Taʻiala Tauatua mo le Filifilia o se Paaga Faaipoipo

“Ou te aʻoaʻo ia te oe, ma faasino ia te oe i lea lava ala e te savali ai; ou te faatonu ia te oe, ma ou vaai ia te oe.”—SALAMO 32:8.

1. O ā vala e manaʻomia mo se faaipoipoga ina ia taulau manuia ai?

UA OSO vave ese le tagata tāfiti i le ea mai lona tāupega, ua loloʻu faapiʻolua lona tino, ona fiti ai lea i le ea i se gaoioiga sili ona mataʻina. Ua vave ona faasasaʻo lona tino, ua faaloloa atu ona lima ona puʻe mai lea e lima o le isi tagata tāfiti lea o loo la faafesagaʻi o loo tāupe i lana foʻi tāupega. Ua faasolosolo mālie atu le faaseega a le alii ma le tamaʻitaʻi lea o loo faasee i totonu o le malae aisa. Ua faafuaseʻi lava ona sii masagi aʻe e le alii lana paga ma liaʻi i luga o le ea. Ua taavili faataamilo le tamaʻitaʻi, ona toe faapaʻū mālie ifo lea ma tū vaetasi i lona seevae faasee, ona faataamilomilo ai lava lea faatasi ma le alii i le aisa. E toetoe lava peiseai e lē o iai ma se gaoioiga a i latou uma o faia i nei faaaʻoaʻoga e lua. Peitaʻi, e leai se tasi na te mafai ona faia lena mea pe a lē muaʻi faia muamua ni faataʻitaʻiga, ia iai se paga ua matuā tomai lelei, aemaise lava ia saʻo taʻiala po o faatonuga o loo maua. E faapena foʻi i se faaipoipoga o loo taulau manuia, e foliga mai o se mea e teʻi lava ua tupu. Ae peitaʻi, e faalagolago atu foʻi i le lelei o se paaga, i ni taumafaiga soosootauʻau, aemaise lava i fautuaga atamai. Ioe, e matuā manaʻomia taʻiala talafeagai.

2. (a) O ai na faavaeina le faatulagaga tau i le faaipoipoga, ma mo le ā le fuafuaga mautū? (e) Ua faapefea ona faia faatulagaga mo nisi faaipoipoga?

² O se tulaga masani mo se alii ma se tamaʻitaʻi e leʻi faaipoipo ona mafaufau i se paaga faaipoipo—se paaga e la te faatasi i le olaga atoa. E talu mai lava ona faavaeina e Ieova le Atua le faaipoipoga, ua avea ai o se vaega masani o le olaga le faaipoipo o se alii ma se tamaʻitaʻi. Peitaʻi, sa leʻi filifilia e le uluaʻi tamāloa, o Atamu, lana avā. Na saunia ma le alofa e Ieova lana avā mo ia. (Kenese 2:18-24) Sa tatau ona fanafanau le uluaʻi ulugalii ina ia mulimuli ane ai faatumulia le lalolagi i tagata. Ina ua mavae atu lena uluaʻi faatasiga, sa masani lava ona faia e mātua fuafuaga mo le tamaʻitaʻi ma le alii o le a faaipoipo, ma i nisi taimi sa faia faapena ina ua iai le maliega a i latou o loo aofia ai. (Kenese 21:21; 24:2-4, 58; 38:6; Iosua 15:16, 17) E ui o loo taatele pea i nisi atunuu ma isi aganuu faaipoipoga e muaʻi faatulagaina, ae toʻatele tagata i aso nei o loo filifilia e i latou a latou lava paaga faaipoipo.

3. E tatau faapefea ona filifilia se paaga faaipoipo?

³ E tatau faapefea ona filifilia se paaga faaipoipo? Ua taaʻina nisi i foliga vaaia—i mea o loo faafiafiaina ma naunau i ai le vaaiga o mata. O isi e vaai i manuia faaletino, mo se tasi o le a ia tausia lelei i latou ma faamalie o latou manaʻoga talafeagai ma mea e naunau i ai. Ae pe o le a mafai ea e se tasi o nei vala ona taʻitaʻia atu ai i se mafutaga fiafia ma le faamalieloto? Ua faapea mai le Faataoto 31:30: “O le matagofie e pepelo lea, o le mea faatauvaa le lalelei; a o le fafine ua mataʻu ia Ieova, e viia lava o ia.” O iinā o loo iai le manatu tāua: Ia mafaufau ia Ieova pe a filifilia se paaga.

Taʻiala Alofa Mai le Atua

4. O le ā le fesoasoani ua saunia mai e le Atua e tusa ai o le filifilia o se paaga faaipoipo?

⁴ Ua saunia mai e lo tatou Tamā alofa faalelagi, o Ieova, lana Afioga tusitusia e taʻitaʻia ai i tatou i mataupu uma. Ua ia fetalai mai: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.” (Isaia 48:17) E lē o se mea la e ofo ai, le mauaina i le Tusi Paia o taʻiala ua leva ona faamaonia le aogā, mo le filifilia o se paaga faaipoipo. E finagalo Ieova ina ia tumau ma fiafia a tatou faaipoipoga. O le mea lea, ua ia saunia ai fesoasoani mo i tatou ina ia malamalama  ai ma faatatauina nei taʻiala. Pe lē o le mea ea lena o le a tatou faatalitalia mai i Lē e alofa na Foafoaina i tatou?—Salamo 19:8.

5. O le ā le mea e matuā tāua mo le fiafiaga tumau i le faaipoipoga?

⁵ Ina ua faavaeina e Ieova le faatulagaga tau i le faaipoipoga, sa ia fuafua ina ia avea o se mafutaga tumau. (Mareko 10:6-12; 1 Korinito 7:10, 11) O le māfuaaga lena ‘ua ʻinoʻino ai o ia i le alei,’ ma e faatoʻā faatagaina pe afai ua faia le “mulilua.” (Malaki 2:13-16; Mataio 19:9) O lea la, o le filifilia o se paaga faaipoipo o se tasi lea o laasaga e sili ona tāua e mafai ona tatou uia, ma e lē tatau ona manatu māmā i ai. E lē tele ni filifiliga e mafai ona aumaia ai le fiafia po o le faanoanoa e pei o lea filifiliga. E pei lava ona ʻoa faamanuiaga ma faamalieina ai le olaga o se tasi pe a lelei lana filifiliga, e faapena foʻi ona lē muta le gasolo mai o faanoanoaga pe a leaga le filifiliga. (Faataoto 21:19; 26:21) Ina ia iai pea le fiafia, e matuā tāua ona filifili ma le atamai ma ia lotomalie e faia se taʻutinoga tumau, auā na faavaeina e le Atua le faaipoipoga e avea o se faiga faapaaga o le a manuia ai i le autasi ma le felagolagomaʻi.—Mataio 19:6.

6. Aiseā e manaʻomia faapitoa ai mo alii ma tamaʻitaʻi talavou ona faaeteete a o filifilia se paaga, ma e mafai faapefea ona latou faia se filifiliga e sili ona atamai?

⁶ E manaʻomia faapitoa lava i alii ma tamaʻitaʻi talavou ona faaeteete ina ia lē avea le tosina i le vaaiga faaletino ma faalogona malolosi, e faasesēina ai la latou filifiliga tonu a o latou filifilia se paaga. O le mea moni, o se mafutaga e na o le pau na o vala e faavae aʻe ai, e vave ona liua i lagona lē fiafia pe oo atu lava i le ʻinoʻino. (2 Samuelu 13:15) I le isi itu, e mafai ona ati aʻe le alofa tumau a o tatou faamasani atu i la tatou paaga, ma a o tatou tau faamasani lelei foʻi ia i tatou lava. E manaʻomia foʻi ona tatou iloa, o le mea e sili ona lelei mo i tatou, atonu e lē o le mea lena na faanaunau muamua i ai o tatou loto. (Ieremia 17:9) O le pogai lena e tāua tele ai taʻiala tauatua o loo maua i le Tusi Paia. E fesoasoani ia i tatou ina ia iloa lelei ai le auala e mafai ona tatou faia ai filifiliga e sili ona atamai i le olaga. Ua fai le faisalamo ma sui o Ieova, i le faapea mai: “Ou te aʻoaʻo ia te oe, ma faasino ia te oe i lea lava ala e te savali ai; ou te faatonu ia te oe, ma ou vaai ia te oe.” (Salamo 32:8; Eperu 4:12) E ui e mafai e le faaipoipoga ona faamalieina o tatou manaʻoga masani o le manaʻo ia alofagia ma mafuta faatasi ma se tasi, ae e aumaia ai foʻi faafitauli na e manaʻomia ai le taʻumatuaina ma le faautautaga lelei.

7. Aiseā e lē talia ai e nisi se fautuaga faale-Tusi Paia e faatatau i le filifilia o se paaga, ae o le ā e ono taʻitaʻia atu i ai e lenei ala?

⁷ O se faiga atamai le utagia o le mea ua fetalai  mai ai Lē na Amataina le faaipoipoga e tusa ai ma le mataupu o le filifilia o se paaga. Peitaʻi, atonu e vave ona tatou mumusu e talia se fautuaga faale-Tusi Paia e aumai e o tatou matua pe mai toeaina Kerisiano. Tatou te ono manatu faapea e latou te lē o malamalama atoatoa ia i tatou, ma atonu o le malolosi o tuʻinanauga ona o faalogona ootia, e ono uunaʻia ai i tatou e mulimuli atu i faanaunauga o le loto. Ae e fesagaʻi loa ma tulaga moni o le olaga, ona tatou toe salamō lea talu ai sa tatou lē utagia le fautuaga atamai na ofoina mai mo so tatou lelei. (Faataoto 23:19; 28:26) Tatou te ono iʻu ai i se faaipoipoga ua lē o iai se alofa, faatasi ai ma ni fanau o loo faigatā ona tausia aʻe ma atonu foʻi o se paaga e lē talitonu. Pagā se faanoanoa o le a iai pe afai o se faatasiga sa tatau ona aumaia ai ia i tatou se fiafiaga tele, ae ua avea ma puna o le tele o mafatiaga!

Tuutoina i le Atua—Le Vala Tāua

8. E faapefea i le tuutoina i le Atua ona fesoasoani i se faaipoipoga ina ia tumau ma maua ai le fiafia?

⁸ O le mea mautinoa, e aogā fetosinaaʻiga māfana mo le faamausalīina o se faaipoipoga. Peitaʻi, o le iai i paaga uma o ni tapulaa aogā la te faatāuaina, e sili atu lena ona tāua ina ia mafai ona tumau ma maua ai le fiafia i le faatasiga o le faaipoipoga. O lo la tuutoina uma ia Ieova le Atua e aumaia ai se fusi e tumau ma tupu mai ai le autasi i se auala e lē mafai ona maua mai se isi lava vala. (Failauga 4:12) Pe a faaautū olaga o se ulugalii Kerisiano i le tapuaʻiga moni ia Ieova, o le a la maua ai le autasi faaleagaga, faalemafaufau, ma i amioga tatau. E la te suʻesuʻeina faatasi le Afioga a le Atua. E la te tatalo faatasi, ma o iinā e autasia ai o la loto. E la te ō faatasi i sauniga faa-Kerisiano ma galulue faatasi i le faiva i le fanua. O nei mea uma e fesoasoani ina ia fafau aʻe ai se fusi faaleagaga e fusia vavalalata ai i laʻua. Ae sili atu ona tāua, e iʻu ai i le mauaina o faamanuiaga a Ieova.

9. O le ā na faia e Aperaamo i le saʻilia o se avā mo Isaako, ma o le ā le iʻuga?

⁹ Ona o le tuutoina i le Atua o le augatamā faatuatua o Aperaamo, sa ia saʻili ai e faafiafia le Atua ina ua oo i le taimi e filifilia ai se avā mo lona atalii o Isaako. Na faapea atu Aperaamo, i lana auauna maufaatuatuaina i lona aiga: “Ia e tauto mai ia te au ia Ieova, o le Atua o le lagi, ma le Atua o le lalolagi,  e te le au mai se avā a loʻu atalii i fafine o Kanana, o le nuu ou te nofo ai nei. A ia e alu atu i loʻu nuu ma loʻu aiga, ma e au mai ai se avā mā loʻu atalii o Isaako. . . . e auina atu e [Ieova] lava o lana agelu e muamua ia te oe; e te au mai foi se avā mā loʻu atalii ai lea mea.” Na faamaonia le avea o Repeka o se avā mataʻina, o lē na alofa faapelepele i ai Isaako.—Kenese 24:3, 4, 7, 14-21, 67.

10. O ā avega tauave faale-Tusi Paia ua tuuina mai i tane ma avā?

¹⁰ Pe afai o i tatou o ni Kerisiano e leʻi faaipoipo, o le a fesoasoani mai lo tatou tuutoina atu i le Atua e atiina aʻe ai uiga na o le a mafai ai ona tatou ausia manaʻoga faale-Tusi Paia mo faaipoipoga. O tiute tauave mo tane ma avā, e aofia ai mea nei na taʻua e le aposetolo o Paulo e faapea: “O outou fafine, ia outou usiusitai i a outou lava tane, faapei ona usiusitai i le Alii . . . O outou tane, ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai o ia e ia e fai mona sui . . . [E] tatau ona alolofa o tane i a latou lava avā, faapei o latou lava tino. . . . Ia taitasi outou ma alofa i lana lava avā faapei o ia lava ia te ia; o le fafine foi ia ava o ia i lana tane.” (Efeso 5:22-33) E pei ona tatou iloa, o upu faagaeeina a Paulo e faamamafa mai ai le manaʻoga mo le alofa ma le faaaloalo. O le usitaia o lenei fautuaga e aofia ai le mataʻu faaaloalo ia Ieova. E manaʻomia ai se faamaoni mai le lotoatoa i taimi e taugalemu ai faapea foʻi i taimi e lē taugalemu ai. O Kerisiano o loo mafaufau mo se faaipoipoga e tatau ona mafai ona latou faatinoina lenei tiute tauave.

Filifilia o le Taimi e Faaipoipo Ai

11. (a) O le ā le fautuaga o loo aumaia i le Tusi Paia e faatatau i le taimi e tatau ona faaipoipo ai? (e) O le ā se faaaʻoaʻoga e faaalia ai le atamai o le usitaia o le fautuaga a le Tusi Paia lea ua faamauina i le 1 Korinito 7:36?

¹¹ E matuā tāua lava le iloaina o le taimi ua tatou nofosauni ai e faaipoipo. Talu ai o lenei vala e eseese i tagata uma lava, o le pogai lena e lē o faamaʻoti mai ai e le Tusi Paia se tausaga patino. Peitaʻi, ua faaalia mai e faapea, e sili atu ona lelei lo tatou faatali seʻi “mavae le malaulau o le talavou” o le taimi e mafai ai e faalogona malolosi tau i feusuaʻiga ona faasesēina ai se filifiliga lelei. (1 Korinito 7:36, NW ) Ua faapea mai le tamaʻitaʻi o Masela: “Ina o oʻu vaavaai atu i aʻu uō o loo fai a latou tuugatala ma faaipoipo, o le toʻatele o i latou sa faia a o laiti lava, sa iai nisi taimi na faigatā ai ona ou faatatauina lenei fautuaga. Peitaʻi, sa ou manatua o le fautuaga e mai ia Ieova, ma e na te taʻu maia ia i tatou na o mea e tatou te lelei ai. A o oʻu faatalitali mo se taimi talafeagai ou te faaipoipo ai, sa mafai ona ou uaʻi atu i le ma faiā ma Ieova ma maua ni oʻu potomasani i le olaga, o mea atonu e lē mafai ona e maua a o avea oe o se talavou laʻitiiti. I ni tausaga mulimuli ane, sa oo ina sauniunia lelei aʻu mo le taulimaina o tiute tauave faapea foʻi i faafitauli e tutupu aʻe i le faaipoipoga.”

12. Aiseā e atamai ai ona lē vavevave e faaipoipo a o laiti pea?

¹² O i latou e faataalise ona faaipoipo a o laiti pea, e masani lava ona latou iloa ane ua suia o latou manaʻoga ma faanaunauga a o faasolo ina matutua. O iinā loa e faatoʻā latou iloa ai ua lē o toe iai se tāua o mea ia na latou muaʻi faanaunau atu i ai. O se tasi teine talavou Kerisiano sa maumauaʻi lava e faaipoipo ina ua 16 ona tausaga. O le tausaga lena na faaipoipo ai le tinā o lona tinā, faapena foʻi ma lona tinā. Ina ua musu le alii talavou sa ia manaʻo i ai e la te faaipoipo i lena taimi, sa ia filifilia loa se isi tama o lē na lotomalie e faia faapea. Ae na mulimuli ane, sa matuā auē ma salamō o ia ona o lona vavevave e faaipoipo.

13. O le ā le vala e masani ona lē iai ia i latou e faaipoipo laiti?

¹³ Pe a mafaufau e faaipoipo, e tāua le iai o se malamalamaga lelei i mea uma e aofia ai. O le faaipoipo laiti, e mafai ona aumaia ai le anoanoaʻi o faafitauli e foliga mai e matuā lē o sauniuni lava i ai se tamaʻi ulugalii e la te taulimaina. Atonu e lē o ia i laʻua se tomai ma le matutua talafeagai e faafetaiaʻia ai mafatiaga o le faaipoipoga ma le tausia aʻe o le fanau. E faatoʻā tatau lava ona faia se faaipoipoga pe afai ua tatou sauniuni lelei i le tino, le mafaufau ma le faaleagaga ina ia faia se mafutaga e tumau.

14. O le ā e manaʻomia ina ia taulimaina ai ni tulaga mafatia i le faaipoipoga?

¹⁴ Na tusi mai Paulo e faapea, o i latou e faaipoipo ‘o le a oo i ai puapuaga i o latou tino.’ (1 Korinito 7:28) O le a aliaʻe faafitauli talu ai o i laʻua e toʻalua e eseese o la uiga faaletagata, ma o le a eseese ai manatu. Talu ai le tulaga lē lelei atoatoa faaletagata, e ono faigatā ai ona faataunuu la tatou matafaioi faale-Tusi Paia i le faatulagaga tau i le  faaipoipoga. (1 Korinito 11:3; Kolose 3:18, 19; Tito 2:4, 5; 1 Peteru 3:1, 2, 7) E manaʻomia le taʻumatuaina ma le mautū faaleagaga, e saʻili ai ma usitaia taʻiala tauatua ina ia mafai ona faaleleia i se auala alofa ni tulaga faigatā.

15. O le ā le matafaioi e mafai e mātua ona latou faatino i le sauniunia o a latou fanau mo se faaipoipoga? Faataʻitaʻi mai.

¹⁵ E mafai e mātua ona sauniunia a latou fanau mo se faaipoipoga e ala i le fesoasoani ia i latou ina ia malamalama i le tāua o le usitaia o taʻiala tauatua. E ala i le faaaogā ma le poto o le Tusi Paia ma lomiga faa-Kerisiano, e mafai ai e mātua ona fesoasoani i a latou fanau ina ia faamautinoa po ua nofosauni i latou, po o ē ua latou fuafua e faaipoipo atu i ai, mo le faia o le tautoga o le faaipoipoga. * Na manatu le tamaʻitaʻi talavou o Perosi ua matuā ulu lava lona alofa i se alii talavou i la latou faapotopotoga. O ia o se uso e paeonia faataimi atoa, ma na la mananaʻo e faaipoipo loa. Peitaʻi, na talosaga atu mātua o Perosi ia te ia ina ia toe faatali mo se isi tausaga, ona sa la manatu o loo laʻitiiti pea o ia. Mulimuli ane, na tusi mai Perosi: “Ou te matuā lotofaafetai ona sa ou utagiaina lena fautuaga atamai. E leʻi atoa lelei le tausaga, ae ua amata ona matua loʻu mafaufau ma ou iloa ai sa leʻi iai i lenei alii talavou uiga e ono avea ai o ia o se paaga faaipoipo e lelei. Mulimuli ane sa tuua e ia le faalapotopotoga, ma na ou sao mai ai i le mea na semanū o se mala tugā i loʻu olaga. Maʻeu le matagofie o le iai o ni mātua atamamai e mafai ona faalagolago atu i sa la filifiliga tonu!”

‘Ia Faaipoipo Tau Lava i Le ua i le Alii’

16. (a) E ono tofotofoina faapefea Kerisiano e tusa ai o le ‘faaipoipo tau lava i le ua i le Alii’? (e) Pe a fia faaipoipo atu i se tagata e lē talitonu, o le ā le mea e ao ona toe tomanatu i ai Kerisiano?

¹⁶ E matuā manino lava taʻiala a Ieova mo Kerisiano: ‘Ia faaipoipo tau lava i le ua i le Alii.’ (1 Korinito 7:39) E ono tofotofoina ai mātua Kerisiano ma a latou fanau i lenei itu. E faapefea? Ua fia faaipoipo talavou, ae atonu e lē o iai ni paaga avanoa o maua i le faapotopotoga. Atonu o le tulaga lena o loo foliga mai ai. E iai se isi vaipanoa atonu e toʻalaiti atu le aofaʻi o alii o loo avanoa na i lo o le aofaʻi o tamaʻitaʻi, pe atonu foʻi e leai se tasi i le vaipanoa e foliga mai o se paaga talafeagai. Atonu e fia faauō se tauleʻaleʻa, e lē o se uso tuuina atu o le faapotopotoga, i se tuafafine talavou Kerisiano (po o se tamaʻitaʻi foʻi i se uso Kerisiano), ma oo ai i se lē mautonu pe tatau ona pipiimau i tapulaa ua faataatia e Ieova i lenei itu pe leai. I tulaga faapena, e lelei ai ona toe tomanatu i le faaaʻoaʻoga a Aperaamo. O se tasi o auala na ia tausisia ai lana faiā lelei ma le Atua, o lona faamautinoa lea ua faaipoipo atu lona atalii o Isaako i se tagata tapuaʻi moni a Ieova. O le mea foʻi lena na faia e Isaako mo lona atalii o Iakopo. Sa matuā tele ni taumafaiga na aofia ai i lenei gaoioiga, ae na faafiafiaina le finagalo o le Atua ma iʻu ai i ana faamanuiaga.—Kenese 28:1-4.

17. Aiseā e foliga mai ai o le a iai mala i le faaipoipo atu i se tagata e lē talitonu, ma o le ā le māfuaaga sili ona tāua o le ‘faaipoipo tau lava i le ua i le Alii’?

¹⁷ E iai ni tulaga ua oo ina avea ai le tagata sa lē talitonu, o se Kerisiano. Ae peitaʻi, ua masani pea ona iʻu leaga faaipoipoga e faia ma tagata e lē talitonu. O i latou e amo faalēgatasi e lē tutusa o latou talitonuga, a latou tapulaa, po o sini ma a latou paaga. (2 Korinito 6:14) E mafai ona avea lenei itu ma aafiaga e faaleagaina ai fesootaʻiga ma le fiafiaga o le faaipoipoga. Mo se faataʻitaʻiga, sa faaalia e se tasi tuafafine Kerisiano lona matuā faanoanoa talu ai, ina ua mavae se sauniga faalaeiau sa auai atu i ai, sa lē mafai ona foʻi atu i le fale ma talatalanoa faatasi ma lana paaga lē talitonu i mea faaleagaga. E mautinoa, o le mea e sili atu ona tāua, o ‘le faaipoipo tau lava i le ua i le Alii’ ona o se gaoioiga  o le faamaoni lea ia Ieova. Pe a tatou usiusitai i le Afioga a le Atua, ona lē faasalaina lea o i tatou e o tatou loto, auā o loo tatou faia le mea e “lelei i ona luma.”—1 Ioane 3:21, 22.

18. Pe a mafaufau e faaipoipo, o ā mataupu tāua e tatau ona uaʻi atu i ai, ma aiseā?

¹⁸ Pe a mafaufau e faaipoipo, e tatau ona laualuga i ou popolega le amio lelei ma le tulaga faaleagaga o lē o loo mafaufauina e avea ma paaga. O se uiga faa-Kerisiano, faatasi ai ma le alofa i le Atua ma le tuutoina atu ma le lotoatoa ia te ia, e sili mamao atu ona tāua na i lo o le lalelei faaletino. E fiafia le finagalo o le Atua ia i latou o ē talisapaia ma faataunuu a latou avega tauave ina ia avea o ni paaga faaipoipo e malolosi faaleagaga. Ma o le malosi silisili e mafai ona ausia e se ulugalii, e maua mai lea i le tuutoina atu o paaga uma e toʻalua i Lē na Foafoaina Mea, ma talia atoatoa ana taʻiala. O le auala lenei e faamamaluina ai Ieova, ma amata ai ona iai le faaipoipoga i se faavae e mausalī faaleagaga, lea o le a maua ai se mafutaga e tumau.

[Faamatalaga pito i lalo]

O le a Faapefea Ona E Tali?

• Aiseā e manaʻomia ai taʻiala tauatua i le filifilia o se paaga faaipoipo e lelei?

• O le a faapefea ona aogā le tuutoina i le Atua mo le faamalosia o le fusi o le faaipoipoga?

• E mafai faapefea ona sauniunia e mātua a latou fanau mo se faaipoipoga?

• Aiseā e tāua ai le ‘faaipoipo tau lava i le ua i le Alii’?

[Fesili mo le Suʻesuʻega]

[Ata i le itulau 17]

O le faatatauina o fautuaga a le Atua i le filifilia o sau paaga e mafai ona iʻu ai i le tele o fiafiaga

[Ata i le itulau 18]

E ʻoa faamanuiaga e maua mai le ‘faaipoipo tau lava i le ua i le Alii’