“Na Agalelei Tele Mai Ieova ia te Aʻu!”

I SE afiafi sili ona matagofie ia Mati o le 1985, na mātauina ai e tane ma fafine o le Matagaluega o Tusitusiga o le ofisa ulu o Molimau a Ieova i Niu Ioka i le Iunaite Setete o Amerika, se matatiʻa na ausia. Na atoa ai le 60 tausaga o le faiva faataimi atoa a Karl F. Klein. I lona faagaeetia tele, na faapea mai ai le uso o Klein: “Na agalelei tele mai Ieova ia te aʻu!” Na ia faaalia faapea o le Salamo 37:4 o se mau o le Tusi Paia e sili ona ia fiafia i ai. Mulimuli ane, na ia faafiafiaina tagata uma i le tāina o lana selo.

Mo le isi 15 tausaga, na faaauau ai pea e le uso o Klein ona galue e avea o se sui o le vaega e gafa ma tusitusiga ma auauna i le Vaega Pule a Molimau a Ieova. Ia Ianuari 3, 2001, i le 95 tausaga o lona matua, na faaiʻuina ai ma le faamaoni e Karl Klein lana auaunaga faalelalolagi.

Na fanau Karl i Siamani. Na siitia atu lona aiga i le Iunaite Setete, ma na soifua aʻe Karl i se pitonuu o Chicago, i Illinois. A o itiiti lava o ia, na oo ina matuā fiafia Karl ma lona uso laʻitiiti o Ted i le Tusi Paia. Na papatiso Karl i le 1918, ma o mea e faagaeetia ai na faalogo i ai i le tauaofiaga a Tagata Aʻoga o le Tusi Paia i le 1922, na faaosofia ai o ia e naunau i le faiva i le fanua mo le olaga atoa. Sa ia lē manaʻo e misia se vaiaso e aunoa ma lona auai i le galuega talaʻi, ma sa ia faia faapea seʻia oo lava i vaiaso mulimuli o lona soifuaga.

Na avea Karl ma sui o le ʻaufaigaluega a le ofisa ulu i le 1925, ma sa galue muamua i le vaega e lolomiina ai lomiga. Sa naunau fiafia moni lava o ia i musika, ae mo ni tausaga, na ia tāina ai le selo i se faaili lea na mataʻina i faasalalauga faa-Kerisiano i le leitiō. Ina ua mavae lena, ona ia galue lea i le Matagaluega o le Auaunaga, ae na patino lava le olioli i le aufaatasiga ma lona ovasia o T. J. Sullivan. I lena taimi, na faaipoipo ai Ted ma na auai atu o ia ma lana avā o Doris, i le galuega faamisionare i Puerto Rico.

Sa galue Karl Klein mo le ʻafa senituri i le Matagaluega o Tusitusiga, lea na ia faia ai se sao mataʻina ona e fiafia tele o ia e faia ni saʻiliʻiliga ma sa maua ai se malamalamaga loloto o le Tusi Paia. I le 1963, na faaipoipo atu ai Karl ia Margareta, o se misionare mai Siamani na auauna i Polivia. I le lagolagosua ma le alofa a lana avā, aemaise lava ina ua oo ia te ia faafitauli tau i le soifua mālōlōina, na mafai ai pea e ia ona fua tele mai ina ua mavae le tele o tausaga e litaea ai le toʻatele o tagata. O le uiga masani o Karl o le tautala faamaoni, faatasi ai ma le aasa o se tagata faimusika, lea na saosaolaumea i lauga mataʻina i faapotopotoga ma tauaofiaga. A o toeitiiti lava oo i lona maliu, na ia taʻitaʻia ai le talanoaina o le mau o le taeao mo le aiga Peteli toʻatele i Niu Ioka, mo le fiafia ma ia aogā mo tagata uma.

O le toʻatele o tagata e masani ona faitauina Le Olomatamata o le a manatuaina talaaga i le olaga o le uso o Klein, o ni faamatalaga e mataʻina o mea na tutupu ia te ia lea na lomia i le lomiga faa-Peretania o Oketopa 1, 1984. O le a e olioli i le faitauina po o le toe faitauina foʻi o lena tala, ma teu i le mafaufau faapea o lē na tusia na faamatalaga, na faaaluina le isi sefulu lima tausaga i le avea o se Kerisiano faamaoni ma le tuutoina atu.

Ona o ia o se tagata ua faauuina a le Alii, na faanaunau ai ma le lotoatoa le uso o Klein e pule faatasi ma Keriso i le lagi. Ua ia i tatou uma māfuaaga e talitonu ai faapea, ua faataunuuina nei e Ieova lena faanaunauga.—Luka 22:28-30.

[Ata i le itulau 31]

Karl i le 1943 ma T. J. Sullivan ma Ted ma Doris

[Ata i le itulau 31]

Karl ma Margareta, ia Oketopa 2000