Aiseā e Su‘esu‘e ai le Tusi Paia?
Aiseā e Suʻesuʻe ai le Tusi Paia?
A O TALAVOU Pili, o se tagata sa malosi, sa lelei lona tulaga tau i aʻoaʻoga, ma sa mautū lona tulaga tau tupe. Peitaʻi na leʻi maua e ia le fiafia. Sa leai se fuafuaga o lona olaga, ma sa matuā popole ai lava o ia. I lona taumafai e mauaina se fuafuaga o le olaga, na ia iloiloina ai lotu eseese, ae na te leʻi mauaina le mea na manaʻo i ai. I le 1991 na ia feiloaʻi ai i se tasi o Molimau a Ieova o lē na tuuina i a te ia se tusi, lea e talanoaina ai le mea o loo fai mai ai le Tusi Paia e faatatau i le uiga o le olaga. Sa faia se fuafuaga mo se suʻesuʻega faale-Tusi Paia ina ia faatepa Pili i le mataupu e faatatau i le uiga o le olaga faapea ai foʻi ma isi mataupu.
Na toe taʻua e Pili faapea: “Sa faia la mā uluaʻi suʻesuʻega, ma talu ai sa faasino soo atu lava i le Tusi Paia i le tele o taimi, na ou iloa ai faapea o le mea la lea na ou saʻilia. Na matuā faaoso fiafia lava tali o loo i totonu o le Tusi Paia. Ina ua mavae lena suʻesuʻega, na ou alu atu ai i le taavale agaʻi atu i atumauga, sa ou oso ese ma laʻu loli, ma alaga leotele i le fiafia. Sa ou matuā olioli ona o lea ua oo ina ou mauaina tali o aʻu fesili.”
O le mea moni, e lē o tagata uma e mauaina upu moni o le Tusi Paia e alalaga moni lava i le fiafia. Peitaʻi, o le aʻoaʻoina o tali i fesili tāua o le olaga o se olioli ua tofo i ai le toʻatele. E latou te lagona e pei lava o le tamāloa o loo i le faataoto a Iesu lea na ia mauaina le ʻoa na natia i le fanua. Na fetalai Iesu e faapea: “Ua alu foi ma le fiafia, ma faatau atu ana mea uma, i le faatau aʻi mai lea fanua.”—Le Auala e Mauaina ai se Olaga Uigā
Sa feliuliuaʻi le mafaufau o Pili i se fesili masani, O le ā le fuafuaga o le olaga? O le ʻaufaifilosofia, tagata popoto faapitoa i mataupu faalelotu, ma le ʻausaienitisi, ua latou tauivi ma lea fesili mo le faitau meleniuma. E lē masino le aofaʻiga o tusi ua tusia e tagata taʻitoʻatasi e taumafai ai e taliina lea fesili. Ae na lē taulau a latou taumafaiga, ma e toʻatele ua latou faia le faaiʻuga e faapea, o lea fesili e lē mafai ona taliina. E ui i lea, o loo iai le tali. E ui lava ina loloto, ae e lē lavelave. O loo faamatalaina i le Tusi Paia. O le auala i le mauaina o se olaga fiafia ma e uigā, o lenei: E tatau ona iai sa tatou faiā lelei ma Ieova, o Lē na Foafoaina i tatou ma o lo tatou Tamā faalelagi. E mafai faapefea ona tatou mauaina lena mea?
E lua ni vala e foliga mai e feteenaʻi, e faalatalata atu ai i le Atua. O i latou e faalatalata atu i le Atua e matataʻu, ma e alolofa foʻi, i a te ia. Seʻi o tatou iloiloina ni mau se lua e lagolagoina ai lena faamatalaga. I aso ua leva, na faia ai ma le faaeteete e le tupu o Solomona se suʻesuʻega e faatatau i tagata, ma tusia mea na ia iloaina i le tusi o le Tusi Paia o Failauga. O le taaofaʻiga o ana suʻesuʻega, na ia tusi mai ai e faapea: “Seʻi tatou faalogo ia i le iuga o ia mea uma, Ia e mataʻu i le Atua, ma e anaana i ana poloaiga; auā o mea ia e tatau i tagata uma.” (Failauga 12:13) I senituri mulimuli ane ai, ina ua fesiligia po o le ā le tulafono e aupito silisili i tulafono na tuuina atu i a Mose, na tali Iesu e faapea: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.” (Mataio 22:37) Pe e foliga mai e matuā ese lava i a te oe le faapea, e tatau ona tatou matataʻu i le Atua, ma alolofa foʻi i a te ia? Seʻi o tatou iloiloina le tāua o le mataʻu ma le alofa ma le auala e galulue faatasi ai na uiga i le mauaina o se faiā faamalieina ma le Atua.
Le Uiga o le Mataʻu i le Atua
O le mataʻu tatau e matuā tāua pe afai e tatou te mananaʻo e tapuaʻi i le Atua i le auala e taliaina e ia. Ua faapea mai le Tusi Paia: “O le mataʻu ia Ieova, o le amataga lea o le poto.” (Salamo 111:10) Na tusi mai le aposetolo o Paulo e faapea: “Ia tatou faafetai ai, tatou te auauna ai i le Atua ma le migao, ma le mataʻu ia fiafia mai ai o ia.” (Eperu 12:28) I se tulaga tutusa, na vaaia i se faaaliga e le aposetolo o Ioane se agelu i le taulotoaʻiga o le lagi ua amata ona ia folafola atu le tala lelei i upu nei: “Ia outou matatau i le Atua, ma avatu ia te ia le viiga.”—Faaaliga 14:6, 7.
O lenei mataʻu i le Atua, e tāua tele i se olaga uigā, e lē tutusa ma le matuā fefe i se mea leaga e oo mai. E tatou te ono matuā fefefe pe afai ua faamataʻuina i tatou e se tagata solitulafono mataʻutia. Ae o le mataʻu i le Atua—po o le mataʻu faale-Atua—o se migao po o se faaaloalo loloto mo Lē na Foafoaina Mea. E aofia ai foʻi i le mataʻu tatau le lē manaʻo e faia se mea e lē fiafia mai ai le Atua, ona o ia o le Faamasino Sili ma o Lē Silisili ese, o loo i a te ia le malosi ma le pule e faasalaina ai i latou e lē usiusitai.
E Galulue Faatasi le Mataʻu ma le Alofa
Ae peitaʻi, e lē finagalo Ieova e auauna atu tagata i a te ia ona e fefefe i a te ia. O Ieova e tū matilatila o ia, o le Atua o le alofa. Na uunaʻia le aposetolo o Ioane e tusi faapea: “O le Atua, o le alofa lava ia.” (1 Ioane 4:8) Na feutagaʻi Ieova le Atua ma tagata i se auala agalelei, ma e finagalo foʻi o ia e toe tali atu tagata e ala i le alofa atu foʻi i a te ia. O lea la, e faapefea ona ōgatusa lea alofa ma le mataʻu faale-Atua? E fesootaʻi moni na uiga e lua. Na tusi le faisalamo e faapea: “O loo faaali e Ieova lona finagalo i e matatau ia te ia.”—Salamo 25:14.
Seʻi manatu i faalogona o le faaaloalo ma le migao lea o loo iai i se tamaitiiti e malosi ma atamai lona tamā. I le taimi lava e tasi, o lea tamaitiiti o le a tali atu foʻi i le alofa o lona tamā. O le a faatuatuaina e le tamaitiiti le tamā ma vaai atu i a te ia mo le taʻitaʻiga, ma e na te mautinoa o le a aumaia ai aogā i lenei taʻitaʻiga. I se tulaga talitutusa, afai tatou te alolofa ma matataʻu i a Ieova, o le a tatou usitaia lana taʻitaʻiga, ma o le a tatou maua ai aogā. Mātau le mea na fetalai ai Ieova e faatatau i tagata Isaraelu: “E! ana ia i latou lena loto e matatau mai ai ia te au, ma tausiusi i aʻu poloaiga uma i aso uma lava, ina ia manuia ai i latou, atoa ma a latou fanau e faavavau.”—Teuteronome 5:29.
Ioe, o le mataʻu faaleatua e lē taʻitaʻiina atu i le nofo pologa ae i le mauaina o le saʻolotoga, e lē i le faanoanoa ae i le olioli. Na vavalo Isaia e faatatau i a Iesu e faapea: “E fiafia foi o ia i le mataʻu ia Ieova.” (Isaia 11:3) Na tusi foʻi le faisalamo e faapea: “Amuia le tagata o lē mataʻu ia Ieova, o loo o fiafia tele i ana poloaiga.”—Salamo 112:1.
E manino la, e lē mafai ona tatou matataʻu i le Atua pe e alolofa foʻi i a te ia pe afai e tatou te lē iloa o ia. O le māfuaaga lena e tāua ai tele le suʻesuʻeina o le Tusi Paia. O lena suʻesuʻega e fesoasoani lea i a i tatou e malamalama ai i uiga o le Atua ma oo ai ina talisapaia le atamai o le mulimuli i ana fautuaga. A o tatou faalatalata atu atili i le Atua, e tatou te mananaʻo e faia lona finagalo, ma ua uunaʻia ai i tatou e tausia ana poloaʻiga, i le iloa o le a tatou maua ai aogā.—1 Ioane 5:3.
O se fiafiaga le iloa o loo ola se tasi i le ala saʻo o le olaga. O le tulaga moni lena o Pili lea na taʻua i le amataga. Na ia taʻua talu ai nei e faapea: “I le iva tausaga ua tuanaʻi talu mai laʻu uluaʻi suʻesuʻega o le Tusi Paia, ua tupu aʻe ai la mā faiā ma Ieova. O le uluaʻi alaga o le olioli lea na ou lagonaina, lea ua tuputupu aʻe nei e avea ma auala moni e olioli ai i le olaga. Ua i a te aʻu pea se vaaiga mautinoa o le olaga. Ua faatumuina oʻu aso i gaoioiga uigā, ae lē o se saʻiliga mo mea e faafiafia ai e leai se aogā. Ua avea Ieova o se tasi e moni i a te aʻu, ma ua ou iloa foʻi e naunau moni mai o ia mo loʻu lelei.”
I le mataupu o loo sosoo mai, o le a tatou talanoaina atili ai le auala e aumaia ai e le poto i a Ieova le olioli ma aogā i a i latou o ē e faatatauina i o latou olaga.
[Faamatalaga faaopoopo i le itulau 5]
O le faalatalata atu i le atua o lona uiga e tatou te alolofa i a te ia ma matataʻu foʻi i a te ia
[Ata i le itulau 6]
Sa olioli Iesu i le mataʻu i a Ieova