O Aafiaga i ni Fafine se Toʻalua Ina ua Maliliu a La Tane

O SARA, o se fafine ua maliu lana tane ma e nofo o ia i Ausetalia. Ina ua maliu lana tane i ni nai tausaga ua mavae, na faafuaseʻi lava ona suia atoatoa uiga o Sara. “Na matuā lofitūina aʻu i mafatiaga ina ua ou iloa o lea ua faafuaseʻi ona motusia le ma mafutaga ma si aʻu paaga ma laʻu uō mamae. E mautinoa lava ou te leʻi manatuaina pe na faapefea ona ou toe oo i le fale ina ua ou alu ese mai i le falemaʻi ae po o ā foʻi aʻu mea na fai mulimuli ane ai i lena aso. I ni nai vaiaso na sosoo ai, sa liua ai loʻu fefe ma avea ma tigā sa ou logo pea i ai i loʻu tino.”

E iai se uō a Sara, e matua atu ia te ia, o Eleni lona suafa, ma ua tusa ma le ono tausaga talu ona maliu foʻi lana tane. E ono masina na tausi ai e Eleni le maʻi o si ana tane o Tavita, ae maliu loa i le kanesa. Sa matuā ogaoga faanoanoaga o Eleni, o lea e leʻi leva lava ona maliu lana tane, ae tauaso loa o ia mo sina vaitaimi. I le lua tausaga mulimuli ane, sa matapogia ai o ia i se nofoaga faitele. Sa leʻi maua e lana fomaʻi sona maʻi. Peitaʻi, na iloa e le fomaʻi faapea sa matuā oono lava i totonu e Eleni ona faavauvauga, o lea na ia fautuaina ai Eleni ina ia alu i le fale ma taumafai e tagi. “Na umi se taimi o oʻu taumafai e manumalo mai i loʻu faavauvau,” o le taʻutinoga lea a Eleni, ma ia faaopoopo mai ai e faapea, pe a lagona le tuua toʻatasi, “na oo ai lava ina fai ma aʻu masani loʻu alu i le ma potumoe ma tanumaʻi loʻu ulu i ofu o Tavita.”

Ioe, e mafai ona avea le maliu o se paaga e pele ma faapogai o ni uiga eseese e faaalia, auā o le avea ma se fafine ua oti lana tane e aofia ai ni mea e tele atu na i lo o le tau ina ola e aunoa ma se tane. Mo se faataʻitaʻiga, na umi se taimi o iai ia Sara ni faalogona faapea ua matuā ese lava o ia. I le pei o le toʻatele o isi fafine e leʻi leva ona fesagaʻi ma faavauvauga ina ua maliliu a latou tane, sa faapena foʻi ona oo ia Sara ni faalogona lē malupuipuia, ma le lē saogalemu. Ua faapea mai Sara: “Talu ai ua ou masani i le fai uma e laʻu tane o a ma faaiʻuga, o lea na faafuaseʻi ai lava ona tuua na o aʻu e faia na faaiʻuga. Sa lē lelei saʻu moe. Sa ou lē lavā ma vaivaigofie. Sa faigatā tele ona ou iloa po o le ā tonu se mea o le a fai.”

O aso taʻitasi i le lalolagi atoa o loo tutupu ai foʻi mea faapena e pei ona sa tutupu ia Sara ma Eleni. O maʻi, faalavelave faafuaseʻi, taua, fasiotiga tagata i vā o lanu, o tupuaga ma aganuu eseese ma faiga sauā i le lautele, ua māfua ai ona faateleina le aofaʻi o fafine ua feoti a latou tane. * E toʻatele nisi o nei fafine o loo nānā lava ia i latou o latou mafatiaga, ona o le lē iloa po o le ā se mea o le a fai. O le ā se mea e mafai e uō ma tauaiga ona fai e fesoasoani atu ai ia i latou na, ina ia tau faamasani ai i le tulaga ua feoti a latou tane? O loo iai i le mataupu o sosoo mai nisi o fautuaga e ono aogā i ai.

[Faamatalaga pito i lalo]