Pe e Iai se Tiapolo?

“Sa iai se taimi i le talafaasolopito o le Lotu Kerisiano lea na talitonu ai i le moni ma le malosi o le tiapolo, o Pelesepulo po o Satani, o le tupu o le leaga, e pei foʻi ona manatu i ai tagata ua faasolo ina toʻaitiiti e faatatau i le ‘Atua’ i aso nei; o le tiapolo e foliga ʻafa tagata ʻafa manu o le mea na faia e tagata Siū ma uluaʻi Kerisiano ina ia avatu ai se māfuaaga i le amioleaga lea o loo latou vaaia i lo latou siʻomaga. Mulimuli ane, na oo ina iloa e Kerisiano e faapea, o se mea e lē moni ma e lē faavaea i ni mea moni ma o lea na faifai mālie ai lava ona tuu ese atu le Tiapolo.”​—“All in the Mind​—A Farewell to God,” tusia e Ludovic Kennedy.

E PEI ona taʻua e Ludovic Kennedy, o se tusitala ma o se tagata faasalalau foʻi faapea, mo le faitau senituri e leai se tasi i Kerisinetoma na taumatea le iai moni o le Tiapolo. Ae peitaʻi, sa iai taimi na “matuā mafaufau mamafa ai [Kerisiano] e uiga i le mana o Satani ma ana temoni,” e pei ona faaupu ai e le polofesa o Norman Cohn. (Europe’s Inner Demons) O nei mafaufauga sa leʻi gata i tagata faatauvaa, e leʻi aʻoaʻoina. O le talitonuga faapea na liutino le Tiapolo i se ituaiga o manu ina ia pulea ai sauniga faalelotu e leaga ma inosia, mo se faataʻitaʻiga, “e leʻi amataina mai i faiga faaleaganuu a le toʻatele o tagata e lē iloa faitau ma tusitusi, ae i le tuufaafeagai, o le vaaiga faalelalolagi a se vaega e maualuluga ma atamamai,” o le faamatalaga lenā a le polofesa o Cohn. O lenei “vaega e maualuluga ma atamamai,”​—o loo aofia ai le vaega o faifeʻau popoto​—na tuuaʻia mo le saʻilia o faataulāitu lea na aofia atoa ai Europa mai le senituri e 15 e oo atu i le senituri e 17, lea na faapea mai, o tagata taualoa o lotu ma malo ia na faataugāina ma fasiotia le tusa ma le 50,000 o tagata na tuuaʻia faapea o faataulāitu.

E lē o se mea e ofo ai, i le toʻatele na latou teena le mea o loo latou manatu i ai, o le pulea e talitonuga faataulāitu e faatatau i le Tiapolo. E oo lava i tuā i le 1726, na faifaia ai e Daniel Defoe ia talitonuga o tagata faapea o le Tiapolo o se meaola taufaafefe e “iai ona apaʻau pei o se peʻa, e iai ona seu, e magalua lona vae, e umī lona siʻusiʻu, o lona laulaufaiva e pei o se tui, ma isi lava tulaga faapena.” Na ia faapea mai, o na manatu, e “sesē e lē moni” ua fafauina aʻe e “latou na faaauilumaina le iai o le tiapolo ma i latou na faamatalaina foliga o le tiapolo” lea na “faasesēina le lalolagi lē malamalama i se tiapolo na faia lava e i latou.”

Po o lou manatu lenā? Po o e manatu foʻi faapea o “le tiapolo o se mea moni lava na faia e le tagata ina ia tuuaʻia ai lona lava tulaga agasala”? O loo iai lenā faamatalaga i le Zondervan Pictorial Encyclopedia of the Bible, ma o le toʻatele o i latou o loo faapea mai o ni Kerisiano e manatu i ai faapena. Ua faapea mai Jeffrey Burton Russell, o tagata popoto faapitoa i mataupu faalelotu a Kerisinetoma, i se tulaga aoao tetele “ua latou tuuesea le Tiapolo ma temoni o ni talitonuga faataulāitu.”

 Peitaʻi, i nisi tagata, e matuā moni lava le Tiapolo iā i latou. E latou te mafaufau e tatau lava ona iai se ituaiga o malosi leaga e sili atu i le malosi faaletagata, o loo i tua o mea leaga o loo tutupu soo lea ua lofia ai le talafaasolopito o tagata. “O tulaga mataʻutia ua aumaia e le luasefulu senituri,” e pei ona taʻua e Russell, ua aumaia ai se tasi o māfuaaga ua “televave ai le toe tulaʻi mai o le talitonuga i le Tiapolo ina ua mavae se taimi umi na lē toe iai ai lenā talitonuga.” E tusa ai ma le faamatalaga a le tusitala o Don Lewis na faapea mai, o se vaega o tagata atamamai i aso nei o ē sa “ataata aamu” i talitonuga faataulāitu ma le matataʻu i “o latou tuaa e leʻi aʻoaʻoina” ia ua “toe oo ina taofiofi mamau e se malosi leaga e i talaatu o le malosi faaletagata.”​—Religious Superstition Through the Ages.

O le ā tonu la le tulaga o le mataupu? Po o le Tiapolo ua na o se talitonuga faataulāitu e leai se uiga? Po o ia o se tasi e tatau ona manatu mamafa i ai i lenei 21 senituri?

[Ata i le itulau 4]

E pei o lenei ata na vaneina e Gustave Doré, o talitonuga faataulāitu anamua na faaalia ai le ata o le Tiapolo e ʻafa tagata, ʻafa manu

[Faamatalaga i Ata]

The Judecca​—Lucifer/The Doré Illustrations For Dante’s Divine Comedy/Dover Publications Inc.