Le Auala e Mafai Ona E Faia ai Filifiliga Atamai

O LE saʻolotoga e faia ai filifiliga o se meaalofa mai le Atua. Pe ana leai, semanū e pei i tatou o masini ua faapolokalameina, ma aunoa ai ma se malosi e tatou te puleaina ai a tatou lava gaoioiga. Ae peitaʻi, o le iai o le saʻolotoga e faia ai filifiliga, e oo ai foʻi ina tatou fesagaʻi ma ni luʻi. Ona o le mauaina o lea saʻolotoga, e tatau ai ona tatou faia ni filifiliga a o faagasolo le olaga.

O le mea moni, e tele filifiliga e faalētāua tele. O isi filifiliga e pei o le ituaiga o galuega e filifilia, pe e ao ona faaipoipo, e mafai ona aafia ai lo tatou lumanaʻi atoa. Ae o loo iai foʻi filifiliga e aafia ai isi tagata. O nisi filifiliga o loo faia e mātua e iai ni āuga loloto i a latou fanau. E lē gata i lea, e tatau ona tatou tali atu i le Atua mo le tele o filifiliga o loo tatou faia.—Roma 14:12.

Le Manaʻoga mo se Fesoasoani

E lē o iai se talaaga lelei o tagata i le itu lea tau i le faia o filifiliga. O se tasi o uluaʻi filifiliga ua faamaumauina na faia e le tagata na matuā iʻu leaga lava. Na filifilia e Eva le ʻaina o le fua o le laau sa matuā faasāina e le Atua. O lana filifiliga, e faavae aʻe i se faanaunauga manatu faapito, na iʻu ina aufaatasi ane ai ma lana tane i le lē usiusitai atu i le Atua, ma ua matuā pagatia ai lava le fanau a tagata ona o lea filifiliga. I le tele o tulaga, o loo mafuli lava ina faavae e tagata a latou filifiliga i faanaunauga manatu faapito na i lo le faavae i mataupu silisili tonu. (Kenese 3:6-19; Ieremia 17:9) Ma pe a tatou fesagaʻia filifiliga e sili ona tāua, e masani lava ona tatou nofouta i tulaga e gata mai ai so tatou tomai.

E lētioa lava la pe a faia e tagata a latou filifiliga tāua, e toʻatele i latou e saʻili atu mo se fesoasoani mai ni puna e maualuluga atu na i lo tagata. O loo faamauina e le Tusi Paia le taimi na tatau ai ona faia e Nepukanesa se filifiliga, a o vevela se taua. E ui o ia o se tupu, ae sa ia lagona le manaʻoga ina ia ‘faia togafiti faataulāitu,’ ia saʻili atu i agaga. O lea ua taʻua ai e le faamatalaga: “Na ia luluina ana u fanafana, na ia fesili atu i tupua, na ia iloilo i le ate.” (Esekielu 21:21) Ua faapena foʻi i aso nei, o le toʻatele o tagata ua saʻili atu i aitu vavalo ma ē o loo saʻili i fetu, ma isi auala ina ia maua ai se fesoasoani mai agaga. Peitaʻi o nei puna o faamatalaga ua faasesēina ma taʻitaʻisesēina ai.—Levitiko 19:31.

E iai Lē ua atoatoa ona maufaatuatuaina ma i le faagasologa mai o le talafaasolopito, ua faamaonia ai le fesoasoani mai o ia i tagata ina ia faia filifiliga atamai. Ma e leai lava se tasi na i lo o Ieova le Atua. Mo se faaaʻoaʻoga, i taimi anamua, na tauaao atu ai e le Atua i lona nuu, o Isaraelu, le Urima ma le Tumema—e foliga mai, o ni mea paia sa faaaogāina pe a fesagaʻi le nuu ma tulaga e sili ona tāua. O le Urima ma le Tumema, sa faaauala mai ai tali tuusaʻo a Ieova i fesili ma fesoasoani atu ai i toeaina o Isaraelu ina ia latou mautinoa sa ōgatusa a latou filifiliga ma lona finagalo.—Esoto 28:30; Levitiko 8:8; Numera 27:21.

Seʻi manatu i se isi faaaʻoaʻoga. Ina ua tāpā Kitiona e na te taʻitaʻia ʻautau a Isaraelu i se taua ma Mitiana, sa tatau ona ia faia se filifiliga pe ao ona ia talia sea faaeaga maualuga. I le fia faamautinoa e Kitiona pe o le a lagolagoina o ia e Ieova, na ia talosaga atu ai mo se faailoga faavavega. Sa  ia tatalo ina ia faasūsū i le sau le fulufulu mamoe o le a tuu i fafo i le pō, ae ia mātūtū pea le laueleele uma. I le pō na sosoo ai, na ia talosaga atu ai ina ia mātūtū le fulufulu mamoe ae ia matuā susū le laueleele i le sau. Na foaʻi mai ma le agalelei e Ieova iā Kitiona faailoga sa ia faatalosagaina. O le iʻuga, na faia ai e Kitiona le filifiliga tonu, ma o le lagolagosua tauatua, na matuā faatoʻilaloina ai fili o Isaraelu.—Faamasino 6:33-40; 7:21, 22.

Ae Faapefea Aso Nei?

I aso nei, o loo ofoina mai pea e Ieova le fesoasoani i ana auauna pe a latou fesagaʻi ma ni filifiliga tāua. E faapefea? Pe tatau ea ona pei i tatou o Kitiona, e tatou te ole atu mo ni ‘tofotofoga o fulufulu mamoe,’ ni faailoga mai iā Ieova e faaali ai iā i tatou le filifiliga tonu e ao ona fai? Na tau manatu se tasi ulugalii pe tatau ona la ō atu e auauna i se vaipanoa sa telē ai le manaʻoga mo ni tagata talaʻi o le Malo. Ina ia fesoasoani i le la filifiliga, sa la faatulaga ai se tofotofoga. Na la faasalalauina le faatau atu o le la fale i se tau patino. Pe afai e taulia le fale i le aso patino ua faatulaga, ma ia faatau foʻi i le tau na faatulaga ai pe sili atu foʻi, o le a la iloa ai o le finagalo lea o le Atua ina ia la ō ese atu. Afai e lē taulia le fale, ona la manatu lea sa leʻi finagalo le Atua e la te ō ese atu.

Sa leʻi taulia le fale. Po o se faailoga ea lenā o le lē finagalo o Ieova e auauna atu lenei ulugalii i le vaipanoa sa telē ai le manaʻomia? O le mea moni, o se faamaualuga le taʻua ma le mautinoa o ni mea e faia pe lē faia foʻi e Ieova mo ana auauna. E lē mafai ona tatou faapea atu, e lē o toe faalaa mai lava Ieova i aso nei, ina ia faailoa mai lona finagalo mo i tatou. (Isaia 59:1) Ae peitaʻi, e lē o iai sa tatou aiā e faatalitalia ai lenā faalaa mai i a tatou filifiliga tāua, ma faapea ai e lafo atu le faiga o a tatou filifiliga i le Atua. Ioe, e oo lava iā Kitiona o le tele o taimi o lona olaga sa ia faia ai ni filifiliga e aunoa ma ni faailoga faavavega mai iā Ieova!

Peitaʻi, o loo taʻua e le Tusi Paia le avanoa mai pea o taʻiala tauatua. O loo vavalo mai e faatatau i o tatou taimi: “E faalogo foi o outou taliga i le upu i o outou tua, pe a outou afe ane i le itu taumatau pe afe ane i le itu tauagavale, e faapea mai, O le ala lava lenei, ia outou savavali ai.” (Isaia 30:21) Pe afai tatou te fesagaʻi ma filifiliga tāua, ua matuā talafeagai lelei lava ona saʻili atu ina ia faamautinoa o loo ōgatusa a tatou filifiliga ma le finagalo o le Atua, ma e faaatagia mai ai lona atamai silisili. E faapefea? E ala i le saʻili atu i lana Afioga ma ia avea ‘ma sulu i o tatou vae, ma le malamalama i o tatou ala.’ (Salamo 119:105; Faataoto 2:1-6) Ina ia faia lenei mea, e manaʻomia ona tatou ati aʻe le masaniga o le faagoto ifo i o tatou loto o le poto saʻo mai le Tusi Paia. (Kolose 1:9, 10) Ma pe a fesagaʻi ma le faia o se filifiliga, e manaʻomia ona tatou matuā suʻesuʻe ma le faaeteete i mataupu silisili uma o le Tusi Paia o loo talanoaina ai lea mataupu. O lenā suʻesuʻega o le a mafai ai ona tatou “faamautinoa i mea e sili ona tāua.”—Filipi 1:9, 10, NW.

E tatau foʻi ona tatou talanoa atu iā Ieova e ala i le tatalo, i le mautinoa o le a faafofoga mai o ia iā i tatou. Maʻeu se faamāfanafanaloto pe a faamatala atu i lo tatou Atua alofa le filifiliga e ao ona tatou faia, atoa foʻi ma ni filifiliga o loo tatou mafaufauina e ono toe suia i ai! Ona mafai ai lea ona tatou ole atu ma le mautinoa mo se taʻitaʻiga i le faia o le filifiliga tonu. I le tele o taimi, e faamanatu mai e le agaga paia iā i tatou mataupu silisili o le Tusi Paia e talafeagai, pe fesoasoani mai foʻi ina ia atili ai ona tatou malamalama i se mau e fesootaʻi mai i lo tatou tulaga.—Iakopo 1:5, 6.

 Ua saunia mai foʻi e Ieova tagata taʻumatuaina i le faapotopotoga, o ē e mafai ona tatou talanoaina faatasi a tatou filifiliga. (Efeso 4:11, 12) Peitaʻi, i le talanoa atu i isi, e lē tatau ona tatou faia le mea o loo fai e isi o le talanoa solo atu i lea tagata ma lea tagata seʻiloga lava e maua se tasi o le a faia mai se manatu o loo latou fia faalogo atu i ai. Ona latou mulimuli atu loa lea i lenā fautuaga. Ia tatou manatua foʻi le faaaʻoaʻoga leaga a Reopoamo. Ina ua fesagaʻi o ia ma se filifiliga tāua, sa ia maua se fautuaga sili ona lelei mai tane matutua o ē na auauna faatasi ma lona tamā. Ae peitaʻi, na i lo o le usitaia o la latou fautuaga, sa ia toe saʻili atu i tauleleʻa o ē na latou ola aʻe faatasi. I lona mulimuli atu i fautuaga a tauleleʻa, sa ia faia ai se filifiliga na sili ona leaga, ma o le iʻuga na maʻimau atu ai se vaega tele o lona malo.—1 Tupu 12:1-17.

A o saʻili atu mo ni fautuaga, ia saʻili iā i latou o loo iai le utaga poto i le olaga, o loo iai se malamalamaga lelei i le Tusi Paia ma ua manatu mamafa i mataupu silisili tonu. (Faataoto 1:5; 11:14; 13:20) Pe a talafeagai, ia faaalu se taimi e mafaufau loloto ai i mataupu silisili o loo aofia ai, faapea faamatalaga uma sa e suʻesuʻeina. A o amata ona e malamalama i mataupu e tusa ai o le faamalamalamaga a le Afioga a Ieova, o le a atili mautinoa ai le filifiliga tonu e ao ona e faia.—Filipi 4:6, 7.

O Filifiliga Tatou te Faia

O nisi filifiliga e faigofie lava ona fai. Ina ua poloaʻia le ʻauaposetolo ina ia aua neʻi toe molimau atu, sa latou iloa e tatau ona latou talaʻi atu pea e uiga iā Iesu, ma na latou faailoa atu loa i le ʻau Saniterini la latou filifiliga ina ia usiusitai i le Atua na i lo tagata. (Galuega 5:28, 29) O isi filifiliga atonu e tele ni manatunatuga e manaʻomia ai ona e lē o iai se faamatalaga tuusaʻo a le Tusi Paia o patino atu i lenā mataupu. Peitaʻi, e iai mataupu silisili o le Tusi Paia e masani lava ona faamalamalama mai ai le filifiliga e sili ona lelei e tatau ona fai. Mo se faaaʻoaʻoga, e ui o le tele o ituaiga o faafiafiaga ua iai i aso nei, sa leʻi iai i taimi o Iesu, ae o loo iai faamatalaga manino a le Tusi Paia e faatatau i mea e fiafia i ai le finagalo o Ieova ma mea e lē fiafia i ai o ia. O lea, so o se Kerisiano e soona faananau ma aafia i faafiafiaga o loo faasilisilia ai faiga sauā, o amioga lē mamā, po o uiga fouvale, o lona uiga ua ia faia se filifiliga leaga.—Salamo 97:10; Ioane 3:19-21; Kalatia 5:19-23; Efeso 5:3-5.

I nisi taimi, atonu e saʻo uma filifiliga e lua. O se faaeaga matagofie ma iʻu atu i faamanuiaga sili, pe a auauna i se vaipanoa o loo telē ai le manaʻomia mo se fesoasoani. Ae afai e iai se māfuaaga ua filifili ai se tagata e na te lē faia lenā auaunaga, e mafai lava ona ia faia galuega lelei i lana lava faapotopotoga. O nisi taimi, tatou te ono fesagaʻi ai ma se filifiliga o le a tatou maua ai le avanoa e faaalia ai le loloto o lo tatou tuutoina atu iā Ieova, po o le faaalia ai o le mea e sili ona tāua i o tatou olaga. O lea, ua finagalo Ieova tatou te faaaogā la tatou saʻolotoga e fai ai filifiliga e faaalia atu ai le tulaga moni o loo iai o tatou loto.

E masani ona āfaina isi tagata i a tatou filifiliga. Mo se faaaʻoaʻoga, sa olioli Kerisiano i le uluaʻi senituri ina ua faasaʻolotoina mai le tele o faasāsāga o le Tulafono. O lona uiga o lenei manatu, sa iā i latou le filifiliga pe talia pe teena foʻi meaʻai sa lē mamā e tusa ai o le Tulafono. Peitaʻi, sa faalaeiauina pea i latou ina ia manatunatu i lotofuatiaifo o isi pe a latou manatu e faatino lenei saʻolotoga. E mafai ona faatatau atu upu a Paulo i le mataupu, i le tele o filifiliga e tatou te faia: “Aua  le avea outou ma mea e tautevateva ai.” (1 Korinito 10:32) O se faanaunauga ina ia lē faia se mea e tautevateva ai isi, e mafai ona fesoasoani mai i le tele o a tatou filifiliga e fai. Aemaise ai, o le alofa i tuaoi o le poloaʻiga silisili lona lua.—Mataio 22:36, 39.

O Iʻuga o a Tatou Filifiliga

O filifiliga e faia i se lotofuatiaifo lelei ma faavae aʻe i mataupu silisili o le Tusi Paia, e mautinoa o le a iai sona iʻuga lelei e tumau. O le mea moni, atonu i le taimi nei, e ono iʻu i le faia ai o ni faataulaga totino. Ina ua taʻu atu e le ʻauaposetolo i le ʻau Saniterini la latou filifiliga e faaauau pea ona latou talaʻi atu e faatatau iā Iesu, sa sasaina i latou a o leʻi toe faasaʻolotoina mai. (Galuega 5:40) Ina ua filifilia e tauleleʻa Eperu e toʻatolu—Sataraka, Mesako ma Apeteniko—o le a latou lē ifo atu i le tupua auro a Nepukanesa, sa oo ai i se tulaga lamatia o latou ola. Sa latou nofosauni e fesagaʻi ma se tulaga e ono oo ai le oti iā i latou ona o la latou filifiliga. Peitaʻi sa latou iloa, o le a finagalo malie ma faamanuia mai le Atua iā i latou.—Tanielu 3:16-19.

Pe afai tatou te fetaiaʻi ma faigatā ina ua uma ona faia se filifiliga sa mafaufauina lelei, e lē o se māfuaaga la lenā e manatu ai loa faapea e sesē le filifiliga na faia. “O le tausaga ma le mea e tupu ai” e mafai ona matuā āfaina ai e oo lava i iʻuga o ni filifiliga sa faia mai i ni faanaunauga e sili ona lelei. (Failauga 9:11) E lē gata i lea, o nisi taimi e faatagaina ai e Ieova mala ina ia tofotofoina ai le loloto o lo tatou faamaoni. Sa tauivi Iakopo ma se agelu i le pō atoa a o ia leʻi mauaina se faamanuiaga. (Kenese 32:24-26) Atonu foʻi e tatau ona tatou tauivi ma faigatā, e tusa lava po o loo tatou faia le mea tonu. Ae peitaʻi, pe afai e ōgatusa a tatou filifiliga ma le finagalo o le Atua, e mafai ona tatou mautinoa o le a ia fesoasoani mai iā i tatou ina ia onosai, ma o le a iʻu ai i lona faamanuiaina mai o i tatou.—2 Korinito 4:7.

O lea la, pe a faia se filifiliga tāua, aua e te faalagolago i lou lava atamai. Saʻili mo ni mataupu silisili o le Tusi Paia e fesootaʻi i ai. Talanoa atu iā Ieova e tusa ai ma le mataupu. Pe afai e mafai, ia talanoa atu i ou uso Kerisiano taʻumatuaina. Ona e lototele lea. Ia faaaogā i se auala lelei lou saʻolotoga e fai ai filifiliga ua foaʻiina mai e le Atua. Ia e faia se filifiliga lelei ma faaali atu iā Ieova, o loo tonu lou loto i luma o lana silafaga.

[Ata i le itulau 28]

Saʻili atu i le Afioga a le Atua a o leʻi faia ni filifiliga tāua

[Ata i le itulau 28, 29]

Talanoa atu iā Ieova e tusa ai o filifiliga e tatau ona e faia

[Ata i le itulau 30]

E mafai ona e talanoa atu i ni Kerisiano taʻumatuaina e tusa ai o au filifiliga tāua