Talaaga o le Soifuaga

O le Mulimulituʻi i le Ala o Ieova o lo Ma Malosi Lea ma le Olioli

UA FAAMATALAINA E LUIGGI D. VALENTINO

Ua apoapoaʻi mai Ieova: “O le ala lava lenei, ia outou savavali ai.” (Isaia 30:21) Sa avea pea ma oʻu sini le mulimuli i lenei fautuaga talu ona papatisoina o aʻu i le 60 tausaga ua mavae. O lenei sini, sa faataatia lava i le amataga e ala i le faaaʻoaʻoga a oʻu mātua, o ē na faimalaga mai i Italia, ma nonofo mau i Cleveland, Ohio, Iunaite Setete o Amerika, i le 1921. O iinā na la tausia aʻe ai se fanau e toʻatolu—o loʻu uso matua o Mike, o loʻu tuafafine laʻitiiti o Lydia, ma aʻu.

SA SAʻILIʻILI solo lava oʻu mātua i lotu eseese, ae na iʻu ina fiu ma nofonofo loa. I le tasi la aso i le 1932, sa faalogologo ai Tamā i se polokalame i le leitiō sa faia i le gagana Italia. O se faasalalauga na faia e Molimau a Ieova, ma sa fiafia Tamā i mea na ia faalogo i ai. Sa ia tusi atu mo nisi faamatalaga atili, ma sa asiasi mai ai loa ia i matou se Molimau Italia mai le ofisa ulu o Molimau a Ieova i Brooklyn, Niu Ioka. Ina ua mavae se talanoaga fiafia lava na faia seʻia oo i le tafa o ata, na talitonu ai oʻu mātua e faapea, ua la maua le lotu moni.

Sa amata loa ona auai Tamā ma Tinā i sauniga faa-Kerisiano ma sa faaavanoa lo la fale e nonofo ai ovasia femalagaaʻi. E ui ina e na o aʻu o se tamaitiiti, ae sa fiafia nei tamāloloa e matou te ō faatasi i le galuega talaʻi, ma sa amata ai ona ou mafaufau e auauna faataimi atoa ia Ieova. O le tasi o na tagata asiasi o Carey W. Barber, ua avea nei ma sui o le Vaega Pule a Molimau a Ieova. Ina ua mavae sina taimi puupuu, na papatisoina ai aʻu ia Fepuari i le 1941 ina ua 14 oʻu tausaga, ma i le 1944, na amata ai ona ou paeonia i Cleveland. Sa amata foʻi ona  mulimuli Mike ma Lydia i le ala o upu moni o le Tusi Paia. Na auauna Mike ia Ieova seʻia oo i lona maliu, a o Lydia sa ō faatasi ma lana tane o Harold Weidner, mo le 28 tausaga i le faiva femalagaaʻi. I aso nei, o loo auauna i laʻua o ni faifeʻau faataimi atoa faapitoa.

I le Falepuipui na Faamausalīina ai Laʻu Faaiʻuga ia Mulimulituʻi Pea

I le amataga o le 1945, na iʻu ai ina tuuina aʻu i le falepuipui e igoa o le Chillicothe Federal Prison i Ohio ona sa uunaʻia aʻu e loʻu lotofuatiaifo ua aʻoaʻoina e le Tusi Paia ou te gaoioi e ōgatusa ma le Isaia 2:4, lea e talanoa e uiga i le tuʻiina o pelu e fai ma suōtosina. I le tasi taimi, sa faatagaina ai e pule o le falepuipui pagota Molimau, e mauaina na o ni nai lomiga faale-Tusi Paia na faasalalauina e Molimau a Ieova. Ae peitaʻi, sa fesoasoani mai ia Molimau mai le faapotopotoga sa latalata ane. I nisi taimi, sa latou tuuina ai ni nai lomiga i le fanua lea e latalata ane i le falepuipui. I le taeao e sosoo ai a o ave atu ia pagota i mea latou te faigaluega ai, sa latou saʻilia na lomiga ma mafai ona avatu i totonu o le falepuipui. E oo ane i le taimi na ou taunuu atu ai i le falepuipui, ua faatagaina i matou e maua nisi lomiga e sili atu. Ae ui i lea, i lena taimi sa sili atu ai ona ou faatāuaina meaʻai faaleagaga ua saunia e Ieova—o se lesona o loo ou manatua pea i taimi uma ou te maua ai se lomiga fou o Le Olomatamata ma le Ala Mai!

E ui lava sa faatagaina i matou e faia sauniga a le faapotopotoga i totonu o le falepuipui, ae sa leʻi faatagaina tagata e lē o ni Molimau e auai. Ae peitaʻi, sa iai lava isi leoleo o le falepuipui ma isi pagota na auai faalilolilo, ma na oo lava ina talia e nisi le upu moni. (Galuega 16:30-34) Sa avea asiasiga a le uso o A. H. Macmillan ma puna sili o faamāfanafanaga. E na te faamautinoa mai pea ia i matou e faapea, o le taimi lea e matou te faaaluina i le falepuipui, sa lē o se mea e faalēaogā auā ua toleniina ai i matou mo isi tofiga i le lumanaʻi. Sa pāʻia loʻu loto i faamāfanafanaga a lena uso pele ua matua, ma sa faamalosia ai laʻu faaiʻuga e savali i ala o Ieova.

Ua Maua Saʻu Paaga

Sa faaiʻuina le Taua Lona Lua a le Lalolagi, ma sa tatalaina aʻu mai le falepuipui ma toe faaauau ai ona ou paeonia, o le faiva faataimi atoa lea. Ae i le 1947 na maliu ai loʻu tamā. Ina ia tausia le aiga, sa ou faia ai se galuega totogi ma sa ou agavaa foʻi i le faia o fofō faafomaʻi—o se tomai na fesoasoani ia te aʻu i se taimi faigatā, lea na ma faafesagaʻia ma laʻu avā i le 30 tausaga mulimuli ane ai. Ae ua vave laʻu faamatalaga e aunoa ma le faasolosolo lelei atu. Muamua, seʻi oʻu faamatala atu e uiga i laʻu avā.

I se tasi aoauli i le 1949, a o ou iai i le Maota o le Malo, na tatagi ai le telefoni. Na ou tago atu sii i luga ma sa ou faalogoina ai se leo mālie o faapea mai: “O loʻu igoa o Christine Genchur. O aʻu o se tasi o Molimau a Ieova. Ua ou siitia mai i Cleveland e suʻe ai saʻu galuega, ma ou te fia auaufaatasi ma se faapotopotoga.” Sa matuā mamao lava lo matou Maota o le Malo mai le mea lea sa nofo ai o ia, ae sa ou fiafia i le manaia o lona leo, o lea na ou faasino atu loa ia te ia le auala i lo matou maota ma faamalosiau o ia ina ia sau i lena Aso Sa—o le aso lena ou te faia ai le lauga lautele. I le Aso Sa, o aʻu lava le tagata muamua na taunuu i le Maota o le Malo, ae e leai lava se tuafafine fou na sau. A o faagasolo le lauga, sa fai lava ma ou autilo mai i le faitotoʻa, ae leai se tasi na sau. I le aso na sosoo ai na ou telefoni atu ai ia te ia, ma na ia faapea mai e leʻi masani o ia ma auala e femalagaaʻi ai pasi. O lea na ou ofo atu ai ou te alu atu e faafeiloaʻi o ia ma faamatala lelei atu mea uma ia te ia.

Sa ou iloa ai, o ona mātua sa malaga mai i Czechoslovakia ma nonofo mau iinei, ma na amata ona auaufaatasi ma Tagata Aʻoga o le Tusi Paia ina ua uma ona faitau i le tamaʻi tusi, Where Are the Dead? Na papatisoina ona mātua i le 1935. I le 1938, na avea ai le tamā o Christine ma auauna o le faapotopotoga (lea ua taʻua nei o le ovasia taʻimua) o Molimau a Ieova i Clymer, Pennsylvania, Iunaite Setete o Amerika, ma i le 1947, na papatisoina ai Christine ina ua 16 ona tausaga. E leʻi umi lava se taimi ae ua ou lagona le alofa i lenei tuafafine aulelei, e naunau i mea faaleagaga. Na ma faaipoipo ia Iuni 24, 1950, ma talu mai ai lava, na avea ai Christine ma aʻu paaga faamaoni, e naunau lava o ia e faamuamua manaʻoga o le Malo. Ou te matuā faafetai ia Ieova ona o le lotomalie o lenei paaga amio lelei e faatasia o ma olaga.—Faataoto 31:10.

 Se Mea e Ofo Ai

Ia Novema 1, 1951, na amata ai ona ma paeonia faatasi. I le lua tausaga mulimuli ane, i se tauaofiaga i Toledo, i Ohio, na talanoa mai ai le uso o Hugo Riemer ma Albert Schroeder i se vaega o paeonia e naunau i le auaunaga faamisionare. Sa ma iai ma i latou na. Sa faalaeiauina i maʻua ina ia faaauau ona ma paeonia i Cleveland, ae i le masina lava na sosoo ai, na ma maua ai se mea na ofo ai—o se valaaulia ina ia ma auai i le vasega lona 23 o le Aʻoga Faale-Tusi Paia a le Olomatamata o Kiliata, e amataina ia Fepuari i le 1954!

A o ma tietie e agaʻi atu i le Aʻoga o Kiliata, lea sa iai i South Lansing, i Niu Ioka, sa tātāvale le fatu o Christine, o lea sa ia fai mai ai pea ia te aʻu, “Alu lemu!” Sa ou fai atu, “Christine, o lea e alu lemu, ae afai e toe faalemu ifo, o le a pei ai lava e lē o alu la ta taavale.” Ae e ui i lea, ina ua ma taunuu i le nofoaga o le aʻoga, sa vave lava ona ma lagona le toʻafilemu. O le uso o Nathan Knorr na faafeiloaʻia le vaega o tagata aʻoga ma ave i matou e faamatamata i le Aʻoga. Sa ia faamatala mai foʻi le auala e faasao ai le vai ma le eletise, i le faamamafa mai e faapea, o le lē faamaʻimauina o mea o se uiga aogā e manaʻomia pe a tausia manaʻoga o le Malo. Sa taofimau i o ma mafaufau lena fautuaga. O loo ma ola ai pea e tusa ma lena fautuaga.

Lele i le Vaalele i Rio

E leʻi pine ae faauuina i maʻua, ma ia Tesema 10, 1954, na ma ō ai ma le fiafia i le vaalele mai i le mālūlū o le aai o Niu Ioka, ona o lea o le a felelei atu i lo ma tofiga fou i Rio de Janeiro, i Pasili, lea e susulu ai le lā. Na matou malaga faatasi ma se ulugalii po o uso misionare o Peter ma Billie Carrbello. Sa tatau ona alu le malaga mo le 24 itula, ma mālōlō ai i Puerto Rico, Venezuela, ma Belém i Pasili i mātū. Ae peitaʻi, ona o ni faafitauli i le afi o le vaalele, na alu ai le 36 itula faatoʻā matou vaaia ia Rio de Janeiro. Ae maʻeu se vaaiga matagofie! Sa feemoemoaʻi ia molī o le aai e pei o ni taimane feilafi mai i luga o se kapeta uliuli, ma na feilafi mai foʻi le susulu o le masina i le moana o Guanabara Bay.

Sa faatali mai i matou i le malae vaalele e nisi o le aiga Peteli. Ina ua uma ona faafeiloaʻia ma le māfana i matou, ona latou ave lea o i matou i le ofisa o le lālā, ma e tusa o le tolu i le vaveao na matou momoe ai. Ina ua mavae ni nai itula, ae ta mai loa ma le logo e fafagu ai lea e faamanatu mai ai ia i matou e faapea, o lea ua amata lo matou uluaʻi aso i le auaunaga faamisionare!

Se Lesona na Vave ona Ma Aʻoaʻoina

Sa vave lava ona ma aʻoaʻoina se lesona tāua. Sa ma asiasi atu i le fale o se aiga Molimau i le pō. Ina ua ma mananaʻo e savavali atu i le lālā, sa taofi i maʻua e lē e ona le fale ma faapea mai, “Aua, e lē mafai ona oulua ō; o lea e timu,” ma sa ia tauanau malosi ai i maʻua e matou te momoe mo le pō. Sa ou fai atu ma ou ata, “E timu foʻi le mea lea ma te ō mai ai.” Ma na ma ō lava.

Ona o mauga o loo siʻomia ai Rio, na vave ai lava ona tafe faatasi mai vai mai mauga agaʻi mai i le aai, e masani ona faapogai ai lologa. Sa leʻi pine ae ma āsa i vai ua oo le loloto i o ma tuli. Ina ua latalata atu i le lālā, na tatafe malosi ai vai i luga o le alatele ma na oo le loloto o le vai i luga o o ma fatafata. Na ma susū uma ina ua ma taunuu i Peteli. I le aso na sosoo ai, na matuā maʻi ai lava Christine i le fiva taifoi, lea na umi ai se taimi o vaivai o ia. O le mea moni, ona o ni misionare fou, sa tatau lava ona ma utagia lapataʻiga a Molimau o le atunuu ua lava lo latou iloa.

Uluaʻi Laasaga i le Galuega Faamisionare ma Femalagaaʻi

Ina ua mavae lenei amataga lē manuia, sa ma amata loa ma le naunau i la ma faiva i le fanua. E so o se tasi lava na matou feiloaʻi, sa ma faitauina i ai se taulimaga faa-Potukali, ma e foliga mai sa tutusa lo ma agaʻigaʻi i luma i le tautatala atu i le gagana Potukali. Sa masani ona faapea mai se tasi e ona le fale ia Christine, “Ou te malamalama i lau tala lena e fai mai ae ou te lē malamalama ia te ia le la,” ma faasino  mai ia te aʻu. Ae na faapea mai foʻi se isi e ona le fale ia te aʻu, “Ou te malamalama ia te oe ae ou te lē malamalama ia te ia.” Ae ui i lea, sa faafiafiaina i maʻua ina ua maua le sili atu i le 100 tusiga o Le Olomatamata i nai na uluaʻi vaiaso. O le mea moni, na iai nisi o a ma tagata suʻesuʻe o le Tusi Paia na papatisoina i le faagasologa o lo ma tausaga muamua i Pasili, na aumaia ai se faamaoniga e iloa ai o le a fuatele mai lenei tofiga faamisionare i le lumanaʻi.

I le taulotoaʻiga o tausaga o le 1950, e tele faapotopotoga i Pasili e leʻi asiasia soo e ovasia matagaluega ona o le lē lava o uso agavaa. O lea, e ui lava sa ou aʻoaʻoina pea le gagana ma ou te leʻi faia lava se lauga lautele i le gagana Potukali, ae i le 1956, na tofia ai aʻu i le galuega matagaluega i le setete o São Paulo.

Talu ai o le uluaʻi faapotopotoga lea na ma asiasi i ai, ua lua tausaga e leʻi toe asia e se ovasia matagaluega, o lea sa matuā faatalitalia ai e tagata uma le lauga lautele. I le saunia o lena lauga, sa ou otiina ai ia palakalafa mai mataupu o Le Olomatamata i le gagana Potukali ma faapipii i ni pepa. I lena Aso Sa, sa matuā faatumulia le Maota o le Malo. E oo lava i le pulelaa, sa nonofo ai tagata, sa faatalitali uma i lenei sauniga faapitoa. Na amata ona ou faitauina le lauga. I isi taimi, sa fai lava ma ou tepa atu i luma, ma sa ou matuā ofo lava ona sa leai se tasi na gaoioi, e oo lava i tamaiti. O tagata uma sa pulatoʻa mai ia te aʻu. Sa ou faapea ifo: ‘Oka, Valentino, ua matuā lelei lava lau faa-Potukali! O loo uaʻi totoʻa uma mai nei tagata.’ I tausaga mulimuli ane, ina ua ou toe asiasi atu i lena faapotopotoga, na faapea mai ai se uso sa iai i lena uluaʻi asiasiga: “Po o e manatua le lauga lautele lea na e faia? Matou te leʻi malamalama lava i se upu e tasi o lena lauga.” Sa ou taʻutino atu ou te leʻi malamalama foʻi i le tele o lena lauga.

I lena uluaʻi tausaga o le galuega matagaluega, sa masani ona ou faitauina ai le Sakaria 4:6. O upu ia, ‘E lē o le malosi a o loʻu agaga,’ na faamanatu mai ai ia te aʻu e na o le agaga o Ieova e mafai ai ona agaʻigaʻi i luma le galuega o le Malo. Ma sa faapena lava ona agaʻigaʻi i luma e ui ina sa gata mai lo ma iloa o le gagana.

Faafitauli ma Faamanuiaga na Tutupu

O le auai i le galuega matagaluega, o lona uiga, o le faasopolia lea o le atunuu a o aveina ia se laau lomitusi, pusa o lomiga, atopaʻu, ma ato talaʻi. Sa faanumeraina ma le atamai e Christine a ma ato ina ia aua neʻi galo se mea a o nanati atu mai i lea pasi i le isi. Sa masani lava ona faimalaga i le pasi mo le 15 itula i auala pefua ina ia oo atu ai i le isi taunuuga. I nisi o taimi, sa avea o se mea na ma fefefe ai, aemaise lava pe a fepasiaʻi ni pasi se lua e eseese itu e agaʻi mai ai i se auala laupapa maluelue, sa matuā vāitiiti lava ma na toetoe a fepaʻiaʻi tino o pasi. Sa ma malaga foʻi i nofoaafi, i vaa, ma tietie foʻi i solofanua.

I le 1961 na amata ai ona ma auauna i le galuega itumalo, e faimalaga ai mai i lea matagaluega i lea matagaluega na i lo o lea faapotopotoga i lea faapotopotoga. I nisi pō i se vaiaso, sa ma faaali ai ni ata na saunia e le faalapotopotoga a Ieova—e eseese uma nofoaga sa faaalia ai. Sa masani lava ona tatau ona ma gaoioi vave ina ia manumalo i taumafaiga a taʻitaʻi lotu e taofia ai nei faaaliga o ata. I se tasi aai, na matuā tauanau malosi ai e le patele le tagata e ona le fale ina ia soloia le konekalate na ia faia ma i matou. Ina ua mavae ni aso o faia ni saʻiliʻiliga, na ma maua ai se isi fale ae ma te leʻi taʻuina atu i se tasi, sa faaauau pea ona ma valaaulia tagata uma ina ia ō atu i le fale muamua. A o leʻi amataina le polokalame, na alu atu ai Christine i le fale lena ma tataʻi lemu mai tagata na mananaʻo e matamata i le ata i le isi nofoaga fou lea. I lena pō, e 150 tagata na matamata i le ata, lea na matuā talafeagai lava ma lona igoa, The New World Society in Action.

E ui lava ina faigatā le galuega femalagaaʻi i nofoaga maotua i nisi o taimi, ae sa matuā talisapaia e uso lotomaulalo sa nonofo ai iinā a ma asiasiga, ma ona o lo latou agaga talimalo, sa faaavanoa ai o latou fale faatauvaa e ma te nonofo ai. Ona o lena mea, sa ma faafetai atu ai pea ia Ieova ona ua mafai ona ma faatasi ma i latou. O le faia o se faauōoga ma i latou na iʻu ai i faamanuiaga faamāfanafana loto mo i maʻua. (Faataoto 19:17; Hakai 2:7) O le mea lea, pagā lo ma faanoanoa ina ua mavae le sili atu ma le 21 tausaga o ma auauna i Pasili, ae o lea ua faaiʻuina la ma auaunaga faamisionare!

I se Taimi Faigatā, na Faasino Mai e Ieova ia i Maʻua le Auala

I le 1975, na faia ai se taotoga o Christine. Na ma toe faaauau i le galuega femalagaaʻi, ae na  faateteleina le lē lelei o le soifua mālōlōina o Christine. Sa foliga mai e sili ona lelei pe a ma toe foʻi i le Iunaite Setete ina ia mafai ai ona vaaia o ia e se fomaʻi. Ia Aperila 1976, na ma taunuu ai i Long Beach, i Kalifonia, ma matou nonofo ai ma loʻu tinā. I le mavae o le luasefulu o tausaga o nonofo i se isi atunuu, na ma matuā leiloa ai lava le mea e tatau ona fai e tusa ai ma lenei tulaga. Sa amata ai loa ona ou toe faia fofō, ma o tupe na maua mai i lena galuega sa tausia ai i maʻua. Na saunia e le setete o Kalifonia se nofoaga i le falemaʻi mo Christine, ae iinā sa fai ifo ai lava lona malosi i lea aso ma lea aso ona sa lē mananaʻo fomaʻi e togafitia o ia e aunoa ma le faaaogāina o le toto. Sa tauau ina leai se faamoemoe ma sa ma augani atu ia Ieova mo se taʻitaʻiga.

I se tasi aoauli a o ou auai i le auaunaga i le fanua, na ou vaaia ai se ofisa o se fomaʻi, ma i le taimi lava lena na ou alu ai loa i totonu. E ui lava ina ua sauni le fomaʻi o le a alu i lona aiga, ae na ia ave aʻu i totonu o lona ofisa ma ma talanoa ai mo le lua itula. Ona ia faapea mai lea: “Ou te talisapaia la oulua galuega o ni misionare, ma o le a ou togafitia lau avā e aunoa ma se totogi ma e aunoa foʻi ma le tuiina o le toto.” Sa faateʻia lava aʻu i lana tala.

O lenei fomaʻi agalelei, o se fomaʻi faapitoa ma faaaloalogia, na ia avatu Christine i se falemaʻi sa ia galue ai, ma i lana tausiga matuā lelei lava, sa vave ai lava ona faaleleia le tulaga o Christine. Maʻeu lo ma lotofaafetai ona o le faasinoina mai e Ieova o le ala ia i maʻua i lena taimi faigatā!

Ni Tofiga Fou

Ina ua toe maua le malosi o Christine, na ma auauna ai o ni paeonia ma sa ma olioli e fesoasoani atu i nisi o tagata i Long Beach e avea ma tagata tapuaʻi ia Ieova. I le 1982 na talosagaina ai i maʻua e ma te galulue i le galuega matagaluega i le Iunaite Setete. I aso uma lava, e ma te faafetai atu ai ia Ieova ona o le toe faaaogāina o i maʻua i le galuega femalagaaʻi—o se faiva na ma fiafia tele i ai. Sa ma auauna i Kalifonia ona sosoo ai lea ma New England, o le matagaluega iinā sa aofia ai ni faapotopotoga i le gagana Potukali. Mulimuli ane, sa aofia ai foʻi ma Bermuda.

Ina ua mavae le fā tausaga o le faafouina, na ma maua ai foʻi se isi tofiga. Na valaaulia i maʻua e ma te auauna o ni paeonia faapito i so o se mea lava na ma mananaʻo i ai. E ui lava sa ma lagona le faanoanoa ina ua tuua le galuega femalagaaʻi, ae sa ma maumauaʻi e mulimulituʻi pea i lenei tofiga fou. Ae i fea? A o faia le galuega femalagaaʻi, na ou mātauina ai le manaʻomia o se fesoasoani e le faapotopotoga i le gagana Potukali i New Bedford, i Massachusetts—o lea na ma ō atu ai loa i New Bedford.

Ina ua ma taunuu atu, na faia ai e le faapotopotoga se fiafia tele na faafeiloaʻia ai i maʻua. Maʻeu se lagona fiafia ona o le manaʻomia o i maʻua! Na taufai maligi ai o ma loimata. Na aveina ma le agalelei i maʻua e se ulugalii talavou e toʻalua la laʻua fanau laiti i lo latou aiga e matou te nonofo ai seʻia oo ina maua so maʻua lava fale. Sa matuā faamanuiaina e Ieova lenei tofiga o le paeonia faapito i se tulaga e ma te leʻi faatalitalia. Talu mai le 1986, na ma fesoasoani atu ai i le 40 o tagata i lenei aai ina ia avea ma Molimau. Ua avea i latou ma o ma aiga faaleagaga. E lē gata i lea, sa ou maua le olioli i le mātauina o ni uso se toʻalima mai le aai, o tutupu aʻe faaleagaga ma avea o ni leoleo e tausia le lafu mamoe. E pei lava o loo auauna i se tofiga faamisionare e fuatele mai.

Pe a ma toe tepa i tua, ua ma olioli ona o lo ma auauna ia Ieova mai lava a o laiti ma agaʻi mai ai ma avea foʻi le upu moni ma ala o o ma olaga. E moni, ua aafia i maʻua i le tino matua ma tulaga lē lelei tau i le soifua mālōlōina i le taimi nei, ae o le mulimulituʻi i le ala o Ieova o loo avea pea ma o ma malosi ma mea e olioli ai.

[Ata i le itulau 26]

Faatoʻā taunuu i Rio de Janeiro

[Ata i le itulau 28]

Lo ma aiga faaleagaga i New Bedford, i Massachusetts