Sa Ia “Tumau Seia Oo i le Gataaga”

I SE ata vitiō na puʻeina i le 1993 lea na faaalia i sui fou uma o ofisa ulu a Molimau a Ieova, sa faaleo mai ai e Lyman Alexander Swingle ona faalogona e faatatau i le auaunaga i a Ieova e faapea: “Ia e oti lava o see ou seevae!” *

Sa faia tonu lava e le uso o Swingle, o lē ua ivasefulu tausaga o lona soifuaga, le mea lea na ia faalaeiauina isi e fai. Sa ia “tumau seia oo i le gataaga.” (Mataio 24:13) E ui i mafatiaga o lona tino, ae sa auai atu lava i le Aso Lulu, Mati 7, i se fono a le Vaega Pule o Molimau a Ieova, lea sa avea ai o ia ma sui. Na toe faatetele lona tigāina i le Aso Lua o le vaiaso na sosoo ai, ae i le 4:26 i le taeao, i a Mati 14, na faamautinoa mai ai e lana fomaʻi, ua maliu o ia.

Na amata e Lyman Swingle lana auaunaga i le ofisa ulu o Molimau a Ieova i Purukulini, Niu Ioka, i a Aperila 5, 1930. Sa auauna ai iinā mo le toetoe lava 71 tausaga. Na muaʻi tofia Lyman e galue i le itu e tuufaatasia ma faamau faatasi ai tusi, ona sosoo lea ma le galue i le pito e lolomi ai tusi, ma sa fesoasoani foʻi o ia i le paluina o vaitusi. O le mea moni, e tusa ma le 25 tausaga na galue ai le uso o Swingle i le matagaluega e palu ai vaitusi. Pe tusa foʻi ma se 20 tausaga na galue ai o ia o se sui o le matagaluega o tusitusiga a le ofisa ulu. I tausaga mulimuli e 17 o lona soifuaga, sa galue ai o ia i le Ofisa o le Teutupe.

O Lyman o se tagata e lototele i le folafolaina o le Malo o le Atua. I ona tausaga amata i Purukulini, sa masani ai ona la folau atu ma lana aumea sa la potu faatasi, o Arthur Worsley, i le vaa a se tasi o Molimau, ma agaʻi atu i le vaitafe o Hudson. Sa la faaaogā mea faaleotele leo, ona la faaaluina lea o le tele o faaiʻuga o vaiaso e faasalalau atu ai le feʻau o le Malo i tagata sa alaala i nofoaga e latalata ane i le talafatai.

Na soifua mai le uso o Swingle i a Novema 6, 1910, i Lincoln, i Nebraska, peitaʻi e leʻi umi ae see atu loa lo latou aiga ma nonofo i Salt Lake City, i Utah. O iinā i le 1913, na avea ai ona mātua o ni Tagata Aʻoga o le Tusi Paia, e pei ona sa taʻua ai Molimau a Ieova i lena vaitaimi. A o faagasolo tausaga, sa talimalo ai le aiga o Swingle i le toʻatele o failauga asiasi mai le ofisa ulu o Molimau i Purukulini, ma o tane nei sa latou faapogaia ni taaʻiga lelei i a Lyman. I le 1923, ina ua 12 ona tausaga, sa papatisoina ai o ia e fai ma faailoga o lona tuuina atu i le Atua.

Ina ua mavae le silia ma le 26 tausaga o auauna o se uso nofofua i Purukulini, sa lē mafaatusalia le faaʻoaina o le olaga o Lyman ina ua ia faaipoipo atu i a Crystal Zircher i a Iuni 8, 1956. O se ulugalii fealofani ma e seāseā ona nonofo valavala, sa la galulue faatasi i le faiva seʻia oo lava ina maliu Crystal i le 1998. E tusa e tolu tausaga muamua atu a o leʻi maliu Crystal, sa mafatia ai Crystal ina ua pē atoa lona tino ma sa lē mafai ai ona ia toe faatinoina ni gaoioiga se tele. O gaoioiga sa faia e Lyman i aso taʻitasi i le tausiga o Crystal, sa avea o se faaaʻoaʻoga o le alofa faamaoni lea sa faagaeeina ai tagata uma, aemaise i latou sa vaai o tulei e Lyman le nofoa faataavalevale i autafa o le auala i nofoaga latalata ane, a o ofo atu e Crystal Le Olomatamata ma le Ala Mai! i tagata o loo fegasoloaʻi.

O le uso o Swingle o se tagata e tautala saʻo ma lotoalofa ma e pele o ia i a i latou e iloa o ia. I le pei o lona tamā ma lona tinā, sa faapena foʻi ona i a te ia le faamoemoe faale-Tusi Paia o le ola faatasi ma Iesu Keriso i le Malo faalelagi, o se faamoemoe e tatou te mautinoa ua ia mauaina nei.—1 Tesalonia 4:15-18; Faaaliga 14:13.

[Faamatalaga pito i lalo]

[Ata i le itulau 31]

E tusa ma le 25 tausaga na galue ai le uso o Swingle i le potu e palu ai vaitusi

[Ata i le itulau 31]

O Lyman ma Crystal o se ulugalii fealofani ma e seāseā ona nonofo valavala