Fesili Mai le ʻAufaitau

Aiseā ua taʻua ai i le New World Translation * i le 2 Peteru 3:13 e faapea, “o lagi fou [numera tele] ma se lalolagi fou,” ae i le Faaaliga 21:1 o loo valoia ai “se lagi fou [numera tasi] ma se lalolagi fou”?

O le pogai ona o le tulaga tau i le kalama o loo aafia ai i uluaʻi gagana. E foliga mai e leai ni mea tāua faapitoa e tusa ai ma le uiga.

Seʻi manatu muamua i Tusitusiga Eperu. I tusitusiga o le uluaʻi gagana, o le upu Eperu sha·maʹyim, ua faaliliuina “i lagi,” e numera tele i taimi uma e aliaʻi mai ai. O lona tulaga numera tele, e foliga mai e lē o faaatagia ai se tulaga silisili ona lelei, ae e faasino i se “nofoaga matuā telē” po o “se mea atoa o loo faia aʻe i vaega eseese se tele.” E moni lea auā e matuā telē le lagi faitino i tala atu o le lalolagi ma e aofia ai le faitau piliona o fetu. Pe afai e muamua le upu sha·maʹyim i le muānauna mautinoa (a faaliliu saʻo, “o lagi”), e toetoe lava o taimi uma e faaliliu ai e le New World Translation “o lagi,” e pei ona iai i le Isaia 66:22. Pe a aliaʻi mai le upu sha·maʹyim e aunoa ma le muānauna mautinoa, e mafai ona faaaogā i ai le upu numera tasi (“o le lagi,” e pei ona iai i le Kenese 1:8; 14:19, 22; Salamo 69:34) po o le numera tele (“o lagi,” e pei ona iai i le Kenese 49:25; Faamasino 5:4; Iopu 9:8; Isaia 65:17).

I le Isaia 65:17 ma le 66:22; o le upu Eperu o loo iai iinā mo lagi o loo i le numera tele, ma o le faaliliuga ua filifilia e faaaogā pea, “o lagi fou ma se [po o, le] lalolagi fou.”

O le upu Eleni ou·ra·nosʹ o lona uiga o “le lagi,” ma o le numera tele o le ou·ra·noiʹ o lona uiga “o lagi.” O se mea mataʻina ona sa faaaogā e le ʻaufaaliliu o le Septuagint i le faa-Eleni le numera tasi i le Isaia 65:17 ma le 66:22.

Ae faapefea la ia faaupuga e lua o le fuaiupu, “le lagi fou [po o lagi] ma se lalolagi fou” o loo i Tusitusiga Kerisiano Eleni?

I le 2 Peteru 3:13, o loo faaaogā ai e le aposetolo le numera tele faa-Eleni. Ae e muamua atu i lena (2Pe 3 fuaiupu e 7, 10, 12), sa ia talanoa ai e uiga “i lagi” amioleaga o loo iai nei, e faaaogā ai le numera tele. O lea, sa tausisi ai pea o ia i le faaaogāina o le numera tele i le 2Pe 3 fuaiupu e 13. E lē gata i lea, e foliga mai sa ia siiina mai na upu mai le uluaʻi tusi o le Isaia 65:17, lea o loo numera tele i le faa-Eperu, e pei lava ona iai i le 2 Peteru 2:22, lea na ia siiina mai i le tusitusiga Eperu o le mau i le Faataoto 26:11. I lea sa faasino atu ai Peteru ‘i lagi fou [numera tele] ma se lalolagi fou lea o loo tatou faatalitali i ai e pei o lana na folafola mai.’

I sina faaeseesega itiiti lava, i le Faaaliga 21:1 e manino lava na taulaʻi atu le aposetolo o Ioane i le faasinoga o le Isaia 65:17 i le Septuagint, lea e pei ona mātauina o loo iai le upu Eleni mo le “lagi” i le tulaga numera tasi. O lea, na tusia ai e Ioane e faapea: “Ona aʻu iloa lea o se lagi fou [numera tasi] ma se lalolagi fou; auā ua mavae atu le uluaʻi lagi, ma le uluaʻi lalolagi.”

O tulaga tau kalama na ua fesootaʻi ma le faaliliuga. E faamanatu atu pea e faapea e foliga mai e leai se eseesega i le uiga e tusa lava pe faitau pe taʻua e se tasi “le lagi fou” pe “o lagi fou.” E tutusa lava uiga o le faatatauina.

[Faamatalaga pito i lalo]

[Faamatalaga i Ata i le itulau 31]

Stars: Frank Zullo