Ua Lata Ina Muta le Taimi o Loo Faataga Ai e le Atua Mafatiaga

O SO o se vaipanoa lava e te tagaʻi atu i ai, o loo iai foʻi mafatiaga. O nisi tagata o i latou lava e māfua ai. Ua pisia i latou i faamaʻi pipisi ona o feusuaʻiga, pe aafia i āuga ona o le faaaogā sesē o fualaau faasāina po o le ʻava malosi po o le ulaula tapaa. Po ua latou fesagaʻi foʻi ma faafitauli tau i le soifua mālōlōina ona o le lē lelei o taumafa o loo masani ona latou taumamafa ai. Peitaʻi, o le tele o mafatiaga e māfua mai vala po o tulaga e lē oo i ai le pule a tagata lautele: taua, faiga sauā i le vā o ituaiga o tupuaga, solitulafono, mativa, oge ma faamaʻi. O se isi mea e lē mafai ona oo i ai le pule a tagata, o mafatiaga ia e fesootaʻi atu i le soifua matua ma le oti.

Ua faamautinoa mai e le Tusi Paia ia i tatou e faapea “o le Atua, o le alofa lava ia.” (1 Ioane 4:8) Aiseā la, ua faataga ai e se Atua alofa nei mafatiaga uma ina ia iai pea mo le tele o senituri? O afea o le a ia aumaia ai se vaifofō mo le tulaga o loo iai? Ina ia taliina na fesili, e manaʻomia ona tatou tilofaʻia le fuafuaga mautū a le Atua e faatatau i le fanau a tagata. O le a fesoasoani lenei ia i tatou ina ia malamalama  i le pogai ua faataga ai e le Atua mafatiaga ma le mea o le a ia faia i ai.

Le Meaalofa o le Filifiliga Saʻoloto

Ina ua foafoaina e le Atua le uluaʻi tagata, sa ia tuuina i ai ma isi mea e ese mai le tino ma le faiʻai. E lē gata i lea, sa leʻi foafoaina e le Atua Atamu ma Eva ina ia avea o ni masini ua faapolokalameina e leai ni mafaufau. Sa ia tuuina i o la mafaufau le tomai o le filifiliga saʻoloto. Sa avea lena mea o se meaalofa e sili ona lelei, auā na “silasila atu le Atua i mea uma ua na faia, faauta foi, ua matuā lelei lava.” (Kenese 1:31) Ioe, “e sao lava lana galuega.” (Teuteronome 32:4) E sapaitalia e i tatou uma lenei meaalofa o le filifiliga saʻoloto, auā tatou te lē mananaʻo e faatonutonu uma mai o tatou mafaufauga ma gaoioiga e aunoa ma se filifiliga e tatou te faia i se mea.

Ae peitaʻi, pe sa tatau ea ona faaaogā le meaalofa matagofie o le filifiliga saʻoloto, e aunoa ma ni tapulaa? E tusa ai o faatonuga na tuuina atu i uluaʻi Kerisiano, ua tali mai le Afioga a le Atua: “[Ia] pei o e saʻoloto, a e aua neʻi fai le saʻolotoga ma ufiufi o le loto leaga, a ia faapei o auauna a le Atua.” (1 Peteru 2:16) Mo se lelei o tagata lautele, e tatau ona iai ni tuaoi. O lea la, sa tatau i le filifiliga saʻoloto ona faatonutonuina e le pule a le tulafono. Pe a lē faia faapea, o le a iʻu ai i le lē maopoopo.

O Ai e Ana le Tulafono?

O ai e ana le tulafono lea sa filifilia ai tapulaa talafeagai o le saʻolotoga? E fesootaʻi atu le tali o lenei fesili i le māfuaaga autū ua faataga ai e le Atua mafatiaga. Talu ai na foafoaina e le Atua le fanau a tagata, e sili atu la ona lelei lona silafia i le po o ā tulafono e manaʻomia ona latou usitaia mo so latou lava lelei ma se lelei o isi. Ua faapenei ona faaupu ai e le Tusi Paia: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.”—Isaia 48:17.

E manino lava la, o se manatu tāua lenei: Sa leʻi foafoaina tagata ina ia tutoʻatasi ese mai le Atua. Na ia faia i latou i se auala e tatau ai ona faalagolago le mauaina o lo latou taulau manuia ma lo latou fiafiaga, i le usiusitai atu i ana tulafono amiotonu. Na faapea mai Ieremia, le perofeta a le Atua: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.”—Ieremia 10:23.

Sa faia e le Atua le tagata ina ia gauaʻi atu i ana tulafono faaletino, e pei o le tulafono o le kalave. Sa faapena foʻi ona ia faia tagata ina ia gauaʻi atu i ana tulafono i amioga tatau, na ua fuafuaina ina ia maua ai se vafealoaʻi faaletagata e autasi. Mo se māfuaaga lelei la, ua augani mai ai le Afioga a le Atua: “Ia e faatuatua ia Ieova ma lou loto atoa; a e aua le faalagolago i lou lava atamai.”—Faataoto 3:5.

O lea, e lē taitai mafaia e le aiga faaletagata ona faatonutonuina o ia lava e aunoa ma le pulega a le Atua. I le taumafai e fia tutoʻatasi ese mai ia te ia, ua fuafuaina ai e tagata faiga tau i le vafealoaʻi, tau tamaoaiga, faapolotiki ma pulega faalotu, lea o le a feteenaʻi, ma ‘pule ai le tasi tagata i le tasi, ma leaga ai o ia lava.’—Failauga 8:9.

O le ā le Mea na Sesē?

Na foaʻi atu e le Atua i o tatou uluaʻi mātua, o Atamu ma Eva, se  amataga lelei atoatoa. Sa lelei atoatoa o la tino ma mafaufau faapea ma se faatoʻaga parataiso na avea ma o la aiga. Pe ana fai la te gauaʻi atu i le pule a le Atua, semanū e tumau pea lo la lelei atoatoa ma lo la fiafia. Na semanū, e mulimuli ane, avea i laʻua ma mātua o se aiga atoa faaletagata e lelei atoatoa ma fiafia, o loo ola i se lalolagi parataiso. O le fuafuaga mautū lena a le Atua mo le fanau a tagata.—Kenese 1:27-29; 2:15.

Peitaʻi ane, sa faaaogā sesē e o tatou uluaʻi tuaa le la filifiliga saʻoloto. Sa la mafaufau sesē e faapea, e mafai ona la taulau manuia a o tutoʻatasi ese mai le Atua. I la laʻua lava filifiliga saʻoloto, na la see ese ai mai tuaoi o ana tulafono. (Kenese, mataupu e 3) Talu ai lo la teena o lana pulega, sa lē toe avea ai o sana avega tauave le faatumauina o lo la tulaga lelei atoatoa. ‘Sa leaga i laʻua lava, e leʻi tumau ona avea o sana fanau, ma o lo laʻua lava ila.’—Teuteronome 32:5.

Mai le taimi na lē usiusitai ai Atamu ma Eva i le Atua, na amata ai ona faasolo ifo ina faaleagaina o la tino ma mafaufau. O Ieova le puna o le ola. (Salamo 36:9) Talu ai la le vavae ese e le uluaʻi ulugalii faaletagata o i laʻua lava mai i a Ieova, na oo ai ina la lē lelei atoatoa ma iʻu ai lava ina feoti. (Kenese 3:19) I le ōgatusa ma tulafono o le tuufaasolo mai o uiga, foliga ma isi mea faapena e ala i sela faafanautama, ua mafai ai ona maua e a la fanau na o le mea lava sa iai i o latou mātua. Ma o le ā lena mea? O le lē lelei atoatoa ma le oti. O lea na tusi mai ai le aposetolo o Paulo: “Faapei ona oo mai o le agasala i le lalolagi i le tagata e toatasi [Atamu], o le oti foi ona o le agasala, ona oo mai ai lea o le oti i tagata uma lava, auā ua agasala uma lava.”—Roma 5:12.

Le Finauga Autū—Pule Silisili Ese

Ina ua fouvale Atamu ma Eva i le Atua, sa la luʻia ai lana pule silisili ese, o lona uiga, o lana aiā e pule ai. Sa mafai e Ieova i lena lava taimi ona faaumatia i laʻua ae toe fai se isi ulugalii e amata ai, peitaʻi o le a lē foʻia ai i lena mea le finauga i le po o le pulega a ai ua tonu ma sili ona lelei mo tagata. O le faatagaina o se taimi e faavae aʻe ai e tagata a latou faiga tau i le vafealoaʻi e tusa ma o latou lava manatu, o le a matuā faamautinoa ai lava e tagata pe mafai e se pulega e tutoʻatasi ese mai le Atua ona taulau manuia.

O le ā ua taʻu mai ia i tatou e le faitau afe o tausaga o le talafaasolopito o le tagata? I na senituri uma, ua faatino ai e tagata le tele o ituaiga o faiga tau i le vafealoaʻi, tau tamaoaiga, faapolotiki, ma pulega faalotu. Ae peitaʻi, o loo iai pea le amioleaga ma mafatiaga. O le mea moni, ‘o tagata amio leaga o loo alualu pea lo latou leaga,’ aemaise lava i o tatou taimi.—2 Timoteo 3:13.

Na vaaia i le senituri lona 20 se aofaʻiga maoaʻe i mea ua mafai ona ausia e le faasaienisi ma mea ua fausia e tagata. Peitaʻi na vaaia ai foʻi le mafatiaga sili ona mataʻutia i le talafaasolopito atoa o le fanau a tagata. Ma e tusa lava po o ā ni atamai faafomaʻi ua ausia, ae tumau pea le moni o le tulafono a le Atua: O tagata ua vavae ese mai le Atua—le puna o le ola—ua mamaʻi, ua faasolo ina matutua, ma feoti. Maʻeu la se faamaoniga manino e faapea e lē mafai e tagata ona ‘faatonuina mea e ui ai i latou’!

Ua Faatinoina le Pule Silisili Ese a le Atua

Ua matuā mautinoa lava, o lenei gaoioiga mataʻutia o le fia tutoʻatasi ese mai le Atua ua faaalia mai ai, o pulega e faia e tagata e aunoa ma se faalagolago atu i le Atua e lē taitai ona taulau manuia. E na o le pulega lava a le Atua e mafai ona aumaia le fiafia, le autasi, le soifua mālōlōina ma le ola. E lē gata i lea, i le Afioga lē masesē a Ieova le Atua, le Tusi Paia, ua faaalia mai ai e faapea o loo tatou ola nei i “aso e gata ai” o pulega faaletagata ua tutoʻatasi ese mai le Atua. (2 Timoteo 3:1-5) Ua toeitiiti lava ona faamutaina lea o le faapalepale mai o Ieova i lenei mea, faapea lona faapalepale mai i le amioleaga ma mafatiaga.

Ua lē o toe mamao ona faalaa mai lea o le Atua i mataupufai a tagata. Ua taʻu mai e le Tusi Paia ia i tatou e faapea: “O ona po o ia tupu [pulega faaletagata o loo faatinoina nei] e faatuina ai e le Atua o le lagi o le malo [i le lagi] e le faaumatia e faavavau; o lea malo foi, e le tuuina atu ia i se tasi nuu [o le a lē taitai ona toe puleaina e tagata le lalolagi], na te tuʻimomomoina ma faaumatia ia malo uma lava [pulega o loo iai nei],  a o ia e tumau lava e faavavau.”—Tanielu 2:44.

O le faasilisilia o le pule silisili ese a Ieova le Atua e ala mai i le Malo faalelagi, o le matua lena o le Tusi Paia. Sa faaaogā e Iesu lenei matua e avea ma ana aʻoaʻoga sili. Na ia fetalai: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:14.

Pe a oo ina suia e le pulega a le Atua le pule a le tagata, o ai o le a faasaoina ae o ai e lē faasaoina? I le Faataoto 2:21, 22, ua faamautinoa mai ai ia i tatou e faapea: “O e amio saʻo [o ē lagolagoina le pule a le Atua], latou te mau i le nuu; ma e ua sao a latou amio, e faatotoeina ai i latou; a e vavaeeseina o e amio leaga [o ē lē lagolagoina le pule a le Atua] ai le laueleele.” Na pese le faisalamo na faagaeeina e le Atua e faapea: “E toe itiiti, ona leai lea o le tagata amio leaga . . . A o e agamalu, e fai mo latou le nuu; e faafiafia foi i latou ia te i latou ona o le manuia e tele. E fai lava le nuu mo tagata amiotonu, e nonofo ai pea i latou.”—Salamo 37:10, 11, 29.

Se Lalolagi Fou Ofoofogia

I le pulega a le Malo o le Atua, o le a ulu atu ai i latou e faasaoina mai le iʻuga o lenei faiga o mea, i se lalolagi ua faamamāina mai amioleaga ma mafatiaga. O le a saunia faatonuga mai le Atua mo le fanau a tagata, ma e mulimuli ane ‘o le a tumu le lalolagi i le malamalama o Ieova, e pei ona ufitia o le iliti tai i le suāsami.’ (Isaia 11:9) O lenei aʻoaʻoga faalaeiau ma aogā, o le a iʻu ai i se sosaiete faaletagata e filemu moni ma autasi. O lea, o le a lē toe iai ni taua, le fasioti tagata, o faiga sauā, o feusuaʻiga e fai faamalosi, le gaoi, po o se isi lava solitulafono.

E ofoofogia aogā faaletino o le a maua e tagata usiusitai e ola i le lalolagi fou a le Atua. O le a tafiesea āuga leaga uma o fouvalega i le pule a le Atua. O tulaga lē lelei atoatoa, o maʻi, le soifua matua ma le oti, o le a avea ma mea o aso ua teʻa. Ua faamautinoa mai e le Tusi Paia ia i tatou e faapea: “E le fai mai foi se tasi ua mau ai, Ou te maʻi.” E lē gata i lea, ua folafola mai e le Tusi Paia: “Ona faapupulaina ai lea mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū.” (Isaia 33:24; 35: 5, 6) Maʻeu se fiafiaga o le a iai i le mauaina o se soifua mālōlōina atoatoa ona lelei—e faavavau!

E ala i le taʻitaʻiga alofa a le Atua, o le a faaaogā ai e tagata e ʻaināina lena lalolagi fou o latou malosi ma tomai i le fafauina o se parataiso i le lalolagi aoao. O le a mou ese atu e faavavau le mativa, le fiaʻai ma le leai o ni aiga e nonofo ai, auā ua faapea mai le valoaga a Isaia: “Latou te faia fale, ma latou mau ai; latou te totō tovine, ma latou aai i o latou fua. Latou te le fai fale ina ia mau ai nisi; latou te le totō ina ia ʻai ai nisi.” (Isaia 65:21, 22) O le mea moni, ‘o le a latou taitasi ma nofo i lalo o lona vine, ma lalo o lona mati; o le a leai foi se na te faamatau mai ia i latou.’—Mika 4:4.

O le a talilelei atu le lalolagi i le tausiga alofa a le Atua ma tagata usiusitai. O faamautinoaga nei a le Tusi Paia ua tatou mauaina: “E olioli ona o i latou le vao lafulafua, ma le nuu naumati; e fiafia le toafa, ma fua mai e pei o le aute. . . . E oso mai le vai i le vao lafulafua, ma  vaitafe i le toafa.” (Isaia 35:1, 6) “O le a anoanoaʻi saito i le lalolagi; i tumutumu o mauga o le a fau ma soloi ai.”—Salamo 72:16, NW.

Ae faapefea le faitau piliona o tagata ua maliliu? O i latou o loo manatua e le Atua o le a toe faafoʻisia mai i le ola, auā “o le a toe tutū mai e ua amiotonu atoa ma e ua amioletonu.” (Galuega 24:15, LF) Ioe, o le a toe faafoʻisia le ola i ē ua maliliu. O le a aʻoaʻoina i latou i upu moni matagofie e faatatau i le pulega a le Atua, ma tuuina atu ia i latou le avanoa e ola ai e faavavau i le Parataiso.—Ioane 5: 28, 29.

E ala mai i nei mea, o le a suia atoatoa ai e Ieova le Atua le tulaga malaia o mafatiaga, o maʻi, ma le oti lea ua faapologaina ai le fanau a tagata mo le faitau afe o tausaga. E lē toe iai ni maʻi! E lē toe iai ni tino e lē atoatoa le malosi! E lē toe iai se oti! O le a “sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā [o le a] mavae atu mea muamua.”—Faaaliga 21:3, 4.

O le auala lena o le a faaiʻuina ai e le Atua mafatiaga. O le a ia faaumatia lenei lalolagi iʻuvale ma faaoo mai se faiga fou atoatoa o mea, lea “e mau ai le amiotonu.” (2 Peteru 3:13) Maʻeu se tala ina a lelei! Ua tatou matuā manaʻomia lava lena lalolagi fou. Ma o le a lē umi se taimi e tatou te faatalitalia ai. E tusa ai o le faataunuuga o valoaga a le Tusi Paia, e tatou te iloa ai, ua i faitotoʻa le lalolagi fou, ma ua latalata ina muta le faatagaina e le Atua o mafatiaga.—Mataio 24:3-14.

[Pusa i le itulau 8]

Le Lē Taulau o Pulega Faaletagata

E tusa ai o pulega faaletagata, na taʻua e lē na avea muamua ma minisita sili o le setete i Siamani, o Helmut Schmidt e faapea: “O i tatou o tagata . . . e masani lava ona tatou lē puleaina atoatoa le lalolagi, ma i le tele lava o taimi, e matuā leaga lava. . . . E tatou te leʻi puleaina lava i se tulaga ua filemu atoatoa ai.” Na taʻua i le Human Development Report 1999 e faapea: “Ua lipotia mai e atunuu uma lava le matuā faaleagaina o a latou faatulagaga tau i le vafealoaʻi, faatasi ai ma faiga faatupu faalavelave, le faateteleina o solitulafono, le faateteleina o faiga sauā i aiga. . . . O loo faatupulaʻia faamataʻuga i le lalolagi aoao, ua sili atu na i lo tomai o malo ina ia foʻia na mea, ma ua saosaoa atu na i lo taumafaiga faava-o-malo.”

[Ata i le itulau 8]

“E faafiafia foi i latou ia te i latou ona o le manuia e tele.”—Salamo 37:11

[Faamatalaga i Ata i le itulau 5]

Lona tolu mai le pito i luga, se tinā ma sana tama: FAO photo/B. Imevbore; pito i lalo, se pomu o loo pasae aʻe: U.S. National Archives photo