Ia Tumau ma le Mautinoa Atoatoa

‘Faauta! O le Motu o Tagata e Toʻatele!’

SA O se fesili na iso ai auauna a Ieova mo le tele o tausaga. Ua loa lava ona faia se taumafaiga ina ia foʻia ai lenei fesili e faavae mai i le Tusi Paia. Na tele ni talanoaga na faia i lenei mataupu. Ae na iʻu ina maua le tali faale-Tusi Paia, ma na matuā faafiafiaina ai le aofia na auai i se tauaofiaga i Washington, D.C., i le tausaga e 1935.

Sa faavae lenei talanoaga i se fesili masani e faapea: E faapefea ona iloa le “motu o tagata e manomano” (King James Version), po o le “motu o tagata e toʻatele,” lea o loo taʻua i le Faaaliga 7:9? Po o le a ola ea i le lagi lenei vaega o tagata talitonu?

Se Fesili ua Loa ona Lāgā

E mai lava i le taimi o le aposetolo o Ioane e oo mai i o tatou aso, na iso ai lava Kerisiano e uiga i le faailoaina mai o le “motu o tagata e manomano.” Sa manatu Tagata Aʻoga o le Tusi Paia i le motu o tagata e toʻatele e faapea o se vasega lona lua faalelagi, o se vaega ua maua le poto o upu moni o le Tusi Paia ae sa laʻitiiti se taumafaiga na faia e faasalalauina atu ai.

Ae peitaʻi, sa iai nisi na auaufaatasi ma Kerisiano faauuina o ē na matuā maelega i le galuega talaʻi. Sa leai so latou faanaunauga e ō i le lagi. O le mea moni, na ōgatusa lo latou faamoemoe ma le lauga i le lautele na faalauiloaina atu e tagata o Ieova mai le 1918 e oo i le 1922 e faapea, “E Faitau Miliona o Loo Ola Nei e Lē Oo i ai le Oti.” O na tagata o le a faamanuiaina i le ola e faavavau i le lalolagi.

Na talanoaina i le Watchtower o Oketopa 15, 1923, le faataoto a Iesu e uiga i mamoe ma ʻoti ma faapea mai ai: “O mamoe ua fai ma sui o tagata o nuu uma lava, e leʻi faauuina i le agaga ae ua gauaʻi atu i le amiotonu, o ē ua ioeina le tulaga o Iesu Keriso o le Alii ma o i latou na o loo vaavaai ma faamoemoe atu mo se taimi e sili ona lelei i lalo o lana pulega.”—Mataio 25:31-46.

Isi Ave o le Malamalama

I le tausaga e 1931, na talanoaina ai i le Vindication, Tusi 1, le mataupu e 9 o le Esekielu ma faailoa mai ai i latou ua faailogaina i o latou muaulu mo le faasaoina mai le iʻuga o le lalolagi e faapea o mamoe na o le faataoto a Iesu. I le Vindication Tusi 3, (na lomia i le 1932), na faamatalaina ai le uiga lotosaʻo o le tagata e lē o se Isaraelu o Ionatapa, o lē na oso atu i le kariota a Ieʻu le tupu faauuina o Isaraelu ma la ō atu faatasi ai e molimauina le maelega o Ieʻu i le faasalaina o tagata tapuaʻi i atua sesē. (2 Tupu 10:15-28) Na taʻua i le tusi e faapea: “O Ionatapa na fai ma sui pe na faaatagia ai le vasega o tagata i le lalolagi i le taimi nei o ē e lē o lagolagoina le faalapotopotoga a Satani, ma o loo tutū i le itu o le amiotonu, ma o ē o le a faasaoina e le Alii i le taimi o Amaketo, o le a faasaoina atu i latou i lena puapuaga ma avatu ia te i latou le ola e faavavau i le lalolagi. O i latou nei ua faia aʻe ai le vasega e pei o ni ‘mamoe.’”

I le 1934, na faamanino mai ai e le Watchtower e faapea, o Kerisiano e iai le faamoemoe faalelalolagi, e tatau ona tuuina atu i latou ia Ieova ma ia papatisoina. Ua matuā susulu atili atu ai le malamalama e faatatau i lenei vasega faalelalolagi!—Faataoto 4:18.

Se Malamalama ua Matuā Susulu Atu

Ua toeitiiti ona matuā susulu malosi atu loa lea o le malamalamaga o le Faaaliga 7: 9-17. (Salamo 97:11) Sa faaalia i le Watchtower le faamoemoe e faapea, o se tauaofiaga sa fuafuaina e faia ia Me 30 e oo ia Iuni 3, 1935 i Washington, D.C., i le Iunaite Setete o Amerika, o le a avea o “se faamāfanafanaga moni ma o le a aogā” ia i latou o loo faaatagia e Ionatapa. Ma o le tulaga tonu lena na iai!

I se lauga aasa e faatatau i “Le Motu o  Tagata e Manomano,” na fofogaina atu i le tusa ma le 20,000 o le ʻauusufono, na faailoa atu ai e J. F. Rutherford ia faamaoniga mai i le Tusi Paia e faapea, o “isi mamoe” i aso nei ua tutusa ma lena “motu o tagata e toʻatele” i le Faaaliga 7:9. (Ioane 10:16) I le tumutumuga o lenei lauga, na fesili mai ai le failauga: “Faamolemole, pe mafai ona tutū uma i luga i latou o loo iai le faamoemoe e ola e faavavau i le lalolagi?” A o tutulaʻi se vaega e toʻatele o le aofia, na faalauiloa mai ai e Rutherford e faapea: “Faauta! O le Motu o Tagata e Manomano!” Sa matuā leai lava se pisa, ona sosoo ai lea ma le alaga leotele o le olioli. I le aso na sosoo ai, e 840 Molimau a Ieova fou na papatisoina, o le toʻatele o i latou nei na taʻutino mai o i latou o le motu o tagata e toʻatele.

Se Aofaʻiga Mataʻina

A o leʻi oo i le 1935, o se aofaʻiga ua faateleina o i latou o ē na talilelei mai i le feʻau a le Tusi Paia ma maelega i le talaʻia o le tala lelei, na faaalia le naunau e fia ola e faavavau i le lalolagi Parataiso. E leai so latou faanaunauga e ō i le lagi, auā e leʻi tuuina atu e le Atua ia i latou le faamoemoe o le ola faalelagi. O le faailoaina o i latou faatasi ma le motu o tagata e toʻatele o isi mamoe, ua faaalia ai e faapea, e oo ane i le 1935, ua toeitiiti lava faaiʻu le valaauina o le 144,000 o Kerisiano faauuina.—Faaaliga 7:4.

Ina ua pā le Taua Lona Lua a le Lalolagi, na faia ai e Satani le Tiapolo taumafaiga ogaoga ina ia taofia ai le aoaoina o i latou o le a faia aʻe ai le motu o tagata e toʻatele. Na faasāina ai le galuega o le Malo i le tele o atunuu. I na taimi pogisa ma i se taimi puupuu lava a o leʻi maliu o ia ia Ianuari 1942, na faapea mai ai J. F. Rutherford: “E foliga mai o le a lē toʻatele naʻuā le ‘motu o tagata e manomano.’”

Ae ona o faamanuiaga a le Atua, na suia ai tulaga o mea. ‘Sa tumau ma le mautinoa atoatoa,’ le vasega faauuina ma a latou aumea, o isi mamoe, i le faataunuuina o le tofiga ia faia soo. (Kolose 4:12; Mataio 24:14; 28:19, 20) E oo ane i le 1946, ua 176,456 le aofaʻiga o Molimau a Ieova sa talaʻi i le lalolagi aoao—o le toʻatele o i latou nei o le motu o tagata e toʻatele. I le tausaga e 2000, ua sili atu i le 6,000,000 Molimau na auauna faamaoni ia Ieova i atunuu e 235—o se motu o tagata e matuā toʻatele lava! Ma o loo faateleina pea le faitau aofaʻi.