Na Pei i Maʻua o ni Luko—Ae ua Avea Nei ma Mamoe!

Sa ma tuaoi ma Sakina, a o ma laiti lava. O Sakina e lapoʻa ma malosi, a o aʻu ou te laʻitiiti ma paee. Na masani lava ona ma tauupu, ae i se tasi aso, sa ma tauaʻifusu ai. Sa amata mai ai lava i lenā aso, e ma te leʻi toe fetautalaaʻi lava pe faafeiloaʻi e le tasi le isi. Mulimuli ane, na ma taufai ō ese atu ai i isi vaipanoa ma lē toe iloa ai e le tasi le mea o iai le isi.

I le 1994, na amata ai ona ou suʻesuʻeina le Tusi Paia ma Molimau a Ieova, ma sa faasolosolo mālie ai lava ona suia oʻu uiga. I le fā tausaga mulimuli ane, a o ou auai i la matou aso faapitoa o fonotaga i Bujumbura, i Burundi, na ou teʻi ai ina ua ma fetaui ma Sakina. Sa ou fiafia ona na auai o ia i le fonotaga, ae sa leʻi matuā māfana sa ma feiloaʻiga. Mulimuli ane i lenā lava aso, na faigatā ona ou talitonu ina ua ou vaai atu o tutū faatasi mai o ia ma sui papatiso! Sa matuā suia foʻi ona uiga. Na lē toe avea o ia ma se tagata fia fusu lea sa masani ona ma tauupu. Maʻeu le matagofie i le vaai atu ua faailoaina mai i le lautele lona tuuina atu i le Atua e ala i le faatofuina po o le papatisoina i le vai!

Ina ua tū aʻe o ia mai le vai, sa ou faanatinati atu ma fusi o ia ma ou musumusu atu i lona taliga: “O e manatua le tele o taimi sa ta tauaʻimisa ai?” Na faapea mai o ia: “Ioe, o lea ou te manatua, ae ua mavae na aso. Ua avea nei aʻu o se tagata fou.”

Ua ma taufai fiafia uma ona o le mauaina o le upu moni o le Tusi Paia ua autasia ma ua mafai ai ona suia o ma uiga e pei o ni luko i le avea e pei o ni mamoe a le Leoleo Mamoe Sili, o Ieova le Atua. E moni lava, e suia e le upu moni o le Tusi Paia olaga o tagata.