Ia Faamalosia Lou Faatuatuaina o Ieova

Ua faagasolo se faufauga o se fasiotiga tagata. Ua taupulepule faatasi tagata maualuluga o le malo ma ua ō mai ma se lafo faatū mo le faia o se tulafono fou. Na latou mananaʻo e faia se faasalaga oti mo so o se tasi e auai i se tapuaʻiga e lē o faamaoniaina e le Malo.

PO UA e faalogo i se mea faapea? Ua tumu le talafaasolopito i faataʻitaʻiga a tagata o ē e fai ma masani le faufau o faiga leaga e ala i le tulafono. O le mea na tupu e pei ona taʻua i luga sa tupu i aso o le perofeta o Tanielu i le Emepaea o Peresia. O le tulafono lea na faavaeina e le tupu o Tariu na faamautūina e faapea: “Ai se tasi na te faatoga atu se mea mai se tasi atua, po o se tagata, a e tau lava o oe e faatoga i ai, le tupu e, i po e tolugafulu, ia lafoina o ia i le lua o leona.”—Tanielu 6:7-9.

O le ā o le a faia e Tanielu ona o le faamataʻuga o le oti? Po o le a faaauau ai pea ona ia faatuatua atu i lona Atua, o Ieova, po o le a ia faamaamulu ma faia e pei ona fai mai ai le tupu? Ua taʻu mai i a i tatou i le mea na tupu: “Ua iloa e Tanielu ua tusia le tusi, ona alu atu ai lea o ia i lona fale, ua avanoa faamalama o lona potu e faasaga i Ierusalema, ua taʻi foi faatolu i aso ona tootuli o ia i ona tulivae, ma tatalo, ma faafetai i luma o lona Atua, faapei ona masani ai o ia.” (Tanielu 6:10) Ua tatou masani lelei ma le vaega o loo sosoo mai o le faamatalaga. Na lafoina Tanielu i le lua o leona ona o lona faatuatua,  ae na “pupuni ai gutu o leona” e Ieova ma faasaoina ai lana auauna faamaoni.—Eperu 11:33; Tanielu 6:16-22.

Taimi mo le Suʻesuʻeina o le Tagata Lava Ia

I aso nei, ua ola auauna a Ieova i se lalolagi e lē fiafia mai, ua fesagaʻia le tele o faamataʻuga i lo latou soifua solo lelei faaletino ma le faaleagaga. Mo se faataʻitaʻiga, i le mānu aʻe o faiga sauā ona o le feitagaʻi i le vā o nisi o atunuu, o le tele lava o Molimau na fasiotia ai. I isi vaipanoa, ua fesagaʻia ai e auauna a Ieova le lē lava o meaʻai, faigatā tau tamaoaiga, mala faalenatura, maʻi ogaoga, ma isi lava tulaga e faamataʻuina ai le ola. E lē gata i lena, na latou feagai foʻi ma sauāga, omiga mai galuega, ma isi lava tofotofoga e faia le mea sesē, o nei mea uma e ono ōia ai lo latou itu faaleagaga. O le mea moni, o Lē Tetee sili, o Satani, ua matuā maumauaʻi e faaumatia auauna a Ieova po o le ā lava le auala e taulau ai.—1 Peteru 5:8.

I le fesagaʻi ai ma na tulaga, o le ā e mafai ona tatou faia? E ui o se tulaga masani le oo mai o le fefe pe a faamataʻuina le ola o se tasi, ae e mafai ona teu i o tatou mafaufau le faamautinoaga o loo i upu a le aposetolo o Paulo: “Aua ua fetalai mai o ia [Ieova], Ou te le tuua lava oe, ou te le tuulafoai lava ia te oe. O le mea lea tatou te mafai ai ona fai atu ma le loto tele, O le Alii [Ieova] o loʻu fesoasoani ia, ou te le fefe lava i se mea e faia e tagata ia te au.” (Eperu 13:5, 6) E mafai foʻi ona tatou mautinoa faapea, e faapena foʻi lagona o Ieova e faatatau i ana auauna i aso nei. Peitaʻi, e ese le iloa o folafolaga a Ieova, ese le talitonu faapea o le a ia gaoioi mo lo tatou lelei. O lea la, e matuā tāua ai lo tatou suʻesuʻeina o le faavae o loo fafau aʻe ai lo tatou faatuatua i a Ieova ma ia tatou faia mea uma tatou te mafaia ina ia faamalosia ma tausia ai lena faatuatua. Pe a tatou faia lena mea, “o le manuia foi mai le Atua, o loo silisili lava i mea uma e manatu i ai, e leoleoina ai o [tatou] loto atoa ma o [tatou] mafaufau ia Keriso Iesu.” (Filipi 4:7) O lea, pe a oo mai tofotofoga, o le a mafai ona tatou mafaufau saʻo ma feagai ai ma le poto i na tulaga.

Faavae mo le Faatuatuaina o Ieova

E mautinoa le tele o māfuaaga e tatou te faatuatua ai i Lē na Foafoaina i tatou, o Ieova. E muamua i na mea o le mea moni faapea, o Ieova o le Atua e alofa, e manatu moni mai i ana auauna. E lē mafaitaulia mea o loo faamauina i le Tusi Paia lea e taʻu mai ai e faatatau i le tausiga alofa a Ieova mo ana auauna. I le faamatalaina o le auala na feutagaʻi ai Ieova ma ona tagata filifilia, o Isaraelu, na tusi ai Mose e faapea: “Na ia maua o ia i le vao, o le mea e le āina, e uio ai manu feai, ma ua gaogao; na ia siosio ia te ia, ma aʻoaʻo atu ia te ia, na ia leoleo ia te ia e pei o lona tamatamaimata.” (Teuteronome 32:10) I aso nei, o loo faaauau pea ona tausia lelei e Ieova ana auauna, e lē gata o se vaega ae faapea foʻi ma tagata taʻitoʻatasi. Mo se faataʻitaʻiga, ina ua matuā leai ni meaʻai a nisi o Molimau i le taimi o le taua a le atunuu lava ia o Bosnia, na faamautinoa ai e Ieova ua latou mauaina mea e matuā manaʻomia e ala i taumafaiga malosi a o latou uso mai Croatia ma Oseteria, lea na tuu atu o latou ola i se tulaga lamatia, e malaga atu i nuu e matuā lamatia ai ina ia avatu mea e manaʻomia i o latou uso. *

Ona o Ieova o le Atua e Ona le Malosi Uma Lava, e mautinoa la e na te mafai ona puipuia ana auauna i lalo o so o se tulaga. (Isaia 33:22; Faaaliga 4:8) E tusa foʻi pe faatagaina e Ieova nisi o ana auauna e faamaonia lo latou faamaoni seʻia oo i le oti, e na te tausia pea ma fesoasoani i a i latou e tausia lo latou faamaoni, ma mafai ai ona latou tumau maumauaʻi, ma olioli, ma toʻafimālie seʻia oo i le iʻuga. O lea la, e mafai foʻi ona i a i tatou le mautinoa lava lea e tasi e pei ona sa iai i le faisalamo: “O le Atua, o lo tatou malu ia ma lo tatou malosi; e fai o ia ma fesoasoani silisili i puapuaga. O le mea lea tatou te le fefefe ai, pe a faaliliuina le lalolagi, ma luluina mauga i totonu o le sami.”—Salamo 46:1, 2.

Ua faaalia foʻi e le Tusi Paia e faapea o Ieova o le Atua o le upu moni. O lona uiga e tumau pea ona faamaoni o ia i le faataunuuina o ana folafolaga. O le mea moni, ua faamatalaina o ia e le Tusi Paia o le Atua “e le mafai ona tala pepelo.” (Tito 1:2) Ona e faaalia pea e Ieova lona finagalo malie  e puipuia ma faasaoina pea lava pea ana auauna, e mafai la ona tatou mautinoa atoatoa faapea e lē gata e na te mafaia, ae nofosauni foʻi o ia e faataunuuina ana folafolaga.—Iopu 42:2.

Auala e Faamalosia ai lo Tatou Faatuatua

E ui lava ua i a i tatou māfuaaga uma e tuu atu ai lo latou faatuatua i a Ieova, ae e lē tatau lava ona tatou manatu mamā i lena mataupu. Talu ai, i le tulaga masani o loo iai le lalolagi ua itiiti le faatuatua atu i le Atua, e faigofie ai lava la ona faavaivaia lo tatou faatuatua atu i a Ieova. O lea, e ao ai ona tatou faia ni taumafaiga maumauaʻi e faamalosia ma faatumauina ai lena faatuatua. O loo silafia e Ieova lenei mea, ma e na te saunia auala e mafai ona tatou faia ai.

Muamua lava, ua ia saunia lana Afioga tusia, le Tusi Paia, lea ua faamaumauina ai gaoioiga mamana na ia faia mo ana auauna. Seʻi mafaufau foʻi, o le ā le tele o se mautinoa e mafai ona i a te oe i se tasi, pe afai e na o le pau lava le mea e te iloa e na o lona igoa? Atonu e itiiti lava, pe afai e iai. Pe e lē moni ea e manaʻomia ona e iloa ona ala ma ana gaoioiga ina ia mafai ona e faatuatuaina o ia? A o tatou faitau ma mafaufau loloto i mea o loo taʻua i le Tusi Paia, e faalolotoina ai lo tatou poto e faatatau i a Ieova ma ona ala mataʻina, ma tatou talisapaia atili ai le maufaatuatuaina o ia. O le a faapea ona faamalosia ai lo tatou talitonuina o ia. Na faataatia e le faisalamo se faataʻitaʻiga sili ona lelei ina ua ia taʻua i lana tatalo mai le loto i le Atua e faapea: “Ou te manatua galuega a Ioa; e moni, ou te matua manatua ou vavega anamua. Ou te manatunatu foi i au galuega uma, ou te mafaufau i mea na e faia.”—Salamo 77:11, 12, LT.

E faaopoopo atu i le Tusi Paia, o loo i a i matou foʻi le anoanoaʻi o puna o meaʻai faaleagaga i lomiga faale-Tusi Paia ua saunia e le faalapotopotoga a Ieova. Faatasi ai ma isi mea o tusia ai, ua masani ona iai i nei lomiga tala faagaeetia loto i olaga o auauna a le Atua i aso nei, ua faaalia ai le auala na saunia ai e Ieova le fesoasoani ma le mapusaga, ina ua latou fetaiaʻi ma tulaga ua leai ai se faamoemoe. Mo se faataʻitaʻiga, o Martin Poetzinger, lea na avea mulimuli ane ma sui o le Vaega Pule a Molimau a Ieova, na oo ina maʻi tigāina o ia a o auauna o se paeonia i vaipanoa o Europa e mamao ese mai lona atunuu. Sa leai sana tupe, ma leai foʻi se fomaʻi na malie e vaaia o ia. Ae na leʻi tuulafoaʻia o ia e Ieova. Mulimuli ane, na faafesootaʻi le tagata faufautua sinia a le falemaʻi o lena vaipanoa. Ona o le faufautua sinia e talitonu maumauaʻi i le Tusi Paia, na tausia ai e lena tamāloa agalelei le uso o Poetzinger e pei o sona lava atalii, e aunoa ma se totogi. O le faitauina o na tala i mea na tutupu totino i olaga o tagata, e mautinoa le faamalosia ai o lo tatou faatuatuaina o lo tatou Tamā faalelagi.

O le isi fesoasoani e matuā tāua ua saunia e Ieova e faamalosia ai lo tatou faatuatua atu i a te ia, o le faaeaga tautele o le tatalo. Ua taʻu mai ma le alofa e le aposetolo o Paulo i a i tatou e faapea: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai.” (Filipi 4:6) O “mea uma” e mafai ona aofia ai o tatou faalogona, manaʻoga, atugaluga, ma popolega. O le tele e tatou te tatalo ai faatasi ma le tele e sau ai mai le loto, o le malosi lea o le a iai lo tatou faatuatua i a Ieova.

A o iai Iesu Keriso i le lalolagi, na iai taimi na ia alu atu ai i mea tuufua na o ia ina ia lē faalavelaveina ana tatalo. (Mataio 14:23; Mareko 1:35) A o leʻi faia ni filifiliga e matuā tāua, na ia faaaluina le pō atoa e tatalo ai i lona Tamā. (Luka 6:12, 13) E lē o se mea la e faateʻia ai e faapea o le faatuatuaina e Iesu o Ieova sa matuā malosi, lea na ia mafai ai ona ia onosaia le tofotofoga e matuā sili ona ogaoga ua oo i se tasi. O ana toe upu i le laau faaoosala e faapea: “Loʻu Tamā e, ou te tuuina atu loʻu nei agaga i ou aao.” O lena faaaliga o lona talitonuga na faaalia ai e faapea, sa lē faaitiitia lona faatuatua i lona Tamā seʻia oo i le  iʻuga, e ui lava e leʻi faalaa ane Ieova e faasaoina o ia.—Luka 23:46.

O loo iai foʻi le isi auala e ati aʻe ai lo tatou faatuatuaina o Ieova, o le auaufaatasi lea e lē aunoa ma i latou o ē e faatuatua atu i a te ia ma le lotoatoa. Na faatonu e Ieova ona tagata e faapotopoto e lē aunoa ina ia aʻoaʻoina e faatatau i a te ia, ma ia faalaeiau e le tasi i le isi. (Teuteronome 31:12; Eperu 10:24, 25) O na aufaatasiga sa faamalosia ai lo latou faatuatuaina o Ieova, ma mafai ai ona latou onosaia tofotofoga ogoogo o lo latou faatuatua. I se atunuu i Aferika lea na faasāina ai le talaʻiga, na lē avatuina ai i Molimau a Ieova le puipuiga a leoleo, le faia o pepa malaga, o pepa faaipoipo, o togafitiga faafomaʻi, faapea ai ma galuega. Ina ua pa le taua i se tasi o vaipanoa o le atunuu, e 39 tagata, e aofia ai ma tamaiti, o le faapotopotoga e lata ane na nonofo i lalo o se auala laupapa maualalo i le toāfa pe tusa ma le fā masina, ina ia malu ai a o tafanaina lo latou taulaga. I lalo o na tulaga e sili ona faigatā, sa mauaina lava lo latou malosi tele e ala i le iloiloina o le mau o le Tusi Paia i aso taʻitasi ma isi sauniga. O le auala lena na mafai ai ona latou tutumau i tofotofoga faigatā, a o mautū lo latou malosi faaleagaga. O lenei mea na tupu ua faaalia ai le tāua tele o le auaufaatasi e lē aunoa ma tagata o Ieova.

O le manatu mulimuli, ina ia faamalosia lo tatou faatuatua i a Ieova, e tatau ona tatou gaoioi pea i le galuega talaʻi o le Malo, ia saunia pea e tufa atu le tala lelei i isi. Na faataʻitaʻia lenei tulaga e ala i se mea faamomoi loto na tupu i se tagata talaʻi talavou maelega i Kanata na maʻi i le kanesa o le toto, lea e oo atu ai i le oti. E ui lava i le tugā o lona maʻi, ae sa ia manaʻo e avea ma paeonia sauatoa, o lona uiga o se faifeʻau faataimi atoa. Ina ua tau feoloolo mai lona maʻi, sa lava lona malosi e faaalu ai le masina e tasi i le auaunaga e avea o se paeonia lagolago. Ona oo lea ina tulaga faigatā lona maʻi, ma maliu ai o ia i ni nai masina mulimuli ane ai. Ae ui i lea, na tumau pea lona malosi faaleagaga seʻia oo lava i le iʻuga, ma o lona faatuatua i a Ieova sa aunoa ma se taimi na maluelue ai. Na toe taʻua e lona tinā e faapea: “Seʻia oo lava i lona maliu, sa sili atu lona popole i isi na i lo o ia. E na te faalaeiau atu i isi ina ia suʻesuʻe i le Tusi Paia, ma taʻu atu i a i latou, ‘O le a tatou toe feiloaʻi i le Parataiso.’”

Faamaonia lo Tatou Faatuatua i a Ieova

“E faapei o le tino ua oti ia pe a teʻa le agaga, e faapea foʻi le faatuatua ua mate pe a leai ni galuega.” (Iakopo 2:26) E tusa lava po o le ā le tele tatou te faapea atu ai e tatou te faatuatua i le Atua, e lē aogā seʻi vaganā ua tatou faaalia lo tatou faatuatua i a te ia e ala i gaoioiga. Na faatuatua atoatoa atu Aperaamo i a Ieova ma faamaonia lena faatuatua e ala i le usiusitai e aunoa ma le masalosalo i ana poloaʻiga, ma na oo lava ina nofosauni e tuuina atu lona atalii, o Isaako, e fai ai le taulaga. Ona o le matilatila o lona faatuatua ma le usiusitai, na oo ai ina lauiloa Aperaamo o le uō a Ieova.—Eperu 11:8-10, 17-19; Iakopo 2:23.

E tatou te lē tau faatali seʻi oo mai ni tofotofoga mataʻutia i a i tatou e faaalia ai lo tatou faatuatua atu i a Ieova. Na fetalai Iesu i ona soo: “O le faamaoni i le mea itiiti, e faamaoni foi o ia i mea e tele; o le amioletonu i le mea itiiti, e amioletonu foi o ia i mea e tele.” (Luka 16:10) E tatau ona tatou faamasani e faatuatua atu i a Ieova i a tatou gaoioiga uma i aso taʻitasi, ia usiusitai atu i a te ia e tusa lava po o ni mea e foliga mai e faatauvaa. Pe a tatou mātauina aogā e maua mai i lena usiusitai, e faamalosia ai lo tatou faatuatua atu i lo tatou Tamā faalelagi, ma mafai ai ona tatou fesagaʻia tofotofoga tetelē pe e sili atu foʻi ona faamataʻuina ai.

A o tulata atu le lalolagi i lona iʻuga mataʻutia, e lē taumatea o le a tele atu sauāga ma lamatiaga e oo i tagata o Ieova. (Galuega 14:22; 2 Timoteo 3:12) E ala i le atiina aʻe o le faatuatua malosi ma le lē maluelue i a Ieova i le taimi nei, o le a mafai ai ona tatou faamoemoe e faasaoina atu i lana lalolagi fou ua folafolaina mai—a lē o le faasaoola i ai e ala atu i le puapuaga tele, ia po o le mauaina e ala i le toetū. (2 Peteru 3:13) Seʻi aua lava nei faatagaina le lē lava o le faatuatua i a i tatou e faaleagaina ai la tatou faiā tautele ma Ieova. O lea, o le faamatalaga na fai atu i a Tanielu ina ua faasaoina o ia mai le lua o leona, e mafai foʻi ona fai mai i a i tatou: “Ua le afaina lava o ia, auā na ia faatuatua i lona Atua.”—Tanielu 6:23.

[Faamatalaga pito i lalo]

[Ata i le itulau 9]

O le faitau i mea na tutupu i auauna faamaoni a Ieova, e pei o Martin Poetzinger, e faamalosia ai le faatuatua