Lipoti a Ē Faalauiloa le Malo

Sa Faamalieina Ona Manaʻoga Faaleagaga

O KUPERU, o se motu e i le tulimanu i matū i sasaʻe o le Sami Metitirani. I taimi o le Tusi Paia, na lauiloa ai Kuperu i ana ʻapamemea ma ana laupapa lelei. Na faalauiloa atu e Paulo ma Panapa le tala lelei o le Malo iinā i le taimi o le la uluaʻi malaga faamisionare. (Galuega 13:4-12) I aso nei, o loo iai pea ni aafiaga lelei i olaga o le toʻatele o tagata Kuperu ona o le tala lelei. E mautinoa le moni o lenei mea i le olaga o Luka, o se tamāloa ua 40 ona tausaga. Ua ia faamatala mai e faapea:

“Sa ou fanau mai i se aiga e toʻafitu tamaiti, sa iai sa matou lafupovi. E mai lava a o oʻu laʻitiiti, sa ou matuā fiafia lava e faitau tusi. O le tusi sa sili ona ou fiafia i ai, o le tusi laʻitiiti o le lomiga o le Tusi Paia Kerisiano Eleni. Ina ua sefulu oʻu tausaga, na matou faavaeina ai ma aʻu uō se vaega toʻaitiiti o se suʻesuʻega faale-Tusi Paia. Ae peitaʻi, e leʻi umi ona faia, talu ai sa faapea mai nisi tagata matutua o le nuu o i matou o ni tagata ua faatuʻiese.

“Mulimuli ane, a o oʻu aʻoga i le Iunaite Setete, sa ou feiloaʻi ai i tagata mai le tele o lotu eseese. O le mea lena na toe fafagu mai ai loʻu naunau i mea faaleagaga. Sa ou faaalu le tele o aso i le potu tusi a le iunivesite i le suʻesuʻeina o lotu eseese. Sa ou asiasi atu foʻi i nisi o falesa, ae e ui lava i aʻu taumafaiga, sa lē faamalieina ai lava aʻu i le itu faaleagaga.

“Ina ua uma aʻu aʻoga, sa ou toe foʻi atu loa i Kuperu ma talia ai se galuega o le avea lea ma pule o se fale e fai ai suʻesuʻega faafomaʻi. O se tamāloa matua e igoa ia Antonis, o se tasi o Molimau a Ieova, sa masani ona asiasi mai i a te aʻu i loʻu falefaigaluega. Ae sa leʻi lilo ana asiasiga i tagata o le Lotu Orthodox Eleni.

“Sa leʻi pine, ae asiasi mai se failotu i a te aʻu ma faalotovaivaia aʻu ina ia aua neʻi ou talanoa atu i ni Molimau a Ieova. Talu ai sa aʻoaʻoina lava aʻu a o oʻu laʻitiiti e faapea, o le Lotu Orthodox Eleni, o le upu moni lea, na ou gauaʻi ai ma ou lē toe talanoa ai loa i a Antonis, ae amata ona talanoaina le Tusi Paia ma le failotu. Sa ou asiasi atu foʻi i le tele o monaseri i Kuperu. Na oo lava ina ou faimalaga atu i Eleni i matū ma sa ou asiasi atu i le Mauga o Athos, lea sa manatu i ai o le mauga aupito sili ona paia i tagata Kerisiano o le Lotu Orthodox. Ae ui i lea, sa tumau pea ona leʻi mafai ona taliina aʻu fesili faale-Tusi Paia.

“O lea na ou tatalo ai i le Atua e fesoasoani mai i a te aʻu ina ia ou maua le upu moni. E leʻi pine lava mulimuli ane, na toe sau ai foʻi Antonis e asiasi mai i a te aʻu i loʻu falefaigaluega, ma sa ou lagona ai o se tali lenei i laʻu tatalo. O lea sa ou lē toe alu ai loa i le failotu ae amata ona suʻesuʻeina le Tusi Paia ma Antonis. Sa faaauau pea ona ou agaʻigaʻi i luma, ma i a Oketopa 1997, na faailogaina ai loʻu tuuina atu i a Ieova e ala i le papatisoga i le vai.

“I le taimi muamua, sa tetee ai laʻu avā ma laʻu fanau teine matutua e toʻalua, o le taimi lena ua 14 tausaga o le isi ae 10 le isi. Ae ona o le lelei o laʻu amio, na iʻu ai ina auai laʻu avā i se sauniga i le Maota o le Malo. Sa matuā faafiafiaina o ia i le agalelei o Molimau faapea ma lo latou faaalia o le naunau totino i a te ia. Sa sili lava ona maofa o ia i le auala e latou te faaaogāina ai le Tusi Paia. O le iʻuga, na talia ai e laʻu avā ma laʻu fanau teine matutua e toʻalua se suʻesuʻega faale-Tusi Paia ma Molimau a Ieova. Seʻi manatu i loʻu fiafia ina ua papatisoina i latou uma e toʻatolu i le Tauaofiaga Itumalo o “Afioga Faavaloaga a le Atua” i le 1999!

“Ioe, ua matuā faamalieina laʻu saʻiliga mo le upu moni. I le taimi nei, ua aufaatasia lo matou aiga atoa, o laʻu avā ma la maʻua fanau e toʻafā, i le tapuaʻiga mamā a Ieova.”