‘O Faamanuiaga mo Lē Amiotonu’

“UA OU toeaina aʻu nei, sa aʻu taulealea; a ou te lei iloa se tagata amiotonu na lafoaiina, po o ana fanau ua ʻaiisi i latou,” o le faamatalaga lena a le faisalamo o Tavita ina ua toeaina o ia. (Salamo 37:25) E alofa Ieova le Atua i ē amiotonu ma tausi faapelepele i a i latou. I lana Afioga, le Tusi Paia, ua ia tomatauina ai tagata tapuaʻi moni ina ia saʻili i le amiotonu.—Sefanaia 2:3.

O le amiotonu o le iai lea i se tulaga tonu ma le Atua e ala i le usitaia o ana tapulaa e iloa ai le lelei ma le leaga. I le faalaeiauina o i tatou ina ia ōgatusa o tatou ala ma le finagalo o le Atua, ua taʻua ai e le mataupu e 10 o le tusi o le Tusi Paia o Faataoto, le ʻoa o faamanuiaga faaleagaga ua maua e i latou o loo faia faapea. O nisi o nei faamanuiaga e aofia ai le anoanoaʻi o meaʻai susua faaleagaga, o galuega e tauia ma faamalieina ai, ma se faiā lelei ma le Atua ma tagata. Seʻi o tatou toe tilofaʻia la le Faataoto 10:1-14.

Se Uunaʻiga Sili Ona Lelei

O upu amata lava o le mataupu ua matuā faamautinoa mai ai po o ai le tusitala o le vaega o loo sosoo mai o le tusi o Faataoto. Ua faitauina faapea: “O faataoto a Solomona.” I le faailoaina mai o se uunaʻiga sili ona lelei ina ia mulimuli ai i le ala tonu, ua faapea mai ai le tupu o Solomona mai Isaraelu anamua: “O le atalii poto na te faafiafia lona tamā; a o le tama valea e faanoanoa ai lona tinā.”—Faataoto 10:1.

Pagā le tele o faanoanoaga e oo i mātua pe a iai se tasi o le la fanau e na te lafoaʻia le tapuaʻiga i le Atua moni o loo soifua! O loo faapatino mai e le tupu poto le faavauvau o le tinā, pe atonu e faailoa mai ai le sili atu ona loloto o le faavauvau e oo i le tinā. Na matuā faamaonia le moni o lena manatu i a Torise. * Ua ia faamatala mai: “Ina ua tuua e la ma tama tama e 21 ona tausaga le upu moni, sa matuā nutimomoia o ma loto ma laʻu tane o Falani. E sili atu ona ogaoga tigā o oʻu faalogona na i lo Falani. O lenei ua silia ma le 12 tausaga ae e lē o teʻa lava lena tigā.”

E mafai e le fanau ona latou faalavelavea le fiafia o lo latou tamā ma faapogaia le lototigā i lo latou tinā. Tau ina ia tatou faaalia le atamai ma aumaia ai le olioli i o tatou mātua. Ae o le itu e sili ona tāua, seʻi o tatou faafiafiaina le finagalo o lo tatou Tamā faalelagi, o Ieova.

‘Ua Faamalieina le Loto o le Tagata Amiotonu’

Ua faapea mai le tupu: “E le aoga le faulaigāoloa o le amio leaga; a o le amiotonu, e laveai lea nai le oti.” (Faataoto 10:2) E matuā tāua lava nei upu i Kerisiano moni o loo ola i le lotolotoi o taimi o le iʻuga. (Tanielu 12:4) Ua lalata mai le faaumatiaga o le lalolagi faalēmataʻu. E leai se mea ua faia e tagata mo le aumaia o le saogalemu—meafaitino, tupe, po o le fitafita—o le a saunia maia le puipuiga a o faagasolo le “puapuaga tele” o loo fotuaʻi mai. (Faaaliga 7:9, 10, 13, 14) E na o “e amio saʻo, latou te mau i le nuu; ma e ua sao a latou amio, e faatotoeina ai i latou.” (Faataoto 2:21) O lea la, tau ina ia faaauau pea ona tatou “muai saili le malo o le Atua ma lana amiotonu.”—Mataio 6:33.

E lē tau manaʻomia e auauna a Ieova ona faatali seʻi oo mai le lalolagi fou ua folafolaina, ona faatoʻā tofo lea i faamanuiaga a le Atua. “E le faalāina e Ieova o e amiotonu; a o le manao o e amio leaga, e teena lea e ia.” (Faataoto 10:3) Ua saunia e Ieova le anoanoaʻi o meaʻai faaleagaga e ala mai i “le auauna faamaoni ma le mafaufau.” (Mataio 24:45) E mautinoa lava le iai i le tagata amiotonu o māfuaaga ‘e alalaga ai ona o le loto fiafia.’ (Isaia 65:14) O le poto e faafiafiaina ai lona loto. O le saʻili atu mo ʻoa faaleagaga  e maua ai lona fiafia. E lē iloa e le tagata amioleaga na ituaiga o fiafiaga.

‘O le Lima Malosi e Mauoa ai se Tasi’

E iai foʻi se isi auala e faamanuiaina ai lē amiotonu. “E mativa le ua galue ma le lima vaivai; a o e lima malosi e mauoa i latou. O lē faaputu i le tausaga vevela, o le atalii poto lea; a o lē moegase i le tausaga e selesele ai saito, o le atalii lea e tupu ai le mā.”—Faataoto 10:4, 5.

E patino lava le uigā o upu a le tupu i tagata galulue i le taimi o le seleselega. O le vaitau o le seleselega e lē o se taimi e tautulemoe ai. O se taimi e tele ai galuega ma maelega ai mo ni taimi uumi. O le mea moni, o se taimi o le faanatinati.

Ona o lea sa ia mafaufau i le seleselega o tagata ae lē o saito, na fetalai atu ai Iesu i ona soo: “E tele le saito e seleseleina, a o le au fai galuega e toaitiiti ia; o lea ia outou aioi atu ai i le Alii e ana le saito e seleseleina [Ieova le Atua], ina ia aauina mai e ia ni e galulue i lana saito e seleseleina.” (Mataio 9:35-38) I le tausaga e 2000, e silia i le 14 miliona tagata na auai i le Faamanatuga o le maliu o Iesu—ua sili atu na i lo le faaluaina o le aofaʻiga o Molimau a Ieova. O ai la e mafai ona ia faafitia le mea moni e faapea, ‘ua sinasina mai le fanua mo le seleselega’? (Ioane 4:35) O loo ʻaiʻoi atu tagata tapuaʻi moni i le Matai mo nisi ʻaufaigaluega ae i le taimi e tasi, o loo faamalolosi foʻi i latou i le galuega o le faia o soo, ina ia ōgatusa ma a latou tatalo. (Mataio 28:19, 20) Ma e maʻeu le matuā faamanuiaina e Ieova o a latou taumafaiga! A o faagasolo le tausaga faaleauaunaga e 2000, e silia ma le 280,000 tagata fou na papatisoina. O loo finafinau foʻi i latou nei ina ia avea ma faiaʻoga o le Afioga a le Atua. Talosia o le a tatou tofo i le olioli ma le faamalieina i lenei vaitau o le seleselega, e ala i le faia o so tatou sao atoatoa i le galuega o le faia o soo.

‘Ua i Luga o Lona Ulu Faamanuiaga’

Ua faapea mai Solomona: “O faamanuia ua i luga o le ulu o lē amiotonu; a o gutu o e amio leaga, ua ufitia ia i le faasaua.”—Faataoto 10:6.

O le tagata e mamā ma tonu lona loto, e na te faaalia maia se faamaoniga tele o lona amiotonu. O lana talanoa mai e agalelei ma faalaeiau, o ana gaoioiga e aogā ma agaalofa. E talia ma le fiafia o ia e isi tagata. O se tagata faapena e latou te matuā talisapaia—ma faamanuia mai—i le tulaga o lo latou faia o ni faamatalaga lelei e uiga i a te ia.

Ae peitaʻi, o le tagata amioleaga, e amio tufanua pe amio matagā, ma e tele lava ina faanaunau e faia se mea e faaleagaina ai isi. O ana faamatalaga atonu e susua ma ono ‘ufitia ai le faasaua’ o loo natia i lona loto, peitaʻi e iʻu lava ina ia faatinoina le sauā i ana gaoioiga pe i faaupuga foʻi. (Mataio 12:34, 35) Pe i le isi foʻi itu, o le “sauā o le a ufitia [pe tapunipuni] ai gutu o tagata amioleaga.” (Faataoto 10:6, faaopoopoga i le pito i lalo, NW ) E faaalia ai i lenei mea, e masani lava ona toe faaali mai e isi i le tagata amioleaga, mea o loo ia faaalia atu foʻi, e pei o le lotoa. E peiseai ai ua ufitia, pe tapuni, e lenei mea lona gutu ma faafilemu ai o ia. O ā ni faamanuiaga e mafai e lena tagata ona ia faatalitalia mai isi?

Ua tusi mai le tupu o Isaraelu: “O le faamanatuina o lē amiotonu, e viia lava lea; a o igoa o e  amio leaga, e pala ia.” (Faataoto 10:7) O le tagata amiotonu e manatua ma le fiafia o ia e isi, aemaise lava e Ieova le Atua. Ona o le faamaoni o Iesu seʻia oo ina maliu, na mafai ai ona ia ‘maua se suafa e sili atu’ na i lo o igoa o agelu. (Eperu 1:3, 4) I aso nei, o loo manatua ai e Kerisiano moni, tane ma fafine faatuatua o aso anamua, i le avea o ni faaaʻoaʻoga e aogā ona faataʻitaʻi i ai. (Eperu 12:1, 2) Maʻeu le ese o lenei mea mai le igoa o ē amioleaga, lea ua oo ina avea o se mea e inosia ma matuā matagā! Ioe, “ia sili le manao ina ia taʻuleleia i le manao i le oloa e tele; ma le agalelei, ia sili le manao i lea i le ario ma le auro.” (Faataoto 22:1) Talosia o loo tatou faia se igoa lelei ma Ieova ma o tatou uso a tagata.

‘O le Tagata Amiotonu o le a Savali ma le Saogalemu’

I le faaeseeseina o le atamai ma le valea, ua taʻua ai e Solomona: “O le ua poto [atamai] lona loto, na te talia poloaiga; a o le ua gutu vale, e lafotuina ia.” (Faataoto 10:8) E iloa lelei e le tagata atamai, “e le o i le tagata e savali ona faatonuina le mea e ui ai o ia.” (Ieremia 10:23) E na te taliaina le manaʻoga ina ia saʻili i taʻiala mai i a Ieova ma lotomalie e talia poloaʻiga a le Atua. Ae peitaʻi o le tagata valea, e lē taumafai o ia e malamalama i lenei mea moni autū. O ana faamatalaga valea ma lē uigā e toe mafatia ai lava o ia.

E maua foʻi e le tagata amiotonu se ituaiga o saogalemu lea e lē o maua e le tagata amioleaga. “O lē savali i le amiotonu, ua savali ma le saogalemu o ia; a o lē faapiopio ona ala, e faaalia o ia. O le ua genogeno ona mata, na te faatupuina le tiga; o le ua gutu vale foi, e lafotuina ia.”—Faataoto 10:9, 10.

O le tagata amiotonu e faamaoni i ana feutagaʻiga. E faaaloalogia ma faatuatuaina o ia e isi. O le tagata faamaoni e avea o se tagata faigaluega e sili ona aogā ma e masani ona faatuatuaina i a te ia ni tiute tauave tetele. O lona talaaga faamaoni e mafai ona faafaigaluega ai pea o ia e tusa lava po ua tau leai ni galuega. E lē gata i lea, o lona faamaoni e mafai ona maua ai se siʻomaga fiafia ma le filemu i le aiga. (Salamo 34:13, 14) E na te lagonaina le saogalemu i lana faiā ma isi tagata o lona aiga. Ua avea moni lava le saogalemu o se fua o le amiotonu.

E ese mai le tulaga o le tagata lea e lolo atu i le lē faamaoni mo le mauaina o se manuia i le gaoioiga manatu faapito. E ono taumafai le tagata taufaasesē e nanā ona uiga piʻopiʻo e ala i ni ana faamatalaga lē moni pe feaveaʻi solo ana taga. (Faataoto 6:12-14) O le genogeno o ona mata i se uiga leaga pe taufaavalea, e ono atili ai ona tigā ma mafatia faalogona o i latou ua afaina i ana faiga taufaavalea. Peitaʻi, e lē umi ae iloa le uiga piʻopiʻo o lena tagata. Na tusi mai le aposetolo o Paulo e faapea: “E iloa tino agasala a isi tagata, e muamua atu i le faamasinoga; a o agasala a isi e mulimuli atu. E faapea foi galuega lelei a isi, e iloa tino ia; afai foi e le o faapea, e le mafai ona natia pea lava pea.” (1 Timoteo 5:24, 25, LF ) E tusa lava po o ai e aafia ai—po o se matua, se uō, se paaga faaipoipo, po o se tasi e masani ai—ae e iʻu lava ina faaalia mai le lē faamaoni. O ai na te mafai ona faatuatuaina se tagata ua iai sona talaaga i le lē faamaoni?

‘O Lona Gutu o le Puna Lea o le Ola’

Ua faapea mai Solomona: “O le gutu o lē amiotonu, o le puna o le ola lea; a o gutu o e amio leaga, ua ufitia ia i le faasaua.”  (Faataoto 10:11) O upu mai le gutu e mafai ona faamālōlō pe faatigā ai. E mafai ona faafouina ma faafiafia ai se tagata, po o le faalotovaivaia ai foʻi o ia.

I le faailoaina mai o le agaga o loo i tua o upu e tautala ai, ua taʻua ai e le tupu o Isaraelu: “O le ʻinoʻino e faatupu ai misa; a o le alofa e ufiufi ai solitulafono uma lava.” (Faataoto 10:12) O le ʻinoʻino e faatupu ai misa i le vā o tagata, ma faapogaia ai vevesi. E ao i a i latou e alolofa i a Ieova ona liaʻi ese le ʻinoʻino mai i o latou olaga. E faapefea? I le sui atu i ai o le alofa. “O le alofa e ufiufi ai agasala e tele.” (1 Peteru 4:8) O le alofa e “lavātia mea uma,” o lona uiga “e ufiufia mea uma lava.” (1 Korinito 13:7; Kingdom Interlinear) E lē faatalitalia e le alofa faale-Atua se lelei atoatoa mai tagata e lē lelei atoatoa. Na i lo le faamatilatila mai o mea sesē a isi, o se alofa faapena e fesoasoani i a i tatou ina ia faagalo ai o latou sesē seʻi vaganā o se mea sesē matuiā. O le alofa foʻi e mafai ai ona onosaia ni faiga lē lelei tatou te fetaiaʻi i le faiva i le fanua, i o tatou falefaigaluega, ma i le aʻoga.

Ua faaauau mai le tupu atamai: “Ua iloa le poto [atamai] i laugutu o lē mafaufau; a o le sasa, e tatau lea i le tua o le ua leai sona mafaufau.” (Faataoto 10:13) O le atamai o le tagata mafaufau e taʻitaʻia ai ona ala. O upu faalaeiau mai lona gutu e fesoasoani i isi ina ia latou savavali ai i le ala o le amiotonu. E lē tau faamalosia—i le sasa—o ia po o i latou o ē faalogo atu i a te ia, ina ia agaʻi atu ai i le itulagi saʻo.

Ia “Teua le Poto”

O le ā e fesoasoani i a tatou upu ina ia avea o ‘se alia ola o le poto [atamai]’ na i lo o faamatalaga pāʻo vale a se tagata e leai se mafaufau? (Faataoto 18:4) Ua tali mai Solomona: “O e popoto [atamamai] latou te teua le poto; a o le gutu o le vale, ua latalata i ai le malaia.”—Faataoto 10:14.

O le mea muamua lava e manaʻomia, o le tatau lea ona faatumu o tatou mafaufau i le poto aogā e uiga i le Atua. E na o le tasi lava le puna o lena poto. Na tusi mai le aposetolo o Paulo: “O tusi paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.” (2 Timoteo 3:16, 17) E tatau ona tatou teuina faapelepele le poto ma saʻili loloto atu i le Afioga a le Atua e peiseai o loo saʻili mo se oloa lilo. Maʻeu le matagofie ma le tauia o sea saʻiliʻiliga!

Ina ia iai le atamai i o tatou gutu, e tatau foʻi ona pāʻia e le poto o le Tusi Paia o tatou loto. Na taʻu atu e Iesu i lana ʻaufaalogologo: “Ua au mai mea lelei e le tagata amio lelei i mea lelei ua teu i lona loto; o le tagata amio leaga foi ua au mai e ia mea leaga i mea leaga ua teu i lona loto; auā o le tele o mea i le loto e tautala mai ai lona gutu.” (Luka 6:45) O lea la, e tatau ona fai ma a tatou masani le mafaufau loloto i mea o loo tatou aʻoaʻoina. E ui lava o le mea moni e manaʻomia ni taumafaiga ina ia suʻesuʻe ma mafaufau loloto ai, ae maʻeu le faatamaoaigaina faaleagaga o se suʻesuʻega faapena! E leai se māfuaaga mo se tasi e mulimuli atu ai fua i le ala leaga o se tagata e na ona tautalatala lē aogā i upu e leai se uiga.

Ioe, o le tagata atamai na te faia le mea ua tonu i le silafaga a le Atua ma e iai ana taaʻiga lelei i isi. E anoanoaʻi meaʻai faaleagaga na te maua ma e tele foʻi mea na te faia i le galuega tauia a le Alii. (1 Korinito 15:58) O le avea o se tagata o le amiotonu, e savali ai o ia ma le saogalemu ma ona maua le finagalo malie o le Atua. Ioe, e tele faamanuiaga o le tagata amiotonu. Tau ina ia tatou saʻili atu i le amiotonu e ala i le ōgatusa o o tatou olaga ma tapulaa a le Atua, lea e iloa ai le lelei ma le leaga.

[Faamatalaga pito i lalo]

[Ata i le itulau 25]

O le faamaoni e mafai ona maua ai se olaga fiafia i le aiga

[Ata i le itulau 26]

‘O e atamamai latou te teua le poto’