Aua Ne‘i Faatagaina Masalosaloga e Faaleagaina Lou Faatuatua
Aua Neʻi Faatagaina Masalosaloga e Faaleagaina Lou Faatuatua
Sa e manatu i se tasi aso o loo lelei lou soifua mālōlōina. I le aso na sosoo ai sa e lagonaina ua e faamaʻimaʻi. Ua teʻi lava ua mou atu lou malosi. Ua tigā lou ulu ma ua matuā gāoi lou tino atoa. O le ā ua tupu? Ua lē mafaia e lou tino ona tetee atu i siama faatupu maʻi e lamatia ai le soifua ma ua āfaina ai totoga tāua o lou tino. A lē faia i ai se togafitiga, e ono faaleagaina lou soifua mālōlōina i nei siama ua osofaʻia lou tino—ma e oo lava ina e maliu ai.
O LE mea moni, afai e lē o lelei lou soifua mālōlōina i le taimi e pisia ai oe i se faamaʻi, e sili atu la ona faigofie ona e āfaina ai. Mo se faaaʻoaʻoga, afai ua faavaivaia lou tino i le lē lelei o taumafa paleni, ua faapea mai le tusitala o mataupu faafomaʻi o Peter Wingate, “o le a matuā faaitiitia lou malosiaga e tetee atu, ma o sina faamaʻi lava e pisia ai e ono oo atu ai i le oti.”
Afai o lea le tulaga o mea, o ai la o le a filifili e soifua ai i tulaga faaogea? E mautinoa o le a e faia mea uma e te mafaia e taumafa lelei ai ma tausia lou soifua mālōlōina. Atonu foʻi o le a e faia mea uma e ʻalofia ai lou pisia i vairusi po o siama. Peitaʻi, pe o faapena ona e taumafai e puipuia oe pe a oo mai i le mālōlōina i le “faatuatua.” (Tito 2:2) Mo se faaaʻoaʻoga, po o e mataala i le lamatiaga e aumaia e masalosaloga ia e ono faaleagaina ai? E matuā faigofie ona osofaʻia e nei masalosaloga lou mafaufau ma lou loto, ma faatamaʻia ai lou faatuatua ma lau faiā ma Ieova. O nisi tagata ua foliga mai e lē o iloa lenei lamatiaga. Ua latou tuua i latou e maileia i masalosaloga e ala i le faaogea faaleagaga o i latou lava. Pe faamata o e faia lena mea?
O Masalosaloga—Pe e Leaga i Taimi Uma?
O le mea moni, e lē o masalosaloga uma e leaga. E iai taimi e lē tatau ai ona e vave talitonu i se mea seʻia e mautinoa mea moni uma. E mataʻutia ma e taufaasesē le uunaʻiga faalelotu e faapea ia tau lava ina e talitonu ma aua le masalosalo. E moni, o loo faapea mai le Tusi Paia o le alofa “e talitonu i mea uma.” (1 Korinito 13:7, LT) E nofo sauni se Kerisiano alofa e talitonu i ē sa faamaonia lo latou maufaatuatuaina. Ae, o loo lapataʻi mai foʻi le Afioga a le Atua i le ‘talia o upu uma.’ (Faataoto 14:15) I nisi taimi e iai māfuaaga tatau mo masalosaloga ona o le talaaga o se tagata. Ua lapataʻi mai le Tusi Paia, e faapea: “E ui lava ona faamalie mai [e le tagata e tautala i mea taufaasesē] lona leo, aua e te faatuatua ia te ia.”—Faataoto 26:24, 25.
1 Ioane 4:1, faatusatusa i le NW.) O se “faamatalaga,” o se aʻoaʻoga, po o se taofi faaalia, atonu e foliga e tupuga mai i le Atua. Ae pe na tupuga moni mai lava i a te ia? O le faaalia o le masalosalo, po o le lē vave ona talitonu i ai, e mafai ona avea moni o se puipuiga auā, e pei ona taʻua e le aposetolo o Ioane, “e toatele o e faasese ua o atu i le lalolagi.”—2 Ioane 7.
Sa lapataʻia foʻi e le aposetolo o Ioane ia Kerisiano e uiga i le talitonu e aunoa ma ni saʻiliʻiliga. Na ia tusi mai: “Aua tou te faalogo i faamatalaga faagaeeina uma lava.” I lo lena, ia “tofotofo i faamatalaga faagaeeina pe mai le Atua i latou.” (O Masalosaloga e Lē Faavaea
Ioe, e masani ona manaʻomia le iloiloina ma le faamaoni ma le lotomaulalo o mea moni ina ia faamautū le saʻo o se mea. Peitaʻi, e lē tutusa lea ma le faatagaina o masalosaloga e lē faavaea, ma e ono faaleagaina ai, e tutupu aʻe i o tatou mafaufau ma loto—o masalosaloga e mafai ona lepetia ai o tatou talitonuga ua maumaututū ona faavaeina atoa ai ma faiā ma isi. Ua faamatalaina lenei ituaiga o masalosaloga e faapea o le “lē mautonu i talitonuga po o taofi faaalia lea e masani ona faalavelavea ai le faia o faaiʻuga.” Pe e te manatua le auala na totōina ai e Satani i le mafaufau o Eva ia masalosaloga e faatatau i a Ieova? Na ia fesili atu: “E moni ea, na fetalai mai le Atua, lua te le aai i laau uma o le faatoaga?” (Kenese 3:1) O le tulaga lē mautonu lea na faapogaia e lena fesili e foliga e leai sona āfaina, sa faalavelave i le auala e na te faia ai se faaiʻuga. O metotia masani lava na a Satani. I le pei o se tagata e tusia tusi taufaaleaga, ua i a te ia le tomai e faaaogā ai faamatalaga faauigasesē, e lē moni atoatoa, ma e pepelo. O le auala lea ua faaleagaina ai e Satani le anoanoaʻi o faiā mamā ma maufaatuatuaina, e ala i masalosaloga e faaleagaina ai.—Kalatia 5:7-9.
Sa malamalama lelei Iakopo i aafiaga e afaina ai ona o lenei ituaiga o masalosaloga. Na ia tusi e faatatau i le faaeaga matagofie ua i a i tatou o le faalatalata atu ma le saʻoloto i le Atua mo le fesoasoani i taimi o tofotofoga. Ae peitaʻi, na lapataʻi mai Iakopo e faapea afai e te tatalo i le Atua, “ia ole atu ma le faatuatua, aua lava neʻi masalosalo.” O le iai o masalosaloga i la tatou faiā ma le Atua, o le a avea ai i tatou “e tusa ia ma le peau o le sami ua sousou i le matagi ma felafolafoaiina.” O le a avea i tatou o se “tagata faalotolotolua e faaletumau ia i ona ala uma.” (Iakopo 1:6, 8) E tatou te ati aʻe ai se talitonuga e lē mautinoa lea o le a tatou faalotolotolua ai. Ona mulimuli ane lea, i le pei o Eva, o le a faigofie ona maileia i tatou i ituaiga o aʻoaʻoga ma filosofia faatemoni uma.
Tausiaina o le Soifua Mālōlōina Lelei Faaleagaga
E mafai la faapefea ona puipuia i tatou lava mai masalosaloga e afaina ai? E matuā faigofie le tali: e ala i le teena maumauaʻi o faatosinaga faa-Satani ae faaavanoa atoatoa atu i tatou i sauniuniga a le Atua ina ia tatou ‘mausali ai i le faatuatua.’—1 Peteru 5:8-10.
E matuā tāua le lelei ona fafagaina faaleagaga o le tagata lava ia. Na faapea mai ia Wingate, lea sa muaʻi taʻua: “E oo lava i taimi e mālōlō ai le tino, o loo manaʻomia pea ona iai se sapalai o le malosiaga mo gaoioiga o le tino ma galuega a ona totoga tāua; ma e manaʻomia ona faaauau ona suia mea o loo faia aʻe ai le tele o tisu.” E faapena lo tatou soifua mālōlōina faaleagaga. A lē aunoa ona fafagaina faaleagaga, o le a faasolosolo mālie atu lava ona faaleagaina ma iʻu lava ina mate lo tatou faatuatua, e pei o le tino ua faaogea. Sa faamamafa e Iesu Keriso lenei manatu ina ua ia fetalai: “E le na o mea e ʻai e ola ai le tagata, a o afioga uma e tulei mai i le fofoga o le Atua.” —Mataio 4:4.
Seʻi manatunatu i lena mea. Na faapefea ona tatou fausia aʻe se faatuatua malosi i le taimi muamua? Na tusi le aposetolo o Paulo e faapea, “e tupu le faatuatua i le taulogologo atu.” (Roma 10:17) Sa uiga lana faamatalaga e faapea na muaʻi fausia aʻe lo tatou faatuatua ma le mautinoa i a Ieova, i ana folafolaga, ma i lana faalapotopotoga, e ala i le fafagaina i le Afioga a le Atua. O le mea moni, e leʻi faapea na tatou talitonu e aunoa ma le saʻiliʻili muamua i mea uma sa tatou faalogologo i ai. Ua pei i tatou o ē na nonofo i Perea. Sa tatou ‘sailiili i Tusi i lea aso ma lea aso pe moni ia mea.’ (Galuega 17:11) Na tatou ‘suesue pe se a le finagalo o le Atua, o mea ua lelei, ma mālie, ma atoatoa’ ma faamautinoa e moni mea sa tatou faalogologo i ai. (Roma 12:2; 1 Tesalonia 5:21) Talu mai lena taimi, e mautinoa ua saga faamalosia lo tatou faatuatua a o manino atili mai le lē taitai ona iʻuvale o Afioga ma folafolaga a le Atua.—Iosua 23:14; Isaia 55:10, 11.
ʻAlofia le Matelāina Faaleagaga
O se luʻi le tausia o lo tatou faatuatua ma ʻalofia so o se lagona lē mautonu tau talitonuga, lea e mafai ona faavaivaia ai lo tatou mautinoaina o Ieova ma lana faalapotopotoga. Ina ia faia lenei mea, e ao ona tatou iloiloina i aso taʻitasi le Tusi Paia. Na lapataʻi mai le aposetolo o Paulo “e o ese nisi i le faatuatua [o ē foliga mai sa muaʻi iai se faatuatua malosi] i tausaga amuli, latou te faalogo i agaga [“tala,” NW] e faasese ma aʻoaʻoga a temoni.” (1 Timoteo 4:1) E faapogaia e nei tala ma aʻoaʻoga taufaasesē ia masalosaloga i mafaufau o nisi tagata ma vavaeesea ai i latou mai le Atua. O le ā o le a puipuia i tatou? Ia faaauau ona “tausia [o i tatou] i upu o le faatuatua ma le mataupu lelei ua [tatou] taofi i ai.”—1 Timoteo 4:6.
Ae, e faanoanoa, ona e iai nisi i aso nei ua filifili ia lē ‘tausia i latou i upu o le faatuatua’—e ui o lea e mauagofie mea taumafa e tausia ai. E pei ona faailoa mai e se tasi o tusitala o le tusi o Faataoto, e mafai ona vagaia se tagata i taumafa lelei faaleagaga, e pei o se faigaʻai tele faaleagaga, ae e lē mafai lava ona taumafaina ma maua aogā mai meaʻai.—Faataoto 19:24; 26:15.
O se tulaga mataʻutia lenei mea. Na faapea mai le tusitala o Wingate: “O le taimi lava e faaaogā ai e le tino lona lava polotini, ona amata loa lea ona faaletonu lona tulaga mālōlōina.” Afai e te lē taumafa, o le a amata ona faaaogā e lou tino le gaʻo o loo faasao i vaega eseese o le tino. Pe a uma ona faaaogā lenei gaʻo, ona amata faaaogā lea e le tino le polotini o loo matuā tāua mo le tuputupu aʻe ma le toe faafouina o le tisu. O le a amata ona lē galulue totoga tāua. Mai lena taimi, o le a vave lava ona fai ifo lou soifua mālōlōina.
O le mea lena sa tupu i le itu faaleagaga i nisi i le faapotopotoga Kerisiano anamua. Na latou taumafai e ola i lo latou malosi faaleagaga sa iai. Atonu sa latou lē manatu mamafa i suʻesuʻega totino ma vaivai ai faaleagaga. (Eperu 5:12) Na faamatalaina e le aposetolo o Paulo le lamatiaga e oo i ai pe a faia lenei mea ina ua ia tusi atu i Kerisiano Eperu, e faapea: “E tatau ona atili ai ona tatou naunau i mea ua tatou faalogologo i ai, neʻi teʻa [“tafetafea,” NW] ese i tatou ma ia mea.” Sa ia iloa le faigofie o le tafetafea atu agaʻi i masaniga leaga pe afai e tatou te “faatamala i le faaolataga e matuā tele.”—Eperu 2:1, 3, LF.
O le mea e mataʻina, ona o se tagata e mafatia mai le lē lava o mea taumafa paleni, e lē tau foliga matamaʻi pe paee. E faapena foʻi ona lē vave manino mai le mafatia o se tagata i le matelāina faaleagaga. E mafai ona foliga mai o loo e mālōlōina faaleagaga e ui e te lē o taumafa lelei—ae e mo na o se taimi puupuu! O le a oo lava ina e vaivai faaleagaga, i le taliagofie o masalosaloga lē faavaea, ma lē mafai ai ona finau malosi mo le faatuatua. (Iuta 3) O oe lava e iloa le tele o loo fafagaina ai faaleagaga oe—e tusa pe e lē iloa e isi.
O lea, aua neʻi faavaivai i au suʻesuʻega totino. Ia tau ma le finafinau faasaga i masalosaloga. O le lē amanaʻia o se maʻi e foliga mai e laʻitiiti atoa ma le lē faateʻaeseina o ni masalosaloga o loo faapopolegia ai, e ono iʻu ai i ni iʻuga mataʻutia. (2 Korinito 11:3) ‘Pe o tatou ola moni ea i aso e gata ai? Pe e mafai ona e talitonu i mea uma o fai mai ai le Tusi Paia? Po o le faalapotopotoga moni lava lenei a Ieova?’ E matuā fiafia Satani e totō masalosaloga faapenei i lou mafaufau. Aua neʻi faataga se uiga faatalalē i le fafagaina i taumafa faaleagaga e avea ai oe ma sē e faigofie ona maileia i aʻoaʻoga taufaasesē. (Kolose 2:4-7) Mulimuli i le fautuaga na tuu atu i a Timoteo. Ia avea ma tagata aʻoga lelei o “tusi paia” ina ia mafai ona e “tumau i mea ua aʻoaʻoina ai oe, ma ua mautinoa ia te oe.”—2 Timoteo 3:13-15.
Atonu e te manaʻomia le fesoasoani e fai ai lenei mea. Ua faapea atili mai le tusitala na muaʻi taʻua: “I tulaga ogaoga o le matelāina, atonu ua matuā faaleagaina totoga e faamalūina ai meaʻai ona o le lē lava o vaitamini ma isi mea manaʻomia. Ona o lea, ua lē mafai ai ona talia mea taumafa masani pe a saunia. Atonu, mo sina taimi, e manaʻomia e tagata ua oo i lenei tulaga ia meaʻai e itiiti se gaoioiga e faaaogāina ai e le tino.” E moomia se tausiga faapitoa ina ia faaleleia ai aafiaga o le faaogea o le tino. I se tulaga talitutusa, atonu e manaʻomia e se tagata ua matuā faatalalē i ana suʻesuʻega totino o le Tusi Paia, le tele o le fesoasoani ma faalaeiauga ina ia toe maua lona toe fia taumafaina o meaʻai faaleagaga. Afai o lou tulaga lena, talosaga atu mo se fesoasoani ma ia talia ma le fiafia so o se fesoasoani e ofo mai ina ia toe ati aʻe ai lou tulaga mālōlōina ma le malosi faaleagaga.—Iakopo 5:14, 15.
Aua Neʻi ‘Masalo Vale ma le Le Faatuatua’
Pe a mafaufau i tulaga o le augatamā o Aperaamo, atonu e iai i nisi le lagona e faapea sa iai i a Aperaamo ni māfuaaga tatau e masalosalo ai. Atonu e talafeagai ona faapea atu ua leai se faamoemoe e avea ai o ia ma ‘sē e tupuga mai ai nuu e tele’—e ui lava i le folafolaga a le Atua. Aiseā? Auā foʻi, mai se vaaiga lava ia faaletagata, e leʻi foliga mai o le a taulau. Ua faamauina i le Tusi Paia ‘sa ia manatu i lona tino ua oti, ma le manava foʻi o Sara ua oti.’ Ae ui i lea, na ia teena ma le maumauaʻi le faatagaina o masalosaloga, e faatatau i le Atua ma ana folafolaga, ia mauaa i lona mafaufau ma lona loto. Na tusi mai le aposetolo o Paulo, e faapea: “E lei vaivai foi lona faatuatua,” pe “masalo vale ia ma le le faatuatua.” Sa tumau ona ‘mautinoa Aperaamo e mafai e le Atua ona faia o le mea na folafolaina e ia.’ (Roma 4:18-21, faatusatusa i le NW.) Na ia ati aʻe se faiā malosi, totino, ma maufaatuatuaina ma Ieova i le tele o tausaga. Sa ia teena so o se masalosaloga na ono faavaivaia ai lena faiā.
E mafai foʻi ona e faia faapena pe afai e te tausi i “matua o upu e ola ai”—pe afai e te fafagaina lelei oe faaleagaga. (2 Timoteo 1:13) Aua neʻi manatu māmā i le mataʻutia o masalosaloga. O loo auai Satani i se taua o siama faaleagaga. Afai e te faatalalē i le aveina i fale o taumafa lelei faaleagaga e ala i suʻesuʻega totino o le Tusi Paia ma le auai i sauniga faa-Kerisiano, e faigofie la ona osofaʻia oe. Ia faaaogā lelei le anoano o taumafa faaleagaga ua fetaui ona saunia e le “auauna faamaoni ma le mafaufau.” (Mataio 24:45) Ia faaauau ona “gauai i upu e ola ai” ma ia tumau ona “faamaoni [“malosi,” NW] i le faatuatua.” (1 Timoteo 6:3; Tito 2:2) Aua neʻi faatagaina masalosaloga e faaleagaina lou faatuatua.
[Ata i le itulau 21]
O le ā le lelei o lou fafagaina o oe lava faaleagaga?