea uma lava na muaʻi faaaogā sa fesoasoani i le suʻesuʻeina ma le kopiina o tusitusiga anamua, na tatau ona faaaogā ina ia malamalama ai i le Tusi Paia ma ia toe kopiina ma le tomai. I le pei o ni paneta ua faatoʻā faatulagaina, na tatau ai i se tulaga lautele i tū ma agaifanua faa-Latina ona faataamilo i le lā telē, o le Afioga lea a le Atua.”

Na aumaia faatasi e Cassiodorus ia ʻaufaaliliu ma tagata popoto i le kalama i le monaseri o Vivarium ina ia tuufaatasia atoa ma vaavaaia le galuega fitā o le sauniunia o le Tusi Paia. Na ia tuu atu le vaaiga o le galuega i na o ni nai tagata popoto. Sa tatau ona latou ʻalofia le vave faasaʻoina o ni faamatalaga ua manatu i ai o ni mea sesē a le ʻautusiupu. Afai e tulaʻi mai se fesili e faatatau i le kalama, sa tatau ona piivaa atu i mea o i manusikulipi tuai o le Tusi Paia na i lo o le auala na faaaogā lautele ai i le faa-Latina. Na faatonu atu Cassiodorus, e faapea: “O mea uigaese faalekalama . . . e ao lava ona tausia pea, auā o faamatalaga ua iloa ona faagaeeina e lē tatau ona see ese mai le mea na amata mai ai . . . E ao ona tausi auala faale-Tusi Paia o loo tusia ai, o ona faaupuga faafaatusa ma alagaupu, e tusa pe lē logoleleia i le faa-Latina, ma e ao foʻi ona faia faapena i le faiga ‘faa-Eperu’ e tusia ai igoa.”—The Cambridge History of the Bible.

Le Codex Grandior

Na faatonuina i latou na kopiina le Tusi Paia i le monaseri o Vivarium ina ia gaosia ni lomiga eseese se tolu o le Tusi Paia i le faa-Latina. O se tasi o nei lomiga, i tusi e iva, atonu sa iai tusitusiga o le faa-Latina Tuai, o se faaliliuga na aliaʻi mai e lata i le faaiʻuga o le senituri lona lua. O le lomiga lona lua sa maua ai le Vulgate faa-Latina, lea na faamāeʻaina e Ierome e pe ā o le amataga o le senituri lona lima. O le lona tolu, o le Codex Grandior, o lona uiga o le “codex lapoʻa,” sa fafau aʻe i tusitusiga mai Tusi Paia e tolu. O lomiga mulimuli e lua sa tuufaatasia ai le Tusi Paia atoa i se tusi e tasi.

 E foliga mai o Cassiodorus le tagata muamua na gaosia Tusi Paia faa-Latina i se tusi e tasi, lea na taʻua o pandectae. * E lē taumatea na ia iloa le aogā o le tuufaatasia o tusi o le Tusi Paia i se tusi e tasi, ma ʻalofia ai le galuega faaalu taimi o le suʻeina o le tele o tusi eseese.

Mai i Italia i Saute i Motu o Peretania

A o leʻi umi talu ona maliu Cassiodorus (pe ā o le 583 T.A.), ae amata loa le malaga a le Codex Grandior. I lena taimi, o loo iai le manatu e faapea o se vaega o faaputugatusi Vivarium sa siitia atu i le faletusi Lateran i Roma. I le 678 T.A., o se pule o monike tamāloloa Anglo-Saxon (o se tasi o vaega o tagata Siamani sa nofoia Peretania) e igoa ia Ceolfrith, na ia sau ma aumai i Motu o Peretania mai Roma le Codex Grandior. O le auala lenei na oo mai ai le codex i monaseri e lua ia sa faatonutonuina e Ceolfrith, o Wearmouth ma Jarrow, lenei ua avea ma Northumbria, i Egelani.

E lē taumatea sa matuā naunau Ceolfrith ma ana monike i le Tusi Paia na tuufaatasia i se tusi e tasi a Cassiodorus, o ē sa mautinoa le fiafia i le auala faigofie e faaaogā ai. O lea, i totonu o le nai sefulu tausaga, sa latou gaosia ai isi Tusi Paia atoatoa e tolu i ni tusi taʻitasi. Ua na o le pau le kopi o nei tusi o loo iai i le taimi nei o se manusikulipi telē e taʻua o le Codex Amiatinus. E iai itulau e faia i paʻumanu e 2,060, o itulau taʻitasi e pe ā ma le 20 i le 13 inisi [51 i le 33 senitimita]. Faatasi ai ma ona faavaa, e 10 inisi [25 senitimita] le mafiafia ma e silia ma le 75 pauna [34 kilokalama] le mamafa. O le Tusi Paia faa-Latina atoatoa lenei ua tuufaatasia i se tusi e tasi e sili ona tuai o loo maua nei. O le Tagata Suʻesuʻe i le Tusi Paia na taualoa i le 19 senituri o Fenton J. A. Hort, sa mātauina lenei codex i le 1887. Sa faapea mai Hort: “E oo lava i se tagata o loo soifua i aso nei, e faigatā ona lē maofa i lenei [manusikulipi] matagofie.”

Toe Foʻi i Italia

Ua leiloa nei le uluaʻi Codex Grandior lea na faatonu atu Cassiodorus ina ia gaosia. Ae o le codex na maua mai ai, o le Codex Amiatinus, lea na saunia e ʻautusiupu Anglo-Saxon, e leʻi umi ae toe foʻi i Italia ina ua uma ona gaosia. A o toeitiiti oo i lona maliu, na filifili Ceolfrith e toe foʻi i Roma. Sa ia alu ma ave se tasi o ana manusikulipi e tolu o le Tusi Paia faa-Latina e faimeaalofa ai i le pope o Kelekolio II. Na maliu Ceolfrith a o alu lana malaga, i le 716 T.A., i Langres, i Falani. Ae sa malaga atu pea lana Tusi Paia faatasi ma isi o le ʻaumalaga. Sa mulimuli ane tuua le codex i le faletusi i le monaseri o Mauga o Amiata, i Italia tutotonu, lea e maua ai le igoa o Codex Amiatinus. I le 1782, na siitia atu ai le manusikulipi i le Medicean-Laurentian Library i Florence, i Italia, lea o loo tumau ai ona avea ma se tasi o vaega e sili ona tautele o le faletusi.

I le ā le auala ua aafia ai i tatou i le Codex Grandior? Talu mai le taimi o Cassiodorus, ua faateleina ona mananaʻo ia tusiupu ma tagata lolomi tusi e gaosia ia Tusi Paia ina ia tuufaatasia i se tusi e tasi. E oo mai i le asō, o le iai o le Tusi Paia i lenei faiga ua faafaigofie ai mo tagata ona tilofaʻiaina ma iʻu ai ina maua mai i lona mana ia aogā i o latou olaga.—Eperu 4:12.

[Faamatalaga pito i lalo]

[Faafanua i le itulau 29]

(Tagaʻi i le lomiga mo le ata atoa)

Le malaga a le Codex Grandior

Monaseri o Vivarium

Roma

Jarrow

Wearmouth

Le malaga a le Codex Amiatinus

Jarrow

Wearmouth

Mauga o Amiata

Florence

[Faamatalaga i Ata]

Mountain High Maps® Copyright © 1997 Digital Wisdom, Inc.

[Ata i le itulau 30]

Pito i luga: Codex Amiatinus Itu agavale: Le ata o Esera i le Codex Amiatinus

[Faamatalaga i Ata]

Biblioteca Medicea Laurenziana, Firenze