O le Faamanuia a Ieova e Faatamaoaiga ai i Tatou

“O le faamanuia a Ieova, o lea e faatamaoaiga aʻi; na te le faaopoopo i ai se tiga.”—FAATAOTO 10:22.

1, 2. Aiseā e lē fesootaʻi ai le fiafiaga ma le tamaoaiga faaletino?

UA MATUĀ aafia lava olaga o le faitau miliona o tagata i aso nei i le saʻilia o meafaitino. Ae pe o faafiafiaina ea i latou e meafaitino? Ua faapea mai le Australian Women’s Weekly: “Ou te lē manatua se isi lava taimi e pei o le taimi lenei, ua matuā mafatia ai tagata i o latou olaga.” Ua faapea mai atili: “O se tulaga e foliga mai o loo feteenaʻi. Na taʻu mai iā i matou e faapea, o loo sili ona tulaga lelei Ausetalia i le itu tau i le tamaoaiga, e leʻi iai lava se isi olaga e sili atu ona lelei na i lo le mea o loo iai nei. . . . E ui lava i lea, o loo taatele i le atunuu aoao lagona lē mautinoa. Ua tutusapau tane ma fafine i lo latou lagona e iai se mea o loo misi mai i o latou olaga, ae e lē o mafai ona latou iloa po o le ā lea mea.” Maʻeu le moni o le Tusi Paia i le faapea mai, e lē maua le fiafiaga po o le ola i mea ua tatou maua!—Failauga 5:10; Luka 12:15.

² Ua aʻoaʻoina mai e le Tusi Paia e faapea, o le fiafiaga sili e maua mai le faamanuia a le Atua. I lenei itu, ua faapea mai le Faataoto 10:22: “O le faamanuia a Ieova, o lea e faatamaoaiga aʻi; na te le faaopoopo i ai se tiga.” E masani ona iʻu i tigā le faaputuina ma le matapeʻapeʻa o ʻoa faaletino. Ua fetaui ai le lapataʻiga a le aposetolo o Paulo: “O e manao i le fia mauoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia. Auā o le manao i tupe, o le pogai  lea o mea leaga uma lava; ua mananao tele i ai nisi, ona sese ai lava lea o i latou i le faatuatua, ua tuʻia ai ua ati i latou e i latou i puapuaga e tele.”—1 Timoteo 6:9, 10, LF.

3. Aiseā ua oo ai puapuaga i auauna a le Atua?

³ I le isi itu, e oo faamanuiaga e aunoa ma se tigā iā i latou uma e “faalogo [“atu pea,” NW] i le siufofoga o Ieova.” (Teuteronome 28:2) Peitaʻi, e ono fesili mai nisi, ‘Afai e lē o faaopoopoina se tigā i le faamanuia a Ieova, aiseā la e toʻatele ai auauna a le Atua o loo mafatia?’ Ua faaalia e le Tusi Paia e faapea, ua faatagaina e le Atua le oo mai o o tatou puapuaga, peitaʻi e faapogaia moni mai lava iā Satani, o lana faiga o mea amioleaga, ma o tatou lava tulaga lē lelei atoatoa. (Kenese 6:5; Teuteronome 32:4, 5; Ioane 15:19; Iakopo 1:14, 15) O Ieova o le puna o “mea lelei uma e foaifuaina mai, atoa ma mea alofa uma e atoatoa ona lelei.” (Iakopo 1:17) O lona uiga, e lē taitai faapogaia e ana faamanuiaga ni tigā. O lea, seʻi o tatou talanoaina nisi o meaalofa e atoatoa ona lelei a le Atua.

Le Afioga a le Atua—Se Meaalofa e Lē Mafaatusalia

4. O le ā le faamanuiaga ma le meaalofa tautele ua olioli ai tagata o Ieova i nei “ona po o le iuga”?

⁴ E tusa ai o “ona po o le iuga,” ua taʻua i le valoaga a Tanielu e faapea: “E tupu tele foi le malamalama.” Peitaʻi, sa toe faamaʻoti mai le uiga o lea manatu i upu nei: “E le lagona [“malamalama,” NW] foi so latou e toatasi o e agasala; a o e popoto e lagona [malamalama] lava i latou.” (Tanielu 12:4, 10) Seʻi mafaufau i lenā mea! Ua faailoaina mai le Afioga a le Atua—aemaise lava valoaga—i se atamai tauatua e lē mafai ona malamalama i ai tagata amioleaga i lona uiga moni, e ui o loo malamalama i ai tagata o Ieova. Na tatalo le Alo o le Atua: “Ou te faafetai ia te oe loʻu Tamā e, o le Alii o le lagi ma le lalolagi, ina ua e nanā ia mea i e popoto ma e atamamai, a ua faaalia atu ia mea i tama valevale.” (Luka 10:21) Maʻeu se faamanuiaga o le mauaina o le meaalofa tautele o le Afioga tusitusia a le Atua, le Tusi Paia, ma le iai faatasi ma i latou ua foaʻi mai i ai e Ieova le malamalamaga faaleagaga!—1 Korinito 1:21, 27, 28; 2:14, 15.

5. O le ā le atamai, ma e mafai faapefea ona tatou maua?

⁵ Na semanū e leai lava so tatou malamalamaga faaleagaga pe ana leai “le poto [“atamai,” NW] mai lugā.” (Iakopo 3:17) O le atamai, o le tomai lea e faaaogā ai le poto ma le malamalama e foʻia ai faafitauli, e ʻalofia pe taofia ai le oo mai o lamatiaga, e ausia ai sini, pe saunia ai fautuaga aogā. E faapefea ona tatou maua le atamai faale-Atua? Ua taʻua e le Faataoto 2:6: “O Ieova na te foai mai le poto [“atamai,” NW]; mai lona fofoga le poto ma le faautauta.” Ioe, o le a foaʻi mai e Ieova le atamai iā i tatou pe afai tatou te maumauaʻi e tatalo atu mo le atamai, e pei foʻi ona sa ia foaʻiina i le tupu o Solomona “le loto poto [“atamai,” NW] ma le matala.” (1 Tupu 3:11, 12; Iakopo 1:5-8) Ina ia maua le atamai, e tatau foʻi ona tatou faalogo atu pea iā Ieova, e ala i le suʻesuʻeina e lē aunoa ma le faatatauina o lana Afioga.

6. Aiseā o se ala atamai ai le faatatauina o tulafono ma mataupu silisili a le Atua i o tatou olaga?

⁶ O faaaʻoaʻoga lelei o le atamai faale-Atua o loo maua lea i tulafono ma mataupu silisili o le Tusi Paia. Ua aogā nei mea iā i tatou i vala uma—faaletino, faalemafaufau, faalogona, ma le faaleagaga. Na talafeagai ai la le pese a le faisalamo: “E sao le tulafono a Ieova, e faafoisia mai ai le agaga; e faamaoni poloaiga a Ieova, e faapotoina  ai le ua faigofie. E tonu feau a Ieova, e faafiafia ai le loto; e mamā poloaiga a Ieova, e malamalama ai mata. E mamā le mataʻu ia Ieova, e tumau e faavavau; o faamasinoga foi a Ieova e moni ia ma tonu uma lava. E silisili ona lelei i le auro, o le auro e sili ona lelei e tele.”—Salamo 19:7-10; 119:72.

7. O le ā e iʻu i ai le lē amanaʻiaina o tapulaa amiotonu a le Atua?

⁷ I le isi itu, o i latou o ē ua lē amanaʻiaina tapulaa amiotonu a le Atua, e lē o mauaina le fiafiaga ma le saʻolotoga lea latou te saʻilia. I se taimi ona latou iloa lea, e lē ulagia le Atua, auā o le mea e lūlūina e le tagata, o le mea lava lea o le a selesele mai e ia. (Kalatia 6:7) E faitau miliona tagata o ē teena mataupu silisili a le Tusi Paia, o loo latou seleseleina na āuga faanoanoa e pei o ni maʻitaga sa leʻi manaʻomia, o faamaʻi inosia, po o ni masaniga ua faaleaga ai le tino ma le mafaufau. Pe afai e lē salamō ma suia o latou olaga, o le a iʻu lava ina taʻitaʻiina atu i latou e o latou ala i le oti ma atonu foʻi i le faaumatiaga a le Atua.—Mataio 7:13, 14.

8. Aiseā ua fiafia ai o ē matuā naunau i le Afioga a le Atua?

⁸ Peitaʻi ane, o i latou o ē matuā naunau i le Afioga a le Atua ma latou faatatauina, o le a oo i ai le tele o faamanuiaga i le taimi nei ma i le lumanaʻi. Ua latou lagona ma le tonu ua faasaʻolotoina i latou e le tulafono a le Atua, ua fiafia moni, ma o loo faatalitali atu ma le naunautaʻi i le taimi o le a faasaʻolotoina ai i latou mai le agasala ma ona āuga mataʻutia. (Roma 8:20, 21; Iakopo 1:25) Ua mautinoa lenei faamoemoe talu ai e faavaeina i le meaalofa e sili ona matagofie a le Atua mo le fanau a tagata—le taulaga togiola a lona Alo pele e toʻatasi, o Iesu Keriso. (Mataio 20:28; Ioane 3:16; Roma 6:23) O sea meaalofa silisili ua faamautūina ai le loloto o le alofa o le Atua mo le fanau a tagata, ma faamautinoa mai ai le lē gata mai o faamanuiaga mo tagata uma o ē faalogo atu pea iā Ieova.—Roma 8:32.

Lotofaafetai mo le Meaalofa o le Agaga Paia

9, 10. E faapefea ona tatou maua faamanuiaga mai le meaalofa a Ieova, o le agaga paia? Aumai se faaaʻoaʻoga.

⁹ O le isi meaalofa a le Atua e tatau ona tatou lotofaafetai ai, o lona agaga paia lea. I le aso o le Penetekoso 33 T.A., na augani atu ai le aposetolo o Peteru i le motu o tagata na iai i Ierusalema e faapea: “Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala; ona maua lea e outou o le mea foai fua mai, o le Agaga Paia lea.” (Galuega 2:38) I aso nei, e foaʻi mai e Ieova le agaga paia i ana auauna tuuina atu o ē o loo tatalo mo lea fesoasoani ma mananaʻo e faia lona finagalo. (Luka 11:9-13) I aso anamua, o lenei mana sili ona malosi i le vateatea aoao—le agaga paia o le Atua, po o le malosi galue—sa faamalosia ai tane ma fafine faatuatua, e aofia ai ma uluaʻi Kerisiano. (Sakaria 4:6; Galuega 4:31) E mafai foʻi ona faia lenā lava mea mo i tatou, e ui atonu tatou te fetaiaʻi ma ni toʻatugā po o ni luʻi mataʻutia i le avea ai o ni tagata o Ieova.—Ioelu 2:28, 29.

¹⁰ Seʻi manatu i le faaaʻoaʻoga a Laurel, o lē na aafia i le maʻi pipili ma ola ai mo le 37 tausaga i totonu o se masini sa faagaoioia lana mānava. * E ui i ona tulaga sili ona faigatā, ae sa auauna ma le maelega o ia i le Atua seʻia oo i lona maliu. A o faagasolo tausaga, sa oo iā Laurel faamanuiaga faaʻoaina a Ieova. Mo se faataʻitaʻiga, na mafai ona ia fesoasoani atu i le tusa ma le 17 tagata ina ia latou maua le poto saʻo o upu moni o le Tusi Paia, e ui lava sa saisaitia o ia i totonu o lana masini mo le 24 itula i aso uma lava! O lona tulaga e tatou te manatua ai upu a le aposetolo o Paulo e faapea: “Pe a ou vaivai, ona ou malosi ai lea.” (2 Korinito 12:10) Ioe, so o se taulau manuia e tatou te ono maua i le talaʻiina o le tala lelei, e lē mai i so tatou lava tomai ma se malosi, ae mai le fesoasoani a le  Atua e ala i le agaga paia, lea na te foaʻi mai iā i latou o ē faalogo atu pea i lona siʻufofoga.—Isaia 40:29-31.

11. O ā uiga ua faatupuina aʻe e le agaga o le Atua iā i latou o ē o loo ofuina le “tagata fou”?

¹¹ Pe afai tatou te faalogo atu ma le usiusitai i le Atua, e faatupuina e lona agaga iā i tatou uiga o le alofa, le olioli, le filemu, le onosai, le mataalofa, le agalelei, le faatuatua, le agamalu, ma le lē gaoiā. (Kalatia 5:22, 23, LT) O nei “fua o le Agaga” o se vaega o “le tagata fou” lea o loo ofuina e Kerisiano e suia ai so o se uiga matapeʻapeʻa ma uiga faamanu atonu sa latou uiga aʻi muamua. (Efeso 4:20-24; Isaia 11:6-9) E silisili ona tāua le alofa i nei fua, “o le fusi lea e atoatoa ona lelei ai.”—Kolose 3:14.

Alofa Faa-Kerisiano —Se Meaalofa ia Faapelepele i Ai

12. Na faapefea ona faaalia e Tapita ma isi Kerisiano o le uluaʻi senituri le alofa?

¹² O le alofa faa-Kerisiano o le isi lea meaalofa tautele mai iā Ieova—le meaalofa ua onomea ona tatou faapelepele i ai. E pulea e mataupu silisili, ae talu ai ona ua matuā faatumulia i faalogona māfana, ua sili atu ai ona māfana faiā a uso faaleagaga na i lo o ni sootaga faaletino. (Ioane 15:12, 13; 1 Peteru 1:22) Mo se faaaʻoaʻoga, seʻi manatu iā Tapita, o se fafine Kerisiano o le uluaʻi senituri. Sa “tele ana galuega lelei ma mea alofa” na ia faia, aemaise lava i mea sa ia faia mo se lelei o fafine o le faapotopotoga ua oti a latou tane. (Galuega 9:36) Atonu pe sa iai ni tauaiga o nei fafine, peitaʻi sa manaʻo Tapita na te faia ni mea sa mafai ona ia fai e fesoasoani atu ai ma faalaeiauina i latou. (1 Ioane 3:18) Maʻeu se faaaʻoaʻoga lelei na faataatia e Tapita! O le alofa faaleuso na uunaʻia ai Pisila ma Akula e “tuu atu o la ua e sui aʻi” Paulo. O le alofa foʻi na faagaeetia ai Epafara, Luka, Oneseforo, ma isi e fesoasoani atu i le aposetolo a o faafalepuipuiina o ia i Roma. (Roma 16:3, 4; 2 Timoteo 1:16; 4:11; Filemoni 23, 24) Ioe, o Kerisiano faapena i aso nei ‘o loo fealofani,’ o se meaalofa tautele mai le Atua lea e mātaulia ai i latou o ni soo moni o Iesu.—Ioane 13:34, 35.

13. E mafai faapefea ona tatou faaalia e tatou te matuā talisapaia lo tatou ʻauuso faa-Kerisiano?

¹³ Pe e te faapelepele ea i le alofa lea o loo faaalia i totonu o le faapotopotoga Kerisiano? Po o e talisapaia ea lo tatou ʻauuso faaleagaga o loo iai i le lalolagi aoao? O i latou foʻi nei o ni meaalofa mai lugā ua faamalieina ma faaʻoaina ai i tatou. E mafai faapefea ona tatou faaalia e tatou te faatāuaina nei meaalofa? E ala i le faatinoina o le auaunaga  paia i le Atua, e ala i le faia o se sao i sauniga faa-Kerisiano, ma e ala i le faaalia o le alofa ma isi fua o le agaga o le Atua.—Filipi 1:9; Eperu 10:24, 25.

O “Mea Alofa i Tagata”

14. O le ā e manaʻomia mai se Kerisiano pe afai e tatau ona auauna o se toeaina po o se auauna o le faiva?

¹⁴ O tane Kerisiano o ē faanaunau ina ia auauna atu i o latou uso tapuaʻi, i le avea o ni toeaina po o auauna o le faiva, o loo iā i latou se sini lelei. (1 Timoteo 3:1, 8) Ina ia agavaa mo nei faaeaga, e tatau i se uso ona avea o se tane faaleagaga, ua lava sona malamalama i le Tusi Paia, ma maelega i le faiva i le fanua. (Galuega 18:24; 1 Timoteo 4:15; 2 Timoteo 4:5) E tatau ona ia faaalia le lotomaulalo, le agamalu ma le onosai, auā e lē oo ni faamanuiaga tauatua i tagata e faafiapopoto, e faamaualuluga ma faasausili. (Faataoto 11:2; Eperu 6:15; 3 Ioane 9, 10) Pe afai ua faaipoipo, e tatau ona avea o ia o se ulu o se aiga o loo iai le alofa, ma e mafai ona ia taʻimua lelei i lona ʻauaiga atoa. (1 Timoteo 3:4, 5, 12) Talu ai lona faatāuaina o ʻoa faaleagaga, e maua ai e lenā tagata le manuia mai iā Ieova.—Mataio 6:19-21.

15, 16. O ai ua faamaonia le avea ma “mea alofa i tagata”? Aumai ni faaaʻoaʻoga.

¹⁵ Pe a galulue malosi i latou o loo auauna o ni toeaina i le faapotopotoga, i le avea o ni faievagelia, ni leoleomamoe, ma o ni ē e aʻoaʻo atu, e latou te aumaia ai iā i tatou māfuaaga lelei e tatou te talisapaia ai na “mea alofa i tagata.” (Efeso 4:8, 11) O i latou e maua aogā mai le auaunaga alofa a nei uso atonu e lē o taimi uma e faailoa mai ai lo latou agaga talisapaia, peitaʻi e silafia mai e Ieova mea uma o loo faia e toeaina faamaoni. O le a lē faagalogaloina e ia le alofa ua latou faaali atu i lona suafa e ala i le auauna atu i ona tagata.—1 Timoteo 5:17; Eperu 6:10.

¹⁶ Seʻi manatu i le tulaga o se toeaina galue mamafa, o lē sa asiasi atu i se teine Kerisiano o lē na sauni mo le faia o sona taotoga i lona faiʻai. Na tusi mai se uō a lea aiga: “E ese lona agalelei, e ese le lagolagosua, e ese le manatu mamafa mai. Sa ia talosaga mai mo se faatagaga na te faia ai se tatalo iā Ieova faatasi ma i matou. A o ia tatalo, sa tagi masūsū le tamā [e lē o se Molimau a Ieova] ma na maligi foʻi loimata o tagata uma sa iai i lea potu o le falemaʻi. Maʻeu le māfana o le tatalo a lenā toeaina, ma e maʻeu le alofa o Ieova i lona auina mai o lea toeaina i lenā lava taimi talafeagai!” Na faapea mai se isi Molimau sa maʻi, e uiga i toeaina na asiasi atu iā te ia: “A o latou agaʻi mai i loʻu moega i totonu o le potu tigāina (ICU), na ou iloa ai i lenā taimi, e tusa lava po o le ā se mea e ono tupu, ua mafai lava ona ou lavatia. Na oo ina ou lagona le malosi ma le toʻafilemu.” Pe mafai ea e se tasi ona ia faatau maia lenā naunau alofa? E lē taitai! O se meaalofa mai le Atua, ua faaavanoa e ala mai i le faapotopotoga Kerisiano.—Isaia 32:1, 2.

Le Meaalofa o le Faiva i le Fanua

17, 18. (a) O le ā le meaalofa o le auaunaga ua faaavanoa mai e Ieova i ona tagata uma? (e) O le ā le fesoasoani ua saunia e le Atua ina ia mafai ai ona tatou faataunuuina la tatou faiva?

¹⁷ E leai se isi mamalu e sili atu e mafai ona  faaee atu i so o se tagata na i lo le mamalu o le auauna atu iā Ieova, Lē Silisili Ona Maualuga. (Isaia 43:10; 2 Korinito 4:7; 1 Peteru 2:9) E ui i lea, o loo tatala atu le faaeaga o le auai i le faiva i le lautele, i tagata uma—o ē talavou ma ē matutua, o tane ma fafine—o ē o loo iai se faanaunauga moni e fia auauna i le Atua. Po o e faaaogāina ea lenei meaalofa tautele? Atonu e lē talaʻi nisi ona e manatu faapea e lē lava so latou tomai, peitaʻi ia manatua e foaʻi mai e Ieova le agaga paia iā i latou o loo auauna iā te ia, ma e mafai ona fesoasoani iā i tatou i so o se mea tatou te lē taulau ai.—Ieremia 1:6-8; 20:11.

¹⁸ Ua faatuatuaina mai e Ieova le galuega talaʻi o le Malo e faatino e ana auauna lotomaulalo, ae lē i ni tagata o loo mātele ina faamaualuluga ma faalagolago atu i o latou lava tomai. (1 Korinito 1:20, 26-29) O tagata e lotomaulalo ma agamalu, e latou te amanaʻia mea e gata mai ai so latou tomai, ma faalagolago atu i le fesoasoani a le Atua a o latou auai i le faiva i le fanua. E latou te talisapaia foʻi le fesoasoani faaleagaga ua ia saunia e ala mai i “le auauna e pule.”—Luka 12:42-44; Faataoto 22:4.

Le Olaga Fiafia Faaleaiga—Se Meaalofa Matagofie

19. O ā vala e mafai ona taulau manuia ai le tausia aʻe o le fanau?

¹⁹ O le faaipoipoga ma se olaga fiafia faaleaiga o ni meaalofa e mai le Atua. (Ruta 1:9; Efeso 3:14, 15) O fanau foʻi o se “tofi [tautele] lea mai ia Ieova,” e aumaia ai le olioli i mātua o ē o loo taulau manuia i le totōina o uiga faale-Atua i a latou fanau. (Salamo 127:3) Pe afai o oe o se matua, ia e faalogo atu pea i le siʻufofoga o Ieova, e ala i le toleniina o lau fanau iti e tusa o lana Afioga. O i latou o loo faia faapea, e mautinoa lo latou mauaina o le lagolagosua ma le tele o faamanuiaga mai iā Ieova.—Faataoto 3:5, 6; 22:6; Efeso 6:1-4.

20. O le ā atonu e fesoasoani i mātua o ē ua liliu ese a latou fanau mai le tapuaʻiga moni?

²⁰ E ui lava i taumafaiga faamaoni a mātua amio Atua, ae atonu e iai lava nisi o le fanau e filifili e liliu ese mai le tapuaʻiga moni ina ua latou matutua. (Kenese 26:34, 35) E mafai ona matuā mafatia faalogona o mātua i lenei mea. (Faataoto 17:21, 25) Ae peitaʻi, na i lo o le mou ese atu ai o faamoemoega uma e uiga i le toe maua mai o i latou, e mafai ona fesoasoani i mātua le manatuaina o le tala faatusa a Iesu i le atalii faamaumauʻoa. E ui na alu ese lenā atalii mai lona aiga ma ola ai i se olaga leaga, peitaʻi na mulimuli ane toe foʻi mai o ia i le fale o lona tamā, o lē na taliaina o ia ma le olioli ma le alofa. (Luka 15:11-32) Po o le ā lava le mea e tupu, ae mafai e mātua Kerisiano ona mautinoa o loo malamalama mai Ieova, e naunau alofa mai, ma e lē taitai ona mou atu lana lagolago mai.—Salamo 145:14.

21. O ai e tatau ona tatou faalogo atu i ai, ma aiseā?

²¹ O lea la, seʻi o tatou taʻitoʻatasi ma faamautinoa i le mea e tāua moni i o tatou olaga. Po o tatou saʻili atu ea ina ia tele ni a tatou meafaitino, lea atonu e aumaia ai tigā iā i tatou ma o tatou aiga? Pe o tatou tuliloaina ea ‘mea lelei e foaifuaina mai, atoa ma mea alofa e atoatoa ona lelei’ lea e maua mai “le Tamā o malamalama”? (Iakopo 1:17) E manaʻo Satani, “le tamā o le pepelo,” ina ia alu uma lo tatou taimi e galulue ai mo le tamaoaiga faaletino, ae tatou te lē maua ai le fiafiaga atoa ma le ola. (Ioane 8:44; Luka 12:15) Ae peitaʻi, o loo naunau mai Ieova mo so tatou lelei silisili. (Isaia 48:17, 18) O lea, seʻi o tatou faalogo atu pea i lo tatou Tamā alofa faalelagi, ma ia “fiafia lava” iā te ia i taimi uma. (Salamo 37:4) Pe afai tatou te uia lenā ala, o le a faatamaoaigaina i tatou i meaalofa tautele ma le anoanoaʻi o faamanuiaga a Ieova—ma e matuā aunoa ma se tigā o iai.

[Faamatalaga pito i lalo]

Pe E te Manatua?

• O fea e mafai ona maua ai le fiafiaga sili?

• O ā nisi o meaalofa ua foaʻi mai e Ieova i ona tagata?

• Aiseā ua avea ai le faiva i le fanua o se meaalofa?

• O le ā e mafai ona faia e mātua ina ia maua ai faamanuiaga a le Atua a o tausi aʻe a latou fanau?

[Fesili mo le Suʻesuʻega]

[Ata i le itulau 16]

Po o e talisapaia ea le meaalofa a le Atua o lana Afioga tusia?

[Ata i le itulau 17]

E ui lava i tulaga e sili ona faigatā, ae sa auauna pea ma le maelega Laurel Nisbet i le Atua

[Ata i le itulau 18]

I le pei o Tapita, ua lauiloa Kerisiano i aso nei i a latou gaoioiga o le alofa

[Ata i le itulau 19]

E naunau alofa toeaina Kerisiano mo o latou uso talitonu