Susulu Atu e Pei o Mea e Faamalamalama Aʻi i le Aai o le Malamalama

Fluctuat nec mergitur, po o le “Ua lutia o ia i peau ae lē goto,” o le alagāupu a le aai o Pale.

I LE pei o se vaa, i le silia ma le 2,000 tausaga ua mavae, ua faafetaiaʻia ai pea e aunoa ma le magoto e Pale le lē mafaitaulia o osofaʻiga mai isi atunuu faapea fouvalega i totonu o Pale lava ia. I le taimi nei, ua avea ai Pale o se tasi o aai e aupito sili ona matagofie i le lalolagi, ua viiviia e tagata ona o le matuā matagofie o fausaga o fale, le lauolaola o togālaau i auala, faapea falemataaga taʻutaʻua i le lalolagi. Ua manatu i ai nisi o se nofoaga ua masani ai le ʻaufatusolo, le ʻautusiata, ma le ʻaufaifilosofia. E fiafia isi i meaʻai manogi ma le susua ma e mataʻina foʻi i le gaosiga o lavalava e taʻutaʻua lo latou matagofie.

E tusa ai ma le talafaasolopito, sa oo ina avea Pale ma nofoaga malosi o faiga faa-Katoliko. Ona o lana vaega tāua e ala i se vaega sa faaauilumaina taualumaga e faaaogā i ai le mafaufau i le luaselau tausaga ua mavae i Europa, lea na taʻua o le Faamalamalamaina (Enlightenment), na oo ai ina taʻua Pale o le Aai o le Malamalama (City of Light). I aso nei, pe faia ma le iloa pe e leai foʻi, ua sili atu ona taaʻina le toʻatele o tagata Pale i filosofia sa aʻoaʻoina i tuā i lenā vaitaimi.

Ae peitaʻi, e leʻi faamalamalamaina e le atamai faaletagata olaga o tagata e pei ona sa faatalitalia. O le toʻatele o tagata i aso nei o loo saʻili atu i se isi puna mo le faamalamalamaina. Ua tusa nei ma le 90 tausaga o ‘susulu atu Molimau a Ieova e faapei o mea e faamalamalama aʻi’ i Pale. (Filipi 2:15, LF) I  le pei o ni tautai matapalapala, sa latou fetuutuunaʻi ai i taimi uma lava ona o le fesuisuiaʻi pea o le tai ma mea e tutupu ina ia mafai ona aumaia, e pei o loo faasao mai i totonu o se vaa, “mea ua manaʻomia e nuu uma.”—Hakai 2:7.

O se Aai ua Avea ma Luʻi

I tuā i le 1850, na aināina ai Pale e tagata e 600,000. Ae o le faitau aofaʻi i le taimi nei, e aofia ai ma nuu tūlata i le aai, ua sili atu i le iva miliona. O lea faatuputeleina ua māfua ai ona avea Pale ma aai o Falani e aupito sili ona toʻatele ia tagata mai atunuu eseese o loo nonofo ai. Ua avea ma nofoaga tutotonu o aʻoaʻoga maualuluga i le lalolagi, e iai se tasi o iunivesite aupito sili ona leva i le lalolagi, ma ua avea ma nofoaga o le tusa ma le 250,000 tagata aʻoga. O nisi o pitonuu o Pale, e iai atufalega maualuluga, ua iloga i le tele o tagata amio lē taupulea ma le leai o ni galuega, ua faailoa mai ai le tasi itu e matuā lē lelei ai Pale. E lē taumatea, e manaʻomia le tomai ma le fetuutuunaʻi o Molimau a Ieova i le moliooina atu o le tala lelei i se auala e talia ai e tagata uma.—1 Timoteo 4:10.

E sili atu i le 20 miliona turisi e asiasi atu i Pale i tausaga taʻitasi. Atonu e latou te feʻaʻei fiafia atu i luga o le olo o Eiffel, savalivali i auvai o le vaitafe o Seine, po o le nofonofo ai lava i faleʻaiga eseese i  tafatafā ala ma olioli ai i lea siʻomaga. Ae peitaʻi, o le faagasologa o le olaga i aso faisoo mo tagata i Pale, e matuā pisi lava ma televave. Ua faamatalaina e Christian, o se faifeʻau faataimi atoa e faapea: “E faanatinati tagata. Pe a mānava galuega, e latou te lagona le vaivai.” E lē faigofie foʻi la ona talanoa atu i nei tagata pisi.

O se tasi o faafitauli aupito sili ona telē o loo fesagaʻia ma Molimau a Ieova i Pale, o le faafesootaʻia lea o tagata i o latou aiga. O nisi fale e faaaogā ai ualesi e fesootaʻi ai. Ona o le faatuputeleina o le solitulafono, o lea, e masani ai ona iai ia masini faailoilo i alātatala o falemautotogi, ma lē mafai ai ona ulufale i ai. E lē taumatea o lenei tulaga, ua faamatala manino mai ai le mea moni e faapea, i nisi vaipanoa, o loo iai se faatatauga e na o le toʻa 1 le Molimau e talaʻi atu i le 1,400 tagata. O lea, ua faateleina ai le molimau atu i telefoni ma le molimau lē fuafuaina. Po ua mafai ea e Molimau a Ieova ona ‘faasusulu atu lo latou malamalama’ i nisi auala?—Mataio 5:16.

E anoanoaʻi avanoa ma nofoaga e mafai ona avatu ai se molimau lē fuafuaina. Sa vaaia e Martine se fafine o tūtū i se nofoaga faatali pasi o lē na foliga mai o loo mafatia lona mafaufau. E leʻi leva lava talu ona maliu le tama teine e toʻatasi a si fafine. Na tuu i ai e Martine se polosiua o loo iai faamāfanafanaga a le Tusi Paia e uiga i le faamoemoe o le toetū. Na mavae ni nai masina e leʻi toe feiloaʻi lava i laʻua. Ae ina ua toe feiloaʻi Martine ma lea tamaʻitaʻi, sa mafai ai loa ona la amataina se suʻesuʻega faale-Tusi Paia. E ui i teeteega mai lana tane, ae na avea lava le fafine ma Molimau.

Fua Mai ia Molimau Lē Fuafuaina

O auala tau i femalagaaʻiga a Pale, o se tasi lea o auaunaga e aupito sili ona lelei lana tautua i le lalolagi. O le auala taʻutaʻua o femalagaaʻiga le Metro, e mafai ona aveina ai pasese e 5,000,000 i aso faisoo. O le nofoaga tutotonu e faatali ai nofoaafi i lalo o le eleele i Pale, o Châtelet-Les-Halles, ua taʻua e faapea o se nofoaga o femalagaaʻiga e sili ona telē ma pisi i le lalolagi. E anoanoaʻi avanoa e mafai ona feiloaʻi ai ma tagata i inā. O Alexandra e masani ona faimalaga atu i le galuega i aso taʻitasi i le Metro. I se tasi aso, sa talatalanoa ai o ia ma se tama talavou o lē sa maʻi i se maʻi e mafai ona oti ai o le lukimi. Na ave i ai e Alexandra se sāvali e uiga i le faamoemoe i le Parataiso. Na faia ai lava i inā i lenā taimi se talanoaga faale-Tusi Paia i aso taʻitasi mo le ono vaiaso. Ona oo lea i le tasi aso, ua lē toe alu ane le tamāloa. E leʻi umi lava mulimuli ane, ae telefoni atu lana avā iā Alexandra ma fai atu iā te ia ina ia alu atu i le falemaʻi ona sa iai lona toʻalua i se tulaga faalētonu. O le mea e faanoanoa ai, ona sa fai lava si tuai ona taunuu atu o Alexandra. Ina ua mavae le maliu o le tamāloa, ona siitia atu lea o lana avā i Bordeaux, i saute i sisifo o Falani, o i inā na asiasi atu ai iā te ia ni Molimau. Ina ua mavae se tausaga mulimuli ane, maʻeu se tala fiafia mo Alexandra ina ua faalogo atu ua avea le fafine lea ua oti lana tane ma Molimau Kerisiano a Ieova ua papatisoina, faatasi ma le faamoemoe o le a toe vaai i le toe faatūina mai o lana tane!—Ioane 5:28, 29.

Na talanoa atu se fafine Kerisiano ua matua iā Renata i luga o se nofoaafi na faimalaga mai Pale e agaʻi atu i Limoges, i le ogatotonu o Falani. I lana lava gagana Polani, na suʻesuʻeina ai e Renata le mataupu tau i lotu, ae i le gagana Eperu ma le gagana Eleni mo le lima tausaga, peitaʻi ua mou atu lona faatuatua. I le tolu masina muamua atu, sa tatalo ai o ia i le Atua. E ui lava sa lē fiafia moni o ia i le mea na talanoa atu ai le tuafafine matua, ma sa leʻi iai sona manatu o le a la toe feiloaʻi, ae na tuu atu e Renata i le tuafafine le numera o lana telefoni. O lea, sa finafinau pea le tuafafine ma faamautinoa o le a iai se asiasiga e alu atu iā Renata i se taimi mulimuli ane. Ina ua ō atu se ulugalii Molimau e asiasi iā Renata, sa manatu o ia e faapea, ‘Po o le ā se mea o le a la aʻoaʻo mai iā te aʻu?’ E ui lava i aʻoaʻoga na aʻoaʻoina ai o ia i le aʻoga faalelotu, ae sa taaʻina ma le lotomaulalo Renata e upu moni o le Tusi Paia. Ua ia faamatala mai e faapea: “Sa ou iloa lava i lenā taimi o le upu moni lea.” I le taimi nei, ua fiafia o ia e tufa atu le feʻau o le Tusi Paia i isi.

Sa faia ni lesona avetaavale a Michèle. O isi tagata sa latou aʻoʻoga faatasi, sa amata ona talatalanoa e uiga i feusuaʻiga faaleituaiga a o leʻi faaipoipoina. Sa taʻu atu e Michèle lona lē fiafia. I le tasi le vaiaso mulimuli ane, sa fesili atu ai le faiaʻoga o Sylvie iā te ia: “O oe o se Molimau a Ieova?” Sa faafiafiaina ia Sylvie i manatu e faavae mai le Tusi Paia o Michèle. Na amataina se suʻesuʻega faale-Tusi Paia, ma i le tasi le tausaga mulimuli ane, na papatisoina ai Sylvie.

O le anoanoaʻi o paka ma togālaau i Pale, ua maua ai foʻi se avanoa matagofie mo le faia ai o ni  talanoaga ma tagata. I le faaaogāina o le taimi o le mālōlōga, na alu atu ai Josette i le paka lea na savalivali ai le tamaʻitaʻi matua o Aline. Sa faamatala atu e Josette ia folafolaga ofoofogia o loo maua i le Tusi Paia. Na fuafuaina le faia o se suʻesuʻega faale-Tusi Paia, ma sa leʻi umi lava ae agaʻigaʻi i luma Aline seʻia oo ina papatisoina o ia. I le taimi nei, ua 74 tausaga o Aline, ma ua matuā fuatele mai le avea ai o ia o se faifeʻau paeonia sauatoa, o loo fiafia e tufa atu le upu moni faa-Kerisiano i isi.

Malamalama mo Atunuu Uma

O Molimau i Pale, e lē manaʻomia ona faimalaga mamao atu i se isi atunuu ina ia olioli ai i le anoanoaʻi o aganuu mananaia eseese e tele. E toetoe lava o le 20 pasene o le faitau aofaʻi o tagata e mai i isi atunuu. O loo iai ia faapotopotoga ma vaega Kerisiano e 25, e tautatala i isi gagana.

O le talisapaia o le faaaogāina lelei o le taimi, faatasi ma le tomai, e masani ona maua ai iʻuga lelei i lenei tofiga faapitoa faaevagelia. Sa atiina aʻe e se Molimau Filipaina sana ia lava oganuu faapitoa. A o fai ana faatauga, sa mafai ona ia amataina ni suʻesuʻega faale-Tusi Paia se tele e ala i le faamaʻiteina o ni talanoaga ma isi tagata Filipaina i faleoloa.

E tauia le tausolomua ona talaʻi atu. Iā Tesema 1996, i le iloa e faapea o le a oo mai i le taulaga ia se ʻaufaafiafia lauiloa i le lalolagi, na fuafua ai e se faapotopotoga e tautatala i se isi gagana ina ia taumafai e faafeiloaʻi ia le ʻaufaafiafia. I se tasi afiafi ina ua uma le faafiafiaga, sa mafai ona latou talanoa atu i le ʻaufaafiafia a o foʻi atu i le faletalimalo sa nonofo ai. O lenei taumafaiga na iʻu ai i le ofoina atu o Tusi Paia e 28, o tusi e 59, o polosiua e 131, ma mekasini e 290 faale-Tusi Paia. I le iʻuga o le tolu vaiaso lea na nonofo ai le ʻaufaafiafia, na fesili atu ai se tasi o tagata faafiafia: “E mafai faapefea ona avea aʻu o se tasi o Molimau a Ieova?” Na folafola mai e le isi: “O le a ou talaʻi i loʻu lava atunuu!”

Le Oloa o Loo Natia e Manaʻomia Ona Saʻilia

I so o se mea lava e latou te tilotilo i ai, e iloa ai e tagata asiasi atu i Pale le tāua ma le matagofie o fausaga mai taimi ua mavae. Ae peitaʻi, e tele lava mea matagofie o loo iai e manaʻomia ona saʻilia mai. Na ō atu Aniza i Falani faatasi ma le tane a le tuafafine o lona tamā, o se sui aloaʻia o se isi atunuu. E masani ona ia faitauina e lē aunoa le Tusi Paia i le aiga. I se tasi aso a o ia tuua faanatinati le fale, na avatu ai e se paeonia iā te ia le sāvali, Le Pogai e Mafai ona E Faatuatua i le Tusi Paia. Na faia se fuafuaga mo le isi vaiaso na sosoo ai, ma na amataina ai se suʻesuʻega faale-Tusi Paia. Sa tele teteega na fetaiaʻi ma Aniza mai lona aiga. Sa agaʻigaʻi o ia i luma i lana suʻesuʻega ma oo ina papatiso. Ua faapefea ona ia vaai i le avanoa ua ia maua e tufa atu ai le upu moni i isi? “I le taimi muamua, sa faafaigatā le galuega talaʻi talu ai loʻu matamuli. Ae ina ua ou faitauina le Tusi Paia, sa faamalosia ai aʻu. E lē mafai ona toʻafilemu loʻu mafaufau pe a ou lē talaʻi.” O le uiga lenā ua iai i le toʻatele o Molimau i Pale, o ē o loo “tele mea e fai i le galuega a le Alii.”—1 Korinito 15:58, NW.

E susulu atu foʻi upu moni o le Tusi Paia i nofoaga o faugafale i nuu i tua o Pale, ma maua ai isi “maa tāua.” Ma le manatu e fia nonō mai ni kaseti ua uma ona puʻeina, na alu atu ai Bruce e asiasi i lana uō, o lē na seʻi faatoʻā avea lava o se tasi o Molimau a Ieova. I le mauaina atu o lana uō o talanoa i le Tusi Paia ma ē e masani ma Bruce, sa faalogologo ai loa i ai Bruce i le talanoaga. Sa ia talia le ofo e faia sana suʻesuʻega faale-Tusi Paia, ae sa iai ni faafitauli. “Sa lauiloa lelei lava aʻu i lea vaipanoa. O loʻu uso matua sa masani ona aafia i misa, ma o aʻu sa faamaopoopoina ni patī ma siva malomaloā. O le a faapefea ona talia e nisi le mea moni e faapea, o le a avea aʻu ma Molimau?” E ui i uunaʻiga malolosi iā Bruce ina ia faamaopoopo ni patī, ae sa leʻi toe faia e Bruce lenā gaoioiga. I le tasi le masina mulimuli ane, ae amata loa ona ia talaʻi: “Sa fia iloa e tagata uma i lea vaipanoa pe aiseā ua avea ai aʻu ma se tasi o Molimau.” E leʻi umi lava se taimi mulimuli ane, ae papatisoina loa o ia. Mulimuli ane, sa ia maua ai le avanoa e auai atu ai i le Aʻoga mo Toleniga i le Faiva.

O le saʻilia o oloa e manaʻomia ai ni taumafaiga malolosi. Ae e maʻeu le olioli pe a fua mai ni iʻuga lelei o le galuega! O Jacky, o Bruno, ma Damien, o ni alii faifalaoa i Pale. “Sa lē mafai ona faafesootaʻia i matou ona e matou te galulue i taimi uma lava ma e lē maua lava i matou i le fale,” o le faamatalaga lea a Jacky. Sa iloa e Patrick, o se paeonia sauatoa, e iai ni nai potu laiti i luga o se fale, ma sa ia manatu e faapea, atonu e iai lava se potu o aināina e se isi. O ana taumafaiga maumauaʻi ina ia oo atu i le tagata o nofo i lenā potu, na maua ai se iʻuga lelei ina ua oo i le tasi aoauli, na iʻu ina ia feiloaʻi atu ai iā Jacky, o  lē sa nofo ai i inā mo sina taimi lē tumau. O le ā le iʻuga? Na avea le uō lea e toʻatolu ma Molimau ma na maua nisi a latou galuega sa mafai ai ona latou faia se sao atoatoa i le galuega faatiokarate.

Faatoʻafilemuina o Taimi Fesouaʻiina

Talu ai nei, sa faamatalaina ai i nisi o nusipepa, televise, ma leitiō i Falani ia Molimau a Ieova e faapea o se lotu mataʻutia. I le 1996, na faia ai ma le loto atoa e Molimau se sao i le ofoina atu o le silia ma le iva miliona kopi o le sāvali o loo iai ia faamatalaga faapitoa o loo faaulutalaina, Jehovah’s Witnesses—What You Need to Know. (Molimau a Ieova—Mea e Manaʻomia Ona E Iloaina) Sa matuā lelei iʻuga na oo i ai.

Na faia se taumafaiga faapitoa ina ia oo atu i tagata uma. E toʻatele tagata maualuluga na faaalia lo latou lotofaafetai i Molimau. Na tusi mai se tasi o faufautua a le malo e faapea: “E matuā lelei le gaoioiga ua faia e Molimau a Ieova i le ofoina atu o lenei sāvali. Ua mafai ona faasaʻoina ai manatu sesē.” Na faapea mai se fomaʻi: “O le sāvali lenei ua leva lava ona ou faatalitali i ai!” Na tusi mai se tasi tagata mai le vaipanoa o Pale e faapea: “Na teʻi lava ua ou faitauina le sāvali, Jehovah’s Witnesses—What You Need to Know. Ou te fia iloa atili ma faaaogā le avanoa lea ua ofo mai e faia ai se suʻesuʻega faale-Tusi Paia i le aiga e aunoa ma se totogi.” Na tusi mai foʻi se tasi tagata e faapea: “Faafetai ona o lo outou faaali mai o nei mea i lumamea.” Na taʻu atu e se tamaʻitaʻi Katoliko i se Molimau e faapea: “Taʻi lelei! Ua iʻu lava ina outou tali mai i nei pepelo!”

Sa olioli faapitoa lava le toʻatele o Molimau talavou i Pale i le tauiviga lea na faia i le 1997 e molimau atu ai i Aso o Tupulaga Talavou a le Katoliko i le Lalolagi. E ui lava i le matuā vevela, lea e sili atu i le 95 tikeri Fahrenheit [35° C], ae e tusa ma le 2,500 Molimau na auai. I na o ni nai aso lava, ae na latou ofoina atu kopi e 18,000 o le polosiua, A Book for All People, i talavou i vaega uma o le lalolagi. E lē gata ina avatu ai se molimau lelei i le suafa o Ieova ma lūlūina ai fatu o le upu moni, ae o se tauiviga na uunaʻia malosi ai Molimau talavou. O se tuafafine talavou o lē na faapuupuu aso o lana faigāmālōlōga ona o le manaʻo ia auai atoatoa i lenei tauiviga faapitoa, na ia tusi mai e faapea: “Ua iai tagata fiafia o Ieova i le lalolagi, o ē e faaaogā lo latou malosi e viia ai lona suafa. O nei aso e lua, na matuā faatumuina i mea aogā ma iʻuga lelei, sa matuā aogā moni lava i lo o aso mālōlō uma e faia i loʻu olaga! (Salamo 84:10)”

O Fepuari 28, 1998, na faailogaina ai le 65 tausaga o le poloaʻiga na faia e Hitila lea na iʻu ai i le faasāina o Molimau a Ieova i Siamani. Na faaaogā e Molimau i Falani lenā aso e faaali ai i le lautele i fale na totogiina le vitiō Jehovah’s Witnesses Stand Firm Against Nazi Assault, lea o loo auʻiliʻili mai ai sauāga na pagatia ai tagata o Ieova. E sili atu i le fitu miliona tusi valaaulia na tufaina atu. Na faamatalaina e le ʻautusitala o le talafaasolopito ma isi na iai muamua i le falepuipui ia ni molimau na faagaeeina ai. I le vaipanoa o Pale, na toeitiiti lava 5,000 na auai, e aofia ai ma se faitau aofaʻi mataʻiina o i latou e lē o ni Molimau.

E toʻatele tagata i Pale e matuā talisapaia le malamalama faaleagaga, ma ua fiafia i latou ona o le pupula malosi atu o le ʻautalaʻi o le Malo e pei o mea e faamalamalama aʻi. E pei lava ona faalauiloa mai e Iesu: “E tele le saito e seleseleina, a o le au fai galuega e toaitiiti ia.” (Mataio 9:37) O le agaga finafinau o Molimau a Ieova i le manumalo i lenei luʻi o le talaʻiga i le aai, ua avea ai Pale ma Aai o le Malamalama i se uiga faapitoa, mo le viiga o Ieova.

[Ata i le itulau 9]

City Hall

[Ata i le itulau 9]

Opera Garnier

[Ata i le itulau 9]

Falemataaga i Louvre

[Ata i le itulau 10]

Tufaina atu o le feʻau a le Tusi Paia i tagata pisi i so o se mea e maua i ai i latou