Suʻesuʻega Faale-Tusi Paia—Pe Aogā i Lou Olaga?

“AUA neʻi faitauina e aunoa ma le iai o se patele.” O lenei lapataʻiga na aliaʻi mai i le amataga o nisi o Tusi Paia a tagata Katoliko. Ua faapea mai Kay Murdy, o se tasi o le Catholic Bible Institute i Los Angeles: “Ona o ni tagata Katoliko, e lē taitai ai lava ona matou vaaia se Tusi Paia i taimi ua mavae, ae ua amata ona suia nei lena tulaga.” O le taimi lava e iloa ai e tagata Katoliko le auala e mafai ona fesoasoani ai le Tusi Paia i o latou olaga, ua ia mātauina e faapea, “ua latou faaalia ai le matuā naunau ma le manaʻonaʻo i le Tusi Paia.”

E tusa ai ma lenei suiga, ua sii mai ai e le mekasini o le U.S. Catholic le faamatalaga a se sooupu tau i aʻoaʻoga faalelotu o lē na faapea mai, ua lagona e tagata Katoliko o ē na auai i vasega o suʻesuʻega faale-Tusi Paia e faapea, “ua taofia nei mea mai i a i latou ona o le avea ma ni tagata Katoliko, ma e tele le ʻoa faaleagaga o loo iai i le Tusi Paia. Ua latou mananaʻo e fia maua le tele o na ʻoa ua latou lagona o loo latou misia.”

Po o le ā lava le tulaga, o le ā le “ʻoa” lea o loo iai e mafai ona maua e se tagata suʻesuʻe o le Tusi Paia? Seʻi manatunatu lava: Pe e te fia iloa le auala e mafai ona e faafesagaʻia ai ma le taulau manuia ia popolega o le olaga i aso faisoo? E mafai faapefea ona e tausisia le filemu i totonu o le liʻo o le aiga? Aiseā ua matuā tele ai le lē migao ma le lē mafaufau o tagata? O le ā le pogai o faiga sauā i talavou i aso nei? O tali maufaatuatuaina i nei fesili ma isi fesili lavelave, e mafai ona maua i le Afioga a le Atua, le Tusi Paia, ma o na tali o le a matuā “faaʻoaina” moni ai lava e lē na o tagata Katoliko ma Porotesano, ae faapea foʻi ma tagata Lotu Puta, tagata Hinitu, Musalimi, tagata Lotu Shinto, e oo lava i tagata e lē talitonu o loo soifua le Atua ma ē e masalosalo i le iai o se Atua. E pei ona faaupu ai e le faisalamo e faapea, ‘O le afioga a le Atua, o le sulu lea i ona vae, ma le malamalama i ona ala.’ E mafai foʻi ona faapena i a te oe.—Salamo 119:105.