Pe E te Faapalepale Moni Lava?

NA IAI ea se taimi na e matuā lagona ai le ita ona o se amio lē talafeagai a se tasi? Pe e te vave gaoioi pe a iai ni taaʻiga e faaleagaina ai ua matuā aafia ai au aumea e tou te vavalalata?

O se gaoioiga vave ma le maumauaʻi, e manaʻomia i nisi taimi ina ia taofia ai le sosolo atu o se agasala matuiā. Mo se faaaʻoaʻoga, i le senituri 15 T.L.M. ina ua foliga mai o le a faaleagaina tagata Isaraelu ona o se amioga leaga na faia ma le faasausili, ona gaoioi ai lea ma le maumauaʻi o Fineaso le atalii o le atalii o Arona ina ia aveesea le mea leaga sa iai. Na faaalia le finagalo malie o Ieova le Atua i le mea na ia faia, i le fetalai mai: “O Fineaso . . . ua liueseina ai loʻu ita i le fanauga a Isaraelu, i loʻu maelega ia te i latou.”—Numera 25: 1-11.

Na faia e Fineaso se gaoioiga talafeagai e taofia ai le sosolo atu o le tulaga faaleagaina na iai. Ae faapefea pe afai e tatou te soona feita ona o vaivaiga faaletagata o isi? Afai e tatou te soona mateletele ae e aunoa ma se māfuaaga tatau, e mafai ona avea ai i tatou e lē o sē e puipui i le amiotonu ae o se tagata e lē faapalepale—o se tasi lea e na te lē onosaia uiga lē lelei atoatoa o isi. O le ā e mafai ona fesoasoani i a i tatou ina ia ʻalofia ai lenei mailei?

‘O Loo Faamagaloina e Ieova Au Amio Leaga Uma Lava’

O Ieova o “se Atua e fuā (maelega); o se Atua na te lē faatagaina se faatavā.” (Esoto 20:5, faaopoopoga i le pito i lalo, NW) I le avea ma Lē na Foafoaina Mea, ua iai i a te ia le aiā e tāpā ai lo tatou tuutoina atu atoatoa. (Faaaliga 4:11) E ui i lea, e faapalepale Ieova i vaivaiga faaletagata. E tusa ai o Ieova, na pese ai le faisalamo o Tavita e faapea: “E alofa mutimuti vale ma alofa fua mai Ieova; e tele gese lona toasa, a e tele lona alofa. E le aoai mai pea lava ia [“faaauau pea ona saʻiliʻili masei,” NW] . . . E lei faia e ia ia i tatou e tusa ma a tatou agasala; e lei taui mai foi o ia ia i tatou e tusa ma a tatou amio leaga.” Ioe, afai tatou te faaalia le salamō, e ‘faamagalo e le Atua a tatou amio leaga uma lava.’—Salamo 103: 3, 8-10.

Talu ai e malamalama o ia i le tulaga agasala o tagata, e lē “faaauau pea ona saʻiliʻili masei” Ieova i tagata fai mea sesē ua salamō. (Salamo 51:5; Roma 5:12) O le mea moni, o lana fuafuaga ia tafiesea le agasala ma le lē lelei atoatoa. A o faatalitalia la le faataunuuina atoatoa o lena fuafuaga, na i lo le tuuina mai i a i tatou o mea e “tusa ma a tatou amio,” ua faasafua mai ma le agalelei e le Atua le faamagaloga e faavae i le taulaga togiola a Iesu Keriso. E leai ma se tasi o i tatou o le a faamasinoina e ono ma tatau i ai le faasaoina pe ana lē faaalia mai e Ieova le alofa mutimutivale pe a talafeagai ai. (Salamo 130:3) Maʻeu lo tatou loto faafetai ona o lo tatou Tamā faalelagi, o lē ua tatau ai ona ia tāpā mai ma le tonu le tuutoina atu atoatoa, o ia o se Atua e alofa mutimutivale!

E Manaʻomia le Paleni

Talu ai o lea e faaalia e le Alii Pule Silisili Ese i le vateatea le faapalepale i le feagai ai ma tagata lē lelei atoatoa, pe lē tatau ea la ona tatou faia foʻi faapea? Ua faamatalaina le faapalepale o “se faanaunauga e faaalia ai le onosai i manatu po o masaniga a isi.” Pe e iai se manatu totino faapena i a i tatou—se faanaunauga e faaalia le onosai ma le faapalepale pe a fai mai e nisi ni faaupuga po o ni gaoioiga e lē matuiā tele ae atonu e lē o talafeagai ia upu po o gaoioiga foʻi?

O le mea moni, e manaʻomia ona tatou ʻalofia le soona faapalepale naʻuā. Mo se faataʻitaʻiga, o ni aafiaga mataʻutia ua oo i ai ona ua faaalia e pulega o le lotu le faapalepale i patele o loo latou faaauau pea ona faaleagaina tama ma teine. Na faapea mai le manatu o se tasi tusitala i Aialani: “I le manatu atu i le auala na faia ai tamaiti faapea ua na o se agasala na tupu, pau lava le mea na faia e pulega o le lotu o le siitia  atu lea o patele na faia le agasala [i se isi nofoaga].”

Po ua avea ea le siitia ese o se tagata faapena ma faaaʻoaʻoga o le faaalia o le faapalepale e tatau ai? E leai! Seʻi faapea ua faataga e se pulega faafomaʻi se fomaʻi tipitipi faatamala e faaauau pea ona ia faia ni taotoga, e ala i le siitia atu o ia mai le tasi falemaʻi i le isi falemaʻi, e ui lava ua feoti ni ana maʻi po ua iai foʻi ni faalētonu tumau i ana maʻi. E ono māfua lenei “faapalepale” ona o se manatu lē tonu e faapea ia faatumauina le vā lelei o faafomaʻi. Ae faapefea tagata ua fano o latou ola po o le matuā aafia lava ona o faiga faatalalē, pe ona o ni faiga faasolitulafono?

E iai foʻi lamatiaga i le tau lē lava o le faapalepale. A o soifua Iesu i le lalolagi, na saʻiliʻili sesē ai ia nisi o tagata Iutaia, na taʻua o le ʻau Selote, e faaaogā le faataʻitaʻiga a Fineaso i se taumafaiga e taʻutonuina ai a latou lava gaoioiga. O se tasi o gaoioiga sa sili ona faaalia ai o le aunoa ma se faapalepale o le ʻau Selote, o le “miomiō faatasi lea ma le toʻatele o tagata i Ierusalema i le taimi o tausamiga ma isi foʻi faatasitasiga faapena, ma latou faafuaseʻi ona tatui i o latou fili i naifi.”

I le avea ai o ni Kerisiano, tatou te lē taitai ona faia le mea na faia e le ʻau Selote o le osofaʻia lea faaletino o i latou tatou te lē fiafia i ai. Ae pe faamata o iai sina tulaga o le lē faapalepale e ono uunaʻia ai i tatou e osofaʻia i nisi o auala i latou tatou te lē fiafia i ai—atonu e ala i le tautala taufaaleaga e uiga i a i latou? Afai e tatou te faapalepale moni lava, o le a tatou lē liliu atu i lena ituaiga o tautala taufaaleaga.

O le ʻau Faresaio o le uluaʻi senituri o se isi lea vaega sa leai se faapalepale. Sa faifai pea ona latou taʻusalaina isi ma sa latou leʻi onosaʻia vaivaiga faaletagata. Na vaai maulalo le ʻau Faresaio faamaualuluga i tagata lautele, e ala i le fai upu leaga i a i latou o ni ‘tagata ua fetuuina.’ (Ioane 7:49) O se māfuaaga tatau la, na taʻuleagaina ai e Iesu na tamāloloa faafiaamiotonu, i lona fetalai atu: “Oi talofa ia te outou tusiupu ma faresaio, tagata faafiaamiotonu! Ua outou avatu mea e sefulu aʻi o le mili, ma le aneto, ma le kumina, a ua tuu e outou o mea silisili o i le tulafono, o le amiotonu, ma le alofa, ma le faamaoni; e tatau pe ana faia nei mea, a e aua foi le tuu na mea.”—Mataio 23:23, LF.

I le faia o lenei faamatalaga, sa leʻi taʻumāmāina ai e Iesu le tāua o le tausia o le Tulafono Faa-Mose. Sa na ona ia faailoa atu faapea o mea “silisili,” po o vala e sili atu ona tāua o le Tulafono e manaʻomia ai le faatatauina faatasi ma le fetuutuunaʻi ma le alofa mutimutivale. Maʻeu le tū matilatila o Iesu ma ona soo mai le ʻau Faresaio ma le ʻau Selote e lē faapalepale!

E lē o manatu mamā Ieova le Atua po o Iesu Keriso i amioga leaga. E lē pine, ae oo mai le “taui ma sui i e ua le iloa le Atua, ma ua le anaana i le tala lelei.” (2 Tesalonia 1:6-10) Peitaʻi ane, ona o lona maelega mo le amiotonu, e taulau pea Iesu i le faaatagia mai o le onosai, le alofa mutimutivale, ma le manatu alofa, o lona Tamā faalelagi mo i latou uma e mananaʻo e faia le mea saʻo. (Isaia 42:1-3; Mataio 11:28-30; 12:18-21) Maʻeu se faaaʻoaʻoga lelei ua faataatia e Iesu mo i tatou!

Ia Onosai ma Fefaapalepaleaʻi le Tasi i le Tasi

E ui lava atonu e tatou te matuā maelega mo le mea ua tonu, ae seʻi o tatou faatatauina le fautuaga a le aposetolo o Paulo e faapea: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai le Alii ia te outou, ia faapea foi outou.” (Kolose 3:13, LF; Mataio 6:14, 15) O le faapalepale e manaʻomia ai le onosaʻia e le tasi o le isi i mea e lē o atoatoa ma sesē ai i lenei lalolagi lē lelei atoatoa. E manaʻomia ona tatou fetuutuunaʻi i mea tatou te faatalitalia mai i isi.—Filipi 4:5.

O le faaalia o le faapalepale e lē uiga ai e faapea e talia le faia o ni agasala po o le punitia o le vaai i mea sesē. O nisi o vala o manatu po o amioga a se uso talitonu atonu e iai sona itu e lē ōgatusa ai ma tapulaa a Ieova. E ui o lenei sesē atonu e leʻi oo i se tulaga matuiā lea e taʻitaʻia atu ai i le teena e le Atua, ae e ono aumaia ai se lapataʻiga e faailoa mai ai le manaʻomia ona faia o ni fetuutuunaʻiga. (Kenese 4:6, 7) Maʻeu  se alofa pe a taumafai i latou o loo iai agavaa faaleagaga e faasaʻo lē ua fai mea sesē i le agaga agamalu! (Kalatia 6:1) O lea, ina ia taulau manuia i lenei taumafaiga, e moomia ai le gaoioi ona o le manatu alofa na i lo se agaga faitio.

“Ia Faia ma le Lotoagamalu ma le Faaaloalo Loloto”

Ae faapefea le faaalia o le onosai i tagata e ese o latou talitonuga faalelotu mai i a i tatou? E faitauina faapea le “General Lesson” (Lesona Aoao) sa faapipiiina i Aʻoga uma a le Atunuu na faavaeina i Aialani i le 1831: “E leʻi finagalo Iesu Keriso ina ia faamalosia lana lotu i tagata e ala i ni faiga faasauā. . . . O le feupuaʻi ma o tatou tuaoi ma le taufaaleaga i a i latou e lē o le auala lea e faatalitonu ai i latou faapea o i tatou e saʻo a o i latou e sesē. E foliga mai o le mea lena ua faia o le faatalitonuina lea o i latou faapea e lē o i a i tatou se agaga faa-Kerisiano.”

Na aʻoaʻo ma gaoioi Iesu i se auala na tosina atu ai tagata i le Afioga a le Atua, ma e tatau foʻi ona faapena i tatou. (Mareko 6:34; Luka 4:22, 32; 1 Peteru 2:21) I le avea ai o se tagata lelei atoatoa faatasi ai ma se malamalamaga faapitoa na tuuina atu i ai e le Atua, na mafai ona ia iloaina mea o loo i loto. O lea la, pe a talafeagai ai, na mafai e Iesu ona faalauiloa atu ni taʻusalaina ogoogo i fili o Ieova. (Mataio 23:13-33) Sa lē o se lē faapalepale mo ia le faia faapea.

Tatou te lē pei o Iesu, e lē o i a i tatou se tomai e mafai ai ona iloaina mea o i loto. O lea, e ao ai ona tatou mulimuli i le fautuaga a le aposetolo o Peteru e faapea: “Ia faapaiaina Keriso le Alii i o outou loto, ia saunia pea lava outou e tali puipui atu iā i latou uma o ē fesili mai iā te outou i le uiga o le faamoemoe o loo iā te outou, ma ia faia ma le lotoagamalu ma le faaaloalo loloto.” (1 Peteru 3:15, NW) I le avea ai o ni auauna a Ieova, e ao ona tatou tutū atu mo le mea ua tatou talitonu i ai auā ua faavae mausalī i le Afioga a le Atua. Ae ao ona tatou faia faapea i se auala e faaalia ai le faaaloalo mo isi ma o latou talitonuga o loo taofi ma le faamaoni i ai. Na tusi Paulo e faapea: “Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata e taitoatasi uma.”—Kolose 4:6.

I lana Lauga taʻutaʻua i le Mauga, na fetalai ai Iesu: “O mea uma . . . tou te loto i ai ia faia e tagata ia te outou, ia faapea lava ona outou faia ia te i latou.” (Mataio 7:12) O lea la, seʻi o tatou onosai ma faapalepale o le tasi i le tasi ma faaalia le faaaloalo mo i latou tatou te talaʻi atu i ai le tala lelei. E ala i le faapaleniina o lo tatou maelega mo le amiotonu faatasi ma le faapalepale e faavae mai le Tusi Paia, o le a tatou faafiafiaina ai Ieova ma o le a tatou faapalepale moni ai lava.

[Ata i le itulau 23]

ʻAlofia le uiga lē faapalepale o le ʻau Faresaio

[Ata i le itulau 23]

Na faaatagia e Iesu le agaga faapalepale o lona Tamā. Ae faapefea oe?