Le Taʻutinoga e Iʻu ai i le Malosi Faaleagaga

“NA OU faalologo, ona palagia ai lea o oʻu ivi i loʻu faataio i le aso atoa; auā sa mamafa lou aao i luga ia te au i le ao atoa foi ma le po; ua liua lava loʻu malosi i le vevela o le tausaga vevela.” (Salamo 32:3, 4) O na upu faamomoiloto atonu ua atagia mai ai ni tigā loloto o faalogona ia sa lagona e le tupu o Tavita o Isaraelu anamua, o tigā na ia faatupuina i a te ia lava e ala i le natiaina o le agasala matuiā na i lo le taʻutino atu.

O Tavita o se tagata sa matilatila ona tomai. O ia o se toa malosi, o se tagata atamai i mataupu faalemalo, o se fatusolo, ma o se tagata faimusika. Peitaʻi, sa ia leʻi faalagolago i ni ona tomai, ae sa faalagolago i lona Atua. (1 Samuelu 17:45, 46) Sa faamatalaina o ia faapea o se tagata na “sao lona loto ia Ieova.” (1 Tupu 11:4) Peitaʻi sa matuā matuiā lava se agasala se tasi na ia faia, ma atonu o le agasala lea o loo faasino atu i ai ana upu i le Salamo 32. E tele lesona e mafai ona tatou aʻoaʻoina pe a iloiloina tulaga na taʻitaʻia atu ai i lana agasala. O le a tatou iloa ai mailei e ao ona ʻalofia, ma mātauina ai foʻi le manaʻomia ona taʻutino a tatou agasala ina ia toe faaleleia ai la tatou faiā ma le Atua.

Se Tupu Faamaoni na Paʻū Atu i le Agasala

A o auai le nuu o Isaraelu i se taua e faasagatau atu i le fanauga a Amoni, sa nofo pea Tavita i Ierusalema. I se tasi afiafi a o fealualuaʻi solo i luga o lona maota, na ia iloa ifo ai se fafine lalelei o loo tāʻele i se aiga tuaoi. Sa ia leʻi taulau i le puleaina o ona faalogona ae ua amata ona ia manaʻonaʻo atu i le fafine. Ina ua ia iloa o le igoa o le fafine o Patesepa, le avā a Uria, o se fitafita i lana vaegaʻau, ona aami lea e Tavita le fafine ina ia aumai i a te ia, ma la faia ai le mulilua. Mulimuli ane na faailoa atu e Patesepa i a Tavita e faapea ua tō o ia.—2 Samuelu 11:1-5.

Na lavelavea ai iinā Tavita. Pe afai o le a faaalialia le la agasala, o le oti le faasalaga mo i laʻua uma. (Levitiko 20:10) Ona ia faia ai lea o se faufauga. Sa ia amia Uria le tane a Patesepa, e toe faafoʻi ane mai le taua. Ina ua uma se taimi umi na ia tuufesili ai i a Uria e faatatau i le taua, ona faatonuina lea o ia e Tavita ia foʻi atu i lona aiga. Sa iai le faamoemoe o Tavita faapea, o lenei mea o le a foliga atu ai o Uria lava le tamā o le pepe a Patesepa.—2 Samuelu 11:6-9.

Na lē maua se toʻa o Tavita, auā sa leʻi asiasi atu Uria i lana avā. Na faapea mai Uria, e lē o se mea tatau i a te ia lona toe foʻi atu i lona aiga ae o loo gāpatia le ʻautau i tulaga mataʻutia o le taua. Pe a auai se ʻautau a Isaraelu i se taua, sa tatau i tane ona taumamao mai le faia o feusuaʻiga, e tusa lava po o a latou avā. Sa tatau ona tumau i lo latou tulaga mamā faaletapuaʻiga. (1 Samuelu 21:5) Ona valaaulia lea e Tavita o Uria mo se taumafataga ma ia faaonā ai i a te ia, peitaʻi sa leʻi alu atu lava Uria i lona fale i lana avā. O le amio faamaoni a Uria na matuā taʻusalaina ai lava le agasala matuiā a Tavita.—2 Samuelu 11:10-13.

O le mailei na fafau mai i lana lava agasala na oo ina matuā lavelavea ai lava Tavita. I lona matuā lē mautonu, na iʻu ai lava ina tasi pē le auala sa ia iloa e mafai ona toe sao ese mai ai. Sa ia toe faafoʻi atu Uria i le taua faatasi ma se tusi i le taʻitaʻiʻau o Ioapo. Na manino lava le uiga o lea tusi puupuu: “Ia e tuu atu ia Uria i tināʻau a le taua, a e tou tuumuli mai ia te ia, ina ia fasia o ia ia oti ai.” E ala i sia lava tamaʻi tusi, na foliga mai ai ua natia e le tupu malosi lana agasala, e ala i lona aauina atu o Uria ina ia fasiotia.—2 Samuelu 11:14-17.

O le taimi lava na māeʻa ai le vaitaimi o le faanoanoa a Patesepa ona o lana tane, sa faaipoipo  atu ai loa Tavita i a te ia. Na faagasolo atu taimi, ma ua fanau mai le la tama. Ae i nei taimi uma lava, sa gūgū pea Tavita i lana agasala. Pe atonu sa ia taumafai e avea ana gaoioiga ma itu e taʻutonuina ai o ia. Pe sa leʻi mamalu ea le oti o Uria i le taua e pei ona sa feoti ai foʻi isi? E lē gata i lea, pe sa leʻi lē usiusitai ea o ia i lona tupu, i lona musu e alu atu i lana avā? O le a faaaogā e le ‘loto faaʻoleʻole’ ituaiga uma o māfuaaga e taumafai e taʻutonuina ai le agasala.—Ieremia 17:9; 2 Samuelu 11:25.

O Laasaga Sesē e Taʻitaʻia ai i le Agasala

E mafai faapefea e Tavita, o le tagata e pele i a te ia le amiotonu, ona paʻū atu i le faia o le mulilua ma le fasioti tagata? E mautinoa lava sa fai sina umi o fuafuaina lana agasala. E tatou te ono mafaufau pe aiseā na lē faatasi atu ai Tavita i lana ʻautau, e lagolagoina i latou a o latou tau ma fili o Ieova. Na i lo lea, sa nofonofo filemu lava Tavita i lona maota, lea sa lē taitai ai ona ia lagonaina tulaga moni o loo tutupu i le taua, ma ono taofia mai ai i lona tuʻinanau sesē atu i le avā a se fitafita faamaoni. I aso nei, o se puipuiga mo Kerisiano moni le faia ma le maelega o so latou sao i mea faaleagaga faatasi ma a latou faapotopotoga, ma ia faia e lē aunoa se sao i le galuega faaevagelia.—1 Timoteo 6:12.

Sa faatonuina le tupu o Isaraelu ina ia faia se kopi o le Tulafono ma faitau i ai i aso taʻitasi. O loo taʻua i le Tusi Paia le māfuaaga mo le faia faapea: “Ina ia aʻoaʻoina ai o ia ia mataʻu ia Ieova lona Atua, ma ia tausi i upu uma lava a lenei tulafono ma nei sauniga, na te faia; ina neʻi faamaualugaina lona loto i ona uso, ina neʻi teʻa ese foi i le poloaiga, i le itu taumatau po o le itu tauagavale.” (Teuteronome 17:18-20) E mafai ona faapea atu sa leʻi usitaia e Tavita lena faatonuga i le taimi na ia faia ai nei agasala matuiā. O le suʻesuʻeina e lē aunoa o le Afioga a le Atua ma mafaufau loloto i ai, e mautinoa lava o le a aogā e puipuia ai i tatou mai le faia o mea sesē i nei aso faigatā.—Faataoto 2:10-12.

E lē gata i lea, o le tulafono mulimuli lava o Tulafono e Sefulu o loo maʻoti le faapea mai: “Aua e te manao i le avā a lē lua te tuaoi.” (Esoto 20:17) E oo ane i lena taimi, ua tele avā ma palake a Tavita sa iai. (2 Samuelu 3:2-5) Peitaʻi, sa leʻi avea lena ma itu e taofia ai o ia mai lona toe tuʻinanau atu foʻi i se isi fafine lalelei. O lenei tala ua faamanatu mai ai i a i tatou le matuiā o fetalaiga a Iesu e faapea: “Ai se vaai atu i le fafine ina ia manao i ai, ua uma ona mulilua ma ia i lona loto.” (Mataio 5:28) Na i lo le taofimau pea i na tuʻinanauga lē tatau, seʻi o tatou faavave ona aveese na tuʻinanauga mai o tatou mafaufau ma loto.

Le Salamō ma le Alofa Mutimutivale

O le faamatalaga tuusaʻo a le Tusi Paia e faatatau i le agasala a Tavita, e mautinoa e lē o tusia mai iinā mo le faamalieina o ni faanaunauga lē talafeagai o se tasi mo feusuaʻiga. Ua aumaia e le tala i a i tatou se avanoa e molimauina ai se faailoaga malosi ma le faagaeeloto o se tasi o uiga mataʻina o Ieova—lona alofa mutimutivale.—Esoto 34:6, 7.

Ina ua fanauina mai e Patesepa se pepe tama, ona aauina atu lea e Ieova le perofeta o Natano e fesagaʻia Tavita. O se gaoioiga lenei o le alofa mutimutivale. Pe ana lē talanoa atu se tasi i a Tavita ae tuu ai lava e gūgū, na semanū e oo ina faaua maaa o ia ma faaauau ai pea i le ala o le agasala. (Eperu 3:13) E fiafia lava, auā sa talia lelei e Tavita le alofa mutimutivale o le Atua. O upu poto ma le manino a Natano na tuia ai le lotofuatiaifo o Tavita, ma ia taʻutino ai ma le lotomaulalo lana agasala i le Atua. O le mea moni, o le Salamo 51, lea e talanoaina ai le agasala sa faia e Tavita ma Patesepa, sa tusia ina ua uma ona salamō Tavita ma ia taʻutino mai lana agasala matuiā. Seʻi aua lava neʻi o tatou faamaaaina o tatou loto pe a tatou paʻūū atu i se agasala matuiā.—2 Samuelu 12:1-13.

Sa faamagaloina Tavita, peitaʻi sa leʻi faasaoina mai le aʻoaʻiga po o āuga o lana agasala. (Faataoto 6:27) Pagā se tulaga ese na semanū e oo i ai pe ana lē faia faapena! Pe ana fai e lē ano mai lava le Atua i mea uma o loo faia, semanū o le a lē uigā ana tapulaa. Na semanū o le a lē uigā ana fetalaiga e pei o le ositaulaga sili o Eli, o lē sa na ona ote atu lava i ona atalii amioleaga ae tuu ai lava i laʻua e fai pea a la amioga leaga. (1 Samuelu 2:22-25) Peitaʻi, e lē pupunia e Ieova le tagata ua lotosalamō mai le mauaina o Lona alofa agalelei. O lona alofa mutimutivale, e pei se vai mālū e faafouina ai, o le a fesoasoani i le tagata faimea  sesē e onosaia ai āuga o le agasala. O le māfana o le faamagaloga tauatua ma le aufaatasiga faalaeiau mai uso tapuaʻi, e mafai ona toe faafouina ai le malosi faaleagaga o le tagata faimea sesē. Ioe, e ala i le togiola a Keriso, e mafai ai e le tagata ua salamō ona ia tofo i “le oloa faulai o lona [le Atua] alofa tunoa.”—Efeso 1:7.

“Se Loto Mamā” ma “se Loto Mau”

Ina ua uma ona taʻutino e Tavita lana agasala, sa leʻi faaauau ai pea ona faavaivaia o ia i se faalogona leaga faapea ua leai sona aogā. O ana upu i salamo na ia tusia e faatatau i taʻutinoga, e faaalia ai se mapusaga na ia lagonaina ma lona maumauaʻi e auauna atu ma le faamaoni i le Atua. Mo se faaaʻoaʻoga, seʻi tagaʻi i le Salamo 32. I le fuaiupu 1, tatou te faitau ai: “Amuia le tagata ua faamagaloina lona solitulafono, ma ua ufitia lana agasala.” Po o le ā lava le matuiā o le agasala, ae mafai ona iai se iʻuga fiafia pe afai e faamaoni se tagata i lona salamō. O se tasi o auala e faaalia ai lenei faamaoni o lona talia lea o āuga uma e iʻu i ai ana gaoioiga, e pei ona sa faia e Tavita. (2 Samuelu 12:13) Sa ia leʻi taumafai e taʻutonuina o ia lava i luma o Ieova pe taumafai e tuuaʻia isi. Ua faapea mai le fuaiupu e 5: “Ona ou faailoa atu ai lea ia te oe o laʻu agasala, na ou le ufitia foi laʻu amioletonu; sa ou faapea, Ou te faaali atu ia Ieova oʻu solitulafono; ona e aveesea ai lea o le leaga o laʻu agasala.” O se taʻutinoga faamaoni e aumaia ai se mapusaga, ma lē toe ōia ai le lotofuatiaifo o le tagata ona o ana sesē i taimi ua teʻa.

Ina ua uma ona ole atu mo le faamagaloga a Ieova, ona talosaga atu lea o Tavita: “Le Atua e, ia e faia se loto mamā mo aʻu; ma ia e faafouina se loto mau i totonu ia te au.” (Salamo 51:10) O le talosagaina o “se loto mamā” ma ‘se loto fou’ e faaalia ai sa manatua e Tavita le faanaunauga agasala na i a te ia, ma sa ia manaʻomia le fesoasoani a le Atua mo le faamamāina o lona loto ae faia se amataga fou. Na i lo le faalolololo ai lava i faalogona faanoanoa, sa ia maumauaʻi ia toe faamalosi i lana auaunaga i le Atua. Na ia tatalo: “[Ieova] e, ia e faamatala mai oʻu laugutu; ona taʻutaʻu atu lea e loʻu gutu lou viiga.”—Salamo 51:15.

O le ā le tali mai a Ieova i le salamō faamaoni o Tavita ma lana taumafaiga maumauaʻi e auauna i a te ia? Sa ia tuu atu i a Tavita lenei faamautinoaga faamāfanafanaloto: “Ou te aʻoaʻo ia te oe, ma faasino ia te oe i lea lava ala e te savali ai; ou te faatonu ia te oe, ma ou vaai ia te oe.” (Salamo 32:8) O le faamautinoaga lenei o le uaʻi totino mai o Ieova i faalogona ma manaʻoga o lē ua salamō. Sa faia e Ieova ni fuafuaga ina ia foaʻi  atili mai i a Tavita le poto, le tomai e malamalama ai i le aano tonu o mataupu. Pe afai e toe fesagaʻi o ia ma se faaosoosoga i se taimi mulimuli ane, o le a mafai ona ia malamalama lelei ai i le iʻuga o ana gaoioiga ma aafiaga e oo ai i isi, ma mafai ai ona ia gaoioi ma le faautauta.

O lenei tala i le olaga o Tavita ua avea o se faalaeiauga i a i latou uma o ē ua faia se agasala matuiā. O le taʻutino o a tatou agasala ma faaalia le salamō faamaoni, e mafai ai ona tatou toe maua la tatou oloa e sili ona tautele, o la tatou faiā lea ma Ieova le Atua. O le tigā ma le masiasi lea o le a tatau ona tatou onosaia mo sina taimi, e sili mamao atu ona lelei na i lo le tigā e tupu aʻe ona o le gūgū pea, po o āuga mataʻutia e oo i ai ona o lo tatou faaua maaa pea ma faaauau ai i se ala fouvale. (Salamo 32:9) Na i lo lea, e mafai ona tatou tofo i le faamagaloga māfana a se Atua alofa mutimutivale, “o le Tamā e ona le alofa mutimuti vale, o le Atua foi e ana le faamafanafanaga uma.”—2 Korinito 1:3.

[Ata i le itulau 31]

Sa faamoemoe Tavita e sao mai āuga o lana agasala e ala i lona aauina atu o Uria ina ia fasiotia