Lau Aiā Tatau e Talitonu Ai

Atonu o loo e faapelepeleina lau aiā tatau e talitonu ai po o le ā lava le mea o loo e manaʻo e talitonu i ai. O loo faapena foʻi lagona o loo iai i le toetoe lava o tagata uma. O le faaaogāina o lenei aiā tatau, ua faia ai e tagata e ono piliona o loo aināina le lalolagi ni talitonuga eseese e māofa ai. E pei lava o le eseese i lanu, le tino mai, lagona, tofo, manogi, ma leo o loo tatou maua i le foafoaga, o le eseese o talitonuga e masani ona faaopoopo atu i mea e fiafia ai, e faagaeetia ai, ma olioli ai i le olaga. O le mea moni, o na eseesega e mafai ona faaopoopo atu i le faagaeetia ma le fiafiaga o le olaga.—Salamo 104:24.

PEITAʻI o loo iai le manaʻoga ina ia faaeteete. O nisi o talitonuga e lē gata ina ese ae e mataʻutia foʻi. I le amatamataga o le uluaʻi senituri, mo se faataʻitaʻiga, na oo ai ina talitonu nisi o tagata e faapea o tagata Siū ma tagata Freemason na iai sa latou fuafuaga e “faaleagaina le tuputupu aʻe o le Faa-Kerisiano ma faatūina se malo faalelalolagi i lalo o le la pulega soofaatasi.” O se tasi o māfuaaga o lenei talitonuga ona o se sāvali e faatautee ai i tagata Siū na faaulutalaina Protocols of the Learned Elders of Zion. Na faapea mai lenei sāvali, o le fuafuaga na aofia ai le lagolagoina o le soona faatetelē o lafoga, le faaauilumaina o fausaga o meatau, le timaʻia o le puleaina o le tele o pisinisi e se kamupani se tasi ina ia ‘vave faatamaʻia ai le tamaoaiga o Nuuese.’ O ia moliaga na aofia ai le faia faatogafiti o faiga tauaʻoaʻoga ina ia ‘suia ai tagata o Nuuese e pei o meaola e lē iloa faaaogā o latou mafaufau,’ ua oo lava i le faia o ala o nofoaafi i lalo o le eleele ina ia fesootaʻi atu ai i aai o loo iai le pulega faalemalo, ina ia faigofie ai e taʻitaʻi Siū ona ‘manumalo i so o se tasi e faasagatau ane e ala i le tafiesea o i latou.’

O le mea moni lava, o pepelo uma na mea—na fuafua e faagaeeina ai lagona tetee faasaga i tagata Siū. Na taʻua e Mark Jones o le British Museum e faapea: ‘O nei talafatu e lē faavaea, na salalau mai i Rusia,’ o i inā na muaʻi aliaʻe mai ai i se mataupu i se nusipepa i le 1903. Na oo atu i le nusipepa o le Times a Lonetona iā Me 8, 1920. E sili atu ma le tausaga mulimuli ane ai, na faaalia ai e le Times ia na faamatalaga tusitusia o ni faamatalaga pepelo. Ae i lena lava taimi, ua uma ona salalau atu le faaleagaina sa faia. ‘O pepelo faapenei,’ e pei ona taʻua e Jones, ‘e faigatā tele ona natia.’ O le taimi lava e taliaina ai e tagata na pepelo, e aumaia ai ni talitonuga e oso ai le lē malie tele, e ogoogo, ma e mataʻutia—e masani lava ona oo ai i iʻuga malaia, e pei ona faaalia ai e talafaasolopito o le 20 senituri.—Faataoto 6:16-19.

Le Eseesega o Talitonuga ma Mea Moni

O le mea moni, e lē tau manaʻomia ni pepelo e faia ma le loto i ai ia e faatupu aʻe ai ia talitonuga sesē.  E iai taimi, e sesē ai lo tatou malamalamaga i mea. Pe ua lē toʻatele ea ni tagata ua vave ona maliliu ona o le faia o se mea na latou talitonu e saʻo? E lē gata i lena, e masani lava ona tatou talitonu i se mea ona e tatou te mananaʻo e talitonu i ai. Na taʻua e se tasi o polofesa e faapea, e oo lava i saienitisi e “masani lava ona latou matuā faatāuaina o latou lava manatu ma faaiʻuga.” O o latou talitonuga ua lē mafai ai ona latou fuafuaina mea e aunoa ma le faaituʻau. Ia atonu e latou te faaalu ai le olaga atoa i taumafaiga lē aogā e lagolagoina ai talitonuga sesē.—Ieremia 17:9.

Na tutupu foʻi mea faapena i talitonuga faalotu—lea o loo tele ai feteenaʻiga o manatu. (1 Timoteo 4:1; 2 Timoteo 4:3, 4) Sa malosi tele le faatuatua o se tasi tamāloa i le Atua. Ae na faapea mai le isi, o lea tamāloa e na ona “faatuatua i le Atua ae aunoa ma ni faamaoniga e lagolagoina ai lena faatuatua.” E tausia pea e se tasi le manatu e faapea, e iai sou agaga e ola pea pe a mavae le oti. E talitonu le isi e faapea, pe a e oti ua e lē toe ola, ua matuā lē toe iai lava. E manino mai, o talitonuga e feteenaʻi faapenei e lē mafai ona saʻo uma. O lea la, pe lē o se ala atamai ea, le faamautinoaina faapea, o mea o loo e talitonu i ai e moni ma e lē na o ni mea o loo e manaʻo e te talitonu i ai? (Faataoto 1:5) E mafai faapefea ona e faia lena mea? O le mataupu o loo sosoo mai o le a iloiloina ai lea mataupu.

[Ata i le itulau 3]

O le mataupu i le 1921 o loo faaalialia ai “Protocols of the Learned Elders of Zion”