Po o E “Faatauina Mai o le Taimi Tatau”?

NA FAUTUAINA e le aposetolo o Paulo ia Kerisiano Efeso o le uluaʻi senituri e faapea: “Ia faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto; i le faatauina mai o le taimi tatau mo outou lava, auā o aso ua leaga.” (Efeso 5:15, 16, faatusatusa i le NW) Aiseā na talafeagai ai lenei fautuaga? O le tali i lena fesili e manaʻomia ai le iloa e uiga i tulaga na fesagaʻi ma Kerisiano i lena aai anamua.

Sa lauiloa Efeso i le matuā maoaʻe o lona tamaoaiga, i amioga matuā lē mamā, le taatele o le solitulafono, ma le anoanoaʻi o faiga faatemoni. E lē gata i lea, sa tatau foʻi i Kerisiano iinā ona tauivi e tetee atu i talitonuga faafilosofia e faatatau i le taimi. Sa lē talitonu tagata Eleni o ē e lē o ni Kerisiano i Efeso e faapea, e faagasolo pea i luma le taimi. Na aʻoaʻoina i latou e faifilosofia Eleni e faapea e toe ola mai le tagata i se isi faataamilosaga o le olaga. O se tagata sa faaalu sesē lona taimi i se tasi o faataamilosaga o le olaga, e mafai ona ia toe maua uma mai i se isi faataamilosaga. O nei mafaufauga, sa ono mafai ona taaʻina ai Kerisiano Efeso e talia se uiga lē manatu mamafa i le faasologa o le taimi a Ieova e faatatau i mea e tutupu, e aofia ai ma lana faasologa e faatatau i le faamasinoga tauatua. O lea, sa talafeagai ai le fautuaga a Paulo ina ia “faatauina mai o le taimi tatau.”

Sa leʻi talanoa Paulo e faatatau i le taimi i na o se uiga lautele. O le upu Eleni lea na ia faaaogāina sa faailoa mai ai se taimi atofaina, se taimi talafeagai mo se fuafuaga faapitoa. Sa fautuaina e Paulo ia Kerisiano o le uluaʻi senituri ina ia faaaogā ma le atamai le taimi avanoa, po o taimi o le alofa tunoa, lea na latou olioli ai a o leʻi oo mai le iʻuga ma aveesea ai le alofa mutimutivale o le Atua ma le avanoa mo le faaolataga.—Roma 13:11-13; 1 Tesalonia 5:6-11.

O loo tatou ola foʻi i se taimi avanoa faapena. Na i lo o le faatalalē i lenei taimi o le alofa tunoa e lē toe faaluaina e ala i le saʻilia o fiafiaga lē tumau ua ofoina mai e le lalolagi, o Kerisiano atamamai o le a latou faaaogā le taimi lea ua faaavanoa mo i latou e faia ai “le amio lelei ma le amio Atua” ma faamalosia ai la latou faiā ma Lē na Foafoaina Mea, o Ieova le Atua.—2 Peteru 3:11; Salamo 73:28; Filipi 1:10.