“Pe e Faasalaina Moni e le Atua Tagata i le Susunuina i Seoli?”

“O lua ō i se aʻoga faafaifeʻau?”

O lenei fesili na faateʻia ai ia Ioelu ma Kali. O tauleleʻa talavou ia e toʻalua—o loo auauna tauofo i le ofisa ulu o Molimau a Ieova i Brooklyn, i Niu Ioka—sa matamata i tusi i se faletusi e latalata ane. A o iloiloina e Ioelu ia tusi faasino mau o le Tusi Paia, sa faamatala atu e Kali i a te ia se talanoaga na ia olioli ai i le faiva. I le faalogo mai i ni vaega o lenei talanoaga, sa uunaʻia vave ai se tamāloa na tū latalata ane e faalatalata atu i a i laʻua.

Ae peitaʻi, sa iai se mea sa sili ona manatu mamafa totino i ai le tamāloa na i lo o le fia iloa pe faamata e ō nei tauleleʻa e toʻalua i se aʻoga faafaifeʻau. Na ia faamatala atu: “O aʻu o se Siū, ma na taʻu mai e nisi o aʻu uō Kerisiano e faapea, o le a susunuina aʻu i seoli talu ai sa teena e tagata Iutaia Iesu. Ua matuā faapopoleina ai lava aʻu i lenei mea. O se faasalaga faapenei mai se Atua alofa e foliga mai e lē saʻo. Pe e faasalaina moni e le Atua tagata i le susunuina i seoli?”

Na taʻu atu e Ioelu ma Kali i lenei tamāloa lotofaamaoni e faapea, o i laʻua o ni tagata aʻoga naunau moni lava o le Tusi Paia. Na la faaali atu i a te ia mai le Tusi Paia e faapea, o ē ua oti ua latou lē iloa se mea ma o loo na ona momoe i latou i le oti e faatalitali ai i le toetū. I lea, e lē o faapuapuagatiaina ai pe faatigāina i latou i se afi i seoli. (Salamo 146:3, 4; Failauga 9:5, 10; Tanielu 12:13; Ioane 11:11-14, 23-26) I le iʻuga o la latou talanoaga e 45 minute, na avatu ai e le tamāloa lona tuatusi i a Ioelu ma Kali ma talosaga atu mo nisi faamatalaga atili e uiga i le mataupu.

Pe afai o seoli o se nofoaga e faapuapuagatia ai i se afi, pe e manaʻo ea se tasi e talosaga atu ina ia aauina atu o ia iinā? Auā, i le manaʻo o le augatamā o Iopu ina ia sola ese mai ona mafatiaga, sa ia talosaga atu e faapea: “E! fia natia aʻu e oe i le tuugamau [“seoli,” NW] ma ia e faaliloina aʻu, seia mavae atu lou toasa.” (Iopu 14:13) E manino lava, sa leʻi talitonu Iopu e faapea o seoli o se nofoaga e faapuapuagatia ai. Na i lo o lea, sa ia saʻilia le puipuiga iinā. O le oti, o le tulaga o le lē toe iai, ma o seoli i le Tusi Paia, o le tuugamau taatele lea o le fanau a tagata.

Afai e te fia silafia atili ni faamatalaga e uiga i le mea e tupu i a i tatou pe a tatou feoti, ma le faamoemoe atonu o loo iai iinā i se taimi mulimuli ane, ua valaaulia ai la ma le māfana oe ina ia e tali atu i le ofo lea o loo mulimuli mai.