O le ā le Mea e Tāua Moni?

O le mauaina o se mea e sili ona tāua, e mafai ona faafiafiaina ai. Ae faamata o le ā lenā mea? Se tupe telē? Ni maatāua taugatā e lē lau maua e tagata uma? Le taʻutaʻua ma le lauiloa? O le toʻatele o tagata e latou te matuā faatāuaina nei mea. O le mauaina o na mea e mafai ona saunia ai mea e ola ai, e sili atu ona uigā ai le olaga, po o le faamalieina ai foʻi o le loto ona ua aloaʻia e tagata ma ua faataunuuina se mea. Po o tatou tauivi ea ina ia maua na mea, i le faamoemoe o le a faataunuuina ai o tatou sini ma faamoemoega mo le lumanaʻi?

O LE tulaga masani lava, e faatāua e tagata se mea e faavae i le auala e faataunuuina ai e lenā mea o latou manaʻoga po o le faamalieina ai o latou lava tuʻinanauga. E tatou te faapelepeleina mea e aumaia ai se lagona o le faamalieina i se olaga sologa lelei ma aumaia ai le faamoemoe mo se lumanaʻi saogalemu. E tāua iā i tatou mea e maua vave ai se mapusaga, toʻafilemu, pe e lauiloa ai. Ae peitaʻi, o le filifilia o se mea tautele ona o le suia o faanaunauga po o mea e fiafia i ai, o se tofā e papaʻu ma e lē faautauta. O le mea moni, o le filifilia o le mea e sili ona tāua moni, e faavae lea i mea ua tatou lagona e sili atu ona tatou manaʻomia.

O le ā le mea e sili atu ona tatou manaʻomia? E leai lava se mea e sili ona tāua e aunoa ma le mea autū lava lea e tasi—o le ola. A aunoa ma le ola, e lē mafai ona tatou i ai i inei. Na tusi le tupu o Solomona o Isaraelu anamua e faapea: “A o e ua oti, latou te le iloa se mea; . . . e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” (Failauga 9:5, 10) Afai e oo le oti iā i tatou, e faamalosia lava ona tatou tuua mea uma ua tatou maua. O lo tatou manaʻoga aupito sili lava la, o le mauaina lea o se mea e faasaoina ai o tatou ola. O le ā o le a faia lenā mea?

O le ā o le a Faasaoina o Tatou Ola?

Na taʻua e le tupu o Solomona e faapea: “Ua fai tupe ma puipuiga.” (Failauga 7:12, NW ) A lava tupe, e mafai ona tatou maua ai meaʻai ma se fale lelei. O tupe foʻi e mafai ona tatou olioli ai i le manaia o le faimalaga atu i nofoaga mamao. E mafai e tupe ona sapalaia mai mea e tatou te manaʻomia pe afai e tatou te lē o toe faigaluega ona ua avea  ma tagata matua po ua lē atoatoa foʻi le malosi. E tele aogā o le iai o tupe. Ae peitaʻi, e lē mafai e tupe ona faasaoina o tatou ola. Na apoapoaʻi atu le aposetolo o Paulo iā Timoteo e faapea: “Ia e matuā fai atu i e mauoa i lenei olaga, aua neʻi faamaualuluga i latou, aua foi le faatuatua i le oloa e faaletumau, a o le Atua.” (1 Timoteo 6:17) E lē mafai e tupe uma o lenei lalolagi ona faatau mai se ola mo i tatou.

Seʻi manatu i le mea na tupu i le tamāloa e igoa iā Hitoshi. Ona sa ola aʻe i se aiga e matitiva, sa matuā faanaunau ai lava Hitoshi ina ia avea o ia o se tagata mauʻoa. Sa faalagolago tele o ia i le malosi o le tupe, o lea na ia manatu ai e mafai foʻi ona mauaina mai le alofa ma le faamaoni o tagata e ala i tupe. Ona alu atu lea o se tasi tamāloa i le fale o Hitoshi ma fesili atu iā te ia pe na te iloa na maliu Iesu Keriso mo ia. O lenei fesili na faatupu ai le fia iloa o Hitoshi talu ai sa ia lagonaina e leai se tagata o le a oti fua mo se tagata e pei o ia. Sa auai o ia i se lauga i le lautele faale-Tusi Paia ma na faateʻia o ia i le faalogo atu i le apoapoaʻiga ina ia ‘faafaigofie le vaai.’ Na faamatala mai e le failauga e faapea, o le “faigofie” o le vaai, o le vaai mamao atu lea i le lumanaʻi ma taulaʻi atu ai i mea faaleagaga. (Luka 11:34, NW) Na i lo o le galue mamafa mo tupe, na amata ai loa e Hitoshi ona faamuamua mea faaleagaga e sili ona tāua i lona olaga.

O mea faitino foʻi, e mafai ona tatou maua ai sina toʻafilemu ma le saogalemu. O le tele o mea e tatou te maua, e mafai ona tatou mapu ai mai le popole e uiga i o tatou manaʻoga i aso faisoo. O se fale manaia i se tuaoi lelei e ono aumaia ai iā i tatou se lagona o le taulau. O laʻei mananaia ma se taavale lelei e viiviia ai i tatou e isi.

O se faamanuiaga le ‘fiafia i mea lelei i a tatou galuega uma.’ (Failauga 3:13) Ma o le iai o ni mea faasili, e mafai ai e ē pele iā i tatou ona ‘nofonofo filemu, ʻaai, feinu, ma olioli i latou.’ Ae peitaʻi, o mea faitino e vave lava ona mavae lo latou aogā. I se lapataʻiga e faatatau i le matapeʻapeʻa, na fetalai ai Iesu Keriso: “E le ola se tasi i le tele o ana mea ua ia te ia.” (Luka 12:15-21) O mea faitino, e tusa lava po o le ā le tele po o le tāua, e lē faamautinoa ai lo tatou mauaina o le ola.

Mo se faaaʻoaʻoga, o Liz, na faaipoipo i se tamāloa sa tele ni ana tupe. Ua ia faamatala mai e faapea: “Sa iai so ma fale manaia lava ma ni taavale se lua, o le tele o a ma tupe, na mafai ai ona ma olioli ai i so o se mea faitino na ofoina mai e le lalolagi . . . Ae o se mea uiga ese, sa ou popole pea lava i tupe.” Ua ia faamatala mai e faapea: “Na tele naʻuā a ma mea faitino sa ma popole i ai. E foliga mai o le tele o au tupe, o le itiiti foʻi lea o lou lagona saogalemu.”

O le fia taʻutaʻua ma le fia lauiloa e faatāua foʻi e le toʻatele o tagata auā e mafai ona viiviia ma faamamaluina ai i latou. I le lalolagi i aso nei, a taulau manuia i se galuega, e lotoleaga ai tagata. O le tuliloaina o ni taleni po o ni tomai maoaʻe, atonu e fesoasoani i le faia ai o se igoa lelei mo i tatou lava. E ono viiviia i tatou e isi, e manatu maualuga i o tatou manatu, ma naunau ina ia tatou fiafia atu iā i latou. O nei mea uma e ono faafiafiaina ma faamalieina ai. Ae peitaʻi, i le iʻuga, e mavae ese atu. Na maua e Solomona le mamalu uma ma le malosi sa mafai ona maua e se tupu, ae na ia auē ma faapea mai: ‘E lē manatua le tagata poto po o le vale . . . e faagalogaloina tagata uma lava.’ (Failauga 2:16) O le ola, e lē o le taui lea o le fia taʻutaʻua po o le fia lauiloa.

O se tagata tā faatagata e igoa iā Celo, na oo ina ia faatāuaina se mea sa sili mamao atu lona tāua na i lo o le fia taʻutaʻua. I le mauaina o se taleni, sa talia ai o ia i le aʻoga na faaleleia atili ai ona tomai. Sa leʻi pine ae viiviia lana galuega i faasalalauga ma tagata e lava le tomai i lenā matātā sa vaavaai i faatagata sa ia faia. O le tele o ana faatagata sa faaalia i aai tetele i Europa. Ua faamatala mai e Celo e faapea: “E tatau ona ou faapea atu, i se taimi, sa avea ai le tā faatagata ma mea sa sili ona tāua i loʻu olaga. Ae peitaʻi, sa oo ina ou iloa e faapea, o le faaauau pea ona faia o lenei galuega, o le taumafai moni lava lea e auauna i matai e toʻalua. (Mataio 6:24) Sa ou talitonu o le mea aupito sili ona tāua e mafai ona ou faia, o le talaʻi lea o le tala lelei o le Malo o le Atua. O lea, na ou faia ai se filifiliga totino e tuu laʻu galuega o le tā faatagata.”

 O le ā le Mea e Aupito Sili Ona Tāua?

Talu ai e leai se mea e mafai ona uigā pe tāua e aunoa ma le ola, o le ā e mafai ona tatou mauaina o le a faamaonia ai e faaauau pea ona tatou ola? O ola uma lava e puna mai iā Ieova le Atua. (Salamo 36:9) Ioe, “o ia o loo ola ai i tatou ma gaoioi ai, o loo i ai foi i tatou.” (Galuega 17:28) Ua ia foaʻi mai le ola e faavavau o se meaalofa iā i latou e alofa i ai. (Roma 6:23) O le ā e tatau ona tatou faia ina ia agavaa ai mo lenei meaalofa?

O le mauaina o le meaalofa o le ola e faavavau e faalagolago lea i le iai o sa tatou faiā vavalalata ma Ieova. O lea la, o lona finagalo malie e sili mamao atu ona tāua i lo o se isi lava mea atonu e tatou te maua. Pe a tatou maua lea finagalo malie, ua iā i tatou la le faamoemoe o le fiafiaga moni e oo i le faavavau. Ae peitaʻi, a aunoa ma le finagalo malie o le Atua, o le a tatou fesagaʻi ma le faaumatiaga e faavavau. E manino lava la, e so o se mea o le a fesoasoani iā i tatou e maua ai se faiā lelei ma Ieova e matuā tautele lava.

Le Mea e Tatau Ona Tatou Faia

O lo tatou taulau manuia, e faalagolago i lo tatou mauaina o le poto. O le puna o le poto saʻo o le Afioga a Ieova, le Tusi Paia. E na o le tusi lava lenā o loo taʻu mai ai iā i tatou le mea e tatau ona tatou faia e faafiafia ai le Atua. O le mea lea, e manaʻomia ai ona tatou suʻesuʻeina ma le faaeteete le Tusi Paia. O se taumafaiga filigā e aʻoaʻoina mea uma e mafai ona tatou iloa e uiga iā Ieova le Atua ma Iesu Keriso, e iʻu i le mauaina ai o le ‘poto e taʻitaʻia ai i le ola e faavavau.’ (Ioane 17:3) O lenā poto o se oloa tāua e faapelepele i ai!—Faataoto 2:1-5.

O le poto lea tatou te maua mai le Afioga a le Atua, ua faaauupegaina ai i tatou e faia le isi laasaga—faaalia le faatuatua iā Iesu Keriso. Ua poloaʻi Ieova e faapea, o i latou uma e ō mai iā te ia e tatau ona faia faapea e ala iā Iesu. (Ioane 14:6) O le mea moni, “e leai . . . se tasi ua i ai le ola.” (Galuega 4:12) O lo tatou faasaoina i le iʻuga e faalagolago e lē i ‘ario po o le auro . . . , a o le toto tāua o Keriso.’ (1 Peteru 1:18, 19) E tatau ona tatou faaalia lo tatou faatuatua e ala i le talitonu i aʻoaʻoga a Iesu ma mulimuli i lana faaaʻoaʻoga. (Eperu 12:1-3; 1 Peteru 2:21) Ma maʻeu le tāua o lana taulaga! O le faatatauina o aogā o lea taulaga e faalagolago i ai le lumanaʻi e faavavau o le fanau uma a tagata. Pe a faatatauina atoatoa lea taulaga mo i tatou, ona tuuina mai lea iā i tatou le meaalofa tautele moni o le ola e faavavau.—Ioane 3:16.

Na fetalai Iesu: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.” (Mataio 22:37) O le alofa iā Ieova o lona uiga “ia tatou tausi i ana poloaiga.” (1 Ioane 5:3) E manaʻomia ai i ana poloaʻiga ona tatou vavae ese mai le lalolagi, ia tausisia amioga saʻo, ma ia lagolagosua faamaoni i lona Malo. O le auala lenā e tatou te “filifili ai le ola” ae lē o le oti. (Teuteronome 30:19) Afai e tatou te ‘faalatalata atu i le Atua, ona faalatalata mai lea o ia iā te i tatou.’—Iakopo 4:8.

O le faamaoniga o le finagalo malie o le Atua, e sili mamao atu ona tāua i lo o oloa uma a le lalolagi. O tagata o loo mauaina lea faamaoniga, o i latou na e sili ona fiafia i le lalolagi! Seʻi o tatou tauivi la ina ia maua le oloa e sili ona tāua moni—le faamaoniga a Ieova. O le mea moni, seʻi o tatou teulotoina le apoapoaʻiga a le aposetolo o Paulo e faapea: “Ia e tausisi atu i le amiotonu, ma le amio Atua, ma le faatuatua, ma le alofa, ma le onosai, ma le agamalu. Ia e tau le taua lelei i la le faatuatua, tago atu ia i le ola faavavau.”—1 Timoteo 6:11, 12.

[Ata i le itulau 21]

O le ā e sili ona e faatāuaina? Tupe, mea faitino, le fia taʻutaʻua, po o se isi mea?

[Ata i le itulau 23]

E manaʻomia ona tatou suʻesuʻe ma le faaeteete le Tusi Paia