Foʻia o Toʻatugā i Lou Agaʻigaʻi i Luma!

SEʻI faapea o lea ua tuu i le kia lau taavale, ma o loo ola foʻi le afi, ae ua lē mafai ona alu i luma. Po o se faafitauli ea tau inisinia? E leai, o loo iai se maa telē o loo taatia i luma o se tasi o paʻu. O le aveesea o lenā maa telē, e na o le pau lava lenā o le mea e manaʻomia ona fai ina ia mafai ai ona alu le taavale.

I se auala talitutusa, o nisi o loo suʻesuʻe le Tusi Paia ma Molimau a Ieova o loo iai toʻatugā lea e mafai ona taofiofia ai lo latou agaʻigaʻi i luma faaleagaga. Mo se faataʻitaʻiga, na lapataʻi mai Iesu e faapea, o mea e pei o “le loto popole i mea a lenei lalolagi, ma le pepelo o le oa” e mafai ona “fetinaiina ai le upu” o le upu moni ma faalavelavea ai lona tupu aʻe.—Mataio 13:22.

O isi, o masaniga na ola aʻe ai po o vaivaiga na punitia ai lo latou agaʻigaʻi i luma. Sa fiafia se tamāloa Iapani e igoa iā Yutaka i le feʻau a le Tusi Paia, peitaʻi sa iai sona faafitauli matuiā i mea tau i taaloga fai tupe. Na masani lava ona ia taumafai e foʻia lenei faafitauli ae sa lē taulau. O lana masaniga na oo ai i le maumau o ana tupe e tele, o fale e tolu, leai se faaaloalogia e lona aiga, ma le mou atu o lona lava mamalu. Pe e mafai ea ona ia aveesea lenei mea o loo avea ma faalavelave ae avea ma Kerisiano?

Seʻi manatu i se fafine e igoa ia Keiko. O le fesoasoani a le Tusi Paia, na ia lafoaʻia ai masaniga leaga e pei o le ifo i tupua, amioga lē mamā, ma le faia o valovaloga. Peitaʻi, na taʻutino e  Keiko e faapea: “O le toʻatugā aupito telē mo aʻu o le ulaula tapaa. Sa ou taumafai e tuu i le tele o taimi ae na lē mafai.”

Atonu o loo iā te oe se toʻatugā e tai faapena e foliga mai ua lē mafai ona aveesea, o loo taofiofia ai lou agaʻigaʻi i luma. Po o le ā lava le toʻatugā, ia faamautinoa iā te oe faapea, e faatasi ai ma le fesoasoani a le Atua, e mafai lava ona foʻia.

Seʻi manatu i le fautuaga a Iesu i ona soo ina ua lē mafai ona latou tulia ese se temoni mai se tamāloa e maʻi māliu. Ina ua mafai ona faia e Iesu le mea na latou lē taulau ai, ona ia taʻu atu lea i ona soo e faapea: “Afai e tusa lo outou faatuatua ma le fua o le sinapi, e fai atu outou i lenei mauga, Alu atu ia oe i le la mea; ona alu atu ai lea; e leai foi se mea tou te le mafaia.” (Mataio 17:14-20 LF; Mareko 9:17-29) Ioe, o se faafitauli e ono foliga mai e pei o se mauga telē iā i tatou, e matuā itiiti lava ma faatauvaa i Lē na Foafoaina i tatou e ona le malosi uma lava.—Kenese 18:14; Mareko 10:27.

Ia Mātaulia Mea e Taofia ai Lou Agaʻigaʻi i Luma

A o leʻi oo ina mafai ona e foʻia ou toʻatugā, e tatau lava ona e mātaulia po o ā tonu lava na toʻatugā. E faapefea ona e faia lenā mea? I nisi o taimi e taʻu atu e se toeaina, po o le tagata o loo lua suʻesuʻeina faatasi le Tusi Paia, se mea iā te oe. Na i lo le teteeina o na fautuaga alofa, e tatau ona e lotomaulalo ma “faalogologo i mea e aʻoaʻo atu, ia outou popoto ai.” (Faataoto 8:33) I nisi o taimi, atonu e te iloaina ai ou vaivaiga e ala i lou suʻesuʻeina o le Tusi Paia. Ioe, o le Afioga a le Atua o loo ‘ola . . . ma o loo matuā galue foi.’ (Eperu 4:12) O le faitauina o le Tusi Paia ma lomiga faale-Tusi Paia e mafai ai ona faaalia ou mafaufauga, faalogona, faapea ma uunaʻiga loloto. E fesoasoani iā te oe lava e fuaina ai oe e tusa ai ma tapulaa maualuluga a Ieova. E faaalia ma mātaulia ai ia mea e taofia ai lou agaʻigaʻi i luma faaleagaga.—Iakopo 1:23-25.

Mo se faataʻitaʻiga, seʻi faapea sa iai i se tagata aʻoga o le Tusi Paia se masaniga o le mafaufau i mafaufauga lē mamā faivavale. Atonu e faigatā ona ia iloaina le tulaga lamatia o le faia faapea, ma faapea mai e na te lē o faia moni se mea sesē. Ae a o faagasolo lana suʻesuʻega, na ia tau ai i upu o loo i le Iakopo 1:14, 15: “A ua taitasi ma faaosoosoina, pe a tosina ma maileia i lona lava tuʻinanau. Pe a to le tuʻinanau ona fanau mai ai lea o le agasala; a matua le agasala ona fanaua mai ai lea o le oti.” O lea ua ia vaai nei i le faaleagaina ai o lona agaʻigaʻi i luma i le faaauau ai pea i lenei ala! E mafai faapefea ona ia aveesea lenei mea o loo taofiofia ai o ia?—Mareko 7:21-23.

Foʻiaina o Toʻatugā

Atonu e ono mafai ai e le tagata aʻoga ona faia ni suʻesuʻega faaopoopo o le Afioga a le Atua, faatasi ai ma se fesoasoani a se Kerisiano taʻumatuaina, i le faaaogāina o le Watch Tower Publications Index. * O le ulutala “Mafaufauga,” mo se faataʻitaʻiga, o loo faasino atu ai le tagata faitau i se aofaʻiga o mataupu ua uma ona lomia lea o loo gafa ma le foʻiaina o mafaufauga faivavale e lamatia ai. O nei mataupu o loo faamatilatila mai ai mau o le Tusi Paia e maua ai le fesoasoani, e pei o le Filipi 4:8, lea o loo faapea mai: “O mea uma ua moni, o mea uma ua taʻuleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foi o se isi amio lelei, po o se tasi mea e viia, ia outou manatunatu i ia lava mea.” Ioe, o mafaufauga lē mamā e tatau ona suia i mafaufauga e mamā, ma ati aʻe ai!

A o faagasolo lana saʻiliʻiliga loloto, o le a lē masalomia le mauaina ai e le tagata aʻoga o isi mataupu silisili faale-Tusi Paia lea o le a fesoasoani iā te ia e ʻalofia ai le faateteleina o lona faafitauli. Mo se faataʻitaʻiga, i le Faataoto 6:27 ma le Mataio 5:28 o loo lapataʻi ai faasaga i le fafagaina o le mafaufau o se tasi i mea e faagaeeina ai manaʻoga mo faiga faaleituaiga. Na tatalo le faisalamo e faapea: “Ia e liliueseina oʻu mata neʻi ou vaai i mea le aoga.” (Salamo 119:37) O le mea moni, o le tau ina faitau i nei mau o le Tusi Paia e lē lava. Na faapea mai le tagata poto: “E manatunatu le loto o lē amiotonu.” (Faataoto 15:28) O le manatunatu loloto e lē na o mea o loo poloaʻi mai ai le Atua ae faapea foʻi ma le māfuaaga ua ia poloaʻi mai ai, o le a oo ai ina maua e le tagata aʻoga le malamalamaga loloto o le atamai ma le fetuutuunaʻi o ala o Ieova.

 Mulimuli ane, o lē o loo tauivi e foʻia lenei tulaga o loo taofia ai lona agaʻigaʻi i luma, e tatau ona lē faatalatū i le saʻilia o le fesoasoani a Ieova. Auā foʻi, o le Atua, e na te silafia lelei lo tatou fausaga, e tatou te lē lelei atoatoa, ma na faia mai i le efuefu. (Salamo 103:14) O le tatalo e lē aunoa i le Atua mo le fesoasoani, faatasi ai ma taumafaiga maumauaʻi e ʻalofia le faalolololo ai pea i faanaunauga lē mamā faivavale, o le a oo ina fuaina mai ai iʻuga manaʻomia—o se lotofuatiaifo mamā e lē o faalavelavea.—Eperu 9:14.

Aua le Fiu

Po o le ā lava le faafitauli o loo e tauivi i ai, ia manatua e ono mafai lava ona toe tupu i se isi taimi. Pe afai e tupu lenā mea, e masani lava ona lagonaina le fiu ma le lē fiafia. Peitaʻi, ia manatua upu o loo i le Kalatia 6:9 (NW ): “O lea, aua tatou te faapalapala i le faia o le mea lelei, auā, i le taimi tatau, o le a tatou selesele mai ai pe afai tatou te lē faavaivai.” O auauna tuutoina a le Atua e pei o Tavita ma Peteru na oo iā i laʻua ni tulaga o le faalumaina ona o lo la lē taulau. Ae e la te leʻi lafoaʻia ai o la tiute. Na la taliaina ma le lotomaulalo ia fautuaga, ma faia suiga manaʻomia, ma la faamaoniaina o i laʻua o ni auauna iloga a le Atua. (Faataoto 24:16) E ui lava i mea sesē na faia e Tavita, ae na taʻua o ia e Ieova “o le tagata e tusa ma loʻu nei loto, na te faia o mea uma lava ou te manao i ai.” (Galuega 13:22) Na faapena foʻi ona toe faaleleia le tulaga o Peteru na sesē ai ma avea ma poutū o le faapotopotoga Kerisiano.

E faapena foʻi se taulau manuia i le foʻiaina o toʻatugā o loo olioli ai le toʻatele i aso nei. O Yutaka, e pei ona taʻua i le amataga, na ia taliaina le ofo i le faia o se suʻesuʻega faale-Tusi Paia. Na ia faamatalaina e faapea: “O le lagolagosua ma le faamanuiaga a Ieova i laasaga taʻitasi uma e agaʻigaʻi ai i luma na ou faia, na fesoasoani iā te aʻu e foʻia ai loʻu faafitauli i taaloga faitupe. Ua matuā tele loʻu olioli i le tofo i le moni o upu a Iesu—faapea o le faatuatua, e oo lava i ‘mauga’ e mafai ona siitia ai.” Na iʻu ina avea Yutaka ma auauna o le faiva i le faapotopotoga.

Ae faapefea Keiko, lea na iai lana masaniga o le taumafa tapaa? O le tuafafine lea na suʻesuʻe ma Keiko na ia fautuaina o ia e faitau i mataupu eseese o le Ala Mai! ia e faatatau i le lolo atu i le ulaula tapaa. Na oo lava foʻi ina faapipii e Keiko upu o loo i le 2 Korinito 7:1 i totonu o lana taavale, e avea o se faamanatuga mo ia ina ia tausia ai pea lona tulaga mamā i fofoga o Ieova. Peitaʻi, sa lē mafai lava ona ia tuua ai le taumafa tapaa. “Sa ou matuā ita iā te aʻu lava,” o le faamatalaga lea a Keiko. “O lea na ou fesili ai iā te aʻu lava po o le ā moni lava o loo oʻu manaʻo i ai—pe ou te manaʻo e auauna iā Ieova po o Satani?” O le taimi lava na ia filifili ai faapea o Ieova o loo ia manaʻo e auauna i ai, na ia tatalo faatauanau ai loa mo se fesoasoani. “I loʻu maofa tele,” o lana tala lea, “sa mafai ona ou taofia le ulaula tapaa e aunoa ma le mafatia tele ai. Sa na ona ou faanoanoa i le leʻi vave faia o saʻu gaoioiga.”

E mafai foʻi ona e taulau manuia i le foʻiaina o toʻatugā i lou agaʻigaʻi i luma. O le tele lava e faaōgatusa atu ai ou manatu, faanaunauga, upu, ma gaoioiga i tapulaa a le Tusi Paia, o le tele foʻi lenā o le a e mauaina ai se lagona o lou faaaloalogia o oe lava faatasi ai ma lou mautinoa. O le a faafouina ma faalaeiauina ai ou uso ma tuafāfine faaleagaga, faapea ai ma tagata o lou aiga, pe a latou auaufaatasi ma oe. O le mea e sili ona tāua i mea uma, o le a faaloloto ai lau faiā ma Ieova le Atua. Na ia folafola o le a ia ‘aveeseina mea e tausuai ai i le ala o lona nuu’ pe a sosola ese mai le pulea e Satani. (Isaia 57:14) Ae e mafai foʻi ona faamautinoaina oe e faapea, afai e te faia ni taumafaiga e aveesea ma foʻia ai toʻatugā i lou agaʻigaʻi i luma faaleagaga, o le a faamanuia tele Ieova iā te oe.

[Faamatalaga pito i lalo]

[Ata i le itulau 28]

Na folafola e Iesu faapea o le faatuatua, e mafai ona aveesea ai toʻatugā e pei o ni mauga

[Ata i le itulau 30]

O le faitauina o le Tusi Paia e faamalosia ai a tatou taumafaiga i le foʻiaina o vaivaiga faaleagaga