Pe e Iai se Olaga pe a Mavae le Oti?

“AFAI e oti le tagata, e toe ola mai ea o ia?” o le fesili lena na fesili ai le augatamā anamua o Iopu pe tusa o le 3,500 tausaga ua mavae. (Iopu14:14) O lenei fesili ua iso ai tagata mo le faitau meleniuma. A o faagasolo tausaga, ua fefulifulisaʻi ai e tagata i so o se aganuu lenei mataupu ma ua latou aumaia ai ni manatu eseese e faatatau i ai.

O le toʻatele o i latou o loo faapea mai o Kerisiano e talitonu i se olaga i le lagi faapea foʻi ma seoli. Ae i le isi itu, o tagata Hinitū, e talitonu i le toe ola mai i se isi tino. O le faamatalaina o le taofi o tagata Musalimi, na faapea mai ai Emir Muawiyah, o se tagata e galue i se tasi o nofoaga autū o le lotu Isalama: “E matou te talitonu e faapea, o le a iai le aso faamasino pe a mavae le oti, pe a e alu atu i luma o le Atua, o Allah, lea o le a pei lava o lou ulu atu i se fale faamasino.” E tusa ai ma talitonuga a tagata Isalama, o le a iloiloina e Allah olaga o tagata taʻitoʻatasi ma tuuina atu lena tagata a lē i le parataiso, o le afi i seoli.

I Sri Lanka, e matuā tatala ai lava faitotoʻa ma faamalama e tagata Puta ma tagata Katoliko pe a maliu se tasi o o latou aiga. E tutu se molī suauu, ma e faataatia le pusa maliu e faaū vae o le tagata maliu e feagai ma le faitotoʻa i luma. O nei fuafuaga, e latou te talitonu, e faafaigofie ai le alu ese atu o le agaga o le tagata ua maliu.

E tusa ai ma le faamatalaga a Ronald M. Berndt o le University of Western Australia, o tagata Apoliki (Aborigine) o Ausetalia e talitonu faapea “o tagata soifua e iai o latou agaga e lē mafai ona oti.” O nisi o ituaiga o tagata Aferika e talitonu faapea, pe a mavae le oti o tagatā lautele, ona avea lea o i latou ma aitu, a o tagata iloga pe a mavae lo latou oti, e avea i latou ma agaga o tuaa o le a faamamaluina ma avatu i ai talosaga i le avea ai o ni taʻitaʻi lē vaaia o le nuu.

I nisi o atunuu, o talitonuga e faatatau i le tulaga o ē ua maliliu, o se tuufaatasiga lea o aganuu masani ma talitonuga ua faapea mai o le Faa-Kerisiano. O se faataʻitaʻiga, o le toʻatele o tagata Katoliko ma Porotesano i Aferika i Sisifo, e fai ma a latou tū masani le ufiufi o fāʻata pe a maliu se tasi ina ia lē tilotilo atu se tasi i le fāʻata ma iloa atu ai le agaga o le tagata oti.

O le mea moni, e eseese lava tali a tagata i le fesili, ‘O le ā e tupu ia i tatou pe a tatou oti?’ Peitaʻi, e tasi lava le manatu faavae o nei talitonuga uma: O loo iai se mea e i totonu o le tagata e lē mafai ona oti ma e ola pea pe a mavae le oti. E talitonu nisi o tagata e faapea o lena “mea” o le agaga. Mo se faataʻitaʻiga, i vaega o Aferika ma Asia faapea ma le atu Pasefika i Polenisia, Melanesia, ma Maikoronesia, o le toʻatele e talitonu faapea o le agaga e ola pea e lē mafai ona oti.

Pe e iai ea se agaga i se tagata ola? Pe e alu ese moni lava lena agaga mai le tino pe a oti? Afai o lena le tulaga, o le ā e tupu i le agaga? Ae o le ā le faamoemoe o loo iai mo ē ua maliliu? E lē tatau ona lē amanaʻiaina nei fesili. Po o le ā lava lau aganuu po o talitonuga faalotu o loo iai, o le oti o le mea moni e ao ona fesagaʻia. O lenei mataupu o loo aafia loloto ai oe i se auala totino. E matou te faalaeiauina oe e tagaʻi i lenei mataupu.