Pe e Iai Sou Agaga e Lē Mafai Ona Oti?

“O TUSI PAIA uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu,” o le tusi mai lena a le aposetolo o Paulo. (2 Timoteo 3:16) Ioe, o le Tusi Paia, o se tusi o upu moni lea e mai i le Atua moni, o Ieova.—Salamo 83:18.

Ona o Ieova o Lē na Foafoaina mea uma lava, e aofia ai ma tagata, e na te silafia lelei le mea e tupu i a i tatou pe a tatou feoti. (Eperu 3:4; Faaaliga 4:11) I lana Afioga faagaeeina le Tusi Paia, ua ia aumaia ai tali e moni ma faamalieloto i fesili e faatatau i le olaga i le lumanaʻi.

O le ā le Agaga?

I le Tusi Paia, o upu mai le uluaʻi gagana o loo faaliliuina i le “agaga” o lona uiga faavae o le “mānava.” Ae e sili atu mea o loo aofia ai na i lo le tau ina mānava. Mo se faataʻitaʻiga, na taʻua e le tusitala o le Tusi Paia o Iakopo e faapea: “E faapei o le tino ua oti ia pe a teʻa le agaga.” (Iakopo 2:26) O lea la, o le agaga o le mea lea e avatua le ola i le tino.

O lenei malosi o loo iai le ola, e lē mafai ona faapea e na o le mānava, po o le ʻea, o loo alu atu i māmā. Aiseā e lē na o le mānava ai? Auā pe a uma le mānava, e tumau pea le ola i sela o le tino mo sina taimi puupuu—“mo ni nai minute,” e tusa ai ma le World Book Encyclopedia. O le māfuaaga lenei e mafai ai ona manuia taumafaiga i le toe faaola mai o se tagata (resuscitation). Ae o le taimi lava e alu ese ai le malosi o le ola mai sela o le tino, e so o se taumafaiga lava la e toe faafoʻisia ai le ola ua lē toe aogā. E oo lava i se sela e tasi, e lē toe mafaia ona faaola e le mānava uma lava, po o le ʻea, o loo iai i le lalolagi. O lea la, o le agaga, o le malosi lē vaaia o le ola—le malosi lea e faaauau ona avatuina i sela ma le tagata, le ola. O lenei malosi o le ola o loo faaolaolaina e ala i le mānava.—Iopu 34:14, 15.

Po o lena ea agaga e na o tagata e galue ai? Ua fesoasoani mai le Tusi Paia i a i tatou e mauaina ai se faaiʻuga saʻo e faatatau i lenei mataupu. Na iloaina e le tupu poto o Solomona e faapea, o tagata ma manu “e tasi lava le mānava [“agaga,”NW ] ia te i latou uma,” ae sa ia fesili e faapea: “O ai se na te iloa le agaga o le tagata e alu ae i luga? po o le agaga o le manu e alu ifo i lalo i le eleele?” (Failauga 3:19-21) O lea ua tautala  ai i meaola faapea ai ma tagata, e iai o latou agaga. E faapefea ona tupu lena mea?

O le agaga, po o le malosi o le ola, e mafai ona faatusa atu i le uila o le eletise o loo alu atu i se masini po o se masini e alu i le eletise. E ono mafai ona faia e le eletise lea e lē o vaaia le tele o matātā, e faalagolago i le ituaiga o masini o loo alu i ai. Mo se faataʻitaʻiga, o se ogaumu e alu i le eletise e mafai ona gaosia ina ia maua mai ai le vevela, o se komepiuta e faia ina ia mauaina ai faamatalaga, ma televise ina ia mauaina ai ata ma leo. Peitaʻi, e lē mafai lava ona avea ai le uila o le eletise ma masini lea e na te faaolaina. E tumau pea le eletise ua na o se malosi. I se tulaga tutusa, e lē mafai e le malosi o le ola ona avea o ia ma uiga o se meafaiola o loo ia avatu i ai le ola. E leai sona peresona ma e leai sona tomai e mafaufau ai. O tagata ma manu “e tasi lava ia mānava [“agaga,”NW] ia te i latou uma.” (Failauga 3:19) O lea la, pe a oti le tagata, e lē faaauau pea ona ola lona agaga i se isi mea e avea o se meafaiola agaga.

O le ā la, le tulaga o loo iai le tagata ua oti? Ae o le ā foʻi le mea e tupu i le agaga pe a oti le tagata?

“E te Toe Foi Atu Lava i le Efuefu”

Ina ua lē usiusitai ma le loto i ai le uluaʻi tagata o Atamu i le poloaʻiga a le Atua, ona fetalai atu lea o le Atua i a te ia: “E te ʻai foi au mea e ʻai ma le afu o ou mata, seia e toe foi atu i le eleele; auā na faiina aʻi lava oe; auā o le efuefu oe, e te toe foi atu lava i le efuefu.” (Kenese 3:19) O fea sa iai Atamu a o leʻi foafoaina o ia e Ieova mai le efuefu? O le mea moni, na leʻi iai o ia! O le tulaga moni lava, e leʻi ola mai o ia. O lea ina ua fetalai Ieova le Atua i a Atamu o le a “toe foi atu i le eleele,” o le uiga o lana fetalaiga e faapea o le a oti Atamu ma toe foʻi atu i elemeni o le eleele. O le a lē siitia atu Atamu i le nofoaga o agaga. I le oti, o le a toe foʻi atu lava Atamu i le tulaga o le lē iai lea na iai muamua. O lona faasalaga o le oti—ua lē o iai se ola—e lē o le siitia atu i se isi vaipanoa.—Roma 6:23.

Ae faapefea isi o ē ua oti? Ua faamanino mai le tulaga o ē ua oti i le Failauga 9:5, 10, lea e tatou te faitau ai: “A o e ua oti, latou te le iloa se mea . . . e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” O le oti la, o se tulaga o le lē toe ola. Na tusi le faisalamo e faapea a oti le tagata, “e alu ese lona agaga, e foi atu i le eleele na i ai o ia; e faaumatia i lea lava aso ona manatunatu.”—Salamo 146:4.

Ua manino la, e lē o toe ola le tagata ua oti. E lē toe mafai ona latou iloa se mea. E latou te lē o toe mafai ona vaai mai i a te oe, faalogo i a te oe, po o le talanoa mai i a te oe. E latou te lē toe mafai ona fesoasoani i a te oe pe faaleaga foʻi i a te oe. E mautinoa lava la le lē tatau ona e fefe i le tagata oti. Ae faapefea ona ‘alu ese le agaga’ mai i le tagata i le taimi e oti ai?

E “Toe Foi Atu le Agaga i le Atua”

Ua taʻua e le Tusi Paia e faapea pe a oti le tagata, e “toe foi atu le agaga i le Atua o le na  foaiina mai ai.” (Failauga 12:7) Po o le uiga ea o lenei mea o le a alu ese moni atu lava le agaga ma malaga atu i le vateatea i le mea o loo afio ai le Atua? E matuā leai lava! O le auala o loo faaaogā ai e le Tusi Paia le upu “toe foi” e lē tau manaʻomia ai se alu atu moni lava mai le tasi nofoaga i le isi nofoaga. Mo se faataʻitaʻiga, na taʻu atu i tagata Isaraelu lē faamaoni e faapea: “[Toe] foi mai ia ia te au, ona ou foi atu lea ia te outou, ua fetalai mai ai Ieova o ʻau.” (Malaki 3:7) O le “toe foi” o tagata Isaraelu i a Ieova, o lona uiga o le suia mai se ala sese ma toe foʻi e ola ia ogatusa ma ala amiotonu a le Atua. Ae o le “toe foi” o Ieova i tagata Isaraelu o lona uiga o lona toe liuliualo atu ma lona finagalo malie i ona tagata. I tulaga nei e lua, o le “toe foi” e aofia ai ia se uiga, ae lē o se alu ese moni mai i se tasi o nofoaga i le isi nofoaga.

I se tulaga tutusa, i le oti e leai ni feoaʻiga moni e faia mai le lalolagi agaʻi i le lagi pe a “toe foi” atu le agaga i le Atua. O le taimi lava e uma ai le malosi o le ola i se tagata, e na o le Atua e mafaia ona toe faafoʻi ai i a te ia. O lea o le “toe foi atu o le agaga i le Atua” o loo i se uiga e faapea, o so o se faamoemoega mo le ola i le lumanaʻi mo lena tagata ua taatia atoatoa atu nei i le Atua.

Seʻi mafaufau, mo se faataʻitaʻiga, i mea o loo fai mai ai le Tusi Paia e faatatau i le maliu o Iesu Keriso. Na faamatalaina e le tusi Evagelia o Luka e faapea: “Ona valaau ai lea o Iesu, ua leo tele, ua faapea atu, ‘Loʻu Tamā e, ou te tuuina atu loʻu nei agaga i ou aao!’ Ua na fetalai ia upu, ona to ai lea o lana mānava.” (Luka 23:46) A o alu ese atu le agaga o Iesu i a te ia, sa ia leʻi alu ese moni atu agaʻi i le lagi. Sa faatoʻā faatūina mai Iesu nai le oti i le aso lona tolu, ma e 40 aso mulimuli ane ai ona faatoʻa afio aʻe lea o ia i le lagi. (Galuega 1:3, 9) Peitaʻi, i le taimi o lona maliu, na tuuina atu ai e Iesu lona agaga i aao o lona Tamā, ma faatuatua atoatoa atu i le tomai o Ieova e toe faafoʻisia mai ai le ola i a te ia.

Ioe, e mafai e le Atua ona toe faafoʻisia le ola i se tagata. (Salamo 104:30) Maʻeu se faamoemoe matagofie ua tatalaina mai!

Se Faamoemoe Mautinoa

Ua taʻua e le Tusi Paia e faapea: “Auā e oo mai le aso e faalogo ai i lona leo o i latou uma ua i tuugamau, ma latou o mai ai.” (Ioane 5:28, 29) Ioe, ua folafola mai e Iesu Keriso e faapea, o i latou uma lava o loo manatua e Ieova o le a toe faatūina mai, po o le toe faafoʻisia i le ola. O le a iai faatasi ma i latou ē na tuliloaina se ala amiotonu i le avea ai o ni auauna a Ieova. Ae e faitau miliona isi tagata ua oti e aunoa ma le faaalia mai po o le a latou gauaʻi i faatulagaga amiotonu a le Atua. A lē ona e latou te leʻi iloa mea e manaʻomia e Ieova, pe na leʻi lava foʻi le taimi na latou mauaina e faia ai suiga manaʻomia. O tagata nei o loo manatuaina e le Atua ma o le a toe faatutūina mai, ona ua faapea mai le Tusi Paia: “O le a toe tutū mai e ua amiotonu atoa ma e ua amioletonu.”—Galuega 24:15.

Ua tumu le lalolagi i aso nei i le feitagaʻi ma feʻainaʻiga, le sauā ma le faamasaatoto, le polusione ma faamaʻi. Afai o le a toe faafoʻisia mai i le ola i latou ua oti i lenei ituaiga o lalolagi, e mautinoa lava la o so o se fiafiaga e maua o le a matuā puupuu lava. Ae ua folafola mai e Lē na Foafoaina Mea e faapea, ua toeitiiti ona ia aumaia lea o le iʻuga i le faiga o mea a tagata o loo iai nei, lea o loo i lalo o le taʻitaʻiga a Satani le Tiapolo. (Faataoto 2:21, 22; Tanielu 2:44; 1 Ioane 5:19) O se sosaiete o tagata amiotonu—“le lalolagi fou”—o le a avea o se mea moni matagofie.—2 Peteru 3:13.

I lena taimi “e le fai mai foi se tasi ua mau ai, Ou te maʻi.” (Isaia 33:24) E oo lava i faanoanoaga o le oti o le a lē toe iai, ona o le a “sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Faaaliga 21:4) Maʻeu se faamoemoe o le a iai mo i latou o loo iai i “tuugamau”!

Pe a tafiesea e Ieova le amioleaga mai le lalolagi, o le a ia lē faaumatia le tagata amiotonu faatasi ai ma tagata amioleaga. (Salamo 37:10, 11; 145:20) O le mea moni, o “le motu o tagata e toatele” o tagata “mai atu nuu uma, ma aiga, ma nuu, ma gagana eseese” o le a faasaoina  nai “le puapuaga tele,” lea o le a faaumatia ai le lalolagi amioleaga o loo iai nei. (Faaaliga 7:9-14) O lea, o le a iai se motu o tagata e toʻatele e faafeiloaʻia i latou e toe faafoʻisia mai i le oti.

Po o e faanaunau atu e toe vaai i ē pele i a te oe? Pe e te manaʻo e ola e faavavau i Parataiso i le lalolagi? O lea la e tatau ona e ave i fale le poto saʻo e faatatau i le finagalo o le Atua ma ana fuafuaga. (Ioane 17:3) O le finagalo o Ieova ina ia “faaolaina o tagata uma lava, ma ia oo ina iloa lelei le upu moni.” —1 Timoteo 2:3, 4.

[Ata i le itulau 4]

“O le efuefu oe, e te toe foi atu lava i le efuefu”

[Ata i le itulau 5]

E mafai ona faatusaina le agaga i le eletise

[Ata i le itulau 7]

O le a aumaia e le toetū le olioli e tumau