Ia Lotofaafetai ma Ia Fiafia

NA FAAMATALAINA i se nusipepa a Kanata o le Calgary Herald e faapea: “O le tali atu o le lotofaafetai, o se mea masani lea i le olaga faaletagata.” Na taʻua i le Herald nisi o tamaiti aʻoga i aʻoga amata e taʻi iva tausaga le matutua, o ē na fesiligia e o latou faiaʻoga ina ia tusi mai ni faamatalaga e uiga i mea uma ua latou faaalia ai le lotofaafetai. Na faapea mai se tasi tamaitiiti, sa lotofaafetai o ia i lona aiga ‘ona sa latou tausia o ia.’ Sa lotofaafetai foʻi se teine talavou i lona aiga, i le faapea mai: “Latou te puipuimalu iā te aʻu, ou te mālōlōina lelei, latou te tausia aʻu, e alolofa iā te aʻu, fafaga iā te aʻu, ma ana lē seanoa oʻu mātua, semanū ou te lē ola mai i lenei lalolagi.”

O le lē lotofaafetai e iʻu ai i le matuā leai o se faamalieina. E tusa ma le manatu o se faifilosofia faalelotu o J. I. Packer e faapea, “na faia i tatou ina ia ola e faalagolago atu i le Atua ma o tagata foʻi, ia felagolagomaʻi.” O lenei mea, ua faamanatu mai ai iā i tatou le fautuaga atamai a le Tusi Paia na faia i le tele o senituri ua mavae, ua faapea mai: “Ia outou saga faafetai.” (Kolose 3:15) O upu faafetai ma le lotofaafetai agaʻi i isi, ua fesoasoani lea i le atiina aʻe o ni faiā e manatu ai le tasi i le isi.

E lē gata i lea, o le faaalia o le lotofaafetai ma le faatāuaina e le tasi o le isi, ua tatou faaalia atu ai foʻi lo tatou lava lotofaafetai iā Ieova, ma o loo ia silafiaina lenei mea. Ua faapea mai le Tusi Paia: “O fofoga o Ieova e fetaufetuliai i le lalolagi uma, na te fesoasoani ia te i latou o e ua sao o latou loto ia te ia.” (2 Nofoaiga a Tupu 16:9) Ua faamautinoa mai e le Atua iā i tatou, e na te lē faagalogaloina ē e pele iā te ia ma le alofa ua faaalia e tagata i lona suafa. (Eperu 6:10) Ioe, e iai māfuaaga lelei e faaali atu ai lo tatou lava lotofaafetai, auā pe a faaalia i aso faisoo lenei uiga lelei faale-Atua, e faafiafiaina ai le finagalo o Ieova ma maua ai foʻi e i tatou le fiafia. E pei ona fai mai le Faataoto 15:13 e faapea: “O le loto fiafia e tupu ai mata fiafia.”