Ia Tofo i le Olioli e Maua i le Foa‘i Atu!
Ia Tofo i le Olioli e Maua i le Foaʻi Atu!
“E sili le manuia [“fiafia,” NW] o le na te foai atu, i lo le na te talia mai.”—GALUEGA 20:35.
1. E faapefea ona faaalia mai e Ieova le olioli e maua i le foaʻi atu?
O LE olioli i le iloaina o le upu moni ma faamanuiaga e maua mai ai o ni meaalofa tautele ia mai le Atua. O i latou ua iloa Ieova e tele ni māfuaaga latou te olioli ai. Peitaʻi, e ui ina iai le olioli i le taliaina o se meaalofa, ae e iai foʻi le olioli i le foaʻiina atu o se meaalofa. O Ieova o Lē Foaʻi o “mea lelei uma e foaifuaina mai, atoa ma mea alofa uma e atoatoa ona lelei,” ma o ia o “le Atua [“fiafia,” NW].” (Iakopo 1:17; 1 Timoteo 1:11) Ua ia faaooina mai aʻoaʻoga aogā i tagata uma o ē faalogo, ma e fiafia lona finagalo ona o le usiusitai atu o i latou ua ia aʻoaʻoina, e pei lava ona olioli mātua pe a talia lelei e a latou fanau faatonuga alofa.—Faataoto 27:11.
2. (a) O le ā na fetalai i ai Iesu e uiga i le foaʻi atu? (e) O le ā le fiafiaga tatou te maua pe a tatou aʻoaʻoina isi i le upu moni o le Tusi Paia?
2 Sa faapena foʻi Iesu a o iai i le lalolagi, sa fiafia o ia e silasila atu i le talia lelei e tagata o ana aʻoaʻoga. Na sii mai e le aposetolo o Paulo fetalaiga a Iesu e faapea: “E sili le manuia [“fiafia,” NW] o le na te foai atu, i lo le na te talia mai.” (Galuega 20:35) O le fiafiaga lea tatou te maua pe a tatou aʻoaʻoina isi i le upu moni o le Tusi Paia, ua lē na o se faamalieina i le iai o se tasi e ioeina o tatou talitonuga faalelotu. E sili mamao atu na i lo lena, o le olioli i le iloaina faapea o loo tatou foaʻiina atu se mea e moni aʻiaʻi ma e tumau lona aogā. O le foaʻi atu faaleagaga, e mafai ai ona tatou fesoasoani i tagata ina ia latou maua aogā e lē gata i le taimi nei ae oo lava i le faavavau.—1 Timoteo 4:8.
E Maua le Olioli i le Foaʻi Atu
3. (a) Na faapefea ona faailoa mai e aposetolo o Paulo ma Ioane lo la olioli i le fesoasoani atu i isi i le itu faaleagaga? (e) Aiseā ua avea ai le faailoaina atu o upu moni o le Tusi Paia i a tatou fanau o se faailoaga o le alofa?
3 Ioe, e pei lava ona olioli Ieova ma Iesu i le foaʻi mai o meaalofa faaleagaga, e faapena foʻi ona olioli Kerisiano. Na olioli le aposetolo o Paulo i lona iloa, sa ia fesoasoani atu i isi ina ia latou aʻoaʻoina le upu moni o le Afioga a le Atua. Na ia tusi atu i le faapotopotoga i Tesalonia: “Se a ea so matou faamoemoe, ma se fiafia, ma se pale e mitamita ai i luma o lo tatou Alii o Iesu Keriso i lona afio mai? E le o outou ea? Auā o outou lava o lo matou viiga ma lo matou olioli.” (1 Tesalonia 2:19, 20, LF ) Sa faapena foʻi lagona o le aposetolo o Ioane, ina ua ia tusi mai e faatatau i lana fanau faaleagaga, e faapea: “E leai soʻu fiafia e sili i lenei, pe a ou faalogo ua savavali laʻu fanau i le upu moni.” (3 Ioane 4) Seʻi manatu foʻi, i le olioli o le a iai pe a tatou fesoasoani atu i a tatou lava fanau ina ia avea ma a tatou fanau faaleagaga! O le tausia aʻe o fanau i “aoaiga ma apoapoaiga a [Ieova]” o se faailoga lea o le alofa o mātua. (Efeso 6:4) O le faia faapena e faaalia ai e mātua lo latou manatu mamafa mo se lelei e faavavau o a latou fanau talavou. Pe a talilelei mai nei fanau, ona tofo ai lea o mātua i le olioli tele ma le faamalieina.
4. O le ā se mea na tupu e faaalia mai ai le mauaina o le olioli i le foaʻi atu faaleagaga?
4 O Tali o se tinā e toʻalima lana fanau, ma o se paeonia faataimi atoa foʻi. Ua ia faapea mai: “Ou te malamalama lelei i upu a le aposetolo o Ioane auā ou te matuā faafetai ona o loo ‘savavali i le upu moni’ laʻu fanau e toʻafā. Ou te iloa e viiviia ma faamamaluina Ieova pe a autasi aiga i le tapuaʻiga moni, ou te matuā lagona ai la le lotomalie i loʻu vaai atu i lona faamanuia mai i aʻu taumafaiga ina ia totō le upu moni i loto o laʻu fanau. O le faamoemoe matagofie o le ola e faavavau faatasi ma loʻu aiga i le Parataiso, ua faatumulia ai aʻu i faamoemoega ma uunaʻia ai aʻu e onosai e ui i faafitauli ma toʻatugā.” O se itu e faanoanoa ai, ona e iai se tama teine a Tali na faateʻaese mai le faapotopotoga ona ua mulimuli atu i se ala e lē faa-Kerisiano. Ae peitaʻi, o loo taumafai malosi pea Tali e faatumauina lona uiga mautinoa. Ua ia faapea mai: “Ou te faamoemoe i se aso o le a toe foʻi mai ma le lotomaulalo ma le faamaoni laʻu tama i a Ieova. Peitaʻi, ou te faafetai i le Atua ona o le toʻatele lava o laʻu fanau, lea o loo auauna faamaoni pea i a te ia. O le olioli o loo oʻu lagonaina ua avea o se puna moni o faamalosiauga i a te aʻu.”—Neemia 8:10.
Faia o Uō e Faavavau
5. A o tatou auai atu i le galuega o le faia o soo, o le ā le mea ua tatou iloa lea ua aumaia ai i a i tatou le faamalieina?
5 Na faatonuina e Iesu ona soo ina ia o latou faia ni soo Kerisiano ma aʻoaʻo atu i a te i latou e uiga i a Ieova ma mea o loo ia faafinagaloina. (Mataio 28:19, 20) Ua taufai fesoasoani mai ma le lē manatu faapito Ieova ma Iesu i tagata, ina ia latou aʻoaʻoina le upu moni. O lea la, a o tatou matuā galulue malolosi i le galuega o le faia o soo, ua faamalieina i tatou i le iloa e faapea, o loo tatou faataʻitaʻi i le faaaʻoaʻoga a Ieova ma Iesu, e pei foʻi ona sa faia e uluaʻi Kerisiano. (1 Korinito 11:1) A tatou galulue faatasi la ma le Atua e Ona le Malosi Uma faapea lona Alo pele, ona matuā uigā ai lea o o tatou olaga. Maʻeu se faamanuiaga o le mātauina faatasi ai ma “le au faigaluega” a le Atua! (1 Korinito 3:9) Ma po ua lē o se mea ea e faafiafiaina ai ona e oo lava i agelu ua iai sa latou vaega i lenei galuega o le talaʻia o le tala lelei?—Faaaliga 14:6, 7.
6. A o faia so tatou sao i le foaʻi atu faaleagaga, o ai ua avea ma a tatou uō?
6 O le mea moni, o le faia o se sao i lenei galuega o le foaʻi atu faaleagaga, e mafai ai ona sili atu se isi o tatou tulaga na i lo na o se ʻaufaigaluega faatasi ma le Atua—e mafai ai ona tatou faia se faauōga e faavavau ma ia. O le faatuatua o Aperaamo na māfua ai ona taʻua o ia o le uō a Ieova. (Iakopo 2:23) A o tatou tauivi e faia le finagalo o le Atua, e mafai foʻi ona avea i tatou ma uō a le Atua. Pe a tatou faia lena mea, e avea foʻi i tatou ma uō a Iesu. Na ia fetalai atu i ona soo: “Ua ou taʻua outou o uo, auā ua ou faailoa atu ia te outou mea uma na ou faalogo ai i loʻu Tamā.” (Ioane 15:15) E fiafia le toʻatele e taʻua i latou o uō a tagata taʻutaʻua po o tagata aloaʻia e maualuluga o latou tulaga, peitaʻi, e mafai ona taʻua i tatou o ni uō a peresona e toʻalua e silisili lava i le lalolagi aoao!
7. (a) Na faapefea e se fafine ona ia maua se uō moni? (e) Po ua oo ea i a te oe se mea faapena?
7 E lē gata i lea, pe a tatou fesoasoani atu i tagata ina ia latou iloa le Atua, e avea ai foʻi i latou ma a tatou uō, ma aumaia ai i a i tatou se fiafiaga faapitoa. O Ioana, o lē o loo nofo i le Iunaite Setete, sa amata ona ia faia se suʻesuʻega faale-Tusi Paia ma se fafine e suafa i a Telema. E ui sa fesagaʻi Telema ma teteega mai lona aiga ona o lana suʻesuʻega, ae sa leʻi faavaivai o ia ma papatisoina ai loa i le tausaga mulimuli ane. Na tusi mai Ioana: “Sa leʻi gata ai iinā le mā mafutaga; na i lo lea, na iʻu ina avea o se faigauō ua tusa nei ma le 35 tausaga le umi. E masani ona mā ō faatasi i le faiva ma i tauaofiaga. Mulimuli ane, sa ou alu atu ma nofo i se fale fou e tusa e 500 maila (800 kilomita) le mamao ese atu. Ae peitaʻi o loo faaauau pea ona lafo mai e Telema i a te aʻu ni tusi e sili ona agaalofa ma faamāfanafanaloto, e taʻu mai ai ona lagona alofa māfana i a te aʻu ma faafetai mai ona o le avea o aʻu o sana uō ma se faaaʻoaʻoga i a te ia, ma le aʻoaʻoina o ia i le upu moni mai le Tusi Paia. O le iai o se uō māfana ma le pele faapena, o se taui sili lea ona matagofie mo taumafaiga uma sa ou faia e fesoasoani ai i a te ia ina ia aʻoaʻoina e uiga i a Ieova.”
8. O le ā le uiga mautinoa o le a fesoasoani i a i tatou i le faiva?
8 O le faamoemoe ina ia maua se tagata o lē e manaʻo e aʻoaʻoina le upu moni e mafai ona fesoasoani i a i tatou ina ia tumau ai, e tusa lava po o le toʻatele o tagata e tatou te feiloaʻi, e itiiti pe matuā leai lava so latou naunau i le Afioga a Ieova. O se uiga faalēano mai faapena e mafai ona luʻia ai lo tatou faatuatua ma le tumau. Peitaʻi, o le a fesoasoani i a i tatou le iai o se uiga mautinoa. Na faapea mai Fausto, o lē e sau mai Kuatemala: “Pe a ou molimau atu i isi, ou te mafaufau lava i le tulaga e ono iai pe afai o le a mafai ona avea le tagata lea o loo oʻu talanoa i ai o se uso po o se tuafafine faaleagaga. Ou te faapea ifo, talosia ia maua se tagata o le a ou feiloaʻi atu i ai, e tusa lava pe na o le toʻatasi, e mulimuli ane ona talia le upu moni o le Afioga a le Atua. O le manatu lena e mafai ai pea ona ou faaauau ma aumaia ai i a te aʻu le olioli moni.”
Faaputuina o ʻOa i le Lagi
9. O le ā na fetalai ai Iesu e faatatau i ʻoa i le lagi, ma o le ā e mafai ona tatou aʻoaʻoina mai lenei mea?
9 E lē faigofie le faia o soo, e tusa lava pe o a tatou fanau pe o isi foʻi tagata. Atonu e alu ai le taimi, ma e manaʻomia ai foʻi le onosai, ma le finafinau. Ae ia manatua, e toʻatele tagata o loo naunau e galulue mamafa ina ia faaputu le anoanoaʻi o meafaitino, o mea e masani lava ona latou lē maua mai ai se olioli ma e lē tumau foʻi e faavavau. Na taʻu mai e Iesu i lana ʻaufaalogologo e faapea, e sili atu ona lelei le galulue mo mea faaleagaga. Sa ia fetalai: “Aua tou te toloʻaʻi oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai. A ia outou toloʻaʻi oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai.” (Mataio 6:19, 20) O le tulimataʻia o sini faaleagaga—lea e aofia ai le faia o se sao i le galuega tāua o le faia o soo—e mafai ai ona faamalieina i tatou i le iloaina, o loo tatou faia le finagalo o le Atua ma o le a ia tauia maia i tatou. Na tusi mai le aposetolo o Paulo: “E le amioletonu le Atua, na te le faagalogaloina la outou galuega ma le alofa ua outou faaali mai ai i lona suafa.”—Eperu 6:10.
10. (a) Aiseā na maua ai e Iesu ʻoa faaleagaga? (e) Na faapefea ona foaʻi mai e Iesu o ia, ma o le ā le aogā silisili na mauaina ai e isi?
10 Pe afai tatou te galulue maelega ina ia maua mai ni soo, ua tatou faaputuina ai mo i tatou lava ‘oa i le lagi,’ e ōgatusa lea ma le fetalaiga a Iesu. O iinā tatou te maua ai le olioli i le avea o ē ua taliaina. Pe afai tatou te foaʻi atu ma le lē manatu faapito, e iʻu ai i le faaʻoaina foʻi o i tatou. E faitau piliona tausaga o auauna atu ma le faamaoni Iesu lava ia i a Ieova. Seʻi mafaufau la i ʻoa sa ia faaputuina i le lagi! E ui lava i lea, sa leʻi saʻilia e Iesu ona lava manaʻoga. Na tusi mai le aposetolo o Paulo: “O [Iesu] na foaiina mai o ia e ia ona o a tatou agasala, ina ia laveai mai o ia ia i tatou ai le olaga leaga ua i ai nei, e tusa ma le finagalo o le Atua, o lo tatou lava Tamā.” (Kalatia 1:4) E lē gata sa foaʻi mai ma le lē manatu faapito e Iesu o ia lava i lana faiva, ae sa ia foaʻi mai foʻi lona lava soifua e fai ma togiola ina ia mafai e isi ona maua le avanoa e faaputu ai ʻoa i le lagi.
11. Aiseā e sili atu ai ona lelei meaalofa faaleagaga na i lo meaalofa faaletino?
11 O le aʻoaʻoina o tagata e uiga i le Atua, ua tatou fesoasoani atu ai i a i latou ina ia latou iloa le auala e faaputu ai ʻoa faaleagaga e lē pala. O le ā se meaalofa e sili ona lelei e mafai ona e foaʻi atu? Pe afai e te foaʻi i sau uō se uati taugatā, se taavale, po o se fale foʻi, e mautinoa o le a lotofaafetai ma fiafia lena uō, ma o le a e olioli foʻi ona ua e foaʻiina atu se mea. Ae o le ā le tulaga o le a iai lena meaalofa i le isi 20 tausaga o lumanaʻi? Pe i le 200 tausaga? Pe i le 2,000 foʻi tausaga? Ae peitaʻi, afai e te matuā fesoasoani atu i se tagata ina ia auauna i a Ieova, e mafai ona aogā e faavavau lena meaalofa i a te ia.
Saʻilia o i Latou o Loo Mananaʻo i le Upu Moni
12. Ua faapefea ona taumafai nisi e fesoasoani atu i isi tagata i le itu faaleagaga?
12 Ona o le fia tofo o tagata o Ieova i le olioli o le foaʻi atu faaleagaga, ua latou ō atu ai i tuluʻiga o le lalolagi. E faitau afe ua tuua o latou fale ma aiga ina ia auauna faamisionare, i atunuu o le a tatau ai ona latou faamasani i ni gagana fou ma ni aganuu fou. O isi ua ō atu i vaipanoa o i totonu lava o o latou atunuu, o loo iai se manaʻoga tele mo tagata talaʻi o le Malo. Ae e iai foʻi isi ua latou aʻoaʻoina se gagana fou, ma maua ai avanoa fou e talaʻi atu ai i o latou lava lotoifale i tagata e faimalaga mai isi atunuu. Mo se faaaʻoaʻoga, e iai se tasi ulugalii mai New Jersey, i le Iunaite Setete o Amerika, ina ua matutua le la fanau tama e toʻalua lea sa tausia aʻe, ma ua galulue nei i le ofisa ulu o Molimau a Ieova, sa amata loa ona la paeonia ma aʻoaʻoina le gagana Saina. E sili laʻitiiti atu ma le tolu tausaga sa la faia ai ni suʻesuʻega faale-Tusi Paia ma ni tagata se toʻa 74, o ē e tautatala i le gagana Saina, o ē o loo aʻoʻoga i se kolisi e latalata ane. Po o mafai ea ona e faalautele atu lau faiva i nisi auala, ina ia mafai ona maua atili ai le olioli i le galuega o le mauaina mai o soo?
13. O le ā e te ono fai pe afai e te manaʻo ina ia fua atili mai lau faiva?
13 Pe atonu o loo e moomoo e te fia taulimaina se suʻesuʻega faale-Tusi Paia ae o lena e leʻi maua. O nisi atunuu e faigatā ai lava ona maua ni tagata e naunau fiafia. Atonu o tagata na e te feiloaʻi atu i ai e lē o fiafia i le Tusi Paia. Pe afai o le tulaga lena, atonu e mafai ona faateleina ona taʻua pea i au tatalo lou faanaunauga lena, i lou mautinoa o loo matuā naunau uma mai Ieova ma Iesu Keriso i le galuega ma atonu e la te taʻitaʻia oe i se tagata e pei o se mamoe. Ia saʻili atu i ni fautuaga mai i a i latou o i lau faapotopotoga o ē ua sili atu so latou tomai po o sili atu foʻi ona fua mai la latou faiva. Ia faaaogā lelei toleniga ma fautuaga o loo aumaia i sauniga faa-Kerisiano. Ia faaaogā lelei fautuaga a ovasia femalagaaʻi ma a latou avā. Ae o le sili o na mea uma, ia aua lava e te faavaivai. Na tusi mai le tagata poto: “O le taeao ia e lulu ai au saito, aua foi le mapu lou lima i le afiafi; auā e te le iloa po o le fea e manuia.” (Failauga 11:6) Ae i le taimi nei, seʻi manatua tane faatuatua e pei o Noa ma Ieremia. E ui lava ina toʻaitiiti i latou na talilelei ane i la laʻua talaʻiga, ae o lena lava sa talia e nisi, ma sa taulau manuia ai la laʻua faiva. Ae o le sili lava, sa faafiafiaina ai Ieova.
Ia Faia le Mea Sili E te Mafaia
14. O le ā le silafaga a Ieova i a i latou o ē ua loa lo latou soifua i lana auaunaga?
14 Pe atonu ona o lou tulaga ua e lē mafai ai ona e faia le tele o ni mea o loo e manaʻo e fai i le faiva. Mo se faaaʻoaʻoga, atonu o le soifua matua ua faatapulaa mai ai mea e mafai ona e faia i le auaunaga i a Ieova. Ae ia e manatua pea le mea na tusi mai ai le tagata poto: “O le pale matagofie le ulusinā, pe a ua i ai i le ala o le amiotonu.” (Faataoto 16:31) E matagofie i a Ieova se soifua e faaaogā i lana auaunaga. E lē gata i lea, ua faapea mai le Tusi Paia: “E oo ina e toeaina, o aʻu [Ieova] lava o ia, e oo foi ina ulusina, o aʻu lava ou te tauave ia te oe; o aʻu na ou faia, ou te siitia foi, ou te tauave, ma ou laveaiina oe.” (Isaia 46:4) Ua folafola mai e lo tatou Tamā alofa faalelagi le tausia ma le lagolagoina o ona tagata faamaoni.
15. Pe e te talitonu ea, e malamalama Ieova i ou tulaga? Aiseā?
15 Pe atonu o loo e onosaia se maʻi, o teteega mai se paaga e lē talitonu, o tiute tauave mamafa i le aiga, po o se isi lava faafitauli tugā. O loo silafia e Ieova o tatou tulaga ma mea e gata mai ai lo tatou malosi, ma e alofa o ia i a i tatou ona o a tatou taumafaiga filigā e auauna atu i a te ia. O le mea moni lena e ui lava o mea o loo tatou faia e ono itiiti ifo na i lo mea o loo faia e isi. (Kalatia 6:4) O loo silafia e Ieova lo tatou tulaga lē lelei atoatoa, ma o loo fuafua tatau foʻi mea o loo ia faatalitalia mai i a i tatou. (Salamo 147:11) Pe afai tatou te faia le mea e sili ona tatou mafaia, e mafai ona tatou mautinoa o loo tautele i tatou i le silafaga a le Atua ma o le a ia lē faagaloina a tatou galuega o le faatuatua.—Luka 21:1-4.
16. I le ā le auala o loo faia ai e le faapotopotoga atoa se sao i le faia o soo?
16 Ia manatua foʻi, o le galuega o le faia o soo o se galuega e pulupululima uma i ai. E leai se tagata e alu toʻatasi na o ia e saʻili mai se soo, e pei lava ona lē lava se matāua se tasi o le timu e faasūsū ai se laau. E moni atonu e feiloaʻi atu se Molimau i se tagata fiafia ma faia ai se suʻesuʻega faale-Tusi Paia. Ae o le taimi lava e sau ai lena tagata fou i le Maota o le Malo, ona fesoasoani atu loa lea o le faapotopotoga atoa i a te ia ina ia ona iloa lelei le upu moni. O le māfana o le ʻauuso e faaalia ai o loo taaʻia i latou e le agaga o le Atua. (1 Korinito 14:24, 25) E faia e fanau laiti ma fanau talavou ni faamatalaga faagaee fiafia, e faaali atu ai i le tagata fou e faapea e ese o tatou talavou mai talavou a le lalolagi. O i latou i le faapotopotoga o loo aafia i maʻi, o loo vaivai le tino, ma ē ua afu lo latou soifua, e latou te aʻoaʻoina atu i tagata fou mea e aofia ai i le onosai. E tusa lava po o le ā lo tatou matutua po o mea e gata mai ai o tatou tomai, ae o loo tatou faia uma lava se vaega tāua i le fesoasoani atu i ē fou, a o faasolo ina loloto lo latou alofa mo upu moni o le Tusi Paia, ma latou agaʻigaʻi atu i le papatisoga. O itula taʻitasi o loo tatou faaaluina i le faiva, i toe asiga taʻitasi, i talanoaga taʻitasi ma se tagata fiafia i le Maota o le Malo, atonu e foliga mai e lē o se mea telē, peitaʻi, o se vaega o le galuega tele o loo faataunuuina e Ieova.
17, 18. (a) E lē gata i le auai i le galuega o le faia o soo, ae mafai foʻi faapefea ona tatou tofo i le olioli e maua i le foaʻi atu? (e) E ala i lo tatou tofo i le olioli e maua i le foaʻi atu, o ai lena ua tatou faataʻitaʻi i ai?
17 O le mea moni, e lē gata i le auai i le galuega tāua o le faia o soo, ae e iai foʻi isi auala o loo tofo ai i tatou o Kerisiano, i le olioli o le foaʻi atu. E mafai ona tatou faataatia ese se seleni e foaʻi atu ina ia lagolagoina ai le tapuaʻiga mamā ma fesoasoani i ē e lē o tagolima. (Luka 16:9; 1 Korinito 16:1, 2) E mafai ona tatou saʻili mo ni avanoa e faaalia ai le agaga talimalo i isi. (Roma 12:13) E mafai ona tatou tauivi e ‘agalelei i tagata uma, aemaise i lo tatou aiga i le faatuatua.’ (Kalatia 6:10, LF) Ma i ni auala faigofie ae tāua, e mafai ai ona tatou foaʻi atu i isi—se tusi, se talanoaga i le telefoni, se meaalofa, se fesoasoani aogā, sina upu faalaeiau.
18 E ala i le foaʻi atu, e tatou te faaalia ai o loo tatou faataʻitaʻi i lo tatou Tamā faalelagi. E tatou te faaalia ai foʻi lo tatou alofa faaleuso, o le faailoga lea o loo mātaulia ai Kerisiano moni. (Ioane 13:35) O le manatuaina o nei mea e mafai ona fesoasoani mai ina ia tatou tofo ai i le olioli e maua i le foaʻi atu.
Pe Mafai Ona E Faamatala?
• Ua faapefea ona faataatia e Ieova ma Iesu le faaaʻoaʻoga i le foaʻi atu faaleagaga?
• E mafai faapefea ona tatou faia ni uō e faavavau?
• O ā laasaga e mafai ona tatou uia ina ia atili ai ona taulau manuia la tatou faiva?
• E mafai faapefea e tagata uma o le faapotopotoga ona tofo i le olioli lea e maua i le foaʻi atu?
[Fesili mo le Suʻesuʻega]
[Ata i le itulau 13]
Pe a talia e le fanau le toleniga, ona tofo ai lea o mātua i le olioli tele ma le faamalieina
[Ata i le itulau 15]
E mafai ona tatou maua uō moni a o tatou faia ni soo
[Ata i le itulau 16]
E tauave e Ieova i tatou e tusa lava pe oo ina tatou matutua
[Ata i le itulau 17]
E mafai ona tatou maua le olioli, e ala i le foaʻi atu i ni auala faigofie ae tāua