Sili Ona Anagatā i lo o le Auro Lelei

E SILI atu ona saʻilia e tagata le auro ona o le matagofie ma le anagatā. E sili ona naunau i ai ona o le mea moni, e foliga mai e tumau pea lona iila ma e lē faaleagaina e le pefu po o so o se isi lava mea faapena. E māfua lenei mea ona e lē faaleagaina le auro pe a susū i le vai, aafia i le okesene, le sulfur ma toetoe lava o mea uma. O le tele o mea e fai i le auro na maua i vaa na gogoto ma isi lava nofoaga, o loo tumau pea le iila e ui ina ua mavae le faitau selau o tausaga.

Ae peitaʻi, o se mea e ao ona mātauina, ona o loo taʻua i le Tusi Paia se mea e sili atu ona anagatā ma “e silisili ona aoga i lo o le auro e faaumatia, e ui lava ina tofotofoina i le afi.” (1 Peteru 1:7) O le auro e “faamaonia,” pe faamamāina i le afi ma isi faiga, ae e mafai lava ona tumau i le 99.9 pasene le tulaga lelei. Peitaʻi, e oo lava i le auro ua faamamāina, e mafai ona faaleagaina, pe liusuavai pe a faaaogā le aseti (acid) e taʻua o le aqua regia (royal water), o se paluga o vaega e tolu o le aseti o le hydrochloric ma le vaega e tasi o le aseti o le nitric. I lea, e saʻo ai le Tusi Paia e tusa ai ma suʻesuʻega faasaienisi i le taʻua faapea o le ‘auro e faaumatia.’

I se faatusatusaga, o le faatuatua o Kerisiano moni, ‘e ola ai le agaga.’ (Eperu 10:39) E mafai e tagata ona fasiotia se tagata e malosi le faatuatua, e pei ona latou faia iā Iesu Keriso. Ae ua tuuina atu lenei folafolaga iā i latou e iai le faatuatua moni: “Ia e faamaoni seia oo i le oti, ona ou avatu ai lea ia te oe le pale o le ola.” (Faaaliga 2:10) O i latou ua maliliu i le faamaoni o loo manatua pea e le Atua, ma o le a ia toe faatutūina mai i latou. (Ioane 5:28, 29) E lē mafai e ni auro ona faataunuuina lenā mea. E tusa ai ma lenei mea, e sili atu ona matuā tāua le faatuatua na i lo o le auro. Ae peitaʻi, ina ia maua e le faatuatua lenei uiga silisili, e tatau foʻi ona faamaonia pe tofotofoina. O le mea moni, o le uiga ‘o le tofotofoina o le faatuatua’ na fai ma ai Peteru, e sili atu ona tāua i lo o le auro. E fiafia Molimau a Ieova e fesoasoani iā te oe e suʻesuʻeina le Tusi Paia ina ia mafai ai ona e atiina aʻe ma tausisia se faatuatua malosi i le Atua moni o Ieova, ma lona Alo o Iesu Keriso. O lenei mea, e tusa ai ma le fetalaiga a Iesu, ‘o le ola e faavavau’ lea.—Ioane 17:3.