Ia Tumau ma le Mautinoa Atoatoa

Fesoasoani i Ē Talavou e Ala i Faatonuga Talafeagai

O EPAFARA, o se Kerisiano o le uluaʻi senituri o lē na malaga i Roma. Ae peitaʻi, mo se māfuaaga lelei, sa taulaʻi atu ai pea ona manatu i tuā i Kolose, o se aai i Asia Itiiti. Sa ia talaʻia ai le tala lelei iinā ma e lē taumatea sa fesoasoani atu i ni tagata Kolose e avea ma soo o Iesu Keriso. (Kolose 1:7) Sa matuā popole lava Epafara e uiga i uso talitonu i Kolose, auā a o iai le aposetolo o Paulo i Roma na ia tusi atu i a i latou e faapea: “O loo alofa atu ia te outou o Epafara, . . . o loo finafinau e le aunoa i tatalo mo outou; ina ia outou tumau ua atoatoa ona lelei ma ua mautinoa le finagalo uma lava o le Atua.”—Kolose 4:12, LT.

E faapena foʻi i tamā ma tinā Kerisiano i aso nei ona finafinau i le tatalo mo le lelei faaleagaga o a latou fanau. O loo tauivi nei mātua ina ia totō le alofa mo le Atua i loto o a latou fanau ina ia latou tutumau mausalī ai i le faatuatua.

E toʻatele Kerisiano talavou ua talosaga mai mo se fesoasoani i le feagai ai ma luʻi o loo latou fesagaʻia i le aʻoga ma isi nofoaga. Na faapea mai se teine e 15 tausaga: “Ua faateteleina le leaga o o matou faafitauli. Ua matuā mataʻutia le olaga. Ua matou manaʻomia se fesoasoani!” Po ua talia ea manaʻoga o na talavou ma tatalo a mātua amio Atua? Ioe! Ua saunia e ala mai i le “auauna faamaoni ma le mafaufau” ia faatonuga e faavae i le Tusi Paia. (Mataio 24:45) O loo vaaia iinei nisi o lomiga ua fesoasoani i le faitau selau afe o talavou ina ia ‘tumau ua atoatoa ona lelei ma le mautinoa.’ Seʻi o tatou iloiloina nisi o nei lomiga.

“Faauta . . . i le 15,000 Molimau Fou!”

I a Aokuso 1941, na tauaofia ai se aofia e 115,000 i St. Louis, Missouri, i le Iunaite Setete o Amerika, mo le tauaofiaga e sili ona toʻatele a Molimau a Ieova na faia e oo atu i lena taimi. I le aso mulimuli o lena tauaofiaga—o le “Children’s Day” (Aso mo Tamaiti)—e tusa ma le 15,000 tamaiti na nonofo e latalata i le pulelaa sa faalogologo lelei a o talanoaina e Joseph F. Rutherford le mataupu e faapea, “Fanau a le Tupu.” Ina ua latalata i le faaiʻuga o lana lauga, na faapea mai ai Rutherford ua 71 tausaga o lona soifuaga i se leo faatamā:

“O outou uma lava . . . o tamaiti o ē ua lotomalilie . . . e usiusitai i le Atua ma lana Tupu, faamolemole ia tutū i luga.” Na tutū faatasi uma i luga tamaiti e pei o se tagata e toʻatasi. Ona alaga lea o le uso o Rutherford e faapea: “Faauta, e sili atu i le 15,000 molimau fou o le Malo!” Sa lagona se pati tele lava. Ona faaopoopo mai lea o le failauga e faapea: “O outou uma lava o ē o le a faia le mea e mafai, e taʻu atu ai i isi e uiga i le malo o le Atua . . . faamolemole ia faapea mai, Ioe.” Na tali mai ma le leo tetele tamaiti, “Ioe!” Ona ia faaali mai lea o le tusi fou o le Children, lea na talia ma se pati umi lava.

Ina ua uma lenei lauga faagaee loto, ona savavali atu ai lea i luga o le pulelaa se laina umī lava o tagata talavou, o iinā na tauaaoina atu ai e le uso o Rutherford i a i latou se kopi faameaalofa o le tusi fou. O lenei vaaiga na taufai maligi ai loimata o le aofia. Na faapea mai se tasi o molimau na vaai tino i lena mea: “E na o se loto e malō e pei o se maa o le a lē faagaeetia i le vaai atu i talavou o faaalia lo latou faalagolago ma faatuatua atoatoa atu i lo latou Atua o Ieova.”

I lena fonotaga e lē faagaloina, e 1,300 tagata talavou na papatisoina e faailogaina ai lo latou tuuina atu i a Ieova. O le toʻatele o i latou o loo tumau pea i le faatuatua e oo mai lava i le taimi nei. E latou te lagolagosua i a latou faapotopotoga, ua avea o ni ē e tauofo i le auaunaga i Peteli, po o le auauna foʻi e avea o ni misionare i isi atunuu. O le mea moni, o le “Aso mo Tamaiti” ma le tusi o le Children, na oo ai se aafiaga tumau i loto o le toʻatele o talavou!

“E Foliga Mai ua Aumai i le Taimi Tonu Lava”

I le faagasologa o le sefulu tausaga na amata mai i le 1970, na lomia ai e Molimau a Ieova nisi tusi se tolu na pāʻia ai loto o le faitau selau afe o tagata talavou. O nei tusi o le Listening to the Great Teacher, Lou Talavou—Mauaina mai ai Aogā Silisili, ma Laʻu Tusi o Tala o Le Tusi Paia. I le 1982 na amata ai ona lomia mai i le mekasini o le Ala Mai! le faasologa o mataupu o le “Ua Fesili Mai Talavou . . . ” O nei mataupu  e faagaeeina ai le loto talisapaia o ē talavou ma ē matutua. Na faapea mai se teineitiiti e 14 tausaga: “O pō uma lava, ou te faafetai atu ai i le Atua mo le lomiaina o nei mataupu.” Na faailoa mai e se tasi talavou e 13 tausaga le matua e faapea: “E ese loʻu fiafia i mataupu, e foliga mai ua aumai i le taimi tonu lava.” E ioeina e mātua ma toeaina Kerisiano tofia e faapea, o nei mataupu e matuā fetaui lelei lava ma aogā mo le taimi nei.

I le tausaga e 1989 na aumaia ai i le Ala Mai! ni mataupu se 200 o le “Ua Fesili Mai Talavou . . . ” I le Tauaofiaga Matagaluega o le “Tuutoina i le Atua” i lena tausaga, na tatalaina ai le tusi, Questions Young People Ask—Answers That Work. Po ua fesoasoani lenei tusi i talavou ina ia tumau ai i le faatuatua? Na tusi mai ni talavou se toʻatolu e faapea: “O lenei tusi o se mea aogā matagofie i a i matou e malamalama ai i o matou faafitauli ma iloa ai le auala e feagai ai ma na faafitauli. Faafetai mo lo outou manatu mamafa mai mo lo matou lelei.” E anoanoaʻi le ʻaufaitau talavou i le lalolagi atoa e latou te ioeina nei manatu.

‘Ua Faamalieina ai lo Matou Matelāina Faaleagaga’

I le 1999, na saunia ai e Molimau a Ieova se isi foʻi ituaiga o faatonuga talafeagai mo talavou—le vitiō, Young People Ask—How Can I Make Real Friends? Na faapogaia e lenei vitiō se tali fiafia mai. Na faapea mai se talavou e 14 tausaga le matua: “Na matuā pāʻia saʻo lava loʻu loto i lenei vitiō.” Na taʻua e se tinā nofo toʻatasi e faapea: “O le a lē aunoa ona avea le vitiō ma vaega o a matou meaʻai faaleagaga.” Na faapea mai se tasi fafine talavou: “O se faamāfanafana loto le iloaina o loo alofa moni mai lava la tatou Uō sili o Ieova, ma tausia talavou i lana faalapotopotoga i le lalolagi aoao.”

O le ā ua faataunuuina e le vitiō? Ua faapea mai tagata talavou: “Ua fesoasoani e leoleoina ai aʻu faasaga i aʻu aumea, ia faalautele atu i le faapotopotoga, ma ia faia Ieova ma aʻu uō.” “Ua fesoasoani i a te aʻu e tetee atu ai i aʻu tupulaga.” “Ua ou tūmausalī ai i laʻu filifiliga e auauna i a Ieova i le mea e sili ou te mafaia.” Ma na tusi mai se ulugalii faaipoipo: “E ma te faafetai atu mai o ma loto ona o le saunia o lenei ‘meaʻai’ mo i maʻua. Ua faamalieina ai lo ma matelāina faaleagaga.”

E tusa ai ma lona tofiga mai le Atua, ua saunia e le “auauna faamaoni ma le mafaufau” meaʻai faaleagaga talafeagai mo i latou uma o le a taliaina. Maʻeu le olioli i le vaai atu i le auala o loo fesoasoani ai na faatonuga faale-Tusi Paia i tagata talavou i aso nei e “tumau ua atoatoa ona lelei ma ua mautinoa le finagalo uma lava o le Atua”!