Fesili Mai le ʻAufaitau

I le 1 Peteru 4:3, ua tatou faitau ai e faapea, i se taimi, na faia ai e nisi Kerisiano le “ifo i tupua e soli ai tulafono.” Pe e lē o ifoga i tupua uma lava e soli ai tulafono, e taʻusalaina ma faasāina e le Atua?

Ioe, i le silafaga a le Atua, o ifoga i tupua uma lava e soli ai tulafono. O i latou e fia maua le finagalo malie o le Atua e lē mafai ona latou faia ifoga i tupua.—1 Korinito 5:11; Faaaliga 21:8.

Ae peitaʻi, e foliga mai sa ese se isi manatu na faasino atu i ai le aposetolo o Peteru e faatatau i le ifo i tupua. O se tasi o māfuaaga, i le tele o atunuu i aso anamua, sa taatele ai le ifo i tupua ma sa lē faasāina i le tulafono e faipule silisili. O lona uiga, sa lē faasāina i le tulafono a le atunuu na ifoga i tupua. O nisi o ifoga i tupua, sa avea ma vaega o aiāiga a le atunuu po o le malo. E tusa ai ma lena tulaga, a o leʻi avea ma Kerisiano, sa faia ai e nisi le ‘ifo i tupua e aunoa ma ni faasāsāga faaletulafono.’ (Lomiga o le 1950 o le New World Translation) Mo se faataʻitaʻiga, atonu e mātauina e faapea, na faatūina e le tupu o Papelonia o Nepukanesa se tupua auro e ifo i ai, ae sa teena e auauna a Ieova o Sataraka, Mesako, ma Apeteniko le ifo atu i lena tupua.—Tanielu 3:1-12.

Mai se isi vaaiga, sa aofia ai i le tele o faiga ifo i tupua faalotu ia gaoioiga sa matuā feteenaʻi lava ma so o se tulafono faavae e uiga i amioga tatau, po o lagona tauamio e mapuna mai i le lotofuatiaifo. (Roma 2:14,15) Na tusi mai le aposetolo o Paulo e faatatau i amioga paʻū maulalo e feteenaʻi ma le “tu e tatau” ma “masiasi ai,” ma o nei mea sa masani ona faia i faiga faalotu. (Roma 1:26, 27) O tane ma fafine na auai i ifoga i tupua e soli ai le tulafono, latou te leʻi utagiaina taofiofiga faaletulafono o lagona faalenatura o le tagata. O lea e mautinoa lava, sa talafeagai mo i latou ua oo ina avea ma Kerisiano ona lafoaʻia na faiga iʻuvale.

E lē gata i mea e pei ona taʻua muamua, sa taʻusalaina foʻi e Ieova le Atua ifoga i tupua na sa taatele i tagata e lē o ni Iutaia. Ona sa lē tusa na mea ma le tulafono. *—Kolose 3:5-7.

[Faamatalaga pito i lalo]