Lipoti a Ē Faalauiloa le Malo

Ua Soloiesea e le Atua Ona Loimata

O TAGATA o ē ua suia ala o o latou olaga ina ia ōgatusa ma tulafono ma mataupu silisili a Ieova, ua matuā faamanuiaina lava. E ui lava o le faia o suiga manaʻomia e lē faigofie i taimi uma, ae o loo maua pea le fesoasoani ma faalaeiauga. (Salamo 84:11) Ua faaalia mai lenei mea i se mea na tupu i Asia i Saute i Sasaʻe.

A o auai i se faiga mālōlōga, na talanoa atu ai se Molimau mai Falani i se tagata e ona se faleoloa e igoa iā Kim, * e uiga i le fuafuaga a Ieova mo le lalolagi. Sa ia tuuina ai foʻi iā Kim se kopi o le tusi, E Mafai Ona E Ola e Faavavau i Parataiso i le Lalolagi. I le vaavaai i le tusi, na tau atu ai le vaai a Kim i upu e faapea, “e sōloiesea foi e le Atua loimata uma i o latou mata.” (Faaaliga 21:4) Ua taʻua e Kim e faapea: “Na matuā faagaeetia lava aʻu i lenei fuaiupu. I le vaai mai iā te aʻu o ʻataʻata ma talanoa i le faleoloa i le aso atoa, e leai se isi sa mafai ona iloa maia, o le taimi lava ou te taunuu ai i le aiga i le afiafi, sa ou tagi seʻia oo ina ou moe.” I le faailoaina mai o le pogai o lona faanoanoa, fai mai a ia: “E 18 tausaga na ma nonofo ai ma se tamāloa ma sa ou matuā lē fiafia ona sa musu o ia ma te faaipoipo. Sa ou manaʻo e faamuta lenei ituaiga o olaga, ae ona o le umi tele ona ma nonofo, sa lē mafai ai ona ou maua le lototele e faia ai faapea.”

I sina taimi mulimuli ane, na talia ai e Kim se suʻesuʻega faale-Tusi Paia ma se tasi o Molimau a Ieova e igoa iā Linh. Ua faapea mai Kim: “Sa ou naunau lava e faatino aʻoaʻoga a le Tusi Paia. Mo se faaaʻoaʻoga, ou te leʻi toe tapuaʻi atu i oʻu tuaa, e ui lava o lenei mea na iʻu ai i teteega mai loʻu aiga. E lē gata i lea, sa ou taumafai e faamaonia faaletulafono la ma ulugalii, ae sa musu laʻu paaga e faia faapea. I le faagasologa o lenei taimi faigatā, sa faaauau pea ona aauina mai e le Molimau mai Falani ia lomiga faale-Tusi Paia iā te aʻu, ma sa avea Linh o se faamalosiau tele iā te aʻu. O le onosai ma le lagolagosua alofa a nei uso, na fesoasoani iā te aʻu e onosai ai seʻia oo i le taimi na ou iloa ai le ituaiga moni o tagata sa iai laʻu paaga. Sa ou iloa ai e toʻa 5 ana ‘avā’ na iai ma se fanau e toʻa 25! O lenei mea na aumaia ai iā te aʻu le lototele e tuua ai o ia.

“O le tuua o se fale telē ma le manaia ae nofo i se tamaʻi fale, sa lē faigofie. E lē gata i lea, na uunaʻi malosi mai laʻu paaga muamua ina ia ou foʻi atu ma te toe nonofo, na oo lava ina ia faamataʻuina aʻu e faapea, afai ou te musu o le a ia faaaogā le aseti (acid) e faamatagā ai oʻu foliga. Ona o le fesoasoani a Ieova, sa mafai ai ona ou faia le mea saʻo.” Sa faaauau ona agaʻigaʻi i luma ia Kim ma iʻu ai ina papatisoina iā Aperila 1998. E lē gata i lea, sa amata foʻi e ona uso e toʻalua ma lana tama tama talavou ona suʻesuʻeina le Tusi Paia ma Molimau a Ieova.

Ua faapea mai Kim: “Sa masani lava ona ou mafaufau e faapea, e matuā leai lava se faamoemoe i loʻu olaga. Ae peitaʻi, i aso nei, ua ou fiafia ma ua ou lē toe tagi ai i pō. Ua soloiesea e Ieova loimata i oʻu mata.”

[Faamatalaga pito i lalo]