O le ā le Faavae o Mea o Loo e Talitonu i Ai?

O le talitonu ua faamatalaina faapea o “le taliaina o mea e saʻo, moʻi, po o le moni.” O le Universal Declaration of Human Rights a Malo Aufaatasi ua puipuia ai “aiā tatau mo le faaalia saʻoloto o manatu, le lotofuatiaifo ma lotu a tagata uma taʻitoʻatasi.” O lenei aiā tatau e aofia ai le saʻolotoga e “suia ai lana lotu po o talitonuga” pe afai e manaʻo o ia e faia faapea.

AE, AISEĀ la, o le a manaʻo ai se tasi e suia lana lotu po o talitonuga? O le faaupuga masani lava, “O loo iai oʻu lava talitonuga, ma ua ou fiafia lava i ai.” E toʻatele e iai le lagona e faapea, e oo lava i talitonuga sesē e itiiti lava sina āfaina e oo ai i so o se tasi. Mo se faataʻitaʻiga, o se tasi e talitonu faapea o le lalolagi e mafolafola, e ono lē āfaina ai o ia po o se isi foʻi. “E tatau lava ona tatou ioe e lē tutusa uma ni manatu ma e leai foʻi se mea o le a talanoaina ai,” o faamatalaga na a nisi tagata. Ae pe e atamai pea lena manatu? Po ua lava ai le na ona lē ioe o se fomaʻi i lana aumea fomaʻi, pe afai o loo faaauau pea e lana aumea ona talitonu e mafai ona ia alu atu saʻo lava mai le taulimaina o tino oti i le nofoaga lea e tuu ai (morgue), ma vaai ia tagata mamaʻi i potu o loo taofia ai i le falemaʻi?

Pe a oo mai i lotu, ua vaaia i talafaasolopito le faapogaia e talitonuga sesē o le tele o le leaga. Seʻi manatu i mea mataʻutia na oo i ai ina ua “faaoso e Kerisiano soona maelega valea faiga sauā e leai se alofa” a o faagasolo le taimi o Taua Paia Faalotu i Tausaga Tutotonu (Holy Crusades of the Middle Ages). Po o le mafaufau foʻi i “Kerisiano” o loo tau i aso nei i se taua faaleatunuu ua “pei lava i latou o tagata tau o tausaga tutotonu na iai igoa o sagato i ʻau o a latou pelu, ma ata o le Taupou (o Maria) na faamauina i muli o a latou  fana.” O nei tagata lolotu soona maelega valea uma na talitonu faapea e saʻo i latou. Peitaʻi, e manino mai i nei tulaga ma isi foʻi tauiviga ma taua faalotu, na iai se mea na matuā sesē lava.

Aiseā ua tele ai le fenuminumiaʻi ma feteenaʻiga? O le tali a le Tusi Paia o loo ‘faaseseina le lalolagi uma’ e Satani le Tiapolo. (Faaaliga 12:9; 2 Korinito 4:4; 11:3) Na lapataʻi mai le aposetolo o Paulo e faapea o le toʻatele lava o tagata lotu o le a “faaumatia” auā o le a faasesēina i latou e Satani, o lē o le a “faia vavega ma mea ofoofogia ua fafau aʻe e faaseseina ai.” O i latou na, na taʻua e Paulo, o le a “pupuni o latou mafaufau i le alofa mo le upu moni lea na ono faasaoina ai i latou” ma ‘faaseseina ai i le talitonu i mea pepelo’. (2 Tesalonia 2:9-12, The New Testament, na tusia e William Barclay) E faapefea ona e faaitiitia se avanoa e ono talitonu ai i se pepelo? O le mea moni, o le ā le faavae ua e talitonu ai i le auala o loo e talitonu ai?

Po o ni Talitonuga na Ola Aʻe Ai?

Atonu na e ola aʻe i talitonuga a lou aiga. Atonu o se mea lelei tele lena. E finagalo le Atua e aʻoaʻoina e mātua a latou fanau. (Teuteronome 6:4-9; 11:18-21) O le talavou o Timoteo, mo se faataʻitaʻiga, na ia maua aogā mai le faalogo i lona tinā ma le tinā o lona tinā. (2 Timoteo 1:5; 3:14, 15) O loo faalaeiauina e le Tusi Paia le faaaloalo mo mea o loo talitonu i ai mātua. (Faataoto 1:8; Efeso 6:1) Ae pe na manatu ea Lē na Foafoaina oe ina ia e talitonu i mea ona o loo talitonu i ai ou mātua? O le pipii mau atu ma le lē manatunatu i mea na talitonu i ai ma faia e augatupulaga ua tuanaʻi, o le mea moni lava, e mafai ona lamatia ai.—Salamo 78:8; Amosa 2:4.

O le fafine Samaria na feiloaʻi ma Iesu Keriso na ola aʻe e talitonu i lana lava lotu Samaria. (Ioane 4:20) Na faaaloalogia e Iesu le saʻolotoga o le fafine e filifili ai i le mea na ia manaʻo e talitonu i ai, ae na ia faasino foʻi iā te ia: “Tou te tapuai ma le le iloa.” O le mea moni, o le tele o ona talitonuga faalotu, sa sesē, ma na taʻu atu e Iesu iā te ia faapea e tatau ona ia faia ni suiga i ona talitonuga pe a fia tapuaʻi i le auala e taliaina e le Atua—“i le agaga ma le faamaoni [“upu moni,” NW ].” Na i lo le pipii mau atu i mea e mautinoa o talitonuga faapelepele, o lea fafine faapea ai ma isi e pei foʻi o ia, o le a iai se taimi, e tatau ai ona “anaana . . . i le faatuatua,” na faaali mai e ala iā Iesu Keriso.—Ioane 4:21-24, 39-41; Galuega 6:7.

Pe na Aʻoaʻoina e Talitonu i Ai?

O le toʻatele lava o faiaʻoga ma tagata atamamai i mataupu faapitoa, e tatau i ai le matuā faaaloalogia. Ae peitaʻi, ua tumu le talafaasolopito i faataʻitaʻiga o faiaʻoga taʻutaʻua na matuā sesē lava. Mo se faataʻitaʻiga, e tusa ai ma tusi e lua i mea tau i le faasaienisi na tusia e le faifilosofia Eleni o Aristotle, na taʻua ai e le tusitala o talafaasolopito o Bertrand Russell e faapea “e toetoe lava a leai se fuaiupu o fuaiupu uma o i na tusi e lua e mafai ona taliaina i le malamalamaga o le faasaienisi faaonaponei.” E oo lava i tagata atamamai faapitoa i aso nei e masani lava ona faia ni faaiʻuga e matuā sesē lava. Na taʻutino ma le mautinoa e le saienitisi Peretania o Lord Kelvin i le 1895 e faapea: “E matuā lē mafai lava ona lele se masini e mamafa atu na i lo le ʻea.” O lea la, o se tagata atamai, e lē talitonu tauaso faapea e saʻo lena mea ona ua faapea mai nisi o faiaʻoga atamamai e saʻo.—Salamo 146:3.

O le faaeteetega lava lena e tasi e iai pe a oo i aʻoaʻoga faalotu. Sa aʻoaʻoina lelei le aposetolo o Paulo e lona faiaʻoga faalelotu ma sa matuā “naunau i uputuu a [ona] tamā.” Peitaʻi o lona maelega i talitonuga faaleaganuu a ona tuaa, na oo ai faafitauli iā te ia. Na oo ina taʻitaʻia ai o ia e “matuā saua lava i le ekalesia a le Atua, ma faataugā i ai.” (Kalatia 1:13, 14; Ioane 16:2, 3) Ae sili atu ona leaga, mo se taimi umi lava, sa faaauau e Paulo ona “aa i tui,” ma teena taaʻiga ia na ono taʻitaʻia ai o ia e talitonu iā Iesu Keriso. Sa manaʻomia se matuā faalaa ane a Iesu lava ia, e uunaʻia ai Paulo e toe fetuutuunaʻi ona talitonuga.—Galuega 9:1-6; 26:14.

Po ua Taaʻina e Ala i le ʻAufaasalalau?

Atonu ua matuā taaʻina lava ou talitonuga e ala i le ʻaufaasalalau. Ua fiafia le toʻatele o tagata ona o loo iai le saʻolotoga e faaali ai manatu e ala i faasalalauga, ua mafai ai ona latou mauaina ni faamatalaga e ono aogā. Peitaʻi, o loo iai uunaʻiga malolosi ia e mafai ma e masani lava ona faasesēina ai le ʻaufaasalalau. O mea o loo masani  ona aumai ai, o faamatalaga faaʻauʻau ia e mafai ona faasesēina ai ou mafaufauga.

E lē gata i lea, ina ia logoleleia po o le faatosina mai o se ʻaufaalogologo e toʻatele, e mātele atu lava le ʻaufaasalalau i le avatuina faalauaʻitele o mea e faagaee ai le naunau fiailoa ma mea e lē masani ai. O mea sa faigatā lava ona taʻua po o le faalogo foʻi i ai i le lautele i nai tausaga ua tuanaʻi atu ua oo ina taatele i aso nei. E ui lava o loo faifai mālie ona tupu, ae ua osofaʻia ma faaleagaina ia tapulaa tauamio ua taliaina. O mafaufauga o tagata ua faifai mālie lava ona faasesēina. Ua amata ona latou talitonu faapea “ua lelei le mea leaga, a e leaga le mea lelei.”—Isaia 5:20; 1 Korinito 6:9, 10.

Saʻilia o se Faavae Mautū mo Talitonuga

O le fafau aʻe i manatu ma filosofia faaletagata, ua pei o le fausia aʻe o se fale i luga o le oneone. (Mataio 7:26; 1 Korinito 1:19, 20) O lea, o le ā e mafai ona e faavae ma le mautinoa aʻe ai ou talitonuga? Ona ua tuuina e le Atua iā te oe le tomai faalemafaufau e suʻesuʻeina ai le lalolagi o loo siʻomia ai oe ma e tuufesili ai e uiga i mataupu faaleagaga, pe e lē saʻo ea la le faapea o loo ia saunia foʻi le auala e mauaina ai tali saʻo i au fesili? (1 Ioane 5:20) Ioe, e mautinoa lava o le a ia faia faapea! E mafai la faapefea ona e faamautinoaina mea ua saʻo, moʻi po o le moni, i mataupu e faatatau i tapuaʻiga? E leai so matou faatalatū e faapea atu o le Afioga a le Atua, le Tusi Paia, ua aumaia ai le faavae e tasi, mo le faia o lenei mea.—Ioane 17:17; 2 Timoteo 3:16, 17.

“Ae faatali,” o le a faapea mai se isi, “pe e lē o i latou lava na o loo iai le Tusi Paia o loo māfua ai le tele o feteenaʻiga ma fenuminumiaʻiga i mataupu faalelalolagi?” Ioe, e moni o taʻitaʻi lotu ia o loo faapea mai o loo mulimuli atu i le Tusi Paia ae ua latou faia le tele o manatu e fenuminumiaʻi ma feteenaʻi ai. O le mea moni lava, ona e lē o faavaeina o latou talitonuga i le Tusi Paia. Ua faamatalaina i latou e le aposetolo o Peteru o “perofeta pepelo” ma “aʻoaʻo pepelo” e latou te faatupuina “vaevaega e fano ai.” O iʻuga o a latou gaoioiga, e pei ona taʻua e Peteru, “e upuleagaina ai le ala o le upu moni.” (2 Peteru 2:1, 2) Ae na tusi Peteru, “o loo ia te i tatou foi le upu o le valoaga e sili lona mausali, e lelei ona outou naunau i ai, e pei o se molī e mumū i le mea pogisa.”—2 Peteru 1:19; Salamo 119:105.

Ua faalaeiauina i tatou e le Tusi Paia e faamautinoa o tatou talitonuga i mea o loo ia aʻoaʻoina mai. (1 Ioane 4:1) O le faitau miliona o le ʻaufaitau o lenei mekasini e mafai ona latou faamaoniaina o le faia faapea, ua faaopoopo atu i le iai o se fuafuaga ma le mautū ai o o latou olaga. O lea ia pei o tagata Perea o ē na iai se tofā faatamalii. ‘Ia saili i Tusi i lea aso ma lea aso’ a o e leʻi filifilia mea e te talitonu i ai. (Galuega 17:11) E fiafia Molimau a Ieova e fesoasoani iā te oe i le faia o lea tulaga. O le mea moni, o lau lava filifiliga po o le ā e te manaʻo e talitonu i ai. Peitaʻi, o le ala o le atamai le faamautinoa o loo faatulaga ou talitonuga, e lē i le poto ma faanaunauga faaletagata, ae na i lo lenā, e ala i Upu moni ua faaalia mai e le Atua.—1 Tesalonia 2:13; 5:21.

[Ata i le itulau 6]

E mafai ona e faavae ma le mautinoa ou talitonuga i le Tusi Paia