Ia Tumau ma le Mautinoa Atoatoa

O Tauaofiaga—O Faamautinoaga Fiafia o lo Tatou ʻAuuso

O JOSEPH F. RUTHERFORD, ua limasefulu tausaga o lona soifuaga, ma ua faalēlelei lona soifua mālōlōina talu ai na toeitiiti lava atoa le tausaga na tuuina ai o ia i le falepuipui i ni moliaga sesē, o loo auauna fiafia i le laʻuina o atopaʻu ma fesoasoani i le faasinoina o mālō i o latou potu. O loo ia tasiiina ma le malosi ia atopaʻu ma fesoasoani e faasino atu uso Kerisiano i o latou potu i faletalimalo. O uso e toʻalua o ē na latou falepuipui faatasi—o uso a Tagata Aʻoga o le Tusi Paia—o loo la tufatufaina atu i se aofia e matuā toʻatele o loo faatalitali mo ni api, ia pepa e faailoa atu ai potu e nonofo ai. Sa pisi lava mea uma seʻia oo i le tuneva o le pō. Ua matuā aafia tagata uma lava i le agaga fiafia. O le ā le mea o loo fai?

O le tausaga lea e 1919, ma ua toe faamalosia ai ia Tagata Aʻoga o le Tusi Paia (ia ua iloa i aso nei o Molimau a Ieova) mai se vaitaimi o sauāga ogaoga. Ina ia toe faamalosia lo latou ʻauuso, ua latou faia ai se tauaofiaga i Cedar Point, Ohio, i le Iunaite Setete o Amerika, mai iā Setema 1-8, 1919. I le aso mulimuli o le tauaofiaga, sa faalogologo ai ma le naunautaʻi se muaʻau e matuā toʻatele ua faafiafiaina e 7,000, a o faalaeiauina e le uso o Rutherford ia le ʻauusufono taʻitoʻatasi i upu nei: “O outou o sāvali a le Tupu o tupu ma le Alii o alii, e faalauiloa atu i tagata . . . le malo mamalu o lo tatou Alii.”

Sa faia foʻi tauaofiaga a tagata o Ieova i tuā i taimi o Isaraelu anamua. (Esoto 23:14-17; Luka 2:41-43) O na tauaofiaga sa avea o ni taimi fiafia, e fesoasoani ai iā i latou uma sa auai ina ia taulaʻi atu o latou mafaufau i le Afioga a le Atua. E faapena foʻi i tauaofiaga a Molimau a Ieova i aso nei ona faaautū atu i manaʻoga faaleagaga. I tagata lotofaamaoni o loo vaavaai mai, o na faatasiga fiafia ua aumaia ai se faamaoniga e lē mafaafitia e faapea, o loo autasia Molimau i noataga malolosi o le ʻauuso Kerisiano.

Taumafaiga Ina ia Auai

Ua iloa e Kerisiano i aso nei e faapea, o a latou tauaofiaga o vaitaimi na e faafouina ai faaleagaga ma faatonuina ai i le Afioga a le Atua. E latou te manatu i nei sauniga tetele o se auala e matuā talafeagai e fesoasoani ai iā i latou ‘ina ia tumau ma le mautinoa atoatoa i le finagalo uma o le Atua.’ (Kolose 4:12) I lea, e lagolagoina ai ma le loto atoa e Molimau nei faatasitasiga, i le faia o ni taumafaiga malolosi ina ia auai ai.

Mo nisi, o lo latou auai i na tauaofiaga e manaʻomia ai ona faaalia le faatuatua ma foʻia ai ni toʻatugā e matuā tetelē. Mo se faaaʻoaʻoga, seʻi manatu i se Molimau matua i Oseteria. E ui lava ina maua i le maʻi suka ma manaʻomia ai ona fai i aso uma ona tui o le insulin, ae sa ia faamautinoa ua auai o ia i aso uma o le tauaofiaga itumalo i lona atunuu. I Initia, i se aiga Molimau e toʻatele sa nonofo i se vaipanoa e matuā matitiva lava, na latou iloa le matuā faigatā ona auai i le tauaofiaga. Ae na fesoasoani ane se tasi o le aiga. “I le lē manaʻo e misia le tauaofiaga,” na faapea mai ai o ia, “sa ou faatau atu oʻu tautaliga auro ina ia faatupeina ai le malaga. Sa matuā aogā lenei faataulagaina, talu ai, o le aufaatasiga ma tala i mea na tutupu, sa faamalosia ai lo matou faatuatua.”

I Papua Niu Kini, o se vaega o tagata lotofiafia e leʻi papatisoina, sa maumauaʻi ina ia auai i le tauaofiaga itumalo i le laumua. Sa latou faafesootaʻi atu se tamāloa i lo latou nuu e iai sana taavale laʻu pasese ma talosaga atu iā te ia pe fia se totogi e na te momoliina atu ai i latou i le tauaofiaga. Talu ai o le aofaʻi o le tupe manaʻomia sa lē mafai ona latou maua, sa latou faia ai loa se fuafuaga e galulue i le fale o le tamāloa i le toe faafouina o lona umukuka. O lea sa mafai ai ona latou ō atu i le tauaofiaga itumalo ma maua ai aogā ona o le auai i le polokalame atoa.

 E lē o se faafitauli matuiā foʻi la i Molimau a Ieova o ē e naunau ina ia auai i tauaofiaga mamao. I le 1978, na faimalaga atu ai se sui usufono talavou mai Polani i se uila vilivae i le mamao e 750 maila [1,200 kilomita] ina ia auai i se tauaofiaga na faia i Lille, i Falani. I vaitausaga o le tau māfanafana o le 1997, na faimalaga atu ai ni Molimau se toʻalua mai Mongolia i se malaga e 750 maila [1,200 kilomita] ina ia auai i se aufaatasiga faa-Kerisiano sa faia i Irkutsk, i Rusia.

Faatinoina o le Aufaatasiga Moni a Uso

O le autasi ma le mafuta faatasi o le ʻauuso ua faaalia e Molimau i a latou tauaofiaga, na iloa lelei lava e tagata e lē faaituʻau o loo vaavaai ane. E toʻatele tagata ua matuā iloa e faapea, e lē faaituʻau tagata usufono ma e matuā mafuta vavalalata moni lava i latou o ē atonu o se taimi muamua lava lea ua feiloaʻi ai ma sea tagata.

I se tauaofiaga faava-o-atunuu talu ai nei i Ausetalia, o se tagata faasinoala mo tagata tafafao maimoa, o lē na fesoasoani atu i le ʻauusufono na asiasi mai mo se vaiaso, sa manaʻo o ia e faaumiumi atu lona aufaatasi ma i latou ina ia olioli ai i la latou aufaatasiga. I le faafiafiaina i lo latou alofa ma le autasi, sa faigatā ai ona ia talitonu i le sologalelei o la latou aufaatasiga, talu ai o le toʻatele o i latou e matuā lē masani lava le tasi i le isi. Ina ua oo i le taimi o le a ia tuua ai i latou, na ia tautala atu ai ma le leotele ina ia mafai ona latou lagona uma mai. Sa ia taʻua i latou o “uso ma tuafafine,” sa amata ona ia faafetai atu iā i latou ae sa leʻi mafai ona ia faaumaina ana upu ona sa matuā lofitūina i ona faalogona ootia ma oo ai ina maligi ona loimata.

I le 1997, na faia ai mo le uluaʻi taimi i se malae taalo telē i Sri Lanka se tauaofiaga i gagana e tolu. O le polokalame atoa, sa faia faatasi uma lava i le faa-Peretania, le faa-Sinhalese, ma le faa-Tamil. I se lalolagi o loo faateteleina ai feʻainaʻiga i le va o ituaiga i totonu lava o atunuu, sa mātaulia lelei ai lava sea aufaatasiga a ni vaega o ni gagana se tolu. Na fesili atu se leoleo o le malo i se uso: “O ai o loo faagaoioia lenei tauaofiaga—o le ʻau Sinhalese, le ʻau Tamil, po o le ʻau Peretania?” Na tali atu le uso: “E lē tasi se vaega o loo faagaoioia le tauaofiaga. O loo matou faia faatasi uma lava lenei tauaofiaga.” Sa faaalia e le leoleo se uiga e lē talitonu. Ina ua aufaatasi uma ia vaega e tolu o gagana i le tatalo faaiʻu ma faalogoina le faapea mai “Amene” i le malae atoa, na pati faatasi ai ma le leotele le ʻauusufono. Sa taufai maligi loimata o tagata uma i le aofia. Ioe, o tauaofiaga, o ni faamautinoaga fiafia ia o lo tatou ʻauuso.—Salamo 133:1. *

[Faamatalaga pito i lalo]