“O le ā le Mea o Loo Tupu i Falani?”

“Saʻolotoga, le saʻolotoga pele e,” o upu ia mai le “La Marseillaise,” o le vii o le fuʻa a Falani. E aunoa ma le masalosalo, o le saʻolotoga o se mea e ao ona faatāuaina. Peitaʻi, o mea na tutupu talu ai nei i Falani ua faapogaia ai le popole faapea o saʻolotoga talafeagai, ua iai nei i se tulaga lamatia. O le māfuaaga lenā i le Aso Faraile, Novema 3, 2000, na tufatufaina atu ai e le faitau sefulu o afe o Molimau a Ieova se aofaʻiga e tusa ma le 12 miliona o kopi o le sāvali faapitoa “O le ā le Mea o Loo Tupu i Falani? Po o le a Mou Atu le Saʻolotoga?”

MO NI nai tausaga, na oo ai i Molimau a Ieova i Falani ni osofaʻiga mai tagata eseese o le malo ma vaega e tetee i vaega faalotu. Na taʻitaʻiina atu ai e lenei tulaga ia ni faigatā mo Molimau taʻitoʻatasi, mo faapotopotoga, ma i le tulaga lautele i le atunuu. Peitaʻi, iā Iuni 23, 2000, o le Conseil d’État, o le faamasinoga aupito maualuga o mea tau pulega i Falani, na avatu ai se faaiʻuga mataʻina lea na faamautūina ai taofi o loo iai a le 31 o faamasinoga maualalo i le silia ma le 1,100 o faamasinoga na faia. Na faamautūina e le faamasinoga maualuga e faapea o le tapuaʻiga o loo faia e Molimau a Ieova, e matuā ōgatusa lava ma le tulafono a Falani ma o a latou Maota o le Malo o loo iai le aiā e saʻoloto ai mai le totogiina o lafoga lea foʻi o loo tuuina atu i isi lotu.

Peitaʻi, o le faagalogaloina atoatoa o lenei faaiʻuga, na faaauau ai pea e le Matagaluega o Tupe i Falani ona teena le saʻoloto o Molimau a Ieova mai le totogiina o lafoga lea na tuuina atu e le tulafono i faalapotopotoga faalotu. Na faamalosia e le Matagaluega o Tupe le 60 pasene o le lafoga mai foaʻi tauofo o loo faia e Molimau ma a latou uō o loo auaufaatasi ma i latou i faapotopotoga e 1,500 i Falani. O lenei tagi o loo iai nei i lalo o iloiloga tau faamasinoga.

O le sini o le tauiviga faapitoa e pei ona taʻua muamua, o le faaalialia lea o lenei feteenaʻiga  ae faamatilatila lamatiaga o loo aafia ai i ia lafoga e lē talafeagai ma tulafono ua faatūina, lea e faaleagaina ai le saʻolotoga faalotu mo tagata uma. *

O se Aso Umi

I le itula e lua i le vaveao, na amata ai e nisi o Molimau i nisi o faapotopotoga ona faia le tufatufaga i fafo atu o mea e faatali ai nofoaafi ma falegaosimea, ona ō atu ai lea i malaevaalele. I le tā o le ono, ua amata ona galulue ma feoaʻi tagata i Pale. Pe tusa o le 6,000 tagata tauofo na faatulaga i vaipanoa faapitoa ina ia faafeiloaʻia tagata tausavali a o ō atu i a latou galuega. Na faamatala e se tamaʻitaʻi talavou e faapea: “E talisapaia lava la outou galuega o loo fai mo le saʻolotoga faalotu. E lē na o Molimau a Ieova o loo aofia ai.” I Marseilles, e silia ma le 350 Molimau na tufatufaina atu sāvali i nofoaga e faatali ai nofoaafi i lalo o le palapala faapea ma le aualatele. I totonu o le itula e tasi, ae faasalalau loa i le leitiō a le atunuu le tauiviga o loo faia, ma taʻu atu i lana ʻaufaalogologo e aua neʻi faateʻia i latou pe afai e faafeiloaʻia i latou e Molimau a Ieova. I Strasbourg, o le nofoaga autū o le Faamasinoga o Aiā Tatau a Tagata i Europa, na laina ai ma le onosai tagata femalagaaʻi i le nofoaga e fetaulaʻi ai femalagaaʻiga mo le mauaina o ni a latou kopi. Na fai se faamatalaga a se tagata loia e faapea, e ui e lē auai i la tatou talitonuga, ae o loo ia suʻesuʻeina la tatou tagi ma le naunau tele, talu ai o a tatou taumafaiga e tāua ma e tonu.

I le tā o le valu, e ui lava i le mamafa o timuga, ae e 507 Molimau i le aai o Grenoble i atumauga o Alp na latou tuuina atu sāvali i pusa meli i fale o aiga. Ina ua vaaia e avetaavale o taavale laiti ma nofoaafi, le mea o loo tupu, na faatutū a latou taavale ma nofoaafi ma fesili atu mo se sāvali. I le aai o Poitiers i le itu i sisifo, na taunuu mai ai tagata i le tā o le iva ia na faimalaga mai i nofoaafi ua uma ona maua a latou sāvali i nofoaga na latou feosofi mai ai. I Mulhouse, e latalata i le tuaoi o Siamani, e 40,000 kopi ua uma ona tufatufaina atu.

E oo ane i le tā o le sefulu, ua uma ona tufatufaina atu e le tele o faapotopotoga le silia ma le ʻafa o a latou sāvali. A o faagasolo le taeao, e toʻaitiiti lava nai tagata na teena le sāvali, ma na iʻu atu ai i le mauaina o ni talanoaga lelei ma tagata. I Besançon, e sili laʻitiiti lava i le 50 maila [80 kilomita] mai le tuaoi o Suisilani, na faaalia ai e se tane talavou lona fiafia i le Tusi Paia ma ia fesiligia ai le māfuaaga ua faataga ai e le Atua puapuaga. Na valaaulia e le Molimau lea alii ina ia faaauau le la talanoaga i le Maota o le Malo o loo lata ane, lea na amata ai loa i inā le suʻesuʻega faale-Tusi Paia, i le polosiua O le ā e Manaomia e le Atua Mai ia i Tatou?

I le aoauli na faaaogā ai e le toʻatele o Molimau le taimi e mālōlō ai mo taumafataga e talaʻi ai mo le tasi i le lua itula. I le aoauli atoa, na faaauau ai pea le tufatufaga o le sāvali, ma o le tele o faapotopotoga na uma i le tolu i le fā i lenā aoauli. I le aai o Reims, o nisi o tagata na suʻesuʻe pe na auaufaatasi foʻi ma Molimau a Ieova i taimi ua teʻa na faailoa mai lo latou manaʻoga e toe fia amata ona fesootaʻi ma le faapotopotoga. I Bordeaux e tolu ni suʻesuʻega faale-Tusi Paia na amataina ai. I lenā lava aai, na ulu atu ai se Molimau i se faleoloa e faatau mai se nusipepa ae ia vaaia ai se faaputuga o sāvali i luga o le laulau e fai ai faatau. O le faatauoloa, sa avea muamua ma Molimau, na ia mauaina le sāvali ma i le iloaina o lona tāua, na ia faia ai ni kopi e ofoina atu e ia lava.

I Le Havre, i Normandy, na matuā faateʻia ai se tamaʻitaʻi Porotesano na faalogologo i le leitiō  e faapea na totogiina e Molimau a Ieova ia lafoga mo a latou foaʻi tauofo. Na ia taliaina ma le naunau le sāvali ma ia faamālō atu i Molimau mo le faailoa atu ma le lototele o lo latou manatu i na ituaiga o faiga lē tonu. I le 7:20 i le afiafi, na faamatala ai e talafou i le TV i Lyons le tufatufaga o le sāvali, i le faapea mai: “I le taeao nei, sa faigofie ona ʻalo i le va o matāua na i lo le ʻalofiaina o sāvali a Molimau a Ieova.” Na faatalatalanoa e le ʻaufaasalalau ia ni Molimau se toʻalua ma faamatalaina ai māfuaaga mo le faia o le tauiviga.

O Molimau na mananaʻo e faia se sao ina ua mānava mai i a latou galuega totogi na tufatufaina atu ni sāvali i tagata tausavali ma tuuina isi i totonu o pusa meli. I taulaga e pei o Brest ma Limoges—e taʻutaʻua i ana ipu tāua e sili ona matagofie—o tagata na ō ese mai i le faletifaga i le 11:00 i le pō, o i latou na sa mulimuli lava mauaina savali i lenā aso. O sāvali na totoe na aoina ma tufatufa atu i le taeao na sosoo ai.

O Iʻuga

Na tusi se tasi o Molimau e faapea: “Na manatu o tatou fili faapea o loo latou faavaivaia i tatou. Ae o le mea moni, e tuufaafeagai ma le mea ua tupu.” I le tele o faapotopotoga, e silia ma le 75 pasene o Molimau na faia so latou sao i lenā aso, o nisi na faaalu le 10, 12, po o le 14 itula i lenei galuega. I Hem, i le itu i mātū o Falani, ina ua māeʻa le sifi pō, sa tufatufaina atu ai e se tasi o Molimau ia sāvali mai le lima i le vaveao seʻia oo i le tolu i le aoauli. I Denain e latalata ane, lea sa iai le faapotopotoga talu mai le 1906, e 75 Molimau na faaaluina le 200 itula i le tufatufaina atu o le sāvali i le Aso Faraile. O isi, e ui lava i le tulaga matutua, lē atoatoa le malosi o le tino, ma le leaga o le tau, na maumauaʻi foʻi e faia se sao. I Le Mans, mo se faataʻitaʻiga, o le toʻatolu ua silia i le 80 o latou tausaga na faaaluina le lua itula e tufaina atu ai le sāvali i pusa meli, ae o se Molimau e alu i le nofoa faataavalevale na ia tufaina atu sāvali i luma o le nofoaga e faatali ai nofoaafi. Ae maʻeu le faalaeiauina i le vaaia o le toʻatele o Molimau na lē toe talaʻi ae ua toe faia se sao i lenei galuega faapitoa!

Ma le mautinoa, o lenei tufatufaina atu o le sāvali na iʻu atu ai i se molimau tele. O tagata mai i vala eseese o le olaga, o le toʻatele lava e seāseā lava maua i o latou aiga, na mauaina se kopi o le sāvali. O le toʻatele o tagata taʻitoʻatasi na lagonaina e faapea o lenei gaoioiga na faataunuuina ai se mea e sili atu na i lo le puipuiga o manaʻoga o Molimau. O le toʻatele na vaai i ai o se puipuia o le saʻolotoga o le lotofuatiaifo ma le tapuaʻiga mo tagata uma i Falani. O le faamaoniga o lenei mea, na fesili mai tagata i le lautele mo nisi kopi o le sāvali e tuuina atu i a latou uō, o aumea, po o tauaiga.

Ioe, ua mitamita Molimau a Ieova i Falani e faalauiloa le suafa o Ieova ma puipuia manaʻoga o le Malo. (1 Peteru 3:15) O lo latou faamoemoe moni lava ina ia mafai ona latou “nonofo ma le le atuatuvale ma le filemu, i le amio Atua uma lava ma le amio matagofie” ma ia faitau afe nisi o le a aufaatasi mai i le viiaina o lo latou Tamā faalelagi, o Ieova.—1 Timoteo 2:2.

[Faamatalaga pito i lalo]